Varoma 15:1-33
15 Kambe hina hi nga tiya hi fanele hi tiyiselela ku tsandzeka* ka lava kalaka va nga tiyanga,+ ku nga li ku yendla swilo leswi tsakisaka hina ntsena.+
2 Mun’wani ni mun’wani wa hina a a yendleli van’wani swaswinene leswaku a va tiyisa.+
3 Hikusa hambi Kreste a nga yendlanga swa ku tsakisa yena n’winyi,+ kambe hilaha swi nga tsalisiwa xiswona: “Lava ku rhuketelaka va rhuketela na mina.”+
4 Hikusa hinkwaswu leswi nga tsaliwa khale swi tsaleliwe ku djondzisa hina.+ Hi ni ntshembo+ hi mhaka ya ku tiyisela+ ka hina ni hi leswi hi tiyisiwaka hi Matsalwa.
5 Ni navela swaku Xikwembu lexi hi pfunaka ku tiyisela xi tlhela xi hi tiyisa, xi mi pfuna ku va ni mimpimiso ya ku fana ni leyi Kreste Yesu a a li na yona,
6 leswaku hi ku twanana+ ni hi rito lin’we mi ta dzunisa Xikwembu lexi nga Papayi wa Hosi ya hina Yesu Kreste.
7 Kutani yamukelanani,+ ku fana ni leswi Kreste na yena a nga mi yamukelisa xiswona+ hi ku lava ku dzunisa Xikwembu.
8 Hikusa na mi byela swaku Kreste a ve mutirhi wa Vayuda+ leswaku a kombisa ku tshembeka ka Xikwembu ni ku tiyisekisa switshembiso leswi xi nga swi yendla ka vavhovho va vona,+
9 ni leswaku vamatiko va ta dzunisa Xikwembu hi mhaka ya timpsalu ta xona.+ Hilaha Matsalwa ma vulisaka swona ma ku: “Hi yona mhaka leyi ni nga ta ku dzunisa xikarhi ka vamatiko ni tlhela ni yimbelela tinsimu ta ku dzunisa vito la wena.”+
10 Naswona xi li: “Tsakani n’wina vamatiko ni vanhu va yena.”+
11 Xi tlhela xi ku: “Dzunisani Yehovha n’wina matiko, vanhu hinkwavu a va mu dzunise.”+
12 Naswona Esaya a li: “Ku ta va ni limintsu la Yese+ naswona ku ta humelela mun’wani a fuma matiko+ naswona matiko ma ta mu tshemba.”+
13 Ni navela swaku Xikwembu lexi nyikaka ntshembo xi nga mi tata hi ku tsaka hinkwaku ni ku rhula hikusa ma xi tshemba, ni leswaku mi ta va ni ntshembo wawukulu hi matimba ya moya wa ku kwetsima.+
14 Vamakwerhu, na tiyiseka swaku mi tale hi wunene ni wutivi hinkwalu naswona ma swi kota ku djondzisana.
15 Kambe ni mi tsalele timhaka tin’wani ta ku fana ni leti na ni nga djikadjiki swaku mi swi khumbuka. Ni yendla leswo hi mhaka ya timpsalu tatikulu leti ni nga kombiwa tona hi Xikwembu.
16 Ni mutirhi wa Kreste Yesu ka vamatiko.+ Ni hisekela ku yendla ntirho wa ku kwetsima wa ku chumayela mahungu ya ku tsakisa ya Xikwembu,+ swaku va va gandzelo leli yamukelekaka ka Xikwembu naswona li nga kwetsimisiwa hi moya wa ku kwetsima.
17 Na tsaka hileswi ni nga mudjondzisiwa wa Kreste Yesu ni leswi ni yendlaka ntirho wa Xikwembu.
18 Hikusa a ni nge he vulavuli hi minchumu yin’wani kambe ntsena leswi Kreste a nga swi yendla hi ku tirhisa marito ni mintirho ya mina, swaku ni pfuna vanhu vamatiko swaku va mu yingisa.
19 Va yingisile hi mhaka ya masingita ni swilo swa ku hlamalisa+ leswi nga yendliwa hi matimba ya moya wa ku kwetsima wa Xikwembu. Hi ndlela leyo, ni chumayele mahungu ya ku tsakisa hi Kreste ka tindhawu hinkwatu ku sukela Yerusalema anze Ilirika.+
20 Kutani leswi a ni swi lava a ku nga li ku chumayela mahungu ya ku tsakisa lomu se va nga twa hi ta Kreste, hikusa a ni nga lavi ku yaka henhla ka masungulo ya munhu mun’wani.
21 Hilaha swi nga tsalisiwa xiswona ka Matsalwa: “Lava kalaka va nga byeliwanga nchumu hi ta yena va ta mu vona; ni lava kalaka va nga twanga nchumu hi ta yena va ta swi twisisa.”+
22 Hi leswo swi nga yendla ni nga swi koti ku mi fikela minkama ya yinyingi.
23 Kambe swoswi a ka ha na ndhawu leyi ni kalaka ni nge se chumayela ka yona naswona se ku hundze malembe ya manyingi* na ni navela ku ta ka n’wina.
24 Se loko ni ya Expanya, na tshemba swaku ni ta mi vona naswona mi ta ni heleketa loko se hi tikhorisile xikan’we swa nkamanyana.
25 Kambe swoswi se ni lava ku ya Yerusalema ni ya pfuna vamakwerhu.*+
26 Hikusa vamakwerhu lava nga Makedoniya ni le Akaya va tsakela ku va nyika swilo vamakwerhu lava nga swisiwana, lava nga Yerusalema.+
27 Vamakwerhu va swi tsakelile ku yendla leswo hileswi a va va devha. Xikweneti xa vona hileswi vamakwerhu va le Yerusalema va nga va byela swilo leswi taka hi ka Xikwembu. Se vona va devha vamakwerhu va le Yerusalema ku va pambulela tshomba la vona.+
28 Kutani loko ni gamile ku va fikisela swilo* leswi, na swi hlayisekile, ni ta hundza hi koseno ni mi pfuxela loko ni ya Expanya.
29 Na swi tiva swaku loko ni fika seno ni ta mi tisela minkateko ya yinyingi ya Kreste.
30 Kutani na mi kombela vamakwerhu hi Hosi ya hina Yesu Kreste ni hi lirhandzu leli hi nyikiwaka hi moya wa ku kwetsima, swaku mi ni khongelela ka Xikwembu hi mbilu hinkwayu hilaha na mina ni swi yendlisaka xiswona.+
31 Khongelani swaku ni ta ponisiwa+ ka lava kalala va nga li vapfumeli aYudiya, ni swaku ntirho lowu ni wu yendlelaka vamakwerhu aYerusalema wu ta yamukeleka ka vona.+
32 Loko Xikwembu xi swi lava ni ta ta ka n’wina na ni tsakile swaku hi ta tiyisana.
33 Ni navela swaku Xikwembu lexi nyikaka ku rhula xi va na n’wina hinkwenu.+ Amen.
Tinhlamunselu ta le hansi
^ Kumbe: “ku tsana”.
^ Kumbexana: “nkama”.
^ Hi Xigriki: “vakwetsimi.”
^ Kumbe: “minyikelo leyi”.
