•  “Vamakwenu lava ku karhataka”

•  Swivangelo swimbirhi swo lava ku endla ku rhula

•  Leswi tintangha ta wena ti swi vulaka

 Vamakwenu va vitaniwa “vanghana lava karhataka ku tlula hinkwavo.” Wa va rhandza na vona va ku rhandza, kambe mikarhi yin’wana ma holova. Helena la nga ni malembe ya 18 u ri: “Ndzisana ya mina yi tshamela ku ndzi karhata. U swi tiva kahle leswi a nga swi vulaka kumbe ku swi endla leswaku a ndzi hlundzukisa!”

 Timholovo tin’wana ta vamakwenu ti nga lulamisiwa hi ku vulavurisana. Hi xikombiso:

•   Vamakwavo vambirhi lava etlelaka ekamareni rin’we va nga holova hi ku va un’wana a lava ku va yexe ekamareni. I yini lexi nga va pfunaka? I ku dyondza ku ringanisela ni ku nyika un’wana nkarhi wo va yexe. Tirhisa nsinya wa nawu wa Bibele lowu kumekaka eka Luka 6:31.

•   Makwenu un’wana waxisati a nga teka swiambalo swa lowu’wana a nga lombanga. I yini lexi nga va pfunaka? I ku vulavula hi mhaka yoleyo ni ku vekelana swipimelo. Tirhisa nsinya wa nawu wa Bibele lowu kumekaka eka 2 Timotiya 2:24.

 Mikarhi yin’wana, swiphiqo leswi nga kona exikarhi ka vamakwenu i swikulu naswona swi nga va ni vuyelo byo biha. Kambisisa swikombiso swimbirhi swa le Bibeleni:

•   Meriyamu na Aroni a va vondzoka makwavo wa vona Muxe naswona swi ve ni vuyelo byo biha. Hlaya rungula leri nga eka Tinhlayo 12:1-15. Kutani tivutise: ‘Ndzi nga endla njhani leswaku ndzi nga n’wi vondzoki makwenu wa mina?’

•   Kayini u hlundzuke ngopfu lerova a dlaya makwavo Avele. Hlaya rungula leri nga eka Genesa 4:1-12. Kutani tivutise: ‘Ndzi nga endla njhani leswaku ndzi lawula ku hlundzuka ka mina loko ndzi tirhisana ni vamakwenu?’

 Hambiloko swi tika swinene ku tirhisana ni vamakwenu, ku ni swivangelo swimbirhi leswi endlaka swi va swa nkoka.

1.   Swi kombisa leswaku u kurile. Jaha leri vuriwaka Alex ri ri: “A ndzi tshamela ku hlundzukela tindzisana ta mina timbirhi ta xisati. Sweswi a ndza ha ti hlundzukeli naswona ndzi ti lehisela mbilu. Se ndzi kurile.”

    Bibele yi ri: “Loyi a hlwelaka ku hlundzuka u ni ku twisisa lokukulu, kambe loyi a helaka mbilu u engetela vuphukuphuku.”—Swivuriso 14:29.

2.   Swi ta ku pfuna enkarhini lowu taka. Loko u nga swi koti ku tiyiselela vamakwenu, u ta swi kotisa ku yini ku tiyiselela nuna kumbe nsati, lava u tirhaka na vona, muthori wa wena kumbe un’wana ni un’wana loyi u nga tirhisanaka na yena?

    Ntiyiso wa mhaka: Leswaku u kota ku hanyisana ni vanhu enkarhini lowu taka swi titshege hi ku va u kota ku vulavurisana ni ku fikelela swiboho naswona ndhawu leyinene yo dyondza vuswikoti byebyo hi le kaya.

    Bibele yi ri: “Loko swi koteka, swi titshege hi n’wina, vanani ni ku rhula ni vanhu hinkwavo.”—Varhoma 12:18.

 Xana u nga tsakela ku pfuniwa leswaku u lulamisa swiphiqo ni vamakwenu? Hlaya nhlokomhaka leyi nge, “Leswi tintangha ta wena ti swi vulaka” kutani u hlamula swivutiso leswi nga eka tluka ra xitoloveto leri fambisanaka ni xihloko lexi, leri nga ni nhlokomhaka leyi nge, “Ndlela Yo Hanyisana Ni Vamakwenu.”