1, 2. Hingawu kuma kwihi nsirhelelo namuntlha?

TI VONI na wu famba ndleleni hi siku leli kunga ni xidzedze lexikulu. Le henhla kusungula kumphuma swinene, kuhatima swinene naswona tilo li sungula kudzindza. Hi xihantla kusungula kuna mpfula. U lavetela ndhawu leswaku u tumbela. U sungula kuhefu loko hi wugamu u kuma ka kutumbela na kunga pfuti!

² Namuntlha hi le ka xiyimo lexi fanaka. Misava yiya yi biha swinene. Ungahati vutisa: ‘Ningawu kuma kwihi nsirhelelo?’ Mupisalema a tsale leswi: “Nita vula leswi ka Yehovha: ‘Wena u wutumbelo la mina ni ndhawu ya mina ya xisirhelelo, Xikwembu xa mina, lexi nixi tshembaka.’” (Tipisalema 91:2) Hakunene, Yehovha angahi tshunxa ka swikarhato namuntlha, naswona ahi nyika ntshembo wohlamalisa hi wumundzuku.

3. Yehovha anga va wutumbelo la hina hi ndlela yihi?

³ Angahi sirhelelisa kuyini Yehovha? Angahi pfuna leswaku hi langutana ni swikarhato hinkwaswu leswi hi kumanaka na swona. Nakambe a ni matimba swinene kutlula vanhu hinkwavu lavangaha ringetaka kuhi vavisa. Hambiloko hi humeleliwa hi minchumu yobiha swoswi, hinga tiyiseka leswaku ataswi lunghisa ankameni lowu taka. Bibele lahi tiyisa li ku: ‘Tshamani lirhandzwini la Xikwembu.’ (Yudha 21) Hi fanele hi tama hi li vanghanu va Yehovha loko hi lava leswaku ahi pfuna hi nkama wa swikarhato. Kambe, hingaswi yendlisa kuyini leswo?

4, 5. Yehovha ahi kombisise kuyini lirhandzu la yena?

⁴ Leswaku hi tama hi va vanghanu va Yehovha, hi fanele  hi khumbuka ndlela leyi ahi rhandzaka ha yona. Pimisa hi leswi Yehovha angahi yendlela swona. Ahi nyike misava yosaseka leyi taleke hi minsinya yosaseka ni swihari. A tlhele ahi nyika swakudla swonandziha ni mati lama baseke. Hi kutirhisa Bibele, Yehovha ahi djondzise vito ni wumunhu la yena. Kutlula hinkwaswu, ahi kombise lirhandzu la yena loko a rhumela N’wana wa yena lweyi a rhandzekaka, Yesu, leswaku ata laha misaveni kuva ahi fela. (Yohane 3:16) Naswona a gandzelo lelo li yendla leswaku hi va ni ntshembo wotsakisa swinene hi wumundzuku.

⁵ Yehovha a lunghiselele Mfumu wa Mesiya, kunga mfumu wa matilo lowu kungali khale wungata helisa kuhlupheka hinkwaku laha misaveni. Mfumo lowu wuta yendla misava yi va paradeyisi, laha vanhu hinkwavu vangata hanya hi kurhula ni ntsako hilaha kunga heliki. (Tipisalema 37:29) Ndlela yin’wana leyi Yehovha ahi kombiseke lirhandzu hi yona i kuhi djondzisa ndlela yohanya wutomi loyampsa swoswi. A tlhela ahi rhamba leswaku hi khongela ka yena, nakambe a tinyimisele kuyingisa swikhongelo swa hina. Yehovha a kombise lirhandzu la yena ka hina hinkwerhu.

6. Ungali tlangelisa kuyini lirhandzu la Yehovha?

⁶ Hingali tlangelisa kuyini lirhandzu la Yehovha? Mu kombe leswaku waswi tlangela swilo hinkwaswu leswi angaku yendlela swona. Lexi twisaka kuvava, vanhu votala avaha tlangeli namuntlha. Swi fana ni leswinga yendleka loko Yesu a li laha misaveni. Siku lin’wana, Yesu a dahe 10 wa vanhu lava ava ni mapere, kambe ayo tlangeliwa hi mun’we ntsena. (Luka 17:12-17) Hi lava kufana ni wanuna lwiya angaya tlangela Yesu. Minkama hinkwayu hi lava kumu tlangela Yehovha.

