“Loko ndza ha kula a ndzi ri na xiphiqo xa ku tsakela vanhu va rimbewu leri fanaka ni ra mina naswona xiphiqo lexi a xi nga ndzi dyisi byi rhelela. A ndzi ehleketa leswaku loko ndzi ri karhi ndzi kula ndzi ta cinca kambe ni sweswi ndza ha ri enyimpini.”​—David, 23.

 David i Mukreste loyi a lavaka ku tsakisa Xikwembu. Xana a nga swi kota ku endla sweswo hi hala tlhelo a ri karhi a titwa a rhandza vanhu va rimbewu ro fana ni ra yena? Xikwembu xi titwa njhani hi vanhu lava rhandzanaka va ri va rimbewu leri fanaka?

•  Bibele yi ri yini hi mhaka leyi?

•  Xana leswi swi vula . . . ?

•  Kambe ku vuriwa yini loko . . . ?

 Vanhu va mindhavuko yo hambanahambana va ni mavonelo yo hambanahambana mayelana ni mhaka ya ku rhandzana ka vanhu va rimbewu leri fanaka naswona loko nkarhi wu ri karhi wu famba mavonelo wolawo ma cinca. Kambe Vakreste a va endli nchumu wo karhi hi leswi vanhu vo tala va vonaka wu ri wunene eka vona kumbe va “yingayingisiwa hi mheho yin’wana ni yin’wana ya ku dyondzisa.” (Vaefesa 4:14; Vuhundzuluxeri Bya Misava Leyintshwa Bya Matsalwa Yo Kwetsima) Ku ri na sweswo, langutelo ra vona hi ti-gay na ti-lesbian (ku katsa ni mahanyelo hinkwawo lama fambisanaka na sweswo) ri fambisana ni milawu leyi kumekaka eBibeleni.

 Bibele yi ni milawu leyi kongomeke loko swi ta emhakeni ya ku rhandzana ka vanhu va rimbewu leri fanaka. Rito ra Xikwembu ri ri:

•  “U nga tshuki u etlela ni waxinuna ku fana niloko u etlela ni wansati.”—Levhitika 18:22.

•  “Hi ku pfumelelana ni ku navela ka vona Xikwembu xi va tshike va, . . . navela timhaka ta masangu hi ndlela leyi khomisaka tingana, hikuva vaxisati lava nga exikarhi ka vona va tshike ndlela ya vona ya ntumbuluko va tikhoma hi ndlela leyi nga riki ya ntumbuluko.”—Varhoma 1:24, 26.

•  “Mi nga xisiwi. Vanhu lava tikhomaka ku biha hi swa masangu, vagandzeri va swikwembu, vaoswi, vavanuna lava endlaka timhaka ta masangu ni vavanunakulobye, makhamba, vanhu va makwanga, swidakwa, varhuketeri ni vadyeleri, a va nge yi dyi ndzhaka ya Mfumo wa Xikwembu.”—1 Vakorinto 6:9, 10.

 Entiyisweni, milawu ya Xikwembu yi tirha eka vanhu hinkwavo, hambi va rhandzana ni vanhu va rimbewu leri fanaka kumbe ni va rimbewu leri hambaneke ni ra vona. Vanhu hinkwavo va fanele va tikhoma loko swi ta etimhakeni leti leswaku va nga tikhomi hi ndlela leyi nyenyetsaka Xikwembu.—Vakolosa 3:5.

 Xana leswi swi vula leswaku Bibele yi khutaza vanhu ku venga ti-gay na ti-lesbian?

 Doo! Bibele a yi khutazi vanhu ku venga vanhu van’wana​—hambi i ti-gay kumbe doo. Kambe yi vula leswaku hi “[hanyisana] hi ku rhula ni vanhu hinkwavo” hambi va tikhoma hi ndlela yihi. (Vaheveru 12:14) Kutani swi hoxile ku xanisa ti-ga­y kumbe ti-lesbian kumbe ku va khoma hi ndlela yin’wana ni yin’wana yo biha.

 Xana leswi swi vula leswaku Vakreste va fanele va lwisana ni milawu leyi pfumelelaka vanhu va rimbewu leri fanaka ku tekana?

 Bibele yi kombisa leswaku Xikwembu xi lava leswaku wanuna ni wansati ku va vona ntsena lava tekanaka. (Matewu 19:4-6) Mifumo yi veka milawu ya vukati hi ku ya hi leswi vanhu va swi lavaka ku nga ri hi ku ya hi Bibele. Bibele yi byela Vakreste leswaku va nga ngheneleli eka tipolitiki. (Yohane 18:36) Hikwalaho, Vakreste a va yi seketeli kumbe va lwisana ni milawu leyi vekiwaka hi mfumo leyi pfumelelaka vanhu va rimbewu leri fanaka ku tekana kumbe ku rhandzana.

 Kambe ku vuriwa yini loko munhu a ri gay kumbe lesbian? Xana a nga cinca?

 Ina. Van’wana emikarhini ya ku tsariwa ka Bibele lava a va ri ti-gay na ti-lesbian va tshikile! Endzhaku ko vula leswaku vanhu vo tano a va nge yi ndzhaka ya Mfumo wa Xikwembu, Bibele yi ri: “Hi leswi van’wana va n’wina a mi ri swona.”—1 Vakorinto 6:11.

 Xana sweswo swi vula leswaku lava a va ri ti-gay kumbe ti-lesbian ivi va tshika a va ha va tsakeli vanhu va rimbewu leri fanaka ni ra vona? Doo! Bibele yi ri: “Mi ambala vumunhu lebyintshwa, lebyi hi ku ya hi vutivi bya ntiyiso byi endliwaka byi va lebyintshwa.” (Vakolosa 3:10) Hi fanele hi ya emahlweni hi cinca mahanyelo ya hina.

 Kambe ku vuriwa yini loko munhu loyi a lavaka ku yingisa milawu ya Xikwembu a ha va tsakela vanhu va rimbewu leri fanaka ni ra yena?

 Ku fana ni ku navela kun’wana ni kun’wana lowu munhu a nga vaka na kona, munhu a nga hlawula ku nga ku pfumeleli ku n’wi lawula. Njhani? Bibele yi ri: “Tshamani mi ri karhi mi famba hi moya kutani a mi nge endli leswi naveriwaka hi miri lowu dyohaka.”—Vagalatiya 5:16.

 Xiya leswaku tsalwa leri a ri vuli leswaku munhu a nge vi na kona ku navela loku mimiri ya hina yi nga na kona. Kambe loko mikarhi hinkwayo a hlaya Bibele ni ku khongela, u ta swi kota ku lwisana ni ku navela koloko.

 David loyi ku vulavuriweke ha yena eku sunguleni, u kume leswi swi tirha, ngopfungopfu endzhaku ka loko a byele vatswari va yena lava nga Vakreste hi xiphiqo xakwe. U ri: “Ndzi titwe ndzi rhuliwe ndzhwalo naswona loko a ndzi lo va byela khale kumbexana a ndzi ta va ndzi tiphinile evuntshweni bya mina.”

 Ha tsaka loko hi yingisa milawu ya Yehovha. Ha tshemba leswaku yi ‘lulamile, yi tsakisa mbilu naswona ha vuyeriwa swinene loko hi yi yingisa.’—Pisalema 19:8, 11.