Tinhlayo 3:1-51
3 Lava a va li va lixaka la Aroni na Moxe nkama lowu Yehovha a nga khuluma na Moxe na a li ka Ntshava ya Sinayi.+
2 Lawa i mavito ya vana va Aroni: Matevula i Nadabi, ku landzela Abiyu,+ Eliyazari+ na Itamari.+
3 Lawa i mavito ya vana va Aroni, lava nga cheliwa mafurha swaku va va vaprista.+
4 Kambe Nadabi na Abiyu va file phambheni ka Yehovha+ nkama va nga nyikela gandzelo* la ku kala li nga fambisani ni nawu wa Yehovha amananga ya Sinayi, naswona va file na va nga na vana. Kambe Eliyazari+ na Itamari+ va tame va va vaprista ni papayi wa vona Aroni.
5 Kutani Yehovha a byela Moxe a ku:
6 “Teka lixaka la Levhi+ u li yisa ka muprista Aroni, swaku li ta mu pfuna ka mintirho.+
7 Va fanele va yendla mintirho leyi yendliwaka ka tabernakela, hi ku pfuna Aroni ka mintirho ya yena ni mintirho ya hinkwavu lava tirhaka ka tende la ntlhanganu.
8 Va fanele va hlayisa swibya hinkwaswu+ leswi nga ka tende la ntlhanganu ni ku yendlela Vayisrayele mintirho leyi va faneleke va yendleliwa yona ka tabernakela.+
9 U fanele u yisa Valevhi ka Aroni ni vana va yena. Va fanele va lumba Aroni swaku va ta mu pfuna, va huma ka Vayisrayele.+
10 U fanele u langa Aroni ni vana va yena swaku va yendla mintirho leyi yendliwaka hi vaprista,+ lweyi a nga ta tshuka a tshinela, kambe na a nga li muprista* a fanele a dlayiwa.”+
11 Yehovha a tlhela a khuluma na Moxe a ku:
12 “Se mina, ni langa Valevhi xikarhi ka Vayisrayele leswaku va pfaleta matevula hinkwawu ya Vayisrayele,+ Valevhi va ta va va mina.
13 Hikusa matevula hinkwawu i ya mina.+ Siku leli ni nga dlaya matevula hinkwawu ka tiko la Gibita,+ ni kwetsimise matevula hinkwawu ya Israyele ku sukela ka munhu ku ya ka swiharhi.+ Ma ta va ya mina. Hi mina Yehovha.”
14 Yehovha a tlhela a khuluma na Moxe na a li mananga ya Sinayi,+ a ku:
15 “Tsalisa vana va Levhi hi ku ya hi swib’ongo ni mindjangu ya vona. U fanele u tsalisa va xinuna hinkwavu ku sukela ka lweyi a nga ni wheti yin’we ku ya henhla.”+
16 Se Moxe a va tsalisa hi ku landza leswi Yehovha a nga mu byela swona.
17 Hi lawa mavito ya vana va Levhi: Jersoni, Kohata na Merari.+
18 Hi lawa mavito ya vana va Jersoni ni mindjangu ya vona: Libni na Ximeyi.+
19 Vana va Kohata ni mindjangu ya vona a ku li Amirami, Izari, Hebroni na Uziyeli.+
20 Vana va Merari ni mindjangu ya vona a ku li Mahili+ na Muxi.+
Leyi a ku li mindjangu ya Valevhi hi ku ya hi swib’ongo swa vona.
21 Ka Jersoni ku hume ndjangu wa Valibni+ ni ndjangu wa Vaximeyi. Leyi a ku li mindjangu ya Vajersoni.
22 Vavanuna hinkwavu lava nga tsalisiwa va ku sukela ka wheti yin’we ku ya henhla a va li 7.500.+
23 Mindjangu ya Vajersoni a yi gwimbe matende ndzhaku ka tabernakela+ hi tlhelo la wupeladlambu.
24 Murhangeli wa ndjangu wa Vajersoni a ku li Eliyazafi n’wana wa Layele.
25 Ntirho wa vana va Jersoni+ ka tende la ntlhanganu a ku li ku hlayisa tabernakela, tende,+ swa ku funengeta hi swona+ ku patsa ni kortina+ la nyanghwa wa tende la ntlhanganu,
26 makortina+ lawa ma nga vekiwa ka kintari,* kortina+ leli pfalaka nyanghwa wa kintari lani tabernakela ni altari a swi li kona, magoda ya lona ni mintirho hinkwayu leyi fambisanaka na swona.
27 Ka Kohata ku hume ndjangu wa Vaamirami, wa Vaizari, wa Vahebroni ni wa Vauziyeli. Leyi a ku li mindjangu ya Vakohata.+
28 Va xinuna hinkwavu lava nga tsalisiwa va ku sukela ka wheti yin’we ku ya henhla a va li 8.600; a va hlayisa ndhawu ya ku kwetsima.+
29 Mindjangu ya vana va Kohata a yi gwimbe matende hi tlhelo la le sul* ka tabernakela.+
30 Murhangeli wa mindjangu ya Vakohata a ku li Elizafani n’wana wa Uziyeli.+
31 Ntirho wa vona a ku li ku hlayisa Areka,+ meza,+ xa ku tlhoma swa ku voninga hi swona,+ maaltari,+ swibya+ leswi a swi tirhisiwa ka ndhawu ya ku kwetsima, kortina+ ni mintirho hinkwayu leyi fambisanaka na swona.+
32 Murhangeli wamukulu wa Valevhi a ku li Eliyazari+ n’wana wa muprista Aroni, lweyi a a rhangela lava a va tirha ka ndhawu ya ku kwetsima.
33 Ka Merari ku hume ndjangu wa Vamahili ni ndjangu wa Vamuxi. Leyi a ku li mindjangu ya Merari.+
34 Va xinuna hinkwavu lava nga tsalisiwa va ku sukela ka wheti yin’we ku ya henhla a va li 6.200.+
35 Murhangeli wa mindjangu ya Merari a ku li Zuriyeli n’wana wa Abiyayile. Va gwimbe matende ya vona hi tlhelo la norte* la tabernakela.+
36 Ntirho wa vana va Merari a ku li ku hlayisa maaru+ ya tabernakela, timhandzi,+ mapilari, swa ku tlhoma mapilari,+ swibya hinkwaswu+ leswi nga ka yona ni mintirho hinkwayu leyi fambisanaka na swona,+
37 ku patsa ni mapilari hinkwawu lawa a ma li ka kintari ni swa ku tlhoma mapilari swa wona,+ ni switaka ni magoda ya wona.
38 Moxe na Aroni ni vana va yena va gwimbe matende kusuhi ni tabernakela hi le wuxeni, phambheni ka tende la ntlhanganu. A va hlayisa ndhawu leyi kwetsimaka; lowu a ku li ntirho wa vona lowu a va wu yendlela Vayisrayele. Lweyi a a ta tshinela kusuhi na a nga li muprista* a a ta dlayiwa.+
39 Valevhi hinkwavu va ku sukela ka wheti yin’we ku ya henhla, lava Moxe na Aroni va nga va tsalisa hi ku ya hi mindjangu ya vona hi ku landza leswi Yehovha a nga va rhuma swona, a va li 22.000.
40 Se Yehovha a byela Moxe a ku: “Tsalisa matevula hinkwawu ya xinuna ya Vayisrayele, ya ku sukela ka wheti yin’we ku ya henhla,+ ma konti u tlhela u tsala mavito ya wona.
41 U fanele u ni langela Valevhi, va ta pfaleta matevula hinkwawu ya Vayisrayele,+ hi mina Yehovha, u tlhela u ni langela swifuyu swa Valevhi u tshika matevula ya swifuyu hinkwaswu swa Vayisrayele.”+
42 Se Moxe a tsalisa matevula hinkwawu ya Vayisrayele, hi ku landza leswi Yehovha a nga mu rhuma swona.
43 Matevula hinkwawu ya xinuna, lawa ma nga tsalisiwa hi mavito, ku sukela ka lweyi a nga ni wheti yin’we ku ya henhla, a ma li 22.273.
44 Yehovha a tlhela a khuluma na Moxe a ku:
45 “U fanele u langa Valevhi, u tshika matevula ya Vayisrayele, u tlhela u langa swifuyu swa Valevhi u tshika swifuyu swa matevula swa Vayisrayele, Valevhi va fanele va va va mina. Hi mina Yehovha.
46 Leswaku u kutsula+ 273 wa matevula ya Vayisrayele lawa ma tlulaka numeru ya Valevhi,+
47 u ta humesela munhu mun’wani ni mun’wani+ kolomuyani ka 57 wa magrama* ya prata hi ku ya hi mapezela ya ndhawu ya ku kwetsima.* Xikele yin’we yi peza kolomuyani ka 12 wa magrama.*+
48 U fanele u nyika Aroni ni vana va yena male leyi, swaku yi hakelela ku kutsula lava nga tala ku va tlula.”
49 Kutani Moxe a teka male ya ku kutsula swaku a hakelela lava a va tale ku tlula Valevhi.
50 A teke male ka matevula ya Vayisrayele, kolomuyani ka 15 wa makilu* ni hafu ya prata, hi ku ya hi mapezela ya ndhawu ya ku kwetsima.
51 Se Moxe a nyika Aroni ni vana va yena male ya ku kutsula hi ku landza rito la Yehovha, ku nga leswi Yehovha a nga mu byela swona Moxe.
Tinhlamunselu ta le hansi
^ Hi Xiheberu: “ndzilu”.
^ Hi Xiheberu: “munhu wa xitranyu”. Ku nga munhu lweyi a kalaka a nga lumbi ndjangu wa Aroni.
^ Vona Ntlhamuselo.
^ Kumbe: “dzongeni”.
^ Kumbe: “n’walungu”.
^ Hi Xiheberu: “munhu wa xitranyu”. Ku nga munhu lweyi a kalaka a nga lumbi ndjangu wa Aroni.
^ Hi Xiheberu: “5 wa tixikele”. Xikele yin’we a yi peza 11,4 wa magrama. Vona Xiyengetelo B14.
^ Kumbe: “xikele ya ku kwetsima.”
^ Hi Xiheberu: “Xikele yin’we i 20 wa tigera.” Gera yin’we yi peza 0,57 wa magrama. Vona Xiyengetelo B14.
^ Hi Xiheberu: “1.365 wa tixikele”. Xikele yin’we a yi peza 11,4 wa magrama. Vona Xiyengetelo B14.