7. Hi fanele himu rhandzisa kuyini Yehovha?

⁷ Na hina haswi lava kukombisa lirhandzu la hina ka Yehovha. Yesu a byele vadjondzisiwa va yena leswaku va  fanele va rhandza Yehovha hi mbilu ya vona hinkwayu, hi moya-xiviri wa vona hinkwawu, ni hi miyanakanyo ya vona hinkwayu. (Lerha Matewu 22:37.) Kasi swi vula yini leswo?

8, 9. Hingaswi kombisa kuyini leswaku hamu rhandza Yehovha?

⁸ Swi yenelile kuvula ntsena leswaku hamu rhandza Yehovha? Nikatsongo. Hingaswi kombisa hi swiyendlo swa hina leswaku hamu rhandza hi mbilu ya hina hinkwayu, moya-xiviri hinkwawu ni hi miyanakanyo ya hina hinkwayu. (Matewu 7:16-20) Bibele li djondzisa leswaku loko hi rhandza Xikwembu, hita yingisa minawu ya xona. Swa karhata? Nikatsongo, hikusa “milawu ya xona ayitiki.” — Lerha 1 Yohane 5:3.

⁹ Loko hi yingisa Yehovha hi hanya wutomi lotsakisa. (Esaya 48:17, 18) Kambe i yini lexingatahi pfuna kutama hi li vanghanu va Yehovha? Ahiswi voneni.

10. Hi mhaka muni u fanele u tama u djondza hi Yehovha?

¹⁰ Uswi yendlise kuyini leswaku u va munghanu wa Yehovha? Hi kutirhisa djondzo ya wena ya Bibele, u tive Yehovha kuyampsa naswona wuxaka la wena na yena li kulile. Wuxaka leli linga fanisiwa ni ndzilo. Tani hi leswi ndzilo wu lavaka tihunyi leswaku wu tama wu pfurha, na wena u fanele u tama u djondza hi Yehovha leswaku wunghanu la wena na yena li tiya. — Swivuriso 2:1-5.

11. Kuta yendleka yini loko u tama u djondza Bibele?

¹¹ Loko u tama u djondza Bibele, uta djondza swilo leswingata khumba mbilu ya wena. Vona leswi vadjondzisiwa va Yesu va titwiseke xiswona loko Yesu ava hlamusela swiprofeto swa Bibele. Va te: “Xana atingapfurhi timbilu ndzeni ka hina, loko ali karhi avulavula na hina ndleleni, na ahipfuletela Matsalwa?” — Luka 24:32.

12, 13. a) Kungaha humelela yini hi lirhandzu la hina hi Xikwembu? b) Hinga yendla yini leswaku lirhandzu la hina hi Yehovha li tama li tiya?

 ¹² Hilaha vadjondzisiwa va Yesu vanga khumbiwa timbilu ta vona loko va twisisa Matsalwa, na wena ungaha va u sungule kukuma ntsako loko u ya u twisisa Bibele. Leswo swiku pfune kutiva Yehovha u tlhela umu rhandza. Kutani ungali tshiki lirhandzu lolelo li hola hi kufamba ka nkama. — Matewu 24:12.

¹³ Leswi se unga munghanu wa Xikwembu u fanele u tirha hintamu swinene leswaku wuxaka la n’wina li tiya. U fanele u tama u djondza hi Yehovha na Yesu naswona yanakanyisisa hi leswi uswi djondzaka ni ndlela leyi ungataswi tirhisa hi yona ka wutomi la wena. (Yohane 17:3) Loko uli karhi u lerha kumbe u djondza Bibele, ti vutisi: ‘Leswi swini djondzisa yini hi Yehovha Xikwembu? Hi mhaka muni ni fanele nimu rhandza hi mbilu ya mina hinkwayu ni moya-xiviri hinkwawu?’ — 1 Timotiya 4:15.

