Yeremiya 33:1-26
33 Yehovha a tlhela a vulavula na Yeremiya ka wumbirhi, na a ha pfaleliwe ka Kintari* wa Murindzi+ a ku:
2 “Mina Yehovha Muyendli wa misava, mina Yehovha lweyi a nga yi vumba a tlhela a yi tiyisa; Yehovha i vito la mina, ni li:
3 ‘Ni vitane ni ta ku hlamula, ni ta ku byela swilo swaswikulu ni swa ku kala swi nga twisiseki, leswi u kalaka u nga swi tivi.’”+
4 “Hikusa Yehovha Xikwembu xa Israyele a vula leswi hi tiyindlo ta doropa leli ni tiyindlo ta tihosi ta Yuda leti diliziwaka swaku va tivhikela ka mimuru leyi pfunisaka ku hlasela doropa ni ka xipada,+
5 ni lava taka swaku va ta lwa ni Vakalidiya, va tata tindhawu leti hi mintsumbu ya vanhu lava ni nga va dlaya hi mhaka ya ku kwata ka mina, lava wubihi la vona li nga yendla swaku ni va tumbetela nghohe* ya mina vanhu va doropa leli:
6 ‘Ni yendla swaku a hola a tlhela a hanya kahle a nga vabyi,+ ni ta va daha ni ku va nyika ku rhula kakukulu ni ntiyiso.+
7 Ni ta vuyisa swikarawa swa Yuda ni swikarawa swa Israyele,+ naswona ni ta va katekisa ku fana ni leswi ni nga swi yendla ku sunguleni.+
8 Ni ta va basisa ka swidjoho swa vona hinkwaswu+ ni tlhela ni va rivalela swihoxo swa vona ni leswi va kalaka va nga yingisanga nawu wa mina.+
9 Doropa leli li ta yendla swaku ni tsaka loko ni twa vito la lona, li ta yendla swaku matiko hinkwawu ya misava lama twaka hi swilo swaswinene leswi ni nga swi yendlela vanhu va mina ma ni dzunisa ma tlhela ma ni tlakusa.+ Ma ta chava naswona ma ta rhurhumela+ hi mhaka ya hinkwaswu swaswinene ni ku rhula loku ni nga ta ku nyika doropa leli.’”+
10 “Yehovha a li: ‘Ka ndhawu leyi, leyi mi nga ta vula swaku yi hohlokile* a yi na munhu kumbe xifuyu, ka switaratu swa Yerusalema leswi nga wonhekela ni ka madoropa ya Yuda, lani ku kalaka ku nga ha na munhu, ku kalaka ku nga ha tshami munhu kumbe xifuyu, ku ta tlhela ku twiwa
11 ku huwelela ka ku tsaka hintamu,+ rito la lweyi a chadaka ni la lweyi a chadiwaka, rito la lava nge: “Khensani Yehovha murhangeli wa tintsumi, hikusa Yehovha i munene;+ lirhandzu la yena lalikulu a li heli!”’+
“‘Va ta tisa magandzelo ya ku khensa ka yindlo ya Yehovha,+ hikusa ni ta vuyisa swikarawa swa tiko leli ku fana ni le ku sunguleni,’ ku vula Yehovha.”
12 “Yehovha murhangeli wa tintsumi a li: ‘Ka tiko leli, leli nga hohlokela, leli kalaka li nga na munhu kumbe xifuyu ni ka madoropa hinkwawu ya lona, ku ta tlhela ku va ni tindhawu ta ku lusela ka tona leti valusi va nga ta humulisa mintlhambi ya vona.’+
13 “‘Ka madoropa lama nga ka ndhawu ya tintshava, madoropa lama nga ka tindhawu ta ku kala ti nga na maganga, ka madoropa lama nga sul,* ka tiko la Benjamini, ka tindhawu leti nga kusuhi ni Yerusalema+ ni ka madoropa ya Yuda,+ mintlhambi yi ta tlhela yi hundza hi hansi ka mavoko ya lweyi a yi kontelaka,’ ku vula Yehovha.”
14 “‘Phela masiku ma ta,’ ku vula Yehovha, ‘lawa ni nga ta yendla swaswinene leswi ni nga swi tshembisa hi tiko la Israyele ni tiko la Yuda.+
15 Ka masiku wolawo ni ka nkama wolowo ni ta hlukisela Davhida xihluke* xa ku lulama,+ xi ta kombisa wululami ni ku tshembeka tikweni.+
16 Ka masiku wolawo Yuda a ta ponisiwa+ naswona Yerusalema a ta tshama na a hlayisekile.+ A ta vitaniwa hi ndlela leyi: Yehovha I Ku Lulama Ka Hina.’”+
17 “Hikusa Yehovha a li: ‘Minkama hinkwayu ku ta va ni munhu lweyi a humaka ka ndjangu wa Davhida lweyi a nga ta tshama ka xitshamu xa wuhosi xa Israyele,+
18 naswona ka vaprista lava nga Valevhi ku ta tshama na ku ni munhu lweyi a nga ta nyima phambheni ka mina a ni humesela magandzelo ya ku hisiwa, a hisa magandzelo ya swakudla ni ku humesa magandzelo man’wani.’”
19 Yehovha a tlhela a khuluma na Yeremiya a ku:
20 “Mina Yehovha ni li: ‘Loko mo tlula ntwananu wa mina wa nhlikanhi ni ntwananu wa mina wa wusiku, leswaku ku nga ha vi ni nhlikanhi ni wusiku hi nkama wa kona,+
21 hi kona ntwananu wa mina lowu ni nga wu yendla ni mutirheli wa mina Davhida wu nga ta tshoviwa,+ swaku a nga ha vi na n’wana lweyi a nga hosi ka xitshamu xa yena xa wuhosi,+ ni ntwananu lowu ni nga wu yendla ni vaprista lava nga Valevhi, vatirheli va mina wu ta tshoviwa.+
22 Ku fana ni leswi tinyeleti ta le tilweni* ti kalaka ti nga konteki ni misava ya lwandle yi kalaka yi nga pimeki, ni ta yendla swaku vana* va Davhida mutirheli wa mina ni Valevhi lava ni tirhelaka va va vanyingi.’”
23 Yehovha a tlhela a khuluma na Yeremiya a ku:
24 “A wu swi twanga leswi nga vuliwa hi vanhu lava a va ku: ‘Yehovha a ta tshika mindjangu leyimbirhi leyi a nga yi langa’? Va delela vanhu va mina funtshi a va ha va voni na va li tiko.
25 “Yehovha a li: ‘Ku fana ni leswi ni nga tiyisa ntwananu wa mina wa nhlikanhi ni wa wusiku,+ minawu ya tilo ni misava,+
26 a ni nge va tshiki vana* va Yakobe ni va mutirheli wa mina Davhida naswona ka vana va yena ni ta teka vanhu lava nga ta fuma vana va Abrahamu, Izaki na Yakobe. Hikusa ni ta hlengeleta swikarawa swa vona+ ni swi twela wusiwana.’”+
Tinhlamunselu ta le hansi
^ Vona Ntlhamuselo.
^ Kumbe: “kara la”.
^ Kumbe: “i rhumbi”.
^ Kumbe: “dzongeni”.
^ Kumbe: “lweyi a nga ta dla tshomba”.
^ Hi Xiheberu: “vuthu la le tilweni”.
^ Hi Xiheberu: “mbewu”.
^ Hi Xiheberu: “mbewu”.
