Yoxuwa 24:1-33
-
Yoxuwa a tlhamusela leswi wutomi la Vayisrayele li nga va xiswona (1-13)
-
Vayisrayele va byeliwa swaku va tirhela Yehovha (14-24)
-
“Kambe mina ni ndjangu wa mina, hi ta tirhela Yehovha” (15)
-
-
Yoxuwa a yendla ntwananu ni Vayisrayele (25-28)
-
Yoxuwa a fa a gama a lahliwa (29-31)
-
Marhambu ya Yosefa ma lahliwa aXikemi (32)
-
Eliyazari a fa a gama a lahliwa (33)
24 Kutani Yoxuwa a hlengeleta tinxaka hinkwatu ta Israyele aXikemi, a vitana madoda ya vona, varhangeli va vona, vayavanyisi va vona ni tindhuna ta vona.+ Se va fika va nyima phambheni ka Xikwembu xa ntiyiso.
2 Yoxuwa a gama a byela vanhu hinkwavu a ku: “Yehovha Xikwembu xa Israyele a li: ‘Khale+ vavhovho va n’wina,+ Tera papayi wa Abrahamu na Nakori, a va tshama kusuhi ni Nambu wa Ewufrata, naswona a va tirhela swikwembu swin’wani.+
3 “‘Hi ku famba ka nkama, ni teke vhovho wa n’wina Abrahamu+ akusuhi ni Nambu wa Ewufrata, ni mu fambisa ka tiko hinkwalu la Kanana ni tlhela ni mu katekisa a va ni vana va vanyingi.+ Ni mu nyike Izaki,+
4 kutani Izaki ni mu nyika Yakobe na Esawu.+ Se Esawu ni game ni mu nyika Ntshava ya Seyiri swaku a tshama ka yona;+ kasi Yakobe ni vana va yena va ye Gibita.+
5 Hi ku famba ka nkama, ni rhume Moxe na Aroni,+ kutani ni hlasela tiko la Gibita hi leswi ni nga swi yendla xikarhi ka lona,+ se ni mi humesa.
6 A nkama na ni humesa vavhovho va n’wina aGibita,+ kutani mi fika lwandle, Vagibita va txatxe vavhovho va n’wina hi tinyolo* ta nyimpi ni vafambisi va makavhalu anze va ya fika ka Lwandle la Ku Pshuka.+
7 Se vavhovho va n’wina va sungula ku rilela Yehovha+ kutani a tisa munyama xikarhi ka n’wina ni Vagibita, a va mbhonya hi lwandle va mbombomela.+ Naswona mi swi vonile hi n’wexe leswi ni nga swi yendla aGibita.+ Mi game mi ya tshama malembe ya manyingi amananga.+
8 “‘Kutani ni mi tise ka tiko la Vaamori lava a va tshama ka tlhelo lelin’wani la Yordani. Va game va lwa na n’wina,+ kambe ni va nyiketile ka voko la n’wina swaku mi teka tiko la vona, naswona ni va helisile phambheni ka n’wina.+
9 Se Balaki n’wana wa Zipori, hosi ya Mowabu, a lwa ni Vayisrayele. Kutani a rhuma vanhu va ya vitana Balamu n’wana wa Beyori swaku a ta mi rhuka.+
10 Kambe a ni zanga ni mu yingisa Balamu.+ Se a mi katekisa hi ku phindhaphindha+ naswona ni mi ponisile ka voko la yena.+
11 “‘Kutani mi tlulele Nambu wa Yordani+ mi za mi fika Yeriko.+ Kutani varhangeli* va Yeriko, Vaamori, Vaperezi ni Vakanana, Vaheti, Vagirgaxa, Vahivhi ni Vayebusi va lwe na n’wina, kambe hinkwavu ka vona ni va nyikele ka voko la n’wina.+
12 Ni yendle swaku va hela matimba* na mi nge se fika ka tiko la vona; leswo hi swona swi nga va hlongola phambheni ka n’wina,+ ku fana ni leswi nga yendleka ka tihosi timbirhi ta Vaamori. A va hluliwanga hi xipada xa n’wina kumbe hi tlharhi la n’wina.+
13 Se ni mi nyike tiko leli mi kalaka mi nga li tirhelanga ni madoropa ya ku kala mi nga ma yakanga,+ naswona mi tshama ka wona swoswi. Mi dla leswi humaka ka masimu ya mawuvha ni ka masiku ya mawolivhera swaku a hi n’wina mi nga swi byala.’+
14 “Se chavani Yehovha mi mu tirhela hi ku tinyimisela ni hi ku tshembeka,+ mi susa swikwembu leswi vavhovho va n’wina va nga swi tirhela kusuhi ni Nambu wa Ewufrata ni le Gibita,+ mi tirhela Yehovha.