14. Xikhongelo xiyi tiyisa kuyini ndlela leyi hi rhandzaka Yehovha hi yona?

 ¹⁴ Hi ntolovelo u vulavula ni munghanu wa wena nkama ni nkama, naswona leswo swi tiyisa wuxaka la n’wina. Hilaha kufanaka, loko hi vulavula na Yehovha hi xikhongelo nkama ni nkama, lirhandzu la hina hi yena la kula. (Lerha 1 Vatesalonika 5:17.) Xikhongelo i xihiwa xa lisima lexi taka hi le ka B’ava wa hina wa le tilweni. Minkama hinkwayu hi fanele hi vulavula na yena swi huma mbilwini. (Tipisalema 62:8) Ahi fanelanga hi phindhaphindha swikhongelo leswi hingaswi dekorara ka nhloko, kambe hi fanele hi vulavula leswi humaka mbilwini. Hakunene, loko hi tama hi djondza Bibele hi tlhela hi khongela swi huma mbilwini, hita tiyisa lirhandzu la hina hi Yehovha.

15, 16. U fanele uwu tekisa kuyini ntirho wochumayela?

¹⁵ Loko hi lava kutama hi va vanghanu va Yehovha, hi fanele hi tlhela hi byela van’wana hi leswi hiswi kholwaka. Kubyela van’wana hi Yehovha i lunghelo lelikulu swinene. (Luka 1:74) I wutihlamuleli leli Yesu anga nyika Vakreste hinkwavu va ntiyiso. Hinkwerhu hi fanele hi chumayela mahungu yotsakisa ya Mfumo wa Xikwembu. Se u sungulile kuwu yendla ntirho lowu? — Matewu 24:14; 28:19, 20.

¹⁶ Mupostola Pawulo a teke ntirho wochumayela ku li wa lisima swinene, awu vitane “xuma”. (2 Vakorinto 4:7) Kubyela van’wana hi Yehovha ni makungu ya yena i ntirho wa lisima swinene lowu ungawu yendlaka. Leyi i yin’wana ya tindlela totirhela Yehovha naswona waswi tlangela leswi umu yendlelaka swona. (Vaheveru 6:10) Loko u chumayela awu pfuni lavaku yingisaka ntsena, phela na wena wa pfuneka. Leswo swi yendla mi tshinela kusuhi na Yehovha naswona mita kuma wutomi lelinga heliki. (Lerha 1 Vakorinto 15:58.) Wu kona ntirho wun’wana lowungaku tiselaka ntsako kutlula lowu?

17. Hi mhaka muni ntirho wochumayela wu li wa xihantla?

 ¹⁷ Ntirho wochumayela i wa xihantla swinene. Kutani hi fanele hi “chumayela Rito”, naswona hi fanele hiswi yendla hi ‘kuhiseka’. (2 Timotiya 4:2) Vanhu va fanele va tiva swokarhi hi Mfumo wa Xikwembu. Bibele li vula leswi: “Siku lelikulu la Yehovha li tshinele! Li kusuhi naswona li tshinela hi kuhantlisa swinene!” Magamu ‘mangata hlwela!’ (Sofoniya 1:14; Habakuku 2:3) Ina, kungali khale, Yehovha ata helisa misava yobiha ya Sathana. Kambe na kungese yendleka leswo, vanhu va fanele va byeliwa leswaku vata langa kutirhela Yehovha.

18. Hi mhaka muni hi fanele hi gandzela Yehovha xikan’we ni Vakreste van’wana va ntiyiso?

¹⁸ Yehovha a lava leswaku himu gandzela xikan’we ni Vakreste van’wana va ntiyiso. Bibele li vula leswi: ‘Ahilaveni tindlela topfuxana, hikombana lirhandzu ni mintirho leyinene. Hingatshukeni hitshika kuhlengeletana, kufana ni leswi van’wana vatoloveleke kuyendla swona, kambe hi khongotelana, ngopfu ngopfu leswi mivonaka leswaku siku la Hosi liya litshunela.’ (Vaheveru 10:24, 25) Hi fanele hi yendla hinkwaswu leswi hingaswi kotaka leswaku hiva kona ka minhlanganu hinkwayu. Yona yihi nyika mukhandlu wa leswaku hi khutazana hi tlhela hi tiyisana.

