Ku sukela hi December 2012, Timbhoni ta Yehovha ti endle ntirho wo hlawuleka wo pfuna vana va xikolo eThailand leswaku va humelela. Timbhoni ta Yehovha ta 20 ti endzele swikolo swa le Bangkok. Ti tihlanganise ni tinhloko ta swikolo swa kwalaho ivi ti nyika vadyondzisi ni vana va xikolo magazini wa Xalamuka! ya October 2012, lowu nga ni nhlokomhaka leyi nge “U Nga Humelela Njhani eXikolweni?”

Ntirho lowu wu fambe kahle naswona Timbhoni ti wu endle etikweni hinkwaro. Eka lembe ni hafu leri nga landzela, ti ti hlanganise ni swikolo swa 830 naswona ti kume leswaku vana va xikolo ni vadyondzisi a va wu langutele hi mahlongati magazini lowu wa Xalamuka! leswi nga endla leswaku wu tlhela wu kandziyisiwa kanharhu leswaku va ta yi kuma. Eku sunguleni, ku komberiwe 30 000 wa tikopi ta magazini lowu. Hambiswiritano, magazini lowu wu tsakeriwa hi vanhu vo tala lerova ku hetelele ku fambisiwe tikopi ta wona to tlula 650 000.

Vafambisi va swikolo ni vadyondzisi va hatle va swi xiya leswaku Xalamuka! i ya nkoka. Mudyondzisi un’wana u te: “Magazini lowu wu ta pfuna vana va xikolo xa hina leswaku va va ni vuxaka lebyi tiyeke ni mindyangu ya ka vona ni ku va ni tipakani letinene leti va nga ti fikelelaka.” Swikolo swin’wana swi tirhise rungula ra magazini lowu eka tidyondzo ta swona ta nkarhi na nkarhi. Swin’wana swi tirhise magazini lowu etlilasini leswaku vana va titoloveta ku hlaya. Exikolweni xin’wana, swichudeni swi averiwe ku tsala xiviko hi rungula ra magazini lowu naswona leswi tsaleke xiviko hi ndlela ya kahle a swi kuma masagwadi.

Xichudeni xin’wana xa xisati xi tsakisiwe hi xihloko xin’wana lexi nga eka magazini lowu lexi nge “Ku Hlula Xiphiqo Xa Ku Nyuhela Ka Vantshwa.” Xichudeni lexi xi hlamusele leswaku ku nyuhela ngopfu i xiphiqo lexi tolovelekeke naswona vanghana va xona a va swi tsakeli ku vulavula ni vanhu van’wana hi xiphiqo lexi. Xi te: “Ndzi khensa ku kuma xitsundzuxo lexi twisisekaka ni lexi olovaka ku xi tirhisa.”

Vatswari na vona va wu rhandzile magazini lowu. Mutswari un’wana wa xisati u tlangele magazini lowu, lowu a nyikiweke hi Timbhoni tin’wana ta xisati leti n’wi endzeleke ekaya, a ku: “Magazini lowu wu ni tinhla ta nkoka leti nga ta pfuna n’wana wa mina wa nhwanyana leswaku a va xichudeni lexi endlaka nhluvuko exikolweni.”

Nkulukumba Pichai Petratyotin, muvulavuleri wa Timbhoni ta Yehovha eThailand u te: “Magazini wa Xalamuka! wu kombisa vutlhari lebyi nga ni malembe ya magidi byi ri kona eBibeleni, byi pfuna vanhu namuntlha. Timbhoni ta Yehovha ti tshemba leswaku dyondzo i ya nkoka, hikwalaho a hi tsake swinene ku va hi nyike vanhu magazini lowu mahala.”