Yoxuwa 14:1-15
14 Leli i tshomba leli Vayisrayele va nga nyikiwa lona ka tiko la Kanana, va nyikiwe lona hi muprista Eliyazari na Yoxuwa n’wana wa Nuni ni varhangeli va tinxaka ta Vayisrayele.+
2 Ku hoxiwe swiribyani*+ swaku ku yaviwa tshomba la vona hi ku ya hi leswi Yehovha a nga byela Moxe swaku a swi yendla ka 9 wa tinxaka ta Israyele ni hafu ya lixaka la Manasi.+
3 Se a hafu leyin’wani ya lixaka la Manasi ni tinxaka timbirhi ta Israyele ti nyikiwe tshomba la tona hi Moxe ka tlhelo* lelin’wanyani la Yordani,+ kambe lixaka la Valevhi a li nyikiwanga tshomba.+
4 A vana va Yosefa a va kontiwa va li tinxaka timbirhi,+ ku nga lixaka la Manasi ni la Efrayimi;+ kambe Valevhi a va nyikiwanga tiko, va yo nyikiwa madoropa+ ya ku tshama ka wona ni ndhawu ya ku lusela ka yona swifuyu swa vona ni ya ku veka minchumu ya vona.+
5 Se Vayisrayele va yavelana tiko hi ku ya hi leswi Yehovha a nga swi byela Moxe.
6 Vavanuna van’wani va lixaka la Yuda va ya ka Yoxuwa aJiligali,+ se Kalebe+ n’wana wa Yefune wa Mukenizi lweyi a a na vona a byela Yoxuwa a ku: “U swi tiva kahle leswi Yehovha Xikwembu xa ntiyiso+ a nga swi hlaya+ hi mina na wena na a byela Moxe aKadexi-Barneya.+
7 A ni ni 40 wa malembe nkama Moxe mutirheli wa Yehovha a nga ni rhuma ni suka aKadexi-Barneya ni ya kambela tiko+ naswona a nkama ni nga vuya ni tise mahungu yamanene.+
8 Hambileswi lava ni nga famba na vona va nga heta vanhu matimba, mina ni landzele Yehovha Xikwembu xa mina hi mbilu hinkwayu.+
9 Moxe a fungile ka mina hi siku lolelo a ku: ‘Ni ta ku nyika tiko leli u nga famba ka lona li va tshomba la wena ni vana va wena hi masiku ni masiku, hikusa u landzele Yehovha Xikwembu xa mina hi mbilu hinkwayu.’+
10 Yehovha a ni hlayisile+ ka malembe lawa ya 45 hi ku ya hi leswi a nga ni tshembisa swona,+ ku sukela nkama lowu Yehovha a nga yendla xitshembiso lexi ka Moxe nkama Vayisrayele a va li mananga;+ ni swoswi na ha hanya naswona ni ni 85 wa malembe.
11 Ni swoswi na ha ni ntamu ku fana ni siku leli Moxe a nga ni rhuma hi lona, ntamu lowu a ni li na wona hi nkama lowuyani wa ku ya nyimpini, ni ku yendla mintirho yin’wani ni swoswi na ha li na wona.
12 Se ni kombela u ni nyika ndhawu leyi ya tintshava, leyi Yehovha a nga ni tshembisa yona siku leliyani. Hambileswi u nga swi twa siku leliyani swaku seniyani ku ni madoropa ya Vaanaki+ lawa ma nga ni mimuru ya ku tiya,+ na tshemba swaku Yehovha a ta va na mina+ naswona ni ta va hlongola hi ku ya hi leswi Yehovha a nga ni tshembisa swona.”+
13 Se Yoxuwa a katekisa Kalebe n’wana wa Yefune a gama a mu nyika doropa la Hebroni swaku li va tshomba la yena.+
14 Hi leswi nga yendla swaku ku ta fika ni swoswi Hebroni a va tshomba la Kalebe n’wana wa Yefune wa Mukenizi, hikusa a yingise Yehovha Xikwembu xa Israyele hi mbilu hinkwayu.+
15 A doropa la Hebroni a li tiviwa swaku i Kiriyati-Ariba+ (Ariba a a li nhenha ya Vaanaki). Ku game ku va ni ku rhula ka tiko hinkwalu ku nga ha lwiwi nyimpi.+