19. I yini leswingatahi pfuna leswaku hi rhandza vamakwerhu?

¹⁹ Loko uva kona minhlanganwini, uta kuma vanghanu va kahle lavangataku pfuna kuva u gandzela Yehovha. Uta kumana ni vamakwerhu vo hambanahambana, lava yendlaka leswi vaswi kotaka leswaku va gandzela Yehovha kufana na wena. Na vona va yendla swihoxo kufana wena hikusa ava hetisekanga. Loko leswo swi yendleka, tinyimisele kuva rivalela. (Lerha Vakolosa 3:13.) Minkama hinkwayu lwela kuvona wumunhu la kahle ka vamakwerhu. Loko u yendla leswo, switaku pfuna leswaku uva rhandza naswona uta tama u va munghanu wa Yehovha.

20, 21. I yini ‘vutomi la ntiyiso’?

²⁰ Yehovha a lava leswaku vanghanu va yena hinkwavu va hanya wutomi loyampsa hilaha vanga kotaka hi kona. Bibele lihi djondzisa leswaku ka nkama lowu taka wutomi lita yampsa kutlula leli hi li hanyaka namuntlha.

²¹ Ankameni lowu taka, hita hanya hilaha kunga heliki, kunga li 70 kumbe 80 wa malembe ntsena. Hitati khorisa hi ‘vutomi lelingaheliki’, kurhula, wutomi leli hetisekeke ni ntsako ka paradeyisi losaseka. Leswo hi leswi Bibele liswi vitanaka ‘vutomi la ntiyiso.’ Yehovha a tshembisa kuhi nyika wutomi leli la ntiyiso, kambe hi fanele hi yendla hinkwaswu leswi hingaswi kotaka swoswi leswaku hi ‘khoma switiya’ ka lona. — 1 Timotiya 6:12, 19.

22. a) Hingaswi kombisisa kuyini leswaku hi lava ‘vutomi la ntiyiso’? b) Hi mhaka muni swi lava leswaku hiswi tekela nhlokweni leswaku wutomi lelinga heliki i xihiwa xa Yehovha?

²² Hingaswi kombisisa kuyini leswaku hi lava ‘vutomi la ntiyiso’? Hi fanele hi ‘endla leswinene’ hi tlhela hi ‘tala lifuwo la mintirho leyinene’. (1 Timotiya 6:18) Kambe hi fanele hiswi tekela nhlokweni leswaku wutomi lelinga heliki i xihiwa lexi taka hi le ka Xikwembu. Hi mhaka muni? Hikuva hambi ho zama kanjhani, ahinge pfuki hi faneliwili hi wutomi lelinga heliki. Yehovha ata nyika lavamu yingisaka wutomi la ntiyiso hi mhaka ya “musa lowunga faneliwiki”. (Varhoma 5:15) B’ava wa hina wa le tilweni a lava kunyika malandza ya yena yotshembeka xihiwa lexi.

23. Hi mhaka muni u fanele u yendla swiboho swa kahle swoswi?

²³ Ti vutisi: ‘Ni gandzela Xikwembu hi ndlela leyi xiyi yamukelaka?’ Loko u vona leswaku u fanele u yendla kucinca kokarhi, kuyendli hi kuhantlisa. Loko hi tshemba Yehovha naswona hi yendla hinkwaswu leswi hiswi kotaka leswaku himu yingisa, ata va wutumbelo la hina. Ata hlayisa malandza ya yena yotshembeka ka masiku ya wugamu ya  misava ya Sathana. Nakambe ata hetisisa xitshembiso xa yena xa kuva hi hanya hilaha kunga heliki aParadeyisini. Ina, unga va ni wutomi la ntiyiso loko u yendla swiboho leswinene swoswi!