1, 2. Hi wihi ntlhamu lowu Balama awu tirhiseke kuhambukisa vanhu va Yehovha?

MUPHASI wa tihlampfi a ya ka ndhawu leyi a tivaka leswaku ata kuma muxaka wa tihlampfi leti a tilavaka. A tlhoma xinavetiso ka ndzovo ivi axi hoxa matini. A rindzela kuvona leswingata humelela. Kutani loko a vona leswaku a ndzovo yi phasile, hi kuhantlisa a koka hlampfi ayi humesa matini.

² Hi ndlela leyi fanaka, vanhu na vona vanga phasiwa. Hi xikombiso, loko Vayisrayele va li kusuhi ni kunghena ka Tiko Leli Tshembisiweke, va fike va dzima mintxatxa ka Minkova ya Mowabu. Kutani Hosi ya Mowabu yi tshembise kunyika Balama male yotala loko aya rhukana Vayisrayele. Se Balama a kume ndlela ya kuyendla Vayisrayele va tivitanela khombo hi voxe. A tirhise vavasati va Mowabu tani hi ntlhamu. Ava rhumele ka mintxatxa ya Vayisrayele leswaku vaya hambukisa vavanuna va Israyele. — Tinhlayo 22:1-7; 31:15, 16; Nhlavutelo 2:14.

3. Vayisrayele va phasisiwe kuyini hi ntlhamu wa Balama?

³ Kunga va leswaku ntlhamu wa Balama wu tirhile? Ina. Hikusa vavanuna votala swinene va Israyele va ‘yendle wuntunga  la swa masangu (kumbe, kutikhoma hi ndlela yobiha hi tlhelo la masangu) ni tintombhi ta Mowabu’. Naswona va sungule kugandzela swikwembu swa mavunwa, kupatsa na Bali wa Peyori, xikwembu xa kunyenyentsa xa swa masangu. Khombo la kona, 24.000 wa Vayisrayele va file andzelekanwine wa Tiko Leli Tshembisiweke. — Tinhlayo 25:1-9.

4. Hi mhaka muni Vayisrayele votala va yendle wuntunga la swa masangu?

⁴ Hi mhaka muni Vayisrayele votala va phasiwile hi ntlhamu wa Balama? Hikusa ava ni mhaka ni kutitsakisa ntsena kutani va khohlwa ni hinkwaswu leswi Yehovha ava yendleleke swona. Vayisrayele ava ni swivangelo swotala kuva va tshembeka ka Xikwembu. Yehovha ava tshunxile ka wukarawa aGibita, ava hlayisile loko va li khwatini naswona ava khome hi mandla mambirhi anze va fika ndzelekanwine wa Tiko Leli Tshembisiweke va hlayisekile. (Vaheveru 3:12) Kambe va hambukisiwile hi mhaka ya wuntunga la swa masangu. Mupostola Pawulo a te: ‘Hingatshukeni hinghena vuwoswini, kufana ni leswi van’wana va vona vayendliseke swona’. — 1 Vakorinto 10:8.

5, 6. Hi djondza yini ka leswi humeleleke Vayisrayele?

⁵ Phela na hina hi fana ni Vayisrayele lava ava li ndzelekanwini wa Tiko Leli Tshembisiweke hikusa misava leyimpsha yi kola nyongeni. (1 Vakorinto 10:11) Namuntlha, vanhu votala va nghene hi nhloko ka wuntunga la swa masangu kutlula ni nkama wa Vamowabu. Leswo swingahava khumba vanhu va Yehovha. Phela ntlhamu wukulu lowu Sathana awu tirhisaka namuntlha, i kuyendla wuntunga la swa masangu. — Tinhlayo 25:6, 14; 2 Vakorinto 2:11; Yuda 4.

⁶ Kutani ti vutisi: ‘Ni vona swi yampsa kutitsakisa swa xinkamana? Kumbe ni vona swi yampsa kuya hanya  wutomi lotsakisa hilaha kunga heliki amisaveni leyimpsha?’ Kutani i swa lisima kuyingisa xitsundzuxu xa Yehovha lexinge: “Chavani vunghwavana”, leswinge hi fanele hi baleka wuntunga la swa masangu. — 1 Vakorinto 6:18.

7, 8. I yini wuntunga la swa masangu? Hi mhaka muni leyo kuli mhaka ya yikulu?

⁷ Votala namuntlha avaha na tingana naswona avayi hloniphi minawu ya Xikwembu hi swa masangu. Bibele li kombisa leswaku wuntunga la swa masangu i mixaka hinkwayu ya swiyendlo swa masangu leyi yendliwaka hi vanhu lava kalaka vanga chadanga hi kuya hi vonelo la Xikwembu. Leswo swi katsa kufamba masangu ni munhu wa limbewu leli fanaka kumbe kufamba masangu ni swiharhi. Swiyendlo swa kona kungaha va kufamba masangu hi nomo, kufamba masangu hi le ndzhaku kumbe kutitsakisa hi kutlangisa swirho swa mbeleko swa munhu wa kukala unga chadanga na yena. — Vona Nhlamuselo 23.

⁸ Bibele liswi kombisa kahle leswaku loko munhu a tama a yendla wuntunga la swa mansangu, a fanele a susiwa bandleni. (1 Vakorinto 6:9; Nhlavutelo 22:15) Nakambe a munhu lweyi a tikhomaka hi ndlela leyo a tisusa xindzuti ni kutlhela angaha tshembiwi hi vanhu van’wana. Kutikhoma hi ndlela leyo swi tisa swikarhato leswikulu. Swi yendla munhu a biwa hi lipfalu, a kuma nyimba ya kungayi nyimelanga, maguwa wukatini, mavabyi hambi kuhetelela a fa. (Lerha Vagalatiya 6:7, 8.) Loko munhu o nyima a pimisa hi mavuyelo ya wuntunga, aangataswi lava kuswi yendla swoleswo. Kambe vanhu votala hakanyingi vo pimisa hi kutitsakisa ntsena loko va yendla swa masangu. Kambe i yini lexinga sungulaka kubyala timintsu toleto? Swi  sukela ka kuhlalela ponografiya (swilo leswi pfuxaka kunavela kufamba masangu).

9. Hi mhaka muni a ponografiya li ni nghozi?

⁹ Ponografiya li yendleliwe kupfuxa kunavela swa masangu. Namuntlha, li kumeka kun’wana ni kun’wana: ka marevhixta, mabuku, wuyimbeleli, ka minongonoko ya televhizori ni ka interneti. Votala vaswi vona swinga bihanga, kambe kuvula ntiyiso swi ni nghozi swinene. Li yendla munhu ava xikarawa xa swa masangu ni kutshamela kupimisa swilo swobiha. Loko munhu a nghena hi nhloko ka kuhlalela ponografiya, a gama ava ni mukhuva wobiha wa kutitsakisa hi kutlangisa swirho swa mbeleko, ava ni swikarhato awukatini hambi ni kudlaya wukati. — Varhoma 1:24-27; Vaefesa 4:19; vona Nhlamuselo 24.

10. Yakobo 1:14, 15 yingahi pfunisa kuyini kufularhela wuntunga?

¹⁰ I swa lisima kutwisisa nghozi leyinga kona ka kuyendla wuntunga la swa masangu. Yakobo 1:14, 15 yahi tsundzuxa: ‘Munhu mun’wana ni mun’wana waringiwa loko akokiwa ni kuphasiwa hi kunavela ka yena n’winyi. Kutani loko kunavela kukolwile, kupsala xidjoho; xidjoho xona, loko xihetisekile, xipsala lifu.’ Kutani loko hi ngheneliwa hi mimpimiso yobiha, hi fanele hiyi fularhela hi kuhantlisa. Unga pimisi kambirhi loko kutshuka kuhumelela swilo leswi chakeke phambeni ka wena! Tima komputadori kumbe u cinca xitichi. Unga pfumeleli swilo swobiha swi nghena mbilwini ya wena. Hikusa loko swosungula kukula, swingahaku tikela swinene kuswi lawula. — Lerha Matewu 5:29, 30.

11. Yehovha angahi pfunisa kuyini loko hi li ni mimpimiso yobiha?

¹¹ Anga kona lweyi ahi tivaka kahle kutlula Yehovha.  Waswi tiva leswaku ahi hetisekanga. Kambe waswi tiva leswaku hingaswi kota kuhlula kunavela swilo swa kubiha. Ahi byela leswi: ‘Dlayani leswi swinga swa misava ka n’wina, hi leswaku vuwoswi, ni swa nsila, ni kuhisekela swa tingana, ni kunavela lokobiha, ni makwanga, kunga kugandzela swikwembu swa hava.’ (Vakolosa 3:5) Hambileswi swingahi vevukeliki, Yehovha wahi lehisela mbilu ni kutama ahi pfuna. (Tipisalema 68:19) Hi xikombiso, mumpsha mun’wana a phasiwe hi mukhuva wa kuvonetela ponografiya ni kutitsakisa hi kutlangisa swirho swa mbeleko. Kutani vanghanu va yena xikolweni avaswi vona swinga bihanga leswo, kambe yena a te: “Swini hlakate lipfalu! Naswona ni nghene hi nhloko ka wutomi la kuyendla wuntunga la swa masangu.” Kambe aswi vonile leswaku a afanele a lulamisa naswona hi kupfuniwa hi Yehovha, aswi kotile kuwu hlula mukhuva wolowo. Loko kuli leswaku u ni mimpimiso yobiha hi swilo swa masangu, kombela ‘matimba lamakulu, lawa matlulaka hinkwaswu’ ka Yehovha leswaku maku pfuna  kutshama ni mimpimiso leyi baseke. — 2 Vakorinto 4:7; 1 Vakorinto 9:27.

12. Hi mhaka muni hi fanele hi ‘hlayisa mbilu ya hina’?

¹² Solomoni a tsale a ku: “Kutlula swilo hinkwaswu leswi uswi hlayisaka, hlayisa mbilu ya wena, hikuva swihlovo swa wutomi swita hi ka yona.” (Swivuriso 4:23) “Mbilu” ya hina i munhu lweyi hinga yena hi le ndzeni kunga munhu lweyi Yehovha a langutaka yena. Leswi matihlo ya hina maswi langutaka, swingahi khumba hintamu swinene. Yobo a te: “Ni yendle ntwanano ni matihlo ya mina. Kutani ningayi langutisa kuyini ntombhi hi ndlela leyinga faneliki?” (Yobo 31:1) Kufana na Yobo, hi fanele hi lawula leswi hiswi vonaka ni leswi hiswi pimisaka. Naswona kufana ni mupisalema, hi fanele hi kombela Yehovha: “Yendla leswaku matihlo ya mina mangaswi voni swilo leswinga pfuniki nchumu”. — Tipisalema 119:37.

13. I vanghanu va kutshamisa kuyini lava Dina ava langeke?

¹³ Vanghanu va hina vangahi kucetela kuyendla leswinene kumbe leswi humeke ndleleni. Loko u langa vanghanu lava rhandzaka Xikwembu, vataku pfuna kuyendla leswi fanaka. (Swivuriso 13:20; lerha 1 Vakorinto 15:33.) Leswi humeleleke Dina swihi komba lisima la kulanga kahle vanghanu va hina. Dina a ali n’wana wa Yakobo naswona ndjangu wa yena awu gandzela Yehovha. Dina aangali ntunga, kambe a yendle wunghanu ni tintombhi ta Kanana leti atinga gandzeli Yehovha. Vanhu va Kanana ava ni langutelo leli hambaneke ni la Xikwembu hi swa masangu naswona ava tiviwa hi wuntunga la swa masangu. (Levhitika 18:6-25) Hi mhaka ya vanghanu volavo, Dina a tive Xikeme wa Mukanana. Leswi Dina a  axongile, Xikeme a sungule kumu navela. Phela Xikeme a “ahloniphiwa swinene kutlula hinkwavu” va ndjangu wa yena; kambe aanga gandzeli Yehovha. — Genesa 34:18, 19.

14. I yini leswinga humelela Dina?

¹⁴ Xikeme aamu rhandza swinene Dina. Kutani a yendle leswi aaswi lava ka Dina: “Amu khoma”, a gama “amu pfinya.” (Lerha Genesa 34:1-4.) Wubihi lelo li twise Dina kuvava ni ndjangu wa yena hinkwawu. — Genesa 34:7, 25-31; Vagalatiya 6:7, 8.

15, 16. Hingali kumisa kuyini wutlharhi?

¹⁵ Aswi lavi leswaku hi yendla swihoxo swa kufana ni swa Dina leswaku hita za hi djondza leswaku minawu ya Yehovha yi pfuna hina. Bibele li li: “Lweyi a fambafambaka ni wotlhariha ata tlhariha, kambe lweyi a tirhisanaka ni swiphunta, aswingemu fambeli kahle.” (Swivuriso 13:20) Ti nyimiseli kutwisisa “ndlela hinkwayu ya leswinene.” Loko hi yendla leswo, hita fambela kule ni kuhlupheka ni kutivangela swivati swinga fanelanga. — Swivuriso 2:6-9; Tipisalema 1:1-3.

¹⁶ Hinga tlhariha loko hi djondza Bibele, hi khongela ka Yehovha loko hi lava kuyendla swiboho ni kulandzela switsundzuxu swa nandza wotshembeka ni wotlhariha. (Matewu 24:45; Yakobo 1:5) Khumbuka leswaku hinkwerhu ka hina hi tsanile naswona ahi hetisekanga. (Yeremiya 17:9) Kambe, awuta yangulisa kuyini loko u tsundzuxiwa leswaku u le nghozini ya kuyendla swilo leswi chakeke swa wuntunga? Awuta kwata? Kumbe awuta tiveka hansi u pfumela kupfuniwa? — 2 Tihosi 22:18, 19.

17. Nyikela xikombiso xa ndlela leyi ndzayu leyi taka hi ka mutirheli wa Yehovha yingahi pfunaka ha yona.

¹⁷ Pimisa hi leswi: Antirhweni ka makwerhu wokarhi waxisati ku ni wanuna lweyi a sunguleke kunavela makwerhu lweyi, a gama amu rhamba leswaku va huma nyana.  Wanuna lweyi anga tirheli Yehovha kambe a tikomba a li kahle. Loko makwerhu mun’wana waxisati ava vona xikan’we a zama kumu ba ndleve hi khombo lelingaha vaka kona. Ata yangulisa kuyini? Kunga va leswaku ata tinyimelela kumbe ata vona wutlharhi ka ndzayu yoleyo? Phela makwerhu lweyi a pfuniwaka a tibyela leswaku wamu rhandza Yehovha naswona a lava kuyendla leswinene. Kambe loko a ya mahlweni ni wanuna lwiya, kunga va leswaku wa li ‘chava vunghwavana’? Wali baleka wuntunga la swa masangu? Kumbe ata va a kombisa ‘kutshemba mbilu ya yena’? — Swivuriso 22:3; 28:26; Matewu 6:13; 26:41.

18, 19. Hlamusela ndlela leyi Yosefa ali balekeke hi yona wuntunga la swa masangu.

¹⁸ Loko aha li mumpsha, Yosefa a ve xikarawa aGibita. Siku ni siku nsati wa Potifaro a atshamela kumu  sindzisa leswaku va famba masangu. Kambe Yosefa aaswi tiva leswaku leswo aku li xidjoho. Aamu rhandza Yehovha naswona aanga lavi kumu twisa kuvava. Kutani nkama hinkwawu loko nsati wa Potifaro a zama kumu gangisa, Yosefa a ayala. Phela leswi a ali xikarawa aangata suka muntini wa hosi ya yena. Loko siku lin’wana nsati wa Potifaro amu sindzise hi nkanu leswaku a famba masangu yena, Yosefa a pshemukile “a tsutsuma a huma handle.” — Lerha Genesa 39:7-12.

¹⁹ Loko Yosefa awo tshamela kupimisa hi kuyendla wuntunga kumbe kutipimisela na a yetlela ni nsati wa Potifaro, aswitamu tikela swinene kutshembeka ka Yehovha. Kambe ka Yosefa, wuxaka la yena na Yehovha aku li nchumu xa lisima swinene kutlula hinkwaswu. A byele nsati wa Potifaro aku: “N’winyi wa mina anga ni yalelanga nchumu handle ka wena ntsena, hikuva u nsati wa yena. Kutani ninga li yendlisa kuyini wubihi leli lelikulu ni djohela Xikwembu?” — Genesa 39:8, 9.

20. Hiswi tivisa kuyini leswaku swimu tsakisile Yehovha leswi Yosefa angaswi yendla?

²⁰ Yosefa a tshame a tshembekile ka Xikwembu hambileswi a atshama kule ni maxaka yakwe, naswona Yehovha amu katekisile. (Genesa 41:39-49) Yehovha a tsake swinene hi kutshembeka ka Yosefa. (Swivuriso 27:11) I ntiyiso leswaku swingaha karhata kubaleka wuntunga la swa masangu. Kambe khumbuka marito lawa: “Oh n’wina lava rhandzaka Yehovha, nyenyani leswobiha. Yena a hlayisa wutomi la lava tshembekaka va yena; ava ponisa vokweni la lavobiha.” — Tipisalema 97:10.

21. Mumpsha mun’wana amu tekelelise kuyini Yosefa?

²¹ Vanhu va Yehovha va ni xivindzi, hikusa siku ni siku va kombisa leswaku ‘va nyenya leswobiha’ “va rhandza leswinene”. (Amosi 5:15) Kunga khataliseki ntanga ya wena,  ungaswi kota kutshembeka ka Yehovha. Hi xikombiso, a lipfumelo la mumpsha mun’wana li ringiwile axikolweni. Ntombhi yin’wana yimu byele leswaku loko oyi pfuna ka prova la matematika, yita famba masangu na yena. Se a yendle yini mumpsha lweyi? A tekelele Yosefa. A te: “Niswi yale hi kuhantlisa swoleswo. Kutshembeka ka Yehovha, swi yendle ni hlayisa xindzhuti xa mina ni kuva ni lipfalu leli baseke.” Wuntunga linga yendla u “titsakisa [swa] nkarhinyana”, kambe mavuyelo ya kona i swikarhato ni kuhlupheka ntsena. (Vaheveru 11:25) Minkama hinkwayu kuyingisa Yehovha swi tisa ntsaku wa ntiyiso. — Swivuriso 10:22.

22, 23. Yehovha angahi pfunisa kuyini loko hi yendle xidjoho lexikulu?

²² Sathana ata zama kutirhisa swa masangu leswaku ahi phasa; naswona leswo swingaha va xikarhato lexikulu swinene hikusa minkama yin’wana hi tshuka hi va ni mimpimiso yobiha. (Varhoma 7:21-25) Kambe Yehovha wahi twisisa ni kukhumbuka leswaku “hi wuthulu.” (Tipisalema 103:14) Se loko Mukreste o tshuka a yendla xidjoho lexikulu xa kuyendla wuntunga la swa masangu ke? Kunga va leswaku akaha na ntshembo? Aswi tanu. Loko a tisola hi mbilu hinkwayu anga tiyiseka leswaku Yehovha atamu pfuna. Xikwembu xi ‘lunghekile kurivalela’. — Tipisalema 86:5; Yakobo 5:16; lerha Swivuriso 28:13.

²³ Yehovha a tlhela ahi pfuna hi kutirhisa madoda ya bandla lamanga ni lirhandzu, kunga “vanhu [lavanga] tinyiko”. (Vaefesa 4:8, 12; Yakobo 5:14, 15) Madoda lawa ahi nyikeke wona mahi pfuna kuvuyetela wuxaka la hina na Yehovha. — Swivuriso 15:32.

24, 25. Lingahi pfunisa kuyini “wutlharhi” leswaku hi fambela kule ni wuntunga la swa masangu?

²⁴ Leswaku hi yendla swiboho leswinene, hi fanele hi twisisa ndlela leyi minawu ya Yehovha yihi pfunaka ha yona. Ahi lavi kufana ni mumpsha lweyi a hlamuseliwaka ka Swivuriso 7:6-23. Leswi aanga na “wutlharhi”, a phasiwile hi ntlhamu wa kutikhoma hi ndlela yobiha hi ta masangu. Kuva ni wutlharhi ahi kutiva ngopfu. Loko hi ni wutlharhi, hi zama kutwisisa ndlela leyi Xikwembu xi vonaka swilo ha yona hi gama hiswi tirhisa ka wutomi la hina. Khumbuka marito lawa: “Lweyi a kumaka wutlharhi wati rhandza. Lweyi a kunyikaka lisima kutwisisa ata humelela.” — Swivuriso 19:8.

²⁵ Wa tiyiseka hi kuhelela leswaku tindlela ta Xikwembu ti lulamile? Wa kholwa hi kakunene leswaku loko uti