Yeremiya 17:1-27
17 “Xidjoho xa Yuda xi tsaliwe hansi hi xa ku tsala hi xona xa nsimbi.
Xi tsaliwe ka timbilu ta vona hi ponta ya diyamanti*Ni ka timhondzo ta maaltari ya vona,
2 Loko vana va vona va khumbuka maaltari ya vona ni timhandzi ta vona ta Axera*+Leswi nga tlhelweni ka nsinya wawukulu, ahenhla ka maganga,+
3 Ni ka tintshava leti nga khwatini.
Tshomba la wena, xuma xa wena hinkwaxu ni ta swi nyikela swaku swi tekiwa+Ku ta tlhela ku tekiwa ni tindhawu ta wena ta ku gandzela ka tona* hi mhaka ya xidjoho lexi nga tata tiko la wena hinkwalu.+
4 Tshomba leli ni nga ku nyika lona u ta li tshika hi ku swi rhandza.+
Ni ta yendla swaku u tirhela valala va wena ka tiko leli u kalaka u nga li tivi,+Hikusa u tlhavike ku kwata ka mina ku fana ni ndzilu.*+
Ku ta pfurha ku nga timeki.”
5 Yehovha a li:
“A a rhukiwe munhu* lweyi a tshembaka munhu mun’wani,+Lweyi a tshembaka matimba ya munhu mun’wani,*+Lweyi mbilu ya yena yi tshikaka Yehovha.
6 A ta fana ni nsinya lowu nga woxe amananga.
A nge yi kumi minchumu yayinene,Kambe a ta tshama ka tindhawu ta ku woma amananga,Ka tiko la munyu leli ku kalaka ku nga na munhu lweyi a tshamaka ka lona.
7 A katekile munhu* lweyi a tshembaka Yehovha,Lweyi ntshembo wa yena wu nga ka Yehovha.+
8 A ta fana ni nsinya lowu nga byaliwa kusuhi ni mati,Lowu timintsu ta wona ti navaka ti ya ka xinambyani.*
Hambiloko dlambu li hisa hintamu, a nge li twi,Matluka ya yena ma ta tshama na ma sasekile.+
A nge vileli hi lembe la djandza,*Funtshi a nge tshiki ku psala mihandzu.
9 Mbilu yi kanganyisa ngopfu ku tlula swilo hinkwaswu naswona yi ni khombo.*+
I mani lweyi a nga yi tivaka?
10 Mina Yehovha, ni kambela mbilu,+Ni kambela mimpimiso ya le ndzeni,*Swaku ni nyika mun’wani ni mun’wani hi ku ya hi tindlela ta yena,Hi ku ya hi mihandzu ya mintirho ya yena.+
11 Lweyi a kumaka tshomba hi ndlela ya ku biha,A fana ni n’hwarhi* leyi fukamelaka matandza ya ku kala ma nga vekiwanga hi yona.+
Li ta hangalaka loko se a kulile,Hi wugamu a ta va xiphunta.”
12 Xitshamu xa wuhosi lexi phatimaka xi tlakusiwile ku sukela ku sunguleni,Xona i ndhawu ya hina leyi kwetsimaka.+
13 Yehovha Xikwembu xa mina, ntshembo wa Israyele,Hinkwavu lava ku tshikaka va ta danisiwa.
Mavito ya lava ku tshikaka ma ta tsaliwa ka wuthulu,+Hikusa va ku tshikile wena Yehovha, xihlovo xa mati lama hanyaka.+
14 Yehovha Xikwembu xa mina, ni hanyise kutani ni ta hanya.
Ni ponisi kutani ni ta pona,+Hikusa ni dzunisa wena.
15 Ku ni lava ni byelaka va ku:
“Li kwini rito la Yehovha?+
Hi kombela li ta!”
16 Kambe mina a ni tshikanga ku ku landzela leswi u nga murisi,Funtshi a ni li navelanga siku la khombo.
U swi tiva kahle hinkwaswu leswi ni nga swi vula;Swi yendleke phambheni ka wena!
17 U nga ni chavisi.
U ndhawu ya mina ya ku tumbela hi siku la khombo.
