VANTSHWA VA VUTISA

Ha Yini Ndzi Tixekelela?

TLANGA

Xana ku tixeka i yini?

Ku tixeka i mukhuva wo tivavisa hi ku tirhisa xitirhisiwa lexi karihaka. Leyi ko va ndlela leyi munhu a tivavisaka ha yona. Van’wana va tihisa, va tikhandla ni ku tiba. Xihloko lexi xi vulavula hi ku tixeka kambe milawu leyi tsariweke laha yi tirha eka mixaka hinkwayo ya ku tivavisa.

Kambela vutivi bya wena: I ntiyiso kumbe I mavunwa.

I vanhwanyana ntsena lava tixekelelaka.
Ku tixeka swi lwisana ni nawu wa Bibele lowu nga eka Levhitika 19:28, lowu nge: “Mi nga tshuki mi tixeka nyama.”

Tinhlamulo leti nga ntiyiso:

Mavunwa. Hambileswi xiphiqo lexi xi andzeke ngopfu eka vanhwanyana kambe vafana na vona va tixeka naswona va katseka eka mixaka yin’wana ya ku tivavisa.
Mavunwa. Levhitika 19:28 yi vulavula hi mukhuva wa khale wa vuhedeni kambe ku nga ri mukhuva wa ku tivavisa lowu ku vulavuriwaka ha wona eka xihloko lexi. Hambiswiritano, swa twala ku kandziyisa mhaka ya leswaku Muvumbi wa hina la nga ni rirhandzu, a nga swi lavi leswaku hi tivavisa.—1 Vakorinto 6:12; 2 Vakorinto 7:1; 1 Yohane 4:8.

Ha yini vanhu va endla tano?

Kambela vutivi bya wena: Hi rihi rungula leri u anakanyaka leswaku i ntiyiso?

Vanhu va tixekelela . . .

hikuva va ringeta ku langutana ni ku tshikileleka emintlhavekweni.
hikuva va ringeta ku tidlaya.

Nhlamulo leyi nga ntiyiso: A. Vanhu vo tala lava tixekelelaka, va va va nga lavi ku tidlaya. Va lava ntsena ku heta ku tshikileleka loku va ku twaka.

Xiya leswi vantshwa van’wana va swi vulaka hi ku tixeka.

Celia: “A swi ndzi endla ndzi va ni ku rhula.”

Tamara: “A ku ri ndlela yo antswisa xiyimo. Ku twa ku vava hi ku tixekelela a swi antswa eka ku tshikileleka emintlhavekweni.”

Carrie: “A ndzi swi venga ku tshama ndzi ri ni gome. Ku tixekelela a swi endla leswaku ndzi nga vi na gome kambe ndzi twa ku vava hikwalaho ko tixeka.”

Jerrine: “Minkarhi hinkwayo loko ndzi tixekelela, a ndzi rivala hi swiphiqo swa mina. Kambe ndzi wu amukerile mpfuno.”

Loko u ri ni xiphiqo lexi, u nga xi tshika njhani?

Ku khongela eka Yehovha Xikwembu ku nga va goza ra nkoka leri nga ta ku pfuna. Bibele yi ri: “Lahlela ku vilela hinkwako ka [wena] eka xona, hikuva xa [ku] khathalela.”—1 Petro 5:7.

Xiringanyeto: Sungula hi xikhongelo xo koma, kumbexana u byela Yehovha u ku: “Ndzi kombela mpfuno.” Hi ku famba ka nkarhi u ta swi kota ku tiphofula u vula ndlela leyi u titwaka ha yona eka “Xikwembu xa nchavelelo hinkwawo.”—2 Vakorinto 1:3, 4.

Xikhongelo a ko va nchumu lowu nga ta ku endla u antswa. Kambe u va u vulavurisana ni Tata wa wena wa le tilweni, loyi a tshembisaka: “Kunene ndzi ta ku pfuna. Kunene ndzi ta ku khoma swi tiya hi voko ra mina ra xinene ra ku lulama.”—Esaya 41:10.

Vanhu vo tala lava kayakayeke hikwalaho ka xiphiqo lexi xa ku tixekelela, na vona va kume nchavelelo hi ku vulavula ni mutswari kumbe munhu lonkulu loyi va n’wi tshembaka. Xiya leswi vuriweke hi vantshwa vanharhu lava endleke tano.

Mbulavurisano

Diana, 21
Kathy, 15
Lorena, 17

A wu ri ni malembe mangani loko u sungula ku tixeka?

Lorena: Ndzi sungule loko ndzi ri ni kwalomu ka 14 wa malembe.

