Emalembeni ya 50 lama hundzeke, Timbhoni ta Yehovha ta 583 ti teke riendzo leri tekeke mavhiki ya khume leri a ri ta endla leswaku ti endzela misava hinkwayo. Kambe Timbhoni teto a ti nga ri vavalangi. Xikongomelo-nkulu xa tona a ku ri kuma vunghana lebyi khutazaka bya Vukreste eka ntlhandlamano wa Minhlangano leyi nga ni nhloko-mhaka leyi nge, “Mahungu Lamanene Lama Nga Heriki,” leyi khomiweke hi 1963. Leswi Timbhoni ti fambeke ku ya hlangana ni Timbhoni-kulobye ematikweni lama tlulaka 20, ntlhandlamano wa mintsombano leyi yi tshyiwe Nhlengeletano ya “Misava Hinkwayo.”

Nchumu lowu tsakiseke swinene enhlengeletanweni ha yin’we a ku ri nkulumo leyi nga ni nhloko-mhaka leyi nge “Loko Xikwembu Xi Va Hosi eMisaveni Hinkwayo.” Nathan Knorr wa le ntsindza wa Timbhoni ta Yehovha, u nyikele nkulumo leyi eka tinhlengeletano to tala. U hlamusele swiyimo swa misava leswi yaka swi nyanya a tlhela a vulavula hi xitshembiso lexikulu xa ku vuyetela Paradeyisi emisaveni. Emisaveni hinkwayo, loko ku hlanganisiwa nhlayo ya lava yingiseleke nkulumo leyi etinhlengeletanweni hinkwato a yi ri 580 509.

Tinhlengeletano ti sungule eMilwaukee, Wisconsin le U.S.A. Loko vaendzi va suka kwalaho, va ye evuxeni. Endzhaku ka nhlengeletano ya le New York, va ye eNghilandhi, eSweden, eJarimani ni le Italy. Ematikweni wolawo va kume tindlela to chumayela mahungu lamanene lawa ku vulavuriwaka ha wona eBibeleni.

Vanhu vo tala va kwalaho va tsake swinene hileswi Timbhoni ti tikarhateleke ku va endzela. Nhwanyana un’wana wa le Stockholm eSweden, u te: “Riendzo ra n’wina a ndzi nge ri rivali vutomi bya mina hinkwabyo. . . . Xana hakunene mi teke riendzo ro leha swonghasi leswaku mi ta vulavula na mina hi ripfumelo ra n’wina eka Xikwembu? Hakunene ma hlamarisa.”

Vaendzi va tshoveke timbilu loko va fika eAthens le Greece. Leswi hulumendhe yi pfumeleke ku sindzisiwa hi vafundhisi va kwalaho, yi sule ntwanano wa leswaku nhlengeletano yi khomiwa eXitediyamu xa Panathinaikos. Kambe sweswo a swi ti hetanga matimba Timbhoni leti hisekaka. Eku heleni ka August, vanhu va kwalomu ka 10 000 va kote ku khoma nhlengeletano yoleyo emakaya ni le mavandlheni ya kwalaho.

Loko vaendzi va suka eAthens, va ye eLebanon, eJordan, eIsrael ni le Cyprus. Vakreste-kulobye va va amukele hi mandla mambirhi naswona minkarhi yin’wana a ku humelela timhaka to hlekisa. Le Nicosia eCyprus, muendzi un’wana u hlamusele mhaka yo hlamarisa hi tintanghu takwe. U te: “Minkarhi hinkwayo loko ndzi tlhelela ekaya ra [loyi a ndzi rhurheleke] ivi ndzi hluvula tintanghu . . . , a ti nyamalala . . . , ivi ti vuya ku nga si hela timinete ta ntlhanu, ti polichiwile ti tlhela ti hatima!”

Xiphemu xo hetelela xa riendzo a xi katsa matiko ya le Asia ni le Pacific. Matiko lama rhurheleke vaendzi swin’we ni magidi ya Timbhoni ta kwalaho a ku ri Indiya, Burma (sweswi ku nga Myanmar), Thailand, Hong Kong, Singapore, Philippines, Indonesia, Australia, Taiwan, Japani, New Zealand, Fiji na Korea. Vanhu vo tala va hlele swiyimo swa vona hi vuntshwa leswaku va ya enhlengeletanweni kambe ku hava lava hleleke swiyimo swa vona ku fana ni mpatswa lowu a wa ha ri wuntshwa lowu vutaneke wa le Yokosuka le Japani. Loko jaha ra kona ri kombele muthori wa rona leswaku ri teka masiku entirhweni leswaku ri ta ya enhlengeletanweni eKyoto, ri byeriwe leswaku vatirhi va pfumeleriwa ku teka masiku entirhweni ntsena loko va ya eswilahlweni ni le micatweni. Leswi mpatswa lowu ana se wu lunghiselela mucato, wu hlele ku hatla wu tekana. Wu hete masiku ya wona yo sungula ya vukati enhlengeletanweni!

Riendzo ri ye eku chaputeni ka rona eku sunguleni ka September loko ku khomiwa tinhlengeletano eHawaii ni le California eU.S.A. EPasadena le California, ku nga ndhawu yo hetelela laha nhlengeletano yi khomeriweke kona, nhlayo ya vanhu lava veke kona yi hundze leyi a yi languteriwile. Hikwalaho ka sweswo, ku ve ni ntlimbano lowukulu wa timovha endzhaku ka nhlengeletano. Hambiswiritano, phepha-hungu ra kwalaho ri tshahe murhangeri wa maphorisa la vuleke leswaku “a nga si tshama a vona ntsombano wo tano hi vukulu lowu vanhu va kona a va tikhome kahle swonghasi.”

Vuyelo bya tinhlengeletano teto bya ha tsundzukiwa ni sweswi. Enhlengeletanweni yoleyo ku humesiwe buku leyi hlamuselaka Bibele leyi nge “Matsalwa Hinkwawo Ma Huhuteriwe Hi Xikwembu Naswona Ma Pfuna” naswona ninamuntlha ya ha tirhisiwa eminhlanganweni ya Timbhoni ta Yehovha.

Enhlengeletanweni ya le New York ku humesiwe risimu lerintshwa. Ri tsariwe hi Harold King, Mbhoni leyi ntshunxiweke ekhotsweni le China hi 1963. A yi ri ni nhloko-mhaka leyi nge “From Door to Door.” Harold King u qambhe risimu leri loko a pfaleriwe a ri yexe ekhotsweni naswona Timbhoni ta Yehovha ta ha ri yimbelela risimu leri, leri sweswi ri nga ni nhloko-mhaka leyi nge “Hi Yindlu Ni Yindlu.”

Namuntlha, mintsombano ya Timbhoni ta Yehovha yi hambanile ni leya khale. Tindhawu letitsongo ti lunghiseleriwa nhlayo leyitsongo ya vanhu. Loko ku va ni tindhawu to tala to khomelela eka tona tinhlengeletano swi endla leswaku vanhu va nga fambi nkarhi wo leha. Malunghiselelo lawa lama olovisaka swilo ma endla leswaku vanhu vo tala va yingisela hi vukheta nongonoko. Timbhoni ta Yehovha leti tlulaka nkombo wa timiliyoni swin’we ni vaendzi va tona, va va kona emintsombanweni lembe ni lembe. Xana u nga swi tsakela ku va na hina entsombanweni lowu taka? Kuma ndhawu ya ntsombano leyi nga ekusuhi na wena.