Samuwele Wa Ku Sungula 14:1-52
14 Siku lin’wani, Yonatani+ n’wana wa Sawulo a byele mutirhi lweyi a a mu rhwalela matlharhi a ku: “A hi fambe hi ya lani Vafilista va nga gwimba kona matende ya vona.” Kambe a nga mu byelanga papayi wa yena.
2 Sawulo a a tshame kusuhi ni Jibiya,+ ahansi ka nsinya wa ma romã lowu nga Migroni; a a ni kolomuyani ka 600 wa vavanuna.+
3 Kambe a nga kona lweyi a nga swi tsumbula swaku Yonatani a a nga li kona. (Hi nkama wolowo Ahiya hi yena a a yambale efodi;*+ yena a a li n’wana wa Ayitubi,+ makwavu wa Ikabodi,+ naswona a a li ntukulu wa Feniyasi,+ n’wana wa Eli,+ lweyi a a li muprista wa Yehovha aXilo.)+
4 Ka tindhawu leti Yonatani a a lava ku hundza hi ka tona swaku a fika lomu masonchwa ya Vafilista ma nga gwimba kona matende, a ku ni maribye mambirhi ya ku fana ni tinyu amatlhelweni; lin’we la kona a li vitaniwa Bozezi, kasi lelin’wani a li vitaniwa Seni.
5 Ribye lin’we a li li ka tlhelo la norte;* a li fana ni pilari naswona a li txuvukane ni Mikimaxi, kasi lelin’wani a li li sul* naswona a li txuvukane ni Jeba.+
6 Se Yonatani a byela mutirhi wa yena lweyi a a mu rhwalela matlharhi a ku: “A hi tsemakanyi hi ya lani masonchwa ya Vafilista ya ku kala ma nga tirheli Xikwembu*+ ma nga gwimba kona matende. Devhi Yehovha a ta hi pfuna, hikusa a xi kona lexi nga pfalelaka Yehovha swaku a ponisa vanhu va yena; a nga ha tirhisa vanhu va vanyingi kumbe vanhu vavatsongo.”+
7 Mutirhi wa yena a ku: “Yendla xin’wani ni xin’wani lexi mbilu ya wena yi xi lavaka. Yana kun’wani ni kun’wani lani mbilu ya wena yi lavaka ku ya kona, mina ni ta ku landzela.”
8 Yonatani a ku: “Hi ta humelela ka vavanuna lavayani swaku va hi vona.
9 Loko va hi byela va ku: ‘Nyimani lani mi nga kona anze hi mi tela,’ hi ta nyima hi nga yi lani va nga kona.
10 Kambe loko va ku: ‘Khupukani mi ta lwa na hina,’ hi ta khupuka hikusa leswo swi kombisa swaku Yehovha a ta va nyikela ka mavoko ya hina.”+
11 Se havambirhi va yendla swaku masonchwa ya Vafilista, lawa a ma li ka matende ma va vona. Kutani Vafilista va ku: “Ma va vo! Vaheberu va huma ka swikhele leswi a va tumbele ka swona.”+
12 Se vavanuna lava a va li ka matende va byela Yonatani ni mutirhi wa yena va ku: “Vuyani halenu, mi ta xi kuma lexi mi xi lavaka!”+ Yonatani a byela mutirhi wa yena a ku: “A hi fambe hikusa Yehovha a ta va nyikela ka hina Vayisrayele.”+
13 Se Yonatani a khwela ganga, mutirhi wa yena na a mu landza hi ndzhaku; a gama a sungula ku lwa ni Vafilista a va dlaya, kambe lava a va nga fi a va hetisiwa hi mutirhi wa yena lweyi a a mu landza hi ndzhaku.
14 Ka nkama wa ku sungula lowu Yonatani ni mutirhi wa yena va nga hlasela Vafilista, va dlaye kolomuyani ka 20 wa vavanuna ka ndhawu ya ku ringana hafu ya nsimu* hi ku leha.
15 Se masonchwa ya Vafilista lawa a ma li ka matende ma sungula ku chava, ni masonchwa lawa a ma li ka matende lawa a ma li ka tlhelo lelin’wanyani na wona ma chava, hambi masonchwa lawa a ma rhumiwile swaku ma ya hlasela+ Vayisrayele na wona ma sungule ku chava. Misava yi sungula ku tsekatseka, kutani Xikwembu xi yendla swaku Vafilista va chava.
16 A vagwardu va Sawulo lava a va li Jibiya,+ ku nga ndhawu ya lixaka la Benjamini, va vona swaku ku pfuke mpfilumpfilu ka tindhawu hinkwatu ta Vafilista.+
17 Sawulo a byela vanhu lava a a li na vona a ku: “Ni kombela mi konta vanhu, mi vona swaku i vamani lava kalaka va nga li kona.” Loko se va kontile, va tsumbula swaku Yonatani ni mutirhi wa yena a va nga li kona.
18 Se Sawulo a byela Ahiya a ku:+ “Tisa Areka ya Xikwembu xa ntiyiso halenu!” (Hikusa Areka ya Xikwembu xa ntiyiso a yi li ni Vayisrayele hi nkama wolowo.*)
19 Nkama Sawulo a wa ha vulavula ni muprista, a mpfilumpfilu a yo ya yi kula ka matende ya Vafilista. Kutani Sawulo a byela muprista a ku: “Tshika leswo u swi yendlaka.”*
20 Se Sawulo ni masonchwa hinkwawu lawa a ma li na yena va tlhangana swaku va ya nyimpini, kambe nkama va nga fika a nyimpini, va kuma swaku Vafilista va lwa hi xivona naswona a mpfilumpfilu ya kona a yi li yikulu.
21 Naswona Vaheberu lava a va nyima ni Vafilista a ku sunguleni va tlhela va tshama na vona ka matende ya vona, va game va djika va nyima ni Vayisrayele lava a va rhangeliwa hi Sawulo na Yonatani.
22 Vavanuna hinkwavu va Israyele lava a va tumbele+ ka ndhawu ya tintshava ya Efrayimi va twa leswaku Vafilista va balekile, se na vona va nghena nyimpini va va hlongolisa.
23 Yehovha a va ponise hi ndlela yoleyo Vayisrayele hi siku lolelo.+ Phela nyimpi leyi yi lwiwile anze Beti-Avheni.+
24 Hi siku lolelo masonchwa ya Vayisrayele a ma hele ntamu, hikusa Sawulo a a hlaye swaku ma nga dli nchumu a tlhela a ma fungisa a ku: “Xikwembu a xi mu khatise lweyi a nga ta tshuka a dla swakudla* namuntlha na li nga se pela, na ni nge se hakelisa valala va mina!” Se a va dlanga nchumu.+
25 Kutani masonchwa hinkwawu ma fika nhoveni ma kuma swaku ahansi ku ni wulombe.
26 A nkama masonchwa ma nga fika nhoveni, ma vone wulombe na li nthona, kambe a nga kona lweyi a nga li dla, hikusa a ma chava hi mhaka ya leswi Sawulo a nga ma fungisa swona.
27 Kambe Yonatani a a nga mu twanga papayi wa yena nkama a nga va fungisa,+ se a peta nhonga ya yena lani wulombe a li li kona, a li dla a gama a kuma ntamu.
28 Kutani sonchwa lin’wani li ku: “Papayi wa wena a fungise vanhu minchumu ya ku karhata a ku: ‘Xikwembu a xi khatise munhu lweyi a nga ta dlaka swakudla namuntlha!’+ Hi leswo swi nga yendla swaku vanhu va hela ntamu va ku tani.”
29 Kambe Yonatani a ku: “Papayi a pete tiko ka khombo lalikulu. Vonani swaku leswi ni nga nampsanyana wulombe ni tlhele ni kuma ntamu.
30 A swi ta va swi yampse hintamu loko a a tshike vanhu va dla+ leswi va nga swi tekela valala va vona namuntlha! Hikusa a ku ta va ku dlayiwe Vafilista va vanyingi.”
31 Hi siku lolelo va tame va dlaya Vafilista ku sukela aMikimaxi anze Ayiyaloni,+ se vanhu va karhala hintamu.
32 Kutani vanhu va sungula ku va ni magolo* va teketela minchumu ya valala va vona, va teka tinyempfu, tihomu ni swihon’wani, va swi dlaya kolanu va tlhela va dla nyama ni ngati ya kona.+
33 Kutani van’wani va byela Sawulo va ku: “Vanhu va djohela Yehovha hi ku dla nyama leyi nga ni ngati.”+ Se yena a va hlamula a ku: “A mi tshembekanga. Kahlulani mi wumbulutela ribye lalikulu mi li tisa halenu ka mina.”
34 Kutani Sawulo a ku: “Fambani mi ya byela vanhu mi ku: ‘Mun’wani ni mun’wani a fanele a tisa homu ya yena ni nyempfu ya yena, a ta swi dlaya lani a swi dla. Mi nga djoheleni Yehovha hi ku dla nyama na yi ni ngati.’”+ Se hi wusiku lolelo, mun’wani ni mun’wani a ta ni homu ya yena a fika a yi dlaya kolanu a yi dla.
35 Se Sawulo a yakela Yehovha altari.+ A ku li altari ya ku sungula leyi a nga yi yakela Yehovha.
36 A gama Sawulo a ku: “A hi fambeni hi ya hlongolisa Vafilista niwusiku, hi va tekela minchumu ya vona anze li xa. A hi dlayeni vanhu hinkwavu ku nga sali ni wa mun’we.” Se vanhu va ku: “Yendla xin’wani ni xin’wani lexi u xi lavaka.” Kambe muprista a ku: “A hi vutiseni swaku Xikwembu xa ntiyiso xi li yini hi mhaka leyi.”+
37 Sawulo a vutisa Xikwembu a ku: “Ni va hlongolisa Vafilista ke?+ U ta va nyikela ka mavoko ya hina?” Kambe Xikwembu a xi mu hlamulanga hi siku lolelo.
38 Kutani Sawulo a ku: “Tanani halenu hinkwenu n’wina varhangeli va vanhu mi ta kambisisa swaku hi xini xidjoho lexi nga yendliwa namuntlha,
39 hikusa ni funga hi vito la Yehovha Xikwembu lexi hanyaka lweyi a nga ponisa Vayisrayele, swaku hambiloko ko va n’wana wa mina Yonatani a fanele a dlayiwa.” Kambe a ku na munhu lweyi a nga mu hlamula.
40 A gama Sawulo a byela Vayisrayele hinkwavu a ku: “Nyimani kohalanu, mina ni n’wana wa mina Yonatani hi ta nyima halenu.” Se vanhu va mu hlamula va ku: “Yendla hinkwaswu leswi u swi lavaka.”
41 Kutani Sawulo a byela Yehovha a ku: “Xikwembu xa Israyele, hi hlamuli hi ku tirhisa Tumimi!”*+ Se Tumimi yi kombeta Yonatani na Sawulo, ku tshikiwa vanhu lavan’wani va tifambela.
42 Sawulo a ku: “Hoxani swiribyani*+ swaku hi ta tiva lweyi a nga ni nandzu ka mina ni n’wana wa mina Yonatani.” Kutani swiribyani swi kombeta ka Yonatani.
43 Sawulo a vutisa Yonatani a ku: “Ni byeli, i mpsini u nga swi yendla?” Yonatani a hlamula a ku: “Ni yo nampsanyana wulombe hi nhonga ya mina.+ Se hi mina lweyi, loko ni fanele ni fa a ni fe!”
44 Kutani Sawulo a ku: “Xikwembu a xi ni khatise loko wo kala u nga fi, wena Yonatani.”+
45 Se vanhu va byela Sawulo va ku: “U li Yonatani a fanele a dlayiwa, kuve hi yena a nga yendla swaku Israyele a hlulisa xileswi?+ Phela leswo a swi twali! Ha funga hi vito la Yehovha Xikwembu lexi hanyaka swaku hambi ku li nsisi wun’we ka nhloko ya yena a wu fanelanga wu tsuvuliwa, hikusa hi yena a nga tirha ni Xikwembu ka siku leli.”+ Kutani vanhu va ponisa Yonatani, naswona a nga ha dlayiwanga.
46 Se Sawulo a tshika ku hlongolisa Vafilista, Vafilista va gama va tlhela ka tiko la vona.
47 Hosi Sawulo a ya a va ni matimba aIsrayele, a lwa ni valala va yena lava a va li kusuhi na yena, ku nga Vamowabu,+ Vaamoni,+ Vaedomu,+ tihosi ta Zoba+ ni Vafilista;+ hinkwaku lomu a a lwa kona a a hlula.
48 Se a lwa ni Vaamaleki+ a va hlula na a nga chavi nchumu, a ponisa Vayisrayele ka lava a va va tekela minchumu ya vona.
49 Vana va Sawulo va xinuna a ku li Yonatani, Ixivhi na Malakixuwa.+ Naswona a a ni vana vambirhi va tintombhi; vito la lweyi wamukulu a ku li Meraba+ kasi lweyi wamutsongo a ku li Mikala.+
50 Vito la nsati wa Sawulo a ku li Ahinowami, n’wana wa Ayimazi. Vito la murhangeli wa masonchwa ya yena a ku li Abineri+ n’wana wa Neri, tiyu wa Sawulo.
51 Kixi+ a a li papayi wa Sawulo kasi Neri+ papayi wa Abineri a a li n’wana wa Abiyeli.
52 Ka malembe hinkwawu lawa ku nga fuma Sawulo,+ a a tshamela ku lwa ni Vafilista; naswona nyimpi ya kona a yi chavisa. Loko Sawulo a vona swaku ku ni wanuna lweyi a nga ni matimba kumbe a kalaka a nga chavi, a a mu teka a mu yendla sonchwa la yena.+
Tinhlamunselu ta le hansi
^ Vona Ntlhamuselo.
^ Kumbe: “n’walungu.”
^ Kumbe: “dzongeni”.
^ Hi Xiheberu: “va ku kala va nga tsemanga nsuvu”.
^ Ku nga ndhawu leyi tihomu timbirhi ti nga yi rimaka hi siku.
^ Hi Xiheberu: “hi siku lolelo.”
^ Hi Xiheberu: “Susa voko la wena.”
^ Hi Xiheberu: “pawu”.
^ Kumbe: “makolo”.
^ Vona Ntlhamuselo.
^ Vona Ntlhamuselo.
