Timbhoni ta Yehovha ti va ni tinhlengeletano laha ti gandzelaka kona kambirhi hi vhiki. Ku endleka yini eka tinhlengeletano toleto naswona u nga vuyeriwa njhani?

•  Ku endleka yini eTinhlengeletanweni Ta Timbhoni Ta Yehovha?

•  Hikwalaho ka yini u fanele u ya?

•  Leswi tintangha ta wena ti swi vulaka

 ETinhlengeletanweni ta Timbhoni ta Yehovha ku dyondzisiwa ku hanya hileswi Bibele yi swi vulaka. Tinhlengeletano toleto ti nga ku pfuna ku:

•   dyondza ntiyiso hi Xikwembu.

•   Ku twisisa leswi humelelaka namuntlha.

•   va munhu lonene.

•    kuma vanghana lavanene.

 Xana a wu swi tiva? Ndhawu leyi Timbhoni ta Yehovha ti hlanganaka kona yi vuriwa Holo ya Mfumo hikuva ku buriwa ngopfu hi Mfumo wa Xikwembu.​—Matewu 6:9, 10; 24:14; Luka 4:43.

 U ta dyondza swo tala. Leswi dyondziwaka eBibeleni etinhlengeletanweni ta Timbhoni ta Yehovha swi ta ku pfuna leswaku u “kuma vutlhari.” (Swivuriso 4:5) Sweswo swi vula leswaku Bibele yi nga ku pfuna u teka swiboho leswinene evuton’wini. Naswona yi ta tlhela yi ku pfuna u kuma tinhlamulo ta swivutiso swa nkoka swo fana ni leswi landzelaka:

•   Hi xihi xikongomelo xa vutomi?

•   Xana hi fanele hi sola Xikwembu loko hi xaniseka?

•   Ku endleka yini hi hina loko hi fa?

 Leti i tin’wana ta tinhlokomhaka leti ku dyondziwaka ha tona etinhlengeletanwini ta hina ta mahelovhiki:

•   Hikwalaho Ka Yini U Fanele U Kongomisiwa Hi Bibele?

•   Xana U Nga Wu Kuma Kwihi Mpfuno Loko U Langutane Ni Maxangu?

•   Leswi Mfumo Wa Xikwembu Wu Hi Endlelaka Swona Sweswi.

 “Mudyondzi kulorhi u tshame a ta eka yin’wana ya tinhlengeletano ta hina. U tshame ni ndyangu wa ka hina naswona hi n’wi lombe tibuku. Endzhaku u ndzi byele leswaku u tsakisiwe hi xiphemu lexi vayingiseri va katsekaka hi ku hlamula. U tlhele a vula leswaku ekerekeni ya vona a va na tibuku leti va pfunaka ku dyondza ku fana na hina.”​—Brenda

 Xana a wu swi tiva? Ku ngheniwa mahala naswona a ku fambisiwi xindhichana xa minyikelo.

 U ta khutazeka loko u va kona. Bibele yi khutaza Vakreste leswaku va hlangana swin’we va ta “khutazana.” (Vaheveru 10:24, 25) Leswi hi hanyaka ni vanhu lava nga riki na mhaka ni vanhu van’wana swa khutaza ku va exikarhi ka vanhu lava rhandzanaka va tlhela va rhangisa Xikwembu.

 “Hambiloko siku rero ndzi titwa ndzi karhele kambe loko ndzi ya eHolweni ya Mfumo, ndza phyuphya. Loko ndzi ri endleleni yo muka ndzi va ndzi tsakile ndzi ri na matimba yo langutana ni siku leri landzelaka.”—Elisa

 Xana a wu swi tiva? Ku ni mavandlha yo tlula 120 000 ya Timbhoni ta Yehovha emisaveni hinkwayo naswona ma hlengeletana etindhawini to tlula 60 000. Leswi nhlayo ya vanhu yi yaka yi andza hi xiringaniso ku akiwa tiholo to tlula 1 500 lembe ni lembe. a