VANTSHWA VA VUTISA

Ndzi Nga Endla Njhani Leswaku Ndzi Lawula Ndlela Leyi Ndzi Titwaka Ha Yona?

TLANGA

“Siku rin’wana ndzi titwa ndzi tsakile kutani siku leri landzelaka ndzi titwa ndzi borhekile. Swilo leswi a ndzi vona ku nga ri mhaka yo karhata Tolo namuntlha se i mhaka leyikulu.”—Carissa

Xana ndlela leyi u titwaka ha yona ya cincacinca onge hiloko u famba epatweni leyi nga na tibambara. a Loko swi ri tano xihloko lexi xi ta ku pfuna!

Ha yini swi endleka

Ku cincacinca ndlela leyi u titwaka ha yona swi tolovelekile loko munhu a ri karhi a kula se a va muntshwa. Hambiloko u nga cincacinca sweswi u nga hlamarisiwa hi ndlela leyi sweswo swi nga ha cincaka ha yona hi xitshuketa.

Loko u vona u nga yi twisisi ndlela leyi u titwaka ha yona tsundzuka leswaku sweswo swi nga ha vangiwa hi ku titwa u nga sirhelelekanga ni ku nga tiyiseki hi swilo swo karhi kumbe swi vangiwa hi ku kula. Lexi tsakisaka hileswaku u nga swi kota ku twisisa ndlela leyi u titwaka ha yona ni ku yi lawula.

Leswi U Faneleke U Swi Tiva Hi Vutomi: Ku dyondza ku lawula ndlela leyi u titwaka ha yona loko wa ha ri ntsongo i swa nkoka hikuva loko se u kurile swi ta laveka.

Ku titwa u nga tsakanga swi fana ni magodigodi lama nga epatwini. Loko u ri na vuswikoti byo chayela u nga papalata magodi lamakulu kutani u ya emahlweni no chayela

Swilo Swinharhu Leswi U Nga Swi Endlaka

Vulavula. Bibele yi ri: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.”—Swivuriso 17:17.

“Ku ni un’wana loyi a nga munghana wa ndyangu wa ka hina naswona ndzi n’wi teka tanihi mhani wa mina. Wa ndzi yingisela naswona ndzi titwa ndzi ntshunxekile ku vulavula na yena. Loko ndlela leyi ndzi vonaka swilo ha yona yi ri yinene wa tinyungubyisa ha mina naswona loko ndzi swi vona hi ndlela leyi hoxeke u ndzi lulamisa hi ndlela leyinene.”—Yolanda.

Leswi u nga swi endlaka: Ematshan’weni yo byela tintangha ta wena leti swi nga ha endlekaka na tona ti ri xiphiqo lexi fanaka xo cincacinca ndlela leyi ti titwaka ha yona byela vatswari va wena kumbe un’wana lonkulu loyi u n’wi tshembaka.

Tsala. Bibele yi hi byela hi Yobo, loyi a ri emaxangwini lamakulu loyi a nga te: “Ndzi ta humesa mhaka leyi yi ndzi karhataka. Ndzi ta vulavula moya-xiviri wa mina wu ri ni mbitsi!” (Yobo 10:1) Handle ko vulavula ni munhu un’wana ndlela yin’wana yo “tiphofula” i ku tsala hi ndlela leyi u titwaka ha yona.

“Ndzi famba na xibukwana xa mina xo tsalela kun’wana ni kun’wana. Loko ndzi kwatisiwa hi xin’wana ndzi tsala ehansi. Ku tsala ehansi swi ndzi endla ndzi titwa ndzi antswa .”—Iliana.

Leswi u nga swi endlaka: Tshama u ri ni xibukwana lexi u nga tsalaka ndlela leyi u titwaka ha yona eka xona, i yini leswi endleke u titwa hi ndlela yoleyo naswona u nga endla yini leswaku u nga ha titwi tano. Xitoloveto lexi fambisanaka ni xihloko lexi xi ta ku pfuna leswaku u kota ku endla tano.

Khongela. Bibele yi ri: “Lahlela ndzhwalo wa wena eka Yehovha, U ta ku seketela. A nge pfuki a pfumerile leswaku la lulameke a tsekatseka.”—Pisalema 55:22.

“Ndzi tshamela ku khongela ka Yehovha loko ndzi titwa ndzi karhatekile. Endzhaku ko n’wi phofulela ndlela leyi ndzi titwaka ha yona ndzi titwa ndzi tsakile.”—Jasmine.

Lexi u nga xi endlaka: Hambiloko u titwa u ri na gome, ehleketa hi swilo swinharhu evuton’wini bya wena leswi u nga nkhensaka hikwalaho ka swona. Loko u khongela eka Yehovha, kombela mpfuno ni ku tlhela u n’wi byela ndlela leyi u nkhensaka ha yona mikateko leyi u nga na yona evuton’wini bya wena.

a Exihlokweni lexi hi ta bula hi tindlela to hambanahambana leti vantshwa vo tala va titwaka ha tona. Loko u ri na vuvabyi bya bipolar kumbe ntshikilelo wun’wana wa mianakanyo, vona xihloko lexi nge, “Ndzi Nga Langutana Njhani Ni Ntshikilelo Wa Mianakanyo?”