Xana Xikwembu Xi Kona?
Nhlamulo ya Bibele
Ina, Bibele yi nyikela vumbhoni lebyi khorwisaka bya leswaku Xikwembu xi kona. Yi hi khutaza leswaku hi tshemba leswaku Xikwembu xi kona, ku nga ri ku pfumela leswi vukhongeri byi swi vulaka, kambe hi ku tirhisa ‘matimba ya hina ya ku anakanya.’ (Varhoma 12:1; 1 Yohane 5:20) Xiya tinhla leti landzelaka leti sekeriweke eBibeleni:
Ndlela leyi vuako byi hlelekeke ha yona byi kombisa leswaku ku ni Muvumbi. Bibele yi ri: “Ina, yindlu yin’wana ni yin’wana yi akiwa hi munhu, kambe loyi a akeke swilo hinkwaswo i Xikwembu.” (Vaheveru 3:4) Hambileswi mhaka leyi yi twisisekaka, vanhu vo tala lava dyondzekeke swa ha va tikela ku va va yi twisisa. a
Tanihi vanhu, hi navela ku twisisa nhlamuselo ni xikongomelo xa vutomi naswona sweswo swi tshama swi ri etimbilwini ta hina. Bibele yi vula leswaku ku navela koloko i ‘xilaveko xa hina xa moya,’ ku nga ku navela ku tiva ni ku gandzela Xikwembu. (Matewu 5:3; Nhlavutelo 4:11) Xilaveko lexi xa moya a xi nyikeli ntsena vumbhoni bya leswaku Xikwembu xi kona kambe xi tlhela xi kombisa leswaku i Muvumbi la nga ni rirhandzu loyi a lavaka leswaku hi enerisa xilaveko xexo.—Matewu 4:4.
Vuprofeta byo tala lebyi nga eBibeleni lebyi tsariweke ka ha sale madzana ya malembe, byi hetiseke hilaha a byi profetiwe hakona. Vuxokoxoko ni ku pakanisa ka byona byi tiyisekisa leswaku byi huma eka loyi a nga ni matimba.—2 Petro 1:21.
Vatsari va Bibele a va ri ni vutivi bya sayense lebyi a byi nga twisiseki hi nkarhi wolowo. Hi xikombiso, vanhu vo tala va le nkarhini wa khale a va tshemba leswaku misava yi tshegiwe hi swiharhi swo tanihi tindlopfu, tinguluve ta nhova kumbe tinkunzi. Ku hambana ni sweswo, Bibele yi vula leswaku Xikwembu “xi hayek[e] misava ehenhla ka hava.” (Yobo 26:7) Hilaha ku fanaka, Bibele yi hlamusela xivumbeko xa misava tanihi “xirhendzevutana.” (Esaya 40:22) Vanhu vo tala va tshemba leswaku rungula leri vatsari va Bibele va ri tsaleke ri huma eka Xikwembu.
Bibele yi hlamula swivutiso swo tala leswi tikaka, leswi loko munhu a nga kumi tinhlamulo leti enerisaka ta swona a nga gimetaka hi ku vula leswaku Xikwembu a xi kona. Hi xikombiso: Loko Xikwembu xi ri ni rirhandzu ni matimba hinkwawo, ha yini ku ri ni ku xaniseka ni vuhomboloki emisaveni? Ha yini vukhongeri byi hlohlotela vubihi ematshan’weni ya leswinene?—Tito 1:16.
a Hi xikombiso, mufi Allan Sandage mutivi wa swilo swa le mpfhukeni u vule leswi malunghana ni vuako: “Ndlela leyi byi hlelekeke ha yona a ndzi pfumeli leswaku byi lo tiendlekela. Ku fanele ku ri ni loyi a byi simekeke. Swa ndzi tikela ku twisisa leswaku Xikwembu i nchumu wa njhani kambe hi xona lexi endleke leswaku ku va ni swilo leswi hi swi vonaka.”
U Nga Ha Tsakela
TIVHIDIYO TA TIDYONDZO TA NKOKA LETI HUMAKA EBIBELENI
Xana Xikwembu Xi Kona?
Kambisisa vumbhoni lebyi kombisaka leswaku swa twisiseka ku pfumela ku Xikwembu xi kona.
XALAMUKA!
Xana Xikwembu Xi Kona? Xana Ku Tiva Leswaku Xi Kona Swi Ta Ku Pfuna Njhani?
Xana nhlamulo ya xivutiso lexi vanhu vo tala va vona xi nga hlamuleki kumbe xi nga ri xa nkoka?
XIHONDZO XO RINDZA
I Mani Loyi A Endleke Xikwembu
Xana ku pfumela leswaku Xikwembu i khale xi ri kona swi pfilunganya miehleketo ya vanhu?
XALAMUKA!
“Ndza Tiyiseka Leswaku Ku Ni Muvumbi”
Frédéric Dumoulin a a nga ha lavi ku twa nchumu hi swa vukhongeri naswona u sungule ku nga ha pfumeli leswaku Xikwembu xi kona. Xana ku dyondza ka yena Bibele ni ku endla ndzavisiso wa swilo leswi hanyaka swi n’wi khorwise njhani leswaku ku ni Muvumbi?
MALUNGHANA NA HINA
Kombela Ku Endzeriwa Hi Timbhoni Ta Yehovha
Kombela ku endzeriwa hi Timbhoni ta Yehovha leswaku ti ta dyondza na wena Bibele kumbe u tirhisa progreme ya hina yo dyondza Bibele.