15 Loko mi swi vona swi nga li swinene ku tirhela Yehovha, langani namuntlha lweyi mi nga ta mu tirhela;+ kumbe mi lava ku tirhela swikwembu leswi vavhovho va n’wina va nga swi tirhela akusuhi ni Nambu wa Ewufrata+ kumbe swikwembu swa Vaamori lava mi tshamaka ka tiko la vona.+ Kambe mina ni ndjangu wa mina, hi ta tirhela Yehovha.”
16 Kutani vanhu va hlamula va ku: “A hi nge tshuki hi tshika Yehovha hi ya tirhela swikwembu swin’wani.
17 Phela i Yehovha Xikwembu xa hina a nga hi humesa ni vavhovho va hina ka tiko la Gibita+ lani a hi li swikarawa,+ naswona hi yena a nga yendla masingita yamakulu phambheni ka hina+ a tlhela a hi vonelela ka tindlela hinkwatu leti hi nga famba ka tona ni ka vanhu hinkwavu lava hi nga hundza hi ka vona.+
18 Yehovha a hlongole vanhu hinkwavu ku patsa ni Vaamori lava a va tshama ka tiko leli hi tshamaka ka lona swoswi. Se na hina hi ta gandzela Yehovha hikusa i Xikwembu xa hina.”
19 Kutani Yoxuwa a va vutisa a ku: “Indjhe mi ta swi kota ku tirhela Yehovha hikakunene? Phela yena i Xikwembu lexi kwetsimaka;+ lexi lavaka swaku ku tirheliwa xona ntsena.+ A xi nga ta mi rivalela loko mi nga wu yingisi nawu wa xona kumbe mi djoha.+
20 Loko mo tshika Yehovha mi ya tirhela swikwembu swin’wani, na yena a ta mi tshika a tlhela a mi helisa hambiloko se a mi yendlele swilo swaswinene.”+
21 Va gama va mu hlamula va ku: “Ina! Hina hi ta tirhela Yehovha!”+
22 Se Yoxuwa a ku: “N’wina hi n’wexe mi timboni ta leswaku mi yo tilangela ku tirhela Yehovha,+ a mi sindzisiwanga hi munhu.” Va mu hlamula va ku: “Vhela hi timboni.”
23 Yoxuwa a gama a ku: “Susani swikwembu swa matiko leswi nga xikarhi ka n’wina, mi tirhela Yehovha Xikwembu xa Israyele hi mbilu hinkwayu.”
24 Se va mu hlamula va ku: “Hi ta tirhela Yehovha Xikwembu xa hina naswona hi ta yingisa rito la yena!”
25 Kutani Yoxuwa a yendla ntwananu ni vanhu hi siku lolelo, a gama a va nyika minawu aXikemi.
26 Se Yoxuwa a tsala marito lawa ka buku la Nawu wa Xikwembu,+ a gama a teka ribye lalikulu+ a li nyimisa hansi ka nsinya wawukulu lowu nga ka ndhawu leyi kwetsimaka ya Yehovha.
27 Yoxuwa a byela vanhu hinkwavu a ku: “Yingisani! Ribye leli li ta va mboni ya hina,+ hikusa li twe hinkwaswu leswi Yehovha a nga hi byela swona, kutani li ta va mboni leyi kanetanaka na n’wina swaku mi nga djikeli Xikwembu xa n’wina.”
28 Se Yoxuwa a va tshika va muka, mun’wani ni mun’wani a tlhela a ya ka ndhawu ya yena, ku nga tshomba la yena.+
29 Loko leswo swi yendlekile, Yoxuwa n’wana wa Nuni, mutirheli wa Yehovha a fa na a ni 110 wa malembe.+
30 Va mu lahla ka ndhawu leyi nga tshomba la yena aTiminati-Sera,+ ku nga ndhawu ya tintshava ya Efrayimi, hi tlhelo la le norte* ka Ntshava ya Gaxi.
31 Vayisrayele va tame va tirhela Yehovha ka masiku hinkwawu ya Yoxuwa ni le ka masiku hinkwawu ya madoda lawa ma nga sala ma hanya na Yoxuwa se a file, lawa a ma tiva mintirho hinkwayu yayinene leyi Yehovha a nga yi yendlela Vayisrayele.+
32 Marhambu ya Yosefa+ lawa Vayisrayele va nga huma na wona Gibita, ma lahliwe aXikemi ka xiyenge xa nsimu leyi Yakobe a nga yi xava ka vana va Hamori+ papayi wa Xikemi, a yi xave hi 100 wa swikhemu swa prata;+ a nsimu yoleyo yi game yi va tshomba la vana va Yosefa.+
33 Se Eliyazari n’wana wa Aroni na yena a fa.+ Va mu lahla ka ganga la n’wana wa yena Feniyasi,+ leli a a nyikiwe lona ka ndhawu ya tintshava ya Efrayimi.
Tinhlamunselu ta le hansi
^ Kumbe: “tin’qolo; makalichi”.
^ Kumbexana: “vinyi va tiko”.
^ Kumbexana: “va chava”.
^ Kumbe: “n’walungu”.
