Yeremiya 46:1-28
46 Lawa i marito lawa Yehovha a nga ma byela muprofeta Yeremiya hi matiko:+
2 Marito lama yaka Gibita,+ lama vulavulaka hi masonchwa ya Faru Neko+ hosi ya Gibita, lweyi a a li tlhelweni ka Nambu wa Ewufrata naswona a nga hluliwa Karkemixi hi Nebukadinazara* hosi ya le Babilona hi lembe la wu 4 la ku fuma ka Yoyakimi+ n’wana wa Yosiya, hosi ya le Yuda hi lawa:
3 “Lunghisani swivhikelo swaswitsongo ni swaswikulu,Mi tshinela anyimpini.
4 Lulamisani makavhalu mi va henhla ka wona n’wina lava fambaka hi wona.
Lunghekani mi yambala makapaseti ya n’wina ya nyimpi.
Hatimisani matlharhi mi yambala swa ku vhikela xifuva leswi nga yendliwa hi swinsimbani.
5 ‘Hi mhaka muni ni va vona na va chava?
Va tlhelela ndzhaku, tinhenha ta vona ti hluliwile.
Va balekile hi mhaka ya ku chava, tinhenha ta vona a ti txuvukanga ni ndzhaku.
Vanhu hinkwavu va chava,’ ku vula Yehovha.
6 ‘Lweyi a tsutsumaka hintamu a nge baleki ni tinhenha a ti nge baleki.
Anorte* atlhelweni ka Nambu wa Ewufrata,Va tigumulile va wa.’+
7 I mani lweyi a taka ku fana ni Nambu wa Nilu,Ku fana ni minambu leyi tsutsumaka hi matimba?
8 Gibita a ta ku fana ni Nambu wa Nilu,+Ku fana ni minambu leyi tsutsumaka hi matimba,A li: ‘Ni ta khupuka ni ya mbhonya misava.
Ni ta helisa doropa ni lava tshamaka ka lona.’
9 Khupukani, n’wina makavhalu!
Fambani ingi mo hlanya, n’wina tinyolo!*
Tinhenha a ti rhange phambheni,N’wina va le Kuxi ni va le Puti, lava khomaka xivhikelo,+Ni va le Ludi+ lava khomaka va tlhela va tirhisa ligubu.+
10 “Siku lolelo i la Hosi Leyikulu Yehovha murhangeli wa tintsumi, i siku la ku hakelisa, a hakelisa ka valala va yena. Xipada xi ta helisa, xi xurha naswona xi ta timula torha hi ngati ya vona, hikusa Hosi Leyikulu, Yehovha murhangeli wa tintsumi, a lulamisele gandzelo ka tiko la le norte akusuhi ni Nambu wa Ewufrata.+
11 Khupuka u ya Jiliyadi u ya kuma balsamu,+Wena ntombhi ya Gibita.
Mimirhi ya wena hinkwayu ya yinyingi a yi pfuni nchumu,Hikusa a xi kona lexi nga ku dahaka.+
12 Matiko ma yi twile ndlela leyi u nga danisiwa hi yona,+Xirilo xa wena xi tate tiko.
Hikusa nhenha yi wisa nhenha yin’wani,Ti gama ti wa hi wumbirhi ka tona.”
13 Leswi hi leswi Yehovha a nga swi byela muprofeta Yeremiya hi ku ta ka Nebukadinazara* hosi ya le Babilona swaku a ta hlasela tiko la Gibita:+
14 “Swi twaliseni aGibita, mi swi huwelela aMigidoli.+
Swi huweleleni aNofu* ni le Tapanesi.+
Vulani mi ku: ‘Nyimani mi lungheka,Hikusa xipada xi ta helisa hinkwaswu leswi nga matlhelweni ka n’wina.
15 Hi mhaka muni vanhu va wena va matimba va kukuliwile?
A va nyimanga,Hikusa Yehovha a va wise hansi.
16 Va phariheteka na va li vanyingi va gama va wa.
Va byelana va ku:
“Pfukani! A hi tlheleleni ka vanhu va ka hina ni ka tiko la hinaHi mhaka ya xipada xa mona.”’
