Yeremiya 36:1-32
36 Hi lembe la wu 4 la ku fuma ka Yoyakimi+ n’wana wa Yosiya hosi ya le Yuda, Yehovha a vulavule na Yeremiya a ku:
2 “Teka buku* u tsala ka yona marito hinkwawu lawa ni nga ku byela wona hi ku yavanyisiwa ka Israyele na Yuda+ ni matiko hinkwawu,+ ku sukela hi siku la ku sungula leli ni nga vulavula na wena ka masiku ya Yosiya anze namuntlha.+
3 Kumbexana loko vanhu va yindlo ya Yuda va twa hi khombo leli ni lavaka ku va tisela lona, va nga ha tshika tindlela ta vona ta ku biha swaku ni ta va rivalela xihoxo xa vona ni xidjoho xa vona.”+
4 Se Yeremiya a vitana Baruki+ n’wana wa Neriya, a mu byela marito hinkwawu lawa Yehovha a nga mu byela wona, kutani Baruki a ma tsala ka buku leyi songiwaka.+
5 Se Yeremiya a byela Baruki a ku: “Ni pfaleliwile, a ni nge swi koti ku nghena ka yindlo ya Yehovha.
6 Kutani hi wena u faneleke u nghena u ma lerhela henhla marito ya Yehovha lawa ni nga ku byela wona lawa ma nga ka buku leyi u nga yi tsala. Ma lerhi na ma twiwa hi vanhu lava nga ka yindlo ya Yehovha hi siku la ku titsona swakudla; u ta ma lerhela vanhu hinkwavu va Yuda lava taka hi ka madoropa ya vona.
7 Kumbexana Yehovha a ta twa xikombelo xa vona xa ku kombela ku kombiwa timpsalu kutani mun’wani ni mun’wani a tshika tindlela ta yena ta ku biha, hikusa Yehovha a hlaye swaku a va kwatele hintamu vanhu lava.”
8 Se Baruki n’wana wa Neriya a yendla hinkwaswu leswi muprofeta Yeremiya a nga mu rhuma swona; a ma lerhele henhla marito ya Yehovha lawa a ma li ka buku na a li ka yindlo ya Yehovha.+
9 Hi lembe la wu 5 la ku fuma ka Yoyakimi+ n’wana wa Yosiya hosi ya le Yuda, hi wheti ya wu 9, vanhu hinkwavu aYerusalema ni vanhu hinkwavu lava nga ta Yerusalema na va ta hi ka madoropa ya le Yuda va sungule ku titsona swakudla phambheni ka Yehovha.+
10 Se Baruki a ma lerhela henhla marito ya Yeremiya lawa a ma li ka buku na a li ka yindlo ya Yehovha; a ma lerhe na a twiwa hi vanhu hinkwavu, lava a va li ka sala la ku dlela ka lona la Gemariya+ n’wana wa Xafani+ lweyi a a li sekretariyu,* lava a va li ka ndhawu* ya le henhla, ka nyanghwa wa xipfalu xa nyuwani xa yindlo ya Yehovha.+
11 Nkama Mikaya n’wana wa Gemariya n’wana wa Xafani a nga twa marito hinkwawu ya Yehovha lawa a ma li ka buku,
12 a ye ka yindlo ya wuhosi ka kwartu la sekretariyu. Varhangeli hinkwavu lava a va tshame kolanu a ku li: Elixama+ lweyi a a li sekretariyu, Delayi n’wana wa Xemaya, Elinatani+ n’wana wa Akibori,+ Gemariya n’wana wa Xafani, Zedekiya n’wana wa Ananiya ni varhangeli* lavan’wani hinkwavu.
13 Mikaya a va byele marito hinkwawu lawa a nga ma twa nkama Baruki a a lerha buku, na a twiwa hi vanhu.
14 Kutani varhangeli hinkwavu va rhuma Yehudi n’wana wa Netaniya n’wana wa Xelemiya n’wana wa Khuxi swaku a ya byela Baruki, a ku: “Tani ni buku leyi u nga yi lerha na u twiwa hi vanhu.” Se Baruki n’wana wa Neriya a teka buku a famba na yona.
15 Va mu byela va ku: “Hi kombela u tshama hansi, u hi lerhela hi rito la le henhla hi swi twa.” Se Baruki a yi lerhela henhla na va swi twa.
16 Nkama va nga heta ku twa marito wolawo hinkwawu, va txuvukana hi ku chava va gama va byela Baruki va ku: “Hi fanele hi byela hosi marito lawa hinkwawu.”
17 Se va vutisa Baruki va ku: “Hi kombela u hi byela leswi u nga ma tsalisa swona marito lawa hinkwawu. I Yeremiya a nga ku byela wona?”