Diana: A ndzi ri ni 18 wa malembe naswona a ndzi swi endla hi ndlela yo hambana. A ndzi tixeka siku ni siku ku ringana vhiki kumbe mambirhi ivi ku hundza n’hweti ndzi nga tixekanga.

Kathy: Ndzi sungule loko ndzi ri ni malembe ya 14. Minkarhi yin’wana ndzi pfa ndzi ehleketa ha swona.

Ha yini a wu tivavisa?

Kathy: A ndzi titwa ndzi tivenga. A ndzi titwa onge a ku na munhu la nga tsakelaka ku va munghana wa mina.

Diana: Minkarhi yin’wana ku hlunama a ku ndzi endla ndzi pfilunganyeka ivi ndzi hetelela ndzi ri ni gome. Gome rero a ri ya ri kula ndzi nga ha koti ku ri tiyisela. A ndzi titwa ndzi ri ni xiharhi lexikulu endzeni ka mina naswona ndzi vona leswaku swi lava ndzi tixeka leswaku ndzi xi humesa.

Lorena: A ndzi tshikileleka swinene, ndzi hlundzuka kumbe ndzi va ni gome. A ndzi titwa ndzi nga pfuni nchumu naswona a ndzi lava ku antswisa ndlela leyi ndzi titwaka ha yona. Minkarhi yin’wana a ndzi twa swi fanerile leswaku ndzi titwisa ku vava.

Xana ku tivavisa a swi ku endla u antswa?

Diana: Ina. A ndzi twa onge ndzi rhuriwe ndzhwalo wo tika.

Kathy: Swi lava ku fana ni ku va munhu a rila. Loko ndzi heta ku tixeka ndzi titwe ndzi antswa ku fana ni ndlela leyi van’wana va titwaka ha yona loko va heta ku rila.

Lorena: Ku tivavisa a swi fana ni ku boxa mbhovo wutsongo eka baluni ya ntshikilelo leyi nga endzeni ka mina. A yi nga ta buluka; a yi to humesa ntshikilelo wolowo hakatsongo-tsongo.

Xana a wu chava ku byela munhu un’wana hileswi a wu swi endla?

Lorena: Ina. A ndzi chava leswaku vanhu va ta ku ndza penga. Nakambe a ndzi nga lavi vanhu va tiva leswi endlekaka evuton’wini bya mina.

Diana: Minkarhi hinkwayo vanhu a va ehleketa leswaku ndzi ni xivindzi naswona a ndzi lava va tshemba tano. A ndzi vona onge ku lava mpfuno a swi vula leswaku ndzi tsandzekile.

Kathy: A ndzi chava leswaku vanhu va ta ehleketa leswaku swilo a swi nga ha ta lulama naswona sweswo a swi ta nyanyisa xiyimo xa mina. Hambiswiritano, leswi a ndzi swi endla a ndzi vona swi fanerile.

I yini leswi ku pfuneke?

Lorena: Ndzi tivise mhani wa mina hi leswi a ndzi swi endla. Nakambe ndzi kume mpfuno eka dokodela loyi a a ndzi pfuna ku lawula ndlela yo biha leyi a ndzi titwa ha yona. A ndzi lava ku tlhelela ko hlayanyana kambe ku va ndzi antswise ku dyondza ka mina Bibele nkarhi ni nkarhi swi ndzi pfunile. Ndzi tshama ndzi khomekile entirhweni wa Vukreste. Minkarhi yin’wana ndzi tshamela ku karhateka hi ku titwa ndzi nga pfuni nchumu kambe loko swi va tano, ndzi ringeta ku nga swi pfumeleli swi lawula vutomi bya mina.

Kathy: Makwerhu un’wana wa xisati loyi a ndzi siyaka hi malembe ya khume, a a swi xiya leswaku ku ni leswi nga fambiki kahle naswona eku heteleleni ndzi tiphofurile eka yena. Lexi ndzi hlamariseke hileswaku na yena u tshame a langutana ni xiphiqo lexi xa ku tixekelela. A ndzi titwa ndzi ntshunxekile ku vulavula na yena hikuva u tshame a langutana ni xiphiqo lexi fanaka. Nakambe ndzi kume mpfuno eka dokodela loyi a ndzi pfuneke a tlhela a pfuna ni vatswari va mina va twisisa xiyimo xa mina.

