Yeremiya 37:1-21
37 Hosi Zedekiya+ n’wana wa Yosiya a sungule ku fuma a pfaleta Koniya*+ n’wana wa Yoyakimi, hikusa Nebukadinazara* hosi ya le Babilona a mu veke swaku a va hosi ka tiko la Yuda.+
2 Kambe Zedekiya ni vatirhi va yena ni vanhu va tiko a va ma yingisanga marito ya Yehovha lawa a nga va byela wona hi ku tirhisa muprofeta Yeremiya.
3 Hosi Zedekiya a rhume Yewukali+ n’wana wa Xelemiya na Sofaniya+ n’wana wa muprista Mazeya swaku va ya ka muprofeta Yeremiya, va fika va ku: “Hi kombela u hi khongelela ka Yehovha Xikwembu xa hina.”
4 Yeremiya a a ha fambafamba na a chunsekile ka vanhu, hikusa a va nge se mu peta djele.+
5 Masonchwa ya Faru a ma li ku teni na ma ta hi Gibita,+ se Vakalidiya lava a va rhendzele Yerusalema va swi twa. Kutani va tshika ku hlasela Yerusalema.+
6 Se Yehovha a vulavula na muprofeta Yeremiya a ku:
7 “Yehovha Xikwembu xa Israyele a li: ‘Mi fanele mi byela hosi ya le Yuda leyi nga mi rhuma ka mina mi ku: “Phela masonchwa ya Faru lama telaka ku ku pfuna, ma ta boheka ku tlhela ka tiko la wona aGibita.+
8 Vakalidiya va ta vuya swaku va ta lwa ni doropa leli va li hlula va tlhela va li hisa hi ndzilu.”+
9 Yehovha a li: “Mi nga tikanganyisi mi ku: ‘Vakalidiya a va nga ha ta vuya va ta lwa na hina,’ hikusa va ta tlhela va vuya.
10 Hambiloko mo dlaya masonchwa hinkwawu ya Vakalidiya lama lwaka na n’wina ku sala masonchwa lama nga vavisiwa ntsena, ma ta suka ka matende ya wona ma ta hisa doropa leli hi ndzilu.”’”+
11 Nkama masonchwa ya Vakalidiya ma nga tshika ku hlasela Yerusalema hi mhaka ya masonchwa ya Faru,+
12 Yeremiya a suke Yerusalema a ya ka tiko la Benjamini+ swaku a ya kuma ndhawu ya yena xikarhi ka vanhu va ka vona.
13 Kambe nkama a nga fika ka Nyanghwa wa Benjamini, muvoneleli wa vagwardu, lweyi vito la yena a ku li Iriya n’wana wa Xelemiya n’wana wa Ananiya, a khome muprofeta Yeremiya a ku: “U baleka u ya ka Vakalidiya!”
14 Kambe Yeremiya a mu hlamula a ku: “A hi ntiyiso! A ni baleki ni ya ka Vakalidiya.” Kambe Iriya a nga mu yingisanga. A khome Yeremiya a mu yisa ka varhangeli.
15 Kutani varhangeli va mu kwatela Yeremiya,+ va mu ba va gama va mu peta*+ ka yindlo ya Jonathani lweyi a a li sekretariyu;* yindlo leyi a yi txintxiwe yi va djele.
16 Yeremiya a petiwe ka djele leli nga munyama,* ka makwartu lama nga hansi ka misava, lani a nga tshama kona masiku ya manyingi.
17 Hosi Zedekiya a rhuma vanhu swaku va ya mu vitana, a gama a mu vutisa swivutiso na a li yexe ka yindlo ya yena.+ A ku: “Indjhe u ni rito leli taka hi ka Yehovha?” Yeremiya a ku: “Ina, ni na lona,” a gama a ku: “Hosi ya le Babilona yi ta ku hlula!”+
18 Yeremiya a tlhela a vutisa Hosi Zedekiya a ku: “Ni yo ku wonhela yini, wena ni vatirhi va wena ni vanhu lava, mi zaka mi ni peta djele?
19 Va kwini vaprofeta va wena lava nga ku profetela va ku: ‘Hosi ya le Babilona a yi nge ti yi ta lwa na wena ni tiko leli?+
20 Ni kombela u ni yingisa wena hosi ya mina. Ni kombela u ni twela wusiwana. U nga ni tlhelisi ka yindlo ya Jonathani+ lweyi wa sekretariyu, loko wo yendla leswo ni ta ya fa seniyani.”+
21 Se Hosi Zedekiya a vula swaku Yeremiya a petiwa ka djele leli nga ka Kintari* wa Murindzi+ naswona siku ni siku a a nyikiwa pawu la redondu leli taka hi ka Xitaratu* Xa Lava Hambaka Mapawu,+ anze ku hela mapawu adoropeni.+ Yeremiya a tame a tshama ka Kintari wa Murindzi.
Tinhlamunselu ta le hansi
^ Vito la yena lin’wani i Yoyakini na Yekoniya.
^ Hi Xiheberu: “Nebukadretsara”. Ku nga matsalelo ya ku hambana.
^ Hi Xiheberu: “nghenisa ka yindlo ya tinsimbi”.
^ Kumbe: “matsalana; mabalani.”
^ Hi Xiheberu: “yindlo ya xihlovo”.
^ Vona Ntlhamuselo.
^ I vito la ndhawu leyi a va xavisela ka yona.
