Yeremiya 11:1-23
11 Yehovha a vulavule na mina Yeremiya a ku:
2 “Twanani marito ya ntwananu lowu, n’wina vanhu!
“Ma byeli* vanhu va le Yuda ni lava tshamaka Yerusalema
3 u ku: ‘Yehovha Xikwembu xa Israyele a li: “A a rhukiwi munhu lweyi a kalaka a nga ma yingisi marito ya ntwananu lowu,+
4 lawa ni nga ma byela vavhovho va n’wina hi siku leli ni nga va humesa hi lona ka tiko la Gibita,+ lani a va hluphiwa*+ ni ku: ‘Yingisani rito la mina mi yendla hinkwaswu leswi ni mi rhumaka swona; kutani mi ta va vanhu va mina naswona mina ni ta va Xikwembu xa n’wina,+
5 leswaku ni yendla leswi ni nga fungela vavhovho va n’wina, ku nga ku va nyika tiko leli nga tala hi leiti ni wulombe,+ ku nga leswi yendlekaka namuntlha.’”’”
Se ni ku: “Amen,* Yehovha.”
6 Kutani Yehovha a ni byela leswi: “Vula marito lawa hinkwawu ka madoropa ya Yuda ni switaratu swa Yerusalema u ku: ‘Twanani marito ya ntwananu lowu, mi ma yendla.
7 Hikusa ni laye vavhovho va n’wina ku sukela hi siku leli ni nga va humesa hi lona ka tiko la Gibita anze namuntlha, ni va laye hi ku phindhaphindha* ni ku: “Yingisani rito la mina.”+
8 Kambe a va zanga va yingisa; mun’wani ni mun’wani a yo tama a tiwomisa nhloko a landzela mbilu ya yena ya ku biha.+ Kutani ni va khatisile hi ku ya hi leswi ntwananu wu vulaka swona. Ni va rhume swaku va wu yingisa kambe va yalile ku wu yingisa.’”
9 Se Yehovha a ni byela a ku: “Vanhu va le Yuda ni va le Yerusalema va yendle maplanu* ya ku biha.
10 Va tlhelele ka swihoxo swa vavhovho va vona, lava nga yala ku yingisa marito ya mina.+ Na vona va landzelele swikwembu swin’wani va tlhela va swi tirhela.+ Vanhu va tiko la Israyele ni la Yuda va tshike ntwananu wa mina lowu ni nga wu yendla ni vavhovho va vona.+
11 Kutani Yehovha a li: ‘Ni va tisela khombo+ leli va nga ta kala va nga swi koti ku li baleka. Loko va ni kombela swaku ni va pfuna, a ni nga ta va yingisa.+
12 Kutani vanhu lava nga ka madoropa ya Yuda ni lava tshamaka Yerusalema va ta ya ka swikwembu leswi va swi yendlelaka magandzelo swaku va ya kombela ku pfuniwa,+ kambe a swi nga ta swi kota ku va ponisa loko va kumana ni khombo.
13 Hikusa swikwembu swa wena Yuda i swinyingi ku fana ni madoropa ya wena, naswona u yendle maaltari ya manyingi, u yendlela nchumu xa ku danisa.* Maaltari lawa i manyingi ku fana ni switaratu swa Yerusalema, maaltari ya ku yendlela Bali magandzelo.’+
14 “Se wena,* u nga va khongeleli vanhu lava. U nga huweleli mhaka ya vona kumbe u va khongelela+ hikusa a ni nga ta va yingisa loko va huwelela ka mina hi mhaka ya khombo la vona.
15 Hi yini mfanelo leyi vanhu va mina lava ni va rhandzaka va nga na yona ya ku va ka yindlo ya mina,Loko ku tala ka vona va yendla maplanu ya ku biha?
Indjhe va nga sivela khombo hi nyama ya ku kwetsima* loko li va tela?
Indjhe u ta tsaka hi nkama wolowo?
16 Yehovha a tshame a ku vitana swaku u nsinya wawukulu wa mawolivhera,Wa ku saseka lowu psalaka mihandzu yayinene.
Kambe ku twakale guwa lalikulu kutani a ku hisa hi ndzilu,Naswona va tshove tigadja ta wena.
17 “Yehovha murhangeli wa tintsumi, Mubyali wa wena,+ a vule swaku u ta kumana ni khombo hi mhaka ya swilo swa ku biha leswi nga yendliwa hi tiko la Israyele ni la Yuda, lava nga ni kwatisa hi ku yendlela Bali magandzelo.”+
18 Yehovha a ni byelile swaku ni ta swi tiva;Hi nkama wolowo a ni kombile leswi a va li ku swi yendleni.
19 A ni fana ni xinyempfani xa ku rhula lexi yisiwaka ku dlayiweni.
A ni nga ma tivi maplanu lawa va nga ni yendlela wona, va ku:+
“A hi heliseni nsinya ni mihandzu ya wona,A hi mu dlayeni ka tiko la lava hanyaka,Swaku vito la yena li nga ha tshuki li khumbukiwa.”
20 Kambe Yehovha murhangeli wa tintsumi a yavanyisa hi ndlela ya ku lulama;A kambela mimpimiso leyi yenteke* ni mbilu.+
Ni tshiki ni swi vona loko u hakelisa ka vona,Hikusa ni ku byele mhaka ya mina leyi lavaka ku thethiwa.
21 Se Yehovha a vula leswi ka vavanuna va le Anatoti+ lava lavaka ku ku dlaya ni lava nge: “U nga tshuki u profeta hi vito la Yehovha,+ hikusa hi ta ku dlaya”;
22 kutani Yehovha murhangeli wa tintsumi a li: “Ni ta lava swaku va tihlamulela. Madjaha ma ta dlayiwa hi xipada+ naswona vana va vona va ta dlayiwa hi ndlala.+
23 A ku nga ta pona munhu hikusa ni ta tisa khombo ka vavanuna va le Anatoti,+ hi lembe leli va nga ta tihlamulela hi lona.”
Tinhlamunselu ta le hansi
^ Swi tikomba na ku byeliwa Yeremiya.
^ Kumbe: “ka xitiko xa ku dereterisa nsimbi”.
^ Kumbe: “A swi yendlekise swoleswo”.
^ Hi Xiheberu: “ni pfuke nimpundzu ni va laya”.
^ Kumbe: “makungu”.
^ Kumbe: “xikwembu lexi nyenyentsaka.”
^ Ku nga Yeremiya.
^ Ku nga magandzelo lama yendliwaka tempeleni.
^ Hi Xiheberu: “tiyinso”.