Diana: Siku rin’wana nivusiku a ndzi ri ekaya ra mpatswa wun’wana lowu a ndzi wu tshemba naswona nuna wa kona u swi xiyile leswaku ku ni leswi nga fambiki kahle. Hi musa u ndzi kombele leswaku ndzi va byela leswi ndzi karhataka. Nsati wa yena u ndzi angarhile hilaha mhani a a endla hakona loko ndza ha ri xinhwanyatana. Hiloko ndzi sungula ku rila naswona na yena u ririle. A swi ndzi tikela ku va byela leswi a ndzi swi endla kambe ndza tsaka hikuva ndzi hetelele ndzi tiphofurile.

Bibele yi ku pfune njhani?

Diana: Bibele yi ndzi pfune ku xiya leswaku a ndzi nge swi koti ku lwisana ni xiphiqo lexi ndzi ri ndzexe. Ndzi lava mpfuno wa Yehovha Xikwembu.—Swivuriso 3:5, 6.

Kathy: Ku hlaya Bibele ni ku tiva leswaku rungula ra yona ri huma eka Xikwembu—swi ndzi nyika nchavelelo lowukulu.—2 Timotiya 3:16.

Lorena: Loko ndzi hlangana ni Matsalwa lama ndzi khumbaka, ndzi ma tsala eka xibukwana leswaku ndzi ta anakanyisisa hi wona.—1 Timotiya 4:15.

Xana ri kona Tsalwa ro karhi leri ku khumbeke?

Diana: Swivuriso 18:1 yi ri: “Loyi a tihambanisaka ni van’wana u tilavela swa yena ntsena; u ta hambana ni vutlhari hinkwabyo lebyi pfunaka.” Minkarhi yin’wana swa ndzi tikela ku va ni vanhu van’wana kambe Tsalwa leri ra ndzi pfuna ku va ndzi xiya leswaku ku tihambanisa ni van’wana swi ni khombo.

Kathy: Matsalwa mambirhi ya le Bibeleni lawa ndzi ma rhandzaka, i Matewu 10:29, 31 laha Yesu a vuleke leswaku a ku na xindzingiri ni xin’we lexi faka Yehovha a nga swi xiyi. U tlhele a ku: “Mi nga chavi: Mi ni risima ku tlula swindzingiri swo tala.” Ni sweswi, loko ndzi hlaya marito wolawo ma ndzi tsundzuxa leswaku ndzi wa nkoka eka Yehovha.

Lorena: Eka Esaya 41:9, 10 ndzi rhandza laha Yehovha a byelaka vanhu va yena a ku: “A ndzi ku bakanyanga. U nga chavi, hikuva ndzi na wena. . . . Ndzi ta ku nyika matimba.” Loko ndzi ehleketa hi nchumu lowu nga ni matimba, ndzi ehleketa hi nchumu lowu tiyeke ku fana ni khumbi leri akiwe hi maribye. Tsalwa leri ri endla ndzi titwa ndzi ri ni matimba, ndzi tiva leswaku Yehovha wa ndzi rhandza naswona ndzi ta tshembela eka yena minkarhi hinkwayo.

Swivutiso swo anakanyisisa ha swona

Loko se u lunghekele ku pfuniwa, i mani loyi u nga tiphofulaka eka yena?
Loko u khongela eka Yehovha Xikwembu, u nga ku yini malunghana ni xiphiqo lexi?
Xana u nga boxa tindlela timbirhi (leti nga khumbiki ku tivavisa) leti u nga ti tirhisaka ku antswisa gome ni ku karhateka ka wena?

Tinhla ta mina ta le Matsalweni

Xiringanyeto: Loko u hlangana ni Tsalwa ro karhi eBibeleni leri ku tiyisekisaka hi rirhandzu ra Yehovha kumbe leri nga ku pfunaka leswaku u va ni langutelo lerinene hi wena n’wini ni leswi u tsandzekaka eka swona, tsala Tsalwa rero eka xibukwana xa wena. Tsala nileswaku ha yini ri ri ra nkoka eka wena. Leswaku u sungula ku endla tano, hi lawa Matsalwa man’wana lama pfuneke Diana, Kathy na Lorena.

Varhoma 8:38, 39

“Tsalwa leri ri ndzi komba leswaku Yehovha wa ndzi rhandza hambiloko ndzi titwa onge swilo a swi nge antswi.”—Diana.
Pisalema 73:23

“Tsalwa ro fana ni leri, ra ndzi tiyisekisa leswaku a ndzi ndzexe. Swi fana ni loko Yehovha a ri etlhelo ka mina.”—Kathy.
1 Petro 5:10

“Swi nga endleka hi nga antswi hi nkarhi wolowo; hi nga ha ‘xaniseka nkarhinyana.’ Kambe eku heteleleni, Yehovha u ta hi nyika matimba yo tiyisela nchumu wun’wana ni wun’wana.”—Lorena.