Ezekiyele 12:1-28
12 Yehovha a tlhela a vulavula na mina a ku:
2 “N’wana wa munhu, u tshama xikarhi ka vanhu lava nga ni djikela. Va ni matihlo kambe a va voni, va ni tindleve kambe a va twi,+ hikusa i vanhu lava nga ni tshika.+
3 Wena n’wana wa munhu, longela xidjumba ingaku wo ya wukaraweni. Se ninhlikanhi u fanele u famba ingi u ya wukaraweni na vanhu va ku vona. Suka kaya ka wena u yendla ingi u ya wukaraweni ka ndhawu yin’wani na va ku vona. Kumbexana va ta swi twisisa swaku leswo swi vula yini, hambileswi va nga vanhu lava nga ni tshika.
4 Humesa xidjumba lexi u nga ta famba na xona wukaraweni ninhlikanhi na vanhu va ku vona, se nimadlambu u fanele u famba ku fana ni munhu lweyi a yisiwaka wukaraweni na vanhu va ku vona.+
5 “Boxa mbhovo ka muru na va ku vona u gama u humesa xidjumba xa wena hi ka wona.+
6 Pakatsa xidjumba xa wena na va ku vona u gama u famba na xona hi ka munyama. Mbhonya nghohe* ya wena leswaku u nga yi voni misava, hikusa ni ku yendla xikombiso ka Vayisrayele.”+
7 Ni yendle leswi ni nga rhumiwa swona. Ninhlikanhi ni humese xidjumba lexi a ni ta famba na xona awukaraweni, se nimadlambu ni boxa mbhovo ka muru hi voko. Loko se li mphumile ni teke xidjumba xa mina ni xi pakatsa na va ni vona.
8 Yehovha a tlhela a vulavula na mina nimixo a ku:
9 “N’wana wa munhu, Vayisrayele, vanhu lava nga ni tshika, a va ku vutisanga va ku: ‘U yendla yini?’
10 Va byeli u ku: ‘Yehovha Hosi Leyikulu a li: “Loku i ku yavanyisiwa ka murhangeli+ wa le Yerusalema ni Vayisrayele hinkwavu lava nga doropeni.”’
11 “Va byeli u ku: ‘Ni xikombiso ka n’wina.+ Leswi ni nga swi yendla hi leswi va nga ta yendliwa swona. Va ta yisiwa wukaraweni.+
12 Murhangeli lweyi a nga xikarhi ka vona a ta pakatsa xidjumba a gama a famba ka munyama. A ta boxa mbhovo ka muru a humesa xidjumba xa yena hi wona.+ A ta mbhonya nghohe ya yena swaku a nga voni misava.’
13 Ni ta hoxa redi la mina la ku hlota hi lona ka yena naswona li ta mu phasa.+ Se ni ta gama ni mu yisa aBabilona, ka tiko la Vakalidiya, kambe a nga ta li vona; a ta fela koseniyani.+
14 Hinkwavu lava nga matlhelweni ka yena, lava mu pfunaka ni masonchwa ya yena, ni ta va hangalasa ka matlhelo hinkwawu;+ ni ta tlomula xipada ni va txatxa.+
15 Va ta swi tiva swaku hi mina Yehovha nkama ni nga ta va hangalasa xikarhi ka matiko.
16 Kambe ni ta siya vanhu vavatsongo swaku va nga dlayiwi hi xipada, ndlala ni ntungu, leswaku va ta byela vanhu va matiko lawa va nga ta yisiwa ka wona hi ta mintirho ya vona hinkwayu ya ku nyenyentsa; se va ta swi tiva swaku hi mina Yehovha.”
17 Yehovha a tlhela a vulavula na mina a ku:
18 “N’wana wa munhu, u fanele u dla pawu la wena na u rhurhumela funtshi u phuza mati ya wena na u karhatekile u tlhela u vilela.+
19 Byela vanhu atikweni u ku: ‘Yehovha Hosi Leyikulu a byela lava tshamaka aYerusalema ka tiko la Israyele, a ku: “Va ta dla pawu la vona na va vilela va tlhela va phuza mati ya vona na va chava, hikusa tiko la vona li ta hohlokela*+ hi mhaka ya tinyimpi leti yendliwaka hi vanhu hinkwavu lava tshamaka ka lona.+
20 Madoropa ma ta helisiwa, tiko li ta hohlokela;*+ kutani mi ta swi tiva swaku hi mina Yehovha.”’”+
21 Yehovha a tlhela a vulavula na mina a ku:
22 “N’wana wa munhu, kasi xi vula yini xihlayahlaya lexi mi nga na xona aIsrayele lexi nge: ‘Masiku ma hundzile naswona hinkwaswu leswi nga voniwa hi ndlela ya singita* a swi hetisekanga’?+
23 Kutani va byeli u ku: ‘Yehovha Hosi Leyikulu a li: “Ni ta yendla swaku xihlayahlaya lexi xi nga ha tirhi, a va nga ha ta xi tirhisa aIsrayele.”’ Kambe va byeli u ku: ‘Masiku ma tshinele+ naswona hinkwaswu leswi nga voniwa hi ndlela ya singita* swi ta hetiseka.’
24 Hikusa a mi nga ha ta vona minchumu ya mavunhwa kumbe ku va ni ku hlahluva ka wukanganyisi ka yindlo ya Israyele.+
25 ‘“Hikusa mina Yehovha ni ta vulavula. Hinkwaswu leswi ni nga ta swi hlaya swi ta yendliwa hi ku hantlisa.+ Ka masiku ya n’wina,+ n’wina vanhu lava nga ni tshika, ni ta hlaya rito ni tlhela ni li yendla,” ku vula Yehovha Hosi Leyikulu.’”
26 Yehovha a tlhela a vulavula na mina a ku:
27 “N’wana wa munhu, Vayisrayele va li: ‘Leswi a swi vonaka hi ndlela ya singita* a swi nge yendleki swoswi funtshi a profeta hi minchumu leyi nga ta yendleka ka nkama lowu taka.’+
28 Kutani va byele u ku: ‘Yehovha Hosi Leyikulu a li: “‘Leswi ni swi vulaka a swi nga ta hlwela; hinkwaswu leswi ni swi vulaka swi ta yendleka,’ ku vula Yehovha Hosi Leyikulu.”’”
Tinhlamunselu ta le hansi
^ Kumbe: “kara la”.
^ Kumbe: “li ta va rhumbi”.
^ Kumbe: “li ta va rhumbi.”
^ Hi Xiheberu: “xivono”.
^ Hi Xiheberu: “xivono”.
^ Hi Xiheberu: “xivono”.