18 Baruki a va hlamula a ku: “Hi yena a nga ni byela marito lawa hinkwawu se mina ni ma tsala hi tinta ka buku leyi.”*
19 Se varhangeli va byela Baruki va ku: “Famba u ya tumbela wena na Yeremiya funtshi mi nga byeli munhu swaku mi tumbele kwini.”+
20 Kutani va fika va nghena ka kintari wa hosi, va veka buku ka kwartu la Elixama lweyi a a li sekretariyu, se va byela hosi swilo hinkwaswu leswi va nga swi twa.
21 Kutani hosi yi rhuma Yehudi+ swaku a ya teka buku ka kwartu la Elixama lweyi a a li sekretariyu a vuya na yona. Se Yehudi a sungula ku yi lerha na a twiwa hi hosi ni varhangeli hinkwavu lava a va nyime kusuhi na yona.
22 Hosi a yi tshame ka yindlo ya wuxika hi wheti ya wu 9;* aphambheni ka yona a ku ni ndhawu leyi a ku tshiveliwa ndzilu swaku yi tikufumeta.
23 Loko Yehudi se a lerhe 3 kumbe 4 wa swiyenge, hosi a yi handzula xiyenge xolexo hi xikhwa xa sekretariyu yi xi peta ka ndzilu lowu a wu pfurha ka ndhawu leyi a ku tshiveliwe ndzilu ka yona, anze buku hinkwayu yi helela ndzilweni.
24 A hosi ni vatirhi va yona hinkwavu lava nga twa marito lawa hinkwawu a va zanga va chava funtshi a va handzulanga mpahla ya vona hi le xikarhi.
25 Hambileswi Elinatani,+ Delayi+ na Gemariya+ va nga kombela hosi swaku yi nga yi hisi buku, a yi va yingisanga.
26 Hosi yi tlhele yi rhuma Jeramiyele n’wana wa hosi, Seraya n’wana wa Aziriyeli na Xelemiya n’wana wa Abidel swaku va ya khoma Baruki lweyi wa sekretariyu na muprofeta Yeremiya, kambe Yehovha a va tumbetile.+
27 Loko hosi se yi hise buku leyi a yi ni marito lawa Baruki a nga ma tsala na a byeliwa hi Yeremiya, Yehovha a tlhele a vulavula na Yeremiya,+ a ku:
28 “Teka buku yin’wani u tsala marito hinkwawu lawa a ma li ka buku ya ku sungula leyi Yoyakimi hosi ya le Yuda a nga yi hisa.+
29 Byela Yoyakimi hosi ya le Yuda u ku: ‘Yehovha a li: “U hise buku leyi u ku: ‘Hi mhaka muni u tsale u ku: “Hosi ya le Babilona yi ta ta kutani yi helisa tiko leli yi li siya li nga ha na munhu kumbe xiharhi”?’+
30 Se Yehovha a vula leswi hi Yoyakimi hosi ya le Yuda: ‘A ku nga ta va na munhu lweyi a nga ta tshama ka xitshamu xa wuhosi xa Davhida+ naswona ntsumbu wa yena wu ta hisiwa hi dlambu ninhlikanhi wu biwa hi xirhami niwusiku.+
31 Ni ta mu khatisa yena ni vatukulu va yena ni vatirhi va yena hi mhaka ya xihoxo xa vona naswona vona ni lava tshamaka Yerusalema ni vanhu va le Yuda ni ta va tisela khombo leli ni nga vula swaku ni ta va tisela lona,+ kambe a va yingisanga.’”’”+
32 Kutani Yeremiya a teka buku yin’wani a yi nyika Baruki n’wana wa Neriya, lweyi a a li sekretariyu,+ se yena a tsala ka yona leswi Yeremiya a nga mu byela swona, ku nga marito hinkwawu lawa a ma li ka buku leyi Yoyakimi hosi ya le Yuda a nga yi hisa hi ndzilu.+ Ku yengeteliwe marito man’wani ya manyingi ya ku fana na wona.
Tinhlamunselu ta le hansi
^ Hi Xiheberu: “buku ya xikhale leyi a yi yendla hi ku songiwa kunene”.
^ Kumbe: “matsalana; mabalani”.
^ Kumbe: “kintari”. Vona Ntlhamuselo.
^ Kumbe: “vatirhi va le ka yindlo ya wuhosi”.
^ Kumbe: “buku leyi songiwaka.”
^ Ku nga hafu ya wugamu ya Novembro ni hafu ya ku sungula ya Dezembro. Vona Xiyengetelo B15.