18 Lava ni xanisaka a va danisiwe,+Kambe u nga pfumeli swaku mina ni danisiwa.
A va chave,Kambe u nga pfumeli swaku mina ni chava.
Va tisele siku la khombo,+Kutani u va kandzihela u va helisa va ku jii.
19 Yehovha a ni byele leswi: “Famba u ya nyima ka nyanghwa wa vana va vanhu lowu tihosi ta Yuda ti nghenaka ti tlhela ti huma hi wona, ni ka tinyanghwa hinkwatu ta Yerusalema.+
20 U fanele u va byela u ku: ‘Twanani rito la Yehovha n’wina tihosi ta Yuda, vanhu hinkwavu va Yuda ni hinkwavu lava tshamaka Yerusalema, lava nghenaka hi tinyanghwa leti.
21 Yehovha a li: “Tivoneleni mi nga tshuki mi rhwala xidjumba hi siku la Savata kumbe mi xi nghenisa hi tinyanghwa ta Yerusalema.+
22 A mi fanelanga mi humesa swidjumba makaya ka n’wina hi siku la Savata; naswona a mi fanelanga mi tirha.+ Hloniphani siku la Savata, hi ku landza leswi ni nga byela vavhovho va n’wina.+
23 Kambe a va zanga va yingisa, va nonon’hwise timbilu ta vona* va yala ku yingisa ni ku layiwa.”’+
24 “‘“Kambe loko mo ni yingisa,” ku vula Yehovha, “kutani mi nga nghenisi swidjumba hi tinyanghwa ta doropa leli hi siku la Savata naswona mi hlonipha siku la Savata hi ku kala mi nga tirhi hi siku leli,+
25 kutani tihosi ni tindota ta tona leti tshamaka ka xitshamu xa wuhosi xa Davhida+ na tona ti ta nghena hi tinyanghwa ta doropa leli na ti famba hi tinyolo* ni makavhalu, tona ni tindota ta tona, vanhu va Yuda ni lava tshamaka Yerusalema;+ ka doropa leli ku ta tshama vanhu hi nkama wa ku kala wu nga heli.
26 Vanhu va ta ta hi ka madoropa ya Yuda, ka tindhawu leti nga kusuhi ni Yerusalema, ka tiko la Benjamini,+ ka ndhawu leyi kalaka yi nga na maganga ni tintshava,+ ka ndhawu leyi nga ni tintshava ni le Negebi,* va tisa magandzelo ya ku hisiwa,+ magandzelo man’wani,+ magandzelo ya swakudla,+ swinun’hwelisu* ni magandzelo ya ku khensa ka yindlo ya Yehovha.+
27 “‘“Kambe loko mi nga ni yingisi hi ku kala mi nga li hloniphi siku la Savata ni ku rhwala swidjumba mi nghena na swona hi tinyanghwa ta doropa la Yerusalema hi siku la Savata, ni ta hisa tinyanghwa ta lona hi ndzilu, lowu nga ta tlhela wu hisa ni maprediyu* ya Yerusalema+ funtshi ndzilu wa kona a wu nge timiwi.”’”+
Tinhlamunselu ta le hansi
^ Kumbe: “dayimani”.
^ Vona Ntlhamuselo.
^ Hi Xiheberu: “tindhawu ta ku tlakuka”.
^ Kumbexana: “Hikusa ku fana ni ndzilu, u tlhavikiwile hi ku kwata ka mina.”
^ Hi Xiheberu: “a yendlaka nyama yi va voko la yena”.
^ Kumbe: “munhu lweyi a nga ni matimba”.
^ Kumbe: “munhu lweyi a nga ni matimba”.
^ Kumbe: “misele.”
^ Kumbe: “hi lembe la ku kala ku nga na mpfula”.
^ Kumbexana: “a yi daheki.”
^ Hi Xiheberu: “tiyinso”.
^ Ku nga muxaka wa xinyanyani.
^ Hi Xiheberu: “va nonon’hwise tinhamu ta vona”.
^ Kumbe: “tin’qolo; makalichi”.
^ Kumbe: “adzongeni”.
^ Vona Ntlhamuselo.
^ Kumbe: “swihondzo; switezi”.
