Mahungu Ya Ku Tsakisa Ya Ku Tsaliwa Hi Matewu 4:1-25
4 Kutani Yesu a yisiwa mananga hi matimba ya Xikwembu; se Davulosi+ a ya mu ringa.+
2 Nkama a nga heta 40 wa masiku, wusiku ni nhlikanhi na a nga dlanga nchumu, a twa ndlala.
3 Se Davulosi a fika a mu ringa+ a ku: “Loko u li n’wana wa Xikwembu, byela maribye lawa swaku ma txintxa ma va mapawu.”
4 Kambe a mu hlamula a ku: “Ku tsaliwile: ‘Munhu a nga fanelanga a hanya hi pawu ntsena, kambe a fanele a hanya ni hi rito lin’wani ni lin’wani leli humaka hi ka nomo wa Yehovha.’”*+
5 Se Davulosi a famba na yena ka doropa la ku kwetsima,+ a fika a mu nyimisa henhla ka tempele*+
6 kutani a ku: “Loko u li n’wana wa Xikwembu, titxukumeteli hansi; hikusa ku tsaliwile: ‘Xi ta rhuma tintsumi ta xona ti ta ku tlhamukela hi mavoko ya tona, leswaku nenge wa wena wu nga tshuki wu ba ribye.’”+
7 Se Yesu a ku: “Naswona ku tsaliwile: ‘U nga tshuki u ringa Yehovha* Xikwembu xa wena.’”+
8 Davulosi a tlhela a famba na yena ka ntshava yayikulu hintamu swinene a mu komba mimfumu hinkwayu ya misava ni ku phatima ka yona.+
9 Kutani a ku: “Ni ta ku nyika hinkwaswu leswi loko u khizama u ni gandzela.”
10 Se Yesu a ku: “Suka, Sathana! Hikusa ku tsaliwile: ‘U fanele u gandzela Yehovha* Xikwembu xa wena+ naswona u fanele u tirhela yena ntsena.’”+
11 Se Davulosi a mu tshika;+ kutani tintsumi ti ta ka Yesu ti sungula ku mu tirhela.+
12 Nkama a nga twa swaku Yohani a khomiwile,+ a sukile a ya Galileya.+
13 Kutani nkama a nga suka aNazareta, a fike a tshama Kapernawume+ tlhelweni ka lwandle, ka tiko la Zebuloni na Naftali
14 leswaku ku ta hetiseka leswi nga vuliwa hi muprofeta Esaya lweyi a nge te:
15 “Wena tiko la Zebuloni ni tiko la Naftali, u nga ka ndlela leyi yaka lwandle, ka tlhelo lelin’wani la Yordani, ku nga Galileya wa matiko!
16 Vanhu lava tshamaka ka munyama va vone ku vonakala kakukulu, ni lava tshamaka ka ndzhuti wa lifu, va fikeliwe hi ku vonakala.”+
17 Ku sukela hi nkama wolowo, Yesu a sungula ku chumayela a ku: “Tisoleni, hikusa Mfumu wa matilo wu le kusuhi.”+
18 Nkama na a famba atlhelweni ka Lwandle la Galileya, a vone Simoni lweyi a nga chuliwa swaku i Pedru+ na Andre makwavu wa yena, na va hoxa maredi* alwandle, hikusa a va li vaphasi va tihlampfi.+
19 Kutani a ku: “Ni landzeni, ni ta mi yendla vaphasi va vanhu.”+
20 Hi ku kahlula va tshika maredi ya vona va mu landzela.+
21 Nkama a nga suka kolanu, a vone Yakobe na Yohani+ vana va Zebedewu lava a va li vamakwavu, na va li ka boti ni papayi wa vona, na va lunghisa maredi ya vona; kutani a va vitana.+
22 Hi ku kahlula va siya boti ni papayi wa vona, va mu landzela.
23 Kutani a famba ka tiko hinkwalu la Galileya,+ a djondzisa ka masinagoga*+ ni ku chumayela mahungu ya ku tsakisa ya Mfumu. A hanyisa mavabyi ya ku hambanahambana ni ku limala ka mixaka hinkwayu.+
24 Se ndhuma ya yena yi hangalaka ka tiko hinkwalu la Siriya; kutani va mu tisela hinkwavu lava hluphiwaka hi mavabyi ya ku hambanahambana, swivavu,+ lava nga ni madimoni,+ lava nga ni mavabyi ya ku wa*+ ni lava nga ni trombozi; kutani a va hanyisa.
25 Hi mhaka leyo, a landzeliwe hi vanhu va vanyingi lava taka hi Galileya, Dekapolisi,* Yerusalema, Yudiya ni ka tlhelo lin’wani la Yordani.
Tinhlamunselu ta le hansi
^ Vona Xiyengetelo A5.
^ Kumbe: “ka ndhawu ya ku leha ya kona ya tempele”.
^ Vona Xiyengetelo A5.
^ Vona Xiyengetelo A5.
^ Kumbe: “tikoka”.
^ I tindhawu leti Vayuda a va kumana ka tona swaku va khongela va tlhela va lerha matsalwa.
^ Kumbe: “ya wheti”.
^ Kumbe: “Ndhawu ya 10 wa Madoropa”.
