Bibele li vulavula hi mintlawa yimbirhi ya vavanuna lava hlayisaka bandla: ‘valanguteli ni vapfunisi va bandla.’ (Vafilipiya 1:1) Hi ntolovelo, ku ni madoda ni vapfunisi va bandla va kutala mabandleni. Vapfunisi va bandla vahi pfunisa kuyini?

Va pfuna ntlawa wa madoda. Vapfunisi va bandla lavanga vampsha ni lava kuleke va ni wuxaka leli tiyeke na Yehovha naswona va gingiriteka ni kutlhela va tshembiwa. Va yendla mintirho ya lisima leyi lavaka ntamu; kambe minkama yotala va yendla mintirho leyi fambisanaka ni swa michini abandleni. Leswo swi pfuna madoda swaku ma va ni nkama wa kutala wa kudjondzisa ni kuyendzela vamakwerhu swaku va va tiyisa.

Va yendla mintirho ya lisima. Vapfunisi van’wana va bandla va yaviwa kutirha tani hi varindzi swaku va yamukela lava taka mintlhanganwini. Van’wana va tirha ka michini ya mpfumawulo, ka kuhlayisa mabuku, ka swa timale ta bandla ni ka kuyavela swirho swa bandla materitoriyu ya kuchumayela ka wona. Nakambe va tlhela va pfunisa kuhlayisa Yindlo ya hina ya Mfumu. Naswona madoda mangava kombela swaku va pfuna lava gugeke. Vapfunisi va bandla va yendla mintirho hinkwayu leyi va nyikiwaka yona, naswona leswo swi yendla swaku bandla liva hlonipha hi mhaka ya kutikarhata ni kutinyiketela ka vona. — 1 Timotiya 3:13.

Va veka xikombiso xa xinene tani hi vavanuna lavanga Vakreste. Vapfunisi va bandla va langiwa hi leswi vanga ni wumunhu la linene la Wukreste. Vahi tiyisa lipfumelo loko va veka swiyenge mintlhanganwini. Hi kunyikela xikombiso xa xinene ka ntirho wa kuchumayela, vahi pfuna kutama hi hiseka. Leswi va tirhisanaka kahle ni madoda va pfuneta swaku kuva ni kurhula ni ntsaku. (Vaefesa 4:16) Hi kufamba ka nkama, na vona vanga faneleka kutirha tani hi madoda.

• Vapfunisi va bandla i vanhu va kutshamisa kuyini?

• Vali pfunisa kuyini bandla kuva li tirha kahle?