Vakorinto Va Ku Sungula 11:1-34
11 Ni tekeleleni, ku fana ni leswi na mina ni tekelelaka Kreste.+
2 Vamakwerhu, na tsaka hikusa ma ni khumbuka ka minchumu hinkwayu naswona hinkwaswu mi swi yendlisa leswi ni nga mi djondzisisa xiswona.
3 Kambe ni lava mi swi tiva swaku nhloko ya wanuna mun’wani ni mun’wani i Kreste;+ kasi nhloko ya wansati i wanuna;+ kutani nhloko ya Kreste i Xikwembu.+
4 Wanuna lweyi a khongelaka kumbe a profetaka na a timbhonye nhloko, a danisa lweyi a nga nhloko ya yena;
5 kambe wansati lweyi a khongelaka kumbe a profetaka+ na a nga timbhonyanga nchumu ka nhloko, a danisa lweyi a nga nhloko ya yena hikusa swi fana ni loko yena wansati a tsemete mpandlha.
6 Loko wansati a nga timbhonyi nchumu, a fanele a tsemeta misisi; kambe loko swi danisa ka wansati ku tsemeta misisi kumbe ku tsemeta mpandlha, a fanele a timbhonya nhloko.
7 Wanuna a nga fanelanga a mbhonya nhloko ya yena hileswi a nga xifaniso ni ku dzuneka ka Xikwembu,+ kambe wansati i ku dzuneka ka wanuna.
8 Hikusa wanuna a nga ti hi ka wansati kambe i wansati lweyi a taka hi ka wanuna.+
9 Naswona wanuna a nga yendleliwanga wansati kambe i wansati lweyi a nga yendleliwa wanuna.+
10 Hi mhaka ya leswo ni hi mhaka ya tintsumi,+ wansati a fanele a va ni xikombiso ka nhloko ya yena xa leswaku wa tiveka hansi ka nuna wa yena.
11 Naswona axikarhi ka valandzeli va Hosi a ku na wansati na ku nga na wanuna naswona a ku na wanuna na ku nga na wansati.
12 Hikusa wansati a ta hi ka wanuna,+ ni wanuna a kona hi mhaka ya wansati; kambe minchumu hinkwayu yi ta hi ka Xikwembu.+
13 Tsemani mhaka hi n’wexe: Swa fanela swaku wansati a khongela ka Xikwembu na a nga timbhonyanga nchumu ka nhloko ke?
14 Hi ku ya hi leswi munhu a nga yendlisiwa xiswona,* a mi djondzi swaku loko wanuna a ni misisi ya ku leha swa mu xixa?
15 Kasi loko wansati a ni misisi ya ku leha, swi mu nyika lisima ke? Hikusa a nyikiwe misisi swaku yi mbhonya nhloko ya yena.
16 Loko ku ni lweyi a yalaka mhaka leyi hi ku lava ku landzela swihena swin’wani, hina ni mabandla ya Xikwembu a hi swi yamukeli leswi a swi yendlaka.
17 Kambe a ni mi khensi loko ni vula timhaka leti hikusa mintlhanganu ya n’wina a yi mi pfuni nchumu kambe yo mi hohlota.
18 Xa ku sungula, ni twa swaku loko mi tlhangana bandleni ku ni ku yavana xikarhi ka n’wina; naswona na kholwa kakutsongo swaku leswo i ntiyiso.
19 Hikusa ku ta va ni mintlawa xikarhi ka n’wina,+ swaku va ta voneka kahle lava tsakeliwaka hi Xikwembu.
20 Loko mi tlhangana swaku mi ta dla Xilalelo xa Hosi a mi swi yendli hi ndlela yayinene.+
21 Hikusa mun’wani ni mun’wani a sungula hi ku dla swakudla swa yena hi nkama wa Xilalelo xa Hosi, lakakuva mun’we a twa ndlala kasi mun’wani a dakwile.
22 Mo kala mi nga na makaya ya ku ya dla kona ni ku phuza kona ke? Kumbe mi delela bandla la Xikwembu naswona mi yendla swaku lava kalaka va nga na nchumu va daniseka ke? Ni ta ku yini hi n’wina? Ni fanele ni mi khensa? Ihim, ka mhaka leyi a ni nge mi khensi.
23 Hikusa leswi ni mi djondzisaka swona swi ta hi ka Hosi. Ka wusiku+ leli Hosi Yesu a a ta xavisiwa hi lona, a teke pawu,
24 loko se a khensile, a li khema kutani a ku: “Pawu leli li fanekisela muzimbha wa mina+ lowu nyikeliwaka hi mhaka ya n’wina. Tshamelani ku yendla leswi leswaku mi ni khumbuka.”+
25 Naswona loko se va dlile, a yendla swa ku fana ni hi kopo,+ a ku: “Kopo leyi yi fanekisela ntwananu wa nyuwani+ lowu tiyisekisiwaka hi ngati ya mina.+ Tshamelani ku yendla leswi minkama hinkwayu loko mi yi phuza swaku mi ni khumbuka.”+
26 Hikusa minkama hinkwayu loko mi dla pawu leli ni ku phuza ka kopo leyi, mi twalisa ku fa ka Hosi anze yi ta.
27 Se lweyi a dlaka pawu kumbe a phuzaka ka kopo ya Hosi na swi nga fanelanga, a ta va ni nandzu wa ku djohela muzimbha ni ngati ya Hosi.
28 Munhu a a sunguli hi ku tikambela kuva a vona swaku wa faneleka,+ se hi kona a nga dlaka pawu ni ku phuza ka kopo.
29 Hikusa lweyi a dlaka a tlhela a phuza na a nga swi twisisi leswi muzimbha wu nyimelaka swona wa tiyavanyisa.
30 Hi leswo swi nga yendla va ku tala xikarhi ka n’wina va hela ntamu ni ku vabya, kasi va vanyingi va file.*+
31 Loko a ho tikambela a hi nga ta yavanyisiwa.
32 Kambe loko hi yavanyisiwa, ho layiwa hi Yehovha*+ swaku hi nga yavanyiseliwi swa wugamu ni misava.+
33 Se vamakwerhu, loko mi tlhangana swaku mi dla xilalelo lexi, nyimelani van’wani.
34 Loko mun’wani a twa ndlala, a a dli kaya swaku loko mi tlhangana mi nga yavanyisiwi.+ Kambe timhaka leti nga sala ni ta ti lulamisa loko ni fika koseno.
Tinhlamunselu ta le hansi
^ Kumbe: “hi ku ya hi ntumbuluku”.
^ Swi vula ku lahlekeliwa hi wunghanu ni Xikwembu.
^ Vona Xiyengetelo A5.
