Ina, Xikwembu xi ta ku rivalela loko u teka magoza lama faneleke. Bibele yi vula leswaku Xikwembu xi “lunghekele ku rivalela” naswona xi ta “rivalela hi ndlela leyikulu.” (Nehemiya 9:17; Pisalema 86:5; Esaya 55:7) Loko xi hi rivalela, xi hi rivalela hi mbilu hinkwayo. Swidyoho swa hina “swi ta suriwa.” (Mitirho 3:19) Xikwembu xi rivalela xi tlhela xi rivala hi swona, hikuva xi ri: “A ndzi nge he xi tsundzuki xidyoho xa vona.” (Yeremiya 31:34) Loko xi hi rivalela swidyoho swa hina, a xi tlheli xi swi tsundzuka leswaku xi ta hi xupula hi swona.

 Hambiswiritano, ku va Xikwembu xi hi rivalela a swi vuli swona leswaku xi pfumala matimba yo hi xupula. A xi cincacinci milawu ya xona yo lulama. Hikwalaho ka xivangelo xexo, a xi rivaleli swidyoho swin’wana.—Yoxuwa 24:19, 20.

Leswi u nga swi endlaka leswaku Xikwembu xi ku rivalela

1. Pfumela leswaku u tlule milawu ya Xikwembu. Van’wana va nga ha va va vavisiwe hi swiendlo swa wena kambe u fanele u sungula u tsundzuka leswaku xidyoho xa wena i xikhunguvanyiso eka Xikwembu.—Pisalema 51:1, 4; Mitirho 24:16.

2. Phofula xidyoho xa wena eka Xikwembu hi xikhongelo.—Pisalema 32:5; 1 Yohane 1:9.

3. Vana ni gome hikwalaho ka xidyoho xa wena. Ku va ni “gome hi ndlela leyi tsakisaka Xikwembu” swi endla leswaku munhu a hundzuka. (2 Vakorinto 7:10) Swi katsa ku tisola eka swilo leswi ku dyohiseke.—Matewu 5:27, 28.

4. Cinca ndlela leyi u endlaka swilo hayona, ku nga ku “tlhelela eka Xikwembu.” (Mitirho 3:19) Leswi swi nga ha vula ku papalata ku endla nchumu wun’we lowu hoxeke hi ku phindhaphindha kumbe ku cinca ndlela leyi u ehleketaka ni ku endla swilo hayona.—Vaefesa 4:23, 24.

5. Teka magoza yo lulamisa swihoxo swa wena. (Matewu 5:23, 24; 2 Vakorinto 7:11) Kombela ku rivaleriwa eka lava va nga vavisiwa hi swihoxo swa wena u tlhela u lulamisa swihoxo swoleswo loko swi koteka.—Luka 19:7-10.

6. Kombela Xikwembu hi xikhongelo leswaku xi ku rivalela hi ku tirhisa nkutsulo wa Yesu. (Vaefesa 1:7) Leswaku xikhongelo xa wena xi hlamuriwa, u fanele u rivalela lava va ku dyoheleke.—Matewu 6:14, 15.

7. Loko xidyoho xa wena xi ri xikulu, vulavula na munhu loyi a nga ni ntokoto leswaku a ku pfuna hi matsalwa a tlhela a khongela na wena.—Yakobo 5:14-16.

Mavonelo lama hoxeke mayelana niloko u lava ku rivaleriwa hi Xikwembu

 “Loko ndzi phofula swidyoho swa mina eka mufundhisi, swi ta rivaleriwa.”

 A ku na munhu na un’we loyi a nga nyikiwa vutihlamuleri byo rivalela munhu kuloni eka swidyoho leswi a nga dyohela Xikwembu. Hambileswi ku tiphofula eka munhu kuloni swi nga pfunaka mudyohi leswaku a hlakarhela, i Xikwembu ntsena lexi rivalelaka swidyoho.—Vaefesa 4:32; 1 Yohane 1:7, 9.

 Loko swi ri tano, xana Yesu a vula yini loko a byela vaapostola a ku: “Loko mi rivalela vanhu swidyoho swa vona va ta rivaleriwa; loko mi nga va rivaleli a va nge rivaleriwi”? (Yohane 20:23) A hlamusela matimba yo hlawuleka lama a ta ma nyika vaapostola loko va amukela moya lowo kwetsima.—Yohane 20:22.

 Hilaha swi tshembisiweke hakona, vaapostola va kume nyiko leyi loko moya lowo kwetsima wu chuluriwa eka vona hi 33 C.E. (Mitirho 2:1-4) Muapostola Petro u tirhise matimba lawa loko a ahlula nandzu wa Ananiya na Safira. Hi singita, Petro u swi tivile leswaku a va bohe xikungu xo kanganyisa naswona ndlela leyi a avanyiseke hayona a yi kombisa leswaku xidyoho xa vona a xi nge rivaleriwi.—Mitirho 5:1-11.

 Nyiko liya ya singita leyi tisiweke hi moya lowo kwetsima, ku fana ni tinyiko tin’wana to tanihi ku horisa ni ku vulavula hi tindzimi, a ta ha vanga kona endzhaku ka ku fa ka vaapostola. (1 Vakorinto 13:8-10) Hikokwalaho ka sweswo, a ku na munhu na un’we namuntlha loyi a nga sulaka swidyoho swa un’wana.