Vaefeza 2:1-22
2 Naswona Xikwembu xi mi hanyisile hambileswi a mi file hi mhaka ya swidjoho swa n’wina,+
2 leswi a mi hanya hi swona hi ku landza mahanyelo ya misava leyi,+ hi ku twanana ni hosi leyi fumaka moya+ lowu swoswi wu tirhaka ka vana lava kalaka va nga yingisi.
3 Phela hinkwerhu a hi hanyela ku navela ka nyama ya hina+ ku fana na vona, hi yendla leswi tsakisaka nyama ni mimpimiso ya hina+ naswona hi psaliwe na hi li vana lava se va faneliwaka hi ku kwateliwa hi Xikwembu+ ku fana ni lavan’wani hinkwavu.
4 Kambe Xikwembu xi ni ntwelawusiwana wawukulu,+ naswona leswi xi hi rhandzaka hintamu,+
5 xi hi nyike wutomi xi tlhela xi hi patsa na Kreste, hambileswi a hi file hi mhaka ya swidjoho swa hina+ (mi ponisiwile hi timpsalu tatikulu ta Xikwembu).
6 Naswona, xi hi pfuxile ni ku hi nyika ndhawu ya ku tshama amatilweni hikusa xi hi patse na Kreste Yesu,+
7 leswaku ka nkama lowu taka, xi hi komba timpsalu ta xona tatikulu hi ndlela ya ku hlamalisa hi mhaka ya wunene la xona, hileswi hi nga vadjondzisiwa va Kreste Yesu.
8 Lipfumelo+ li mi ponisile hi mhaka ya timpsalu tatikulu ta Xikwembu. A hi mhaka ya minzamu ya n’wina, kambe i nyiko ya Xikwembu.
9 Phela a mi ponisiwanga hi mintirho ya n’wina,+ leswaku ku nga vi na munhu lweyi a tibumaka hi swona.
10 Hi yendliwe hi Xikwembu+ naswona leswi hi nga vadjondzisiwa va Kreste Yesu,+ hi yendliwe swaku hi yendla mintirho yayinene, leyi Xikwembu xi nga yi lunghiselela khale leswaku hi famba ka yona.
11 Se khumbukani leswaku n’wina a mi Vayuda naswona “vanhu lava nga tsemiwa nsuvu”* hi vanhu, a va mi vitana “vanhu lava kalaka va nga tsemanga nsuvu”.
12 Ka nkama wolowo a mi nga mu tivi Kreste; a mi hambanisiwile ni tiko la Israyele naswona a mi nga kontiwanga ka mintwananu ya xitshembiso;+ a mi hanya misaveni na mi nga na ntshembo naswona a mi nga xi tivi Xikwembu.+
13 Kambe swoswi, leswi mi nga vadjondzisiwa va Kreste Yesu, n’wina lava khale a mi li kule ni Xikwembu mi tshinetiwile kusuhi na xona hi ngati ya Kreste.
14 Hikusa hi yena a nga hi tisela ku rhula,+ a nga yendla swaku mintlawa yimbirhi yi va wun’we+ kutani a diliza khumbi leli a li li xikarhi, leli a li hi hambanisa.+
15 A helise Nawu wa Moxe lowu nga ni minawu hi ku nyikela muzimbha* wa yena leswaku a yendla mintlawa leyimbirhi leyi nga vadjondzisiwa va yena, yi va munhu mun’we wa nyuwani+ ni ku tisa ku rhula,
16 ni ku yi tlhanganisa hi ku helela mintlawa leyimbirhi ya vanhu yi va muzimbha wun’we ka Xikwembu hi mhandzi ya yena ya nxaniso,*+ hikusa a helise ku nyenyana+ hi muzimbha wa yena.
17 A tile naswona a chumayele mahungu ya ku tsakisa ya ku rhula ka n’wina lava a mi li kule hintamu ni Xikwembu, ni ku chumayela ku rhula ka lava nga kusuhi na xona.
18 Hi mhaka ya yena, hina hinkwerhu va mintlawa hayimbirhi hi nga swi kota ku khongela ka Papayi wa hina lweyi a nga tilweni hikusa hinkwerhu hi yamukela moya wa ku kwetsima wa ku fana.
19 Se swoswi a ma ha li vanhu lava taka hi ka tiko lin’wani,+ kambe se mi vuliwa va tiko lin’we+ ni vakwetsimi naswona mi lumba ndjangu wa Xikwembu.+
20 Kutani mi yakiwe henhla ka masungulo ya vapostolo ni vaprofeta;+ kasi Kreste Yesu, yena i ribye la lisima swinene la masungulo.+
21 Yindlo hinkwayu leyi twananaka na yena, leyi tlhanganisiwaka hi ku twanana,+ ya kula yi va tempele ya ku kwetsima ya Yehovha.*+
22 Leswi mi twananaka na Kreste, Xikwembu xi yendle leswaku n’wina ni van’wani mi va yindlo leyi xi tshamaka ka yona hikusa moya wa xona wa ku kwetsima wu na n’wina.+
Tinhlamunselu ta le hansi
^ Kumbe: “ku hamba circuncisão”.
^ Hi Xigriki: “nyama”.
^ Vona Ntlhamuselo.
^ Vona Xiyengetelo A5.