17 Va huwelele na va li kolanu va ku:‘Faru hosi ya Gibita a khuluma ngopfu, kambe a nga yendli nchumuA tshike nkama* wu hundza.’+
18 ‘Leswi ni hanyaka,’ ku vula Hosi, leyi vito la yona ku nga Yehovha murhangeli wa tintsumi,‘A* ta ta ku fana na Tabori+ xikarhi ka tintshavaKu fana na Karmeli+ kusuhi ni lwandle.
19 Lunghiselani swidjumba swa n’wina leswi mi nga ta famba na swona awukaraweni,N’wina lava tshamaka Gibita.
Hikusa Nofu* a ta va nchumu xa ku chavisa;A ta hisiwa hi ndzilu* a sala a nga na munhu lweyi a tshamaka kona.+
20 Gibita a fana ni xihon’wani xaxitsongo xa ku saseka,Kambe a ta lumiwa hi tinsuna leti taka hi norte.
21 Ni masonchwa ya yena lama nga tholiwa lama nga xikarhi ka yena ma fana ni swihon’wani swa ku nona,Kambe na wona ma tlhele hi ndzhaku ma baleka hinkwawu.
A ma nyimanga,+Hikusa ma fikeliwe hi siku la khombo,Nkama wa ku yavanyisiwa ka wona.’
22 ‘Guwa la yena li fana ni la nyoka leyi balekaka,Hikusa va mu txatxa hi matimba na va khome mabewula,Ku fana ni vavanuna lava tsemaka minsinya.*
23 Va ta tsema khwati la yena,’ ku vula Yehovha, ‘hambileswi a li tikomba na li nga ngheneki.
Hikusa i vanyingi ku tlula mintete, a va konteki.
24 Yi ta danisiwa ntombhi ya le Gibita.
Yi ta nyikeliwa ka vanhu va le norte.’+
25 “Yehovha murhangeli wa tintsumi, Xikwembu xa Israyele a li: ‘Ni khatisa Amoni+ wa le No*+ na Faru, Gibita, swikwembu swa yena+ ni tihosi ta yena, vhela yena Faru ni hinkwavu lava mu tshembaka.’+
26 “‘Ni ta va nyikela ka lava lavaka ku va dlaya, ka Nebukadinazara* hosi ya le Babilona+ ni ka vatirheli va yena. Kambe hi ku famba ka nkama ku ta tlhela ku tshamiwa ka yena ku fana ni khale,’ ku vula Yehovha.+
27 ‘Kambe wena mutirheli wa mina Yakobe u nga chavi,U nga chavi, wena Israyele.+
Hikusa ni ta ku ponisa na u li kuleNi vana* va wena, na va li ka tiko leli va nga ta yisiwa awukaraweni ka lona.+
Yakobe a ta vuya a fika a va ni ku rhula a nga karhatiwi,A va nge chavisiwi hi munhu.+
28 Wena mutirheli wa mina Yakobe u nga chavi hikusa ni na wena,’ ku vula Yehovha.
Ni ta helisa matiko hinkwawu lawa ni nga ku hangalasela xikarhi ka wona,+Kambe wena a ni nge ku helisi.+
Ni ta ku laya* hi mpimu lowu wu ku fanelaka,+A ni nge ku tshiki ni nga ku khatisi.’”
Tinhlamunselu ta le hansi
^ Hi Xiheberu: “Nebukadretsara”. Ku nga matsalelo ya ku hambana.
^ Kumbe: “aN’walungu”.
^ Kumbe: “tin’qolo; makalichi.”
^ Hi Xiheberu: “Nebukadretsara”. Ku nga matsalelo ya ku hambana.
^ Kumbe: “aMemfisi”.
^ Hi Xiheberu: “nkama lowu nga vekiwa”.
^ Ku nga lweyi a nga ta fuma Gibita.
^ Kumbe: “Memfisi”.
^ Kumbexana: “a ta va rhumbi”.
^ Kumbe: “va rholelaka tihunyi.”
^ Ku nga Tabesi.
^ Hi Xiheberu: “Nebukadretsara”. Ku nga matsalelo ya ku hambana.
^ Hi Xiheberu: “mbewu”.
^ Kumbe: “lulamisa”.
