Vana ni langutelo lerinene hi dyondzo. Ringeta ku vona ndlela leyi dyondzo yi vuyerisaka ha yona. A hi swilo hinkwaswo leswi u swi dyondzaka leswi nga ha vonakaka swi vuyerisa evuton’wini, ngopfu-ngopfu sweswi. Hambiswiritano, ku dyondza tidyondzo to hambana-hambana swi ta ku pfuna leswaku u kota ku twisisa misava leyi u hanyaka eka yona. Dyondzo yi ta ku pfuna leswaku u va swilo “hinkwaswo eka vanhu va mixaka hinkwayo,” ni ku ku nyika vuswikoti byo vulavula ni vanhu va tinxaka to hambana-hambana. (1 Vakorinto 9:22) Nakambe yi ta ku pfuna ku antswisa vuswikoti bya wena bya ku ehleketa, ku nga vutshila lebyi nga ta ku pfuna swinene enkarhini lowu taka.

Vana ni langutelo lerinene hi mudyondzisi wa wena. Loko u ehleketa leswaku mudyondzisi wa wena wa phirha, dzikisa mianakanyo ya wena eka mhaka leyi a dyondzisaka ha yona, ku nga ri eka yena. Tsundzuka leswaku swi nga ha endleka mudyondzisi wa wena se a dyondzise timhaka leti fanaka minkarhi yo tala eka titlilasi tin’wana. Hikwalaho, swi nga ha n’wi tikela ku tshama a ri karhi a hiseka loko a dyondzisa hilaha a a endla hakona loko a ha ku sungula ku dyondzisa.

Xitsundzuxo: Tsala tinhla, kombela rungula leri engetelekeke hi xichavo naswona hisekela dyondzo yoleyo. Ku hiseka ka wena ku nga susumetela van’wana leswaku na vona va hisekela dyondzo yoleyo.

Vana ni langutelo lerinene hi vuswikoti bya wena. Xikolo xi nga ku pfuna u vona vuswikoti lebyi a wu nga swi tivi leswaku u na byona. Pawulo u tsalele Timotiya a ku: ‘Yi kondletele ku fana ni ndzilo nyiko ya Xikwembu.’ (2 Timotiya 1:6) Swi le rivaleni leswaku Timotiya a a nyikiwe nyiko yo hlawuleka hi moya lowo kwetsima. Kambe “nyiko” ya yena a yi fanele yi hlakuleriwa leswaku yi nga tshami yi nga tirhi kumbe yi xaxa. I ntiyiso leswaku vuswikoti lebyi u nga na byona exikolweni a wu nyikiwanga byona hi singita hi Xikwembu. Nilokoswiritano, vuswikoti lebyi u nga na byona i bya wena ntsena. Xikolo xi nga ku pfuna leswaku u tiva vuswikoti lebyi a wu nga swi tivi leswaku u na byona nileswaku u byi hlakulela.