Hakanyingi malembe ya vuntshwa ma fambisana ni ku va munhu a hanye kahle ni ku va ni matimba swinene. Hambiswiritano, vantshwa van’wana a va koti ku endla swilo swo tala hileswi va nga riki ni rihanyo lerinene. Xana sweswo swi tano hi wena? Loko swi ri tano, ntokoto wa V’loria, Justin na Nisa lava nga Timbhoni ta Yehovha wu nga ha ku khutaza. Xiya ndlela leyi va swi koteke ha yona ku langutana ni vuvabyi lebyi tsanisaka miri.

•  V’loria

•  Justin

•  Nisa

 Loko ndzi ri ni malembe ya 14 ndzi khomiwe hi vuvabyi bya fibromyalgia. Loko ndzi va ni malembe ya 20, ndzi tlhele ndzi khomiwa hi vuvabyi bya mahlangano, vuvabyi bya nhlonge ni vuvabyi bya Lyme. Swa tika ku endla swilo hinkwaswo leswi u lavaka ku swi endla tanihi leswi minkarhi hinkwayo u titwaka u tsanile. Minkarhi yin’wana a ndzi oma ku suka etinyongeni ku ya ehansi kutani ndzi boheke ku kuma xitulu xa lava lamaleke.

 Xo biha no tlurisa hi vuvabyi bya mina i ku xaniseka loku ndzi tivangeleke kona emianakanyweni hikwalaho ko va ndzi nga swi koti ku endla mintirho yo olova yo tanihi ku tsala ni ku pfula xibya. Loko ndzi vona vana van’wana va ri karhi va fambafamba a ndzi tivutisa leswaku ha yini mina swi ndzi tikela. A ndzi titwa ndzi nga pfuni nchumu.

 Lexi tsakisaka, a ku ri ni lava ndzi pfunaka​—ku nga ri swirho swa ndyangu ntsena kambe ni le vandlheni ra Timbhoni ta Yehovha leri ndzi hlanganyelaka eka rona. Hakanyingi swirho swa vandlha a swi ndzi endzela, leswi endleke leswaku ndzi nga ha titwi ndzi ri ndzexe. Swin’wana a swi ndzi rhamba eswinkhubyanini, hambileswi swi nga ndzi oloveliki ku suka exitulwini xa lava lamaleke kutani ndzi khandziya ni ku chika emovheni.

 Vadyuhari lava nga evandlheni a va ndzi pfuna swinene hikuva a va swi tiva leswaku swi njhani ku va ni swiphiqo swa rihanyo. Va ndzi pfune leswaku ndzi va ni langutelo lerinene hi xiyimo xa mina ni ku va ndzi nga tivoni nandzu hileswi ndzi nga kotiki ku endla swo tala ku fana ni van’wana. Ndzi va ni ntsako swinene loko ndzi ri eminhlanganweni ya vandlha ni le nsin’wini. (Vaheveru 10:25) Loko ndzi ri kwalaho, ndzi xiye leswaku hambileswi ndzi vabyaka a ndzi hambananga ni van’wana.

 Ndza swi tiva leswaku Yehovha u hi nyika leswi hi swi lavaka leswaku hi tiyisela. Hi xikombiso, Bibele yi vula leswaku hambiloko munhu loyi ndzi nga yena ehandle a hlakala, munhu loyi ndzi nga yena endzeni a nga “pfuxetiwa siku ni siku.” (2 Vakorinto 4:16) Hakunene yoleyo i ndlela leyi ndzi titwaka ha yona!

 Mhaka yo anakanyisisa ha yona: Loko u ri ni xiphiqo lexikulu xa rihanyo, ha yini swi ri swa nkoka ku vulavula ni van’wana? Loko u hanye kahle, u nga va seketela njhani lava vabyaka?​—Swivuriso 17:17.

 Ndzi wele ehansi ndzi tsandzeka ku pfuka. A ndzi twa xifuva xa mina xi omile lerova ndzi tsandzeka ni ku tshukuvanya. Ndzi tsutsumiseriwe exibedlhele. Eku sunguleni, madokodela a ma nga swi voni leswaku ndzi khomiwe hi yini. Kambe endzhaku ko ndzi kambela ko hlayanyana, ma kume leswaku ndzi khomiwe hi vuvabyi bya Lyme.

 Vuvabyi bya Lyme byi hlasele fambiselo ra mina ra misiha. Entiyisweni, ni sweswi ndza ha rhurhumela, minkarhi yin’wana hi ndlela leyi nga lawulekiki, hambileswi se swi nga ni malembe yo hlayanyana ku kumeke leswaku ndzi ni vuvabyi lebyi. Ku ni masiku lawa miri wa mina wu vavaka kumbe tintiho ta mina ti vavaka swinene lerova ndzi nga koti ku ti tirhisa, onge hiloko mahlangano ya mina hinkwawo ma nga ha tirhi.

 A ndzi tala ku tibyela leswi, ‘Ndza ha ri ntsongo swinene ku va ndzi vabya’ kutani sweswo swi endle leswaku ndzi hlundzuka. Siku ni siku a ndzi rila eka Xikwembu ndzi xi vutisa leswi, “Ha yini ndzi langutana ni leswi?” Ndzi sungule ku vona onge Xikwembu xi ndzi fularherile. Kambe hiloko ndzi anakanya hi Yobo wa le Bibeleni. Yobo a a nga swi twisisi hi ku helela leswaku ha yini a langutana ni miringo yo tala, kambe u tshame a tshembekile eka Xikwembu. Loko Yobo a swi kotile ku langutana ni swiphiqo sweswo swo tika, na mina ndzi nga endla hilaha ku fanaka.

 Vakulu va le vandlheni leri ndzi nga eka rona va ndzi seketela swinene. Minkarhi hinkwayo va ndzi pfuxela. Nkulu un’wana u ndzi byele leswaku nkarhi wun’wana ni wun’wana loko ndzi lava ku vulavula na yena ndzi n’wi fonela. Siku ni siku ndzi nkhensa Yehovha leswi a ndzi nyikeke vanghana vo fana ni lava!​—Esaya 32:1, 2.

 Minkarhi yin’wana loko hi khomiwa hi vuvabyi lebyikulu, ha rivala leswaku Yehovha wa swi tiva leswi hi langutanaka na swona. Bibele yi ri: “Lahlela ndzhwalo wa wena eka Yehovha, u ta ku seketela.” (Pisalema 55:22) Sweswo hi swona leswi ndzi ringetaka ku swi endla siku ni siku.

 Mhaka yo anakanyisisa ha yona: Vanhu lava ku rhandzaka va nga ku pfuna njhani leswaku u tiyisela vuvabyi lebyi u nga na byona?​—Swivuriso 24:10; 1 Vatesalonika 5:11.

 Loko ndza ha ri muntshwa, ku kumeke leswaku ndzi ni vuvabyi bya Marfan syndrome, ku nga vuvabyi lebyi tsanisaka mahlangano. Vuvabyi bya Marfan syndrome byi nga tlhela byi hlasela mbilu ya wena, mahlo ni swirho swin’wana. A hi masiku hinkwawo ndzi twaka ku vava kambe siku ndzi swi twaka swi vava swinene.

 Ndzi rile swinene loko ndzi byeriwa leswaku ndzi khomiwe hi vuvabyi lebyi. A ndzi tibyela leswaku a ndzi nge he swi koti ku endla swilo leswi a ndzi swi rhandza. Hi xikombiso, ndzi rhandza ku cina kutani ku va ndzi anakanya leswaku siku rin’wana swi ta ndzi tikela ku endla sweswo​—kumbexana swi ndzi tikela swinene ku famba​—swi endle leswaku ndzi chava leswi a swi ta endleka.

 Sesi wa mina a ndzi seketela swinene. U ndzi pfune leswaku ndzi tshika ku titshandza. U ndzi byele leswaku a ndzi fanelanga ndzi hanya hi ku chava hikuva sweswo swi ta endla leswaku ndzi fa. U tlhele a ndzi khutaza leswaku ndzi phikelela exikhongelweni, hikuva Yehovha hi yena a swi tivaka kahle leswi ndzi langutanaka na swona.​—1 Petro 5:7.

 Tsalwa leri ndzi khutazaka swinene i Pisalema 18:6, leyi nge: “Ndzi tshamela ku vitana Yehovha emaxangwini ya mina, ndzi hambeta ndzi kombela mpfuno eka Xikwembu xanga. U twa rito ra mina a ri etempeleni yakwe, ku kombela ka mina ku pfuniwa emahlweni kakwe sweswi ku fike etindleveni ta yena.” Ndzimana yoleyo yi ndzi pfune ku xiya leswaku loko ndzi khongela eka Yehovha ndzi n’wi kombela leswaku a ndzi pfuna ndzi kota ku langutana ni xiyimo xa mina, u ta ndzi twa naswona u ta ndzi pfuna. U na mina nkarhi hinkwawo.

 Ndzi dyondze leswaku a swi bihanga ku hlundzuka hikwalaho ka khombo leri hi welaka hikuva i swa ntumbuluko ku titwa hi ndlela yoleyo​—ntsena loko hi nga pfumeleli leswaku ku titwa hi ndlela yoleyo ku endla leswaku hi fa kumbe ku khumba vuxaka bya hina na Xikwembu. A hi xona xi hi vangelaka swiphiqo kutani loko hi xi rhangisa evuton’wini bya hina a xi nge hi tshiki.​—Yakobo 4:8.

 Mhaka yo anakanyisisa ha yona: Xana hi fanele hi sola Xikwembu hikwalaho ka ku xaniseka ka hina?​—Yakobo 1:13.