Xana Xikwembu Xi Kumeka Kun’wana Ni Kun’wana?

TLANGA

Nhlamulo ya Bibele

Xikwembu xi kota ku vona swilo hinkwaswo naswona xi nga endla swin’wana ni swin’wana laha xi lavaka kona. (Swivuriso 15:3; Vaheveru 4:13) Kambe Bibele a yi swi dyondzisi leswaku Xikwembu xi kumeka kun’wana ni kun’wana ni le ka swilo hinkwaswo. Ku ri na sweswo, yi dyondzisa leswaku Xikwembu i munhu ni leswaku xi ni ndhawu leyi xi tshamaka eka yona.

Leswi Xikwembu xi nga swona: Xikwembu i moya. (Yohane 4:24) Vanhu a va nge swi koti ku xi vona. (Yohane 1:18) Swivono leswi tsariweke eBibeleni mikarhi hinkwayo swi kombisa leswaku Xikwembu xi ni ndhawu leyi xi tshamaka eka yona. Swivono leswi a swi si tshama swi kombisa leswaku Xikwembu xi tshama kun’wana ni kun’wana.—Esaya 6:1, 2; Nhlavutelo 4:2, 3, 8.
Ndhawu leyi Xikwembu xi tshamaka eka yona: Xikwembu xi tshama endhawini ya moya, leyi hambaneke ni swilo leswi nga vumbiwa leswi hi kotaka ku swi vona. Endhawini yoleyo, Xikwembu xi ni ‘ndhawu leyi xi tshamaka eka yona ematilweni.’ (1 Tihosi 8:30) Bibele yi boxa nkarhi lowu swivumbiwa swa moya swi nga “nghena [swi] yima emahlweni ka Yehovha,” a leswi kombisaka leswaku Yehovha u ni ndhawu yo karhi leyi a tshamaka eka yona.—Yobo 1:6.

Loko Xikwembu xi nga kumeki kun’wana ni kun’wana, xana xi nga ndzi khathalela hakunene?

Ina. Xikwembu xi khathala swinene hi un’wana ni un’wana wa hina. Hambileswi xi tshamaka etilweni, Xikwembu xi va tekela enhlokweni vanhu lava lavaka ku xi tsakisa hi timbilu ta vona hinkwato naswona xa va pfuna. (1 Tihosi 8:39; 2 Tikronika 16:9) Vona ndlela leyi Yehovha a swi kombisaka ha yona leswaku wa khathala hi lava n’wi gandzelaka:

Loko u khongela: Yehovha u kota ku twa xikhongelo xa wena hi nkarhi lowu u sungulaka ku khongela ha wona.—2 Tikronika 18:31.
Loko u karhatekile: “Yehovha u le kusuhi ni lava tshovekeke timbilu; u ponisa lava hetiweke matimba.”—Pisalema 34:18.
Loko u lava ku kongomisiwa: Hi ku tirhisa Rito rakwe ku nga Bibele, Yehovha u “ta endla leswaku u va ni ku twisisa ni ku ku dyondzisa.”—Pisalema 32:8.

Mavunwa ya leswaku Xikwembu xi kumeka kun’wana ni kun’wana

Mavunwa: Xikwembu xi kumeka eka swilo hinkwaswo leswi tumbuluxiweke.

Ntiyiso: Xikwembu a xi tshami emisaveni kumbe eka swilo leswi hi kotaka ku swi vona. (1 Tihosi 8:27) I ntiyiso leswaku tinyeleti ni swilo swin’wana leswi tumbuluxiweke i mitirho ya xona leyi “twarisa[ka] ku vangama ka Xikwembu.” (Pisalema 19:1) Kambe, Xikwembu a xi tshami eka swilo leswi xi swi vumbeke ku fana ni mudirowi loyi a nga tshamiki eka swilo leswi a swi diroweke. Nilokoswiritano, swifaniso swi nga hi byela swo karhi hi n’wini wa swona. Hilaha ku fanaka, misava ni hinkwaswo leswi hi kotaka ku swi vona swi hi byela swo karhi hi “vumunhu bya xona” byo tanihi matimba, vutlhari ni rirhandzu.—Varhoma 1:20.

Mavunwa: Leswaku Xikwembu xi kota ku tiva swilo hinkwaswo ni ku kombisa matimba ya xona lamakulu xi fanele xi kumeka kun’wana ni kun’wana.

Ntiyiso: Moya lowo kwetsima wa Xikwembu i matimba lama Xikwembu xi ma tirhisaka. Hi ku tirhisa matimba wolawo, Xikwembu xi kota ku tiva ni ku endla swilo hinkwaswo, kun’wana ni kun’wana ni hi nkarhi wun’wana ni wun’wana naswona a swi lavi leswaku xi va kona hi xiviri leswaku xi kota ku endla tano.—Pisalema 139:7.

Mavunwa: Pisalema 139:8 yi dyondzisa leswaku Xikwembu xi kumeka kun’wana ni kun’wana hikuva yi ri: “Loko a ndzo ya etilweni, u ta va u ri kona, niloko a ndzo nghena eSirheni, u ta va u ri kona.”

Ntiyiso: Tsalwa leri a ri vulavuli hi ndhawu leyi Xikwembu xi tshamaka eka yona. Hi ndlela yo phata ri dyondzisa leswaku a ku na ndhawu leyi nga le kule ngopfu ni Xikwembu lerova xi nga tsandzeka ku hi pfuna.

a Yehovha i vito ra Xikwembu hilaha swi kombisiweke hakona eBibeleni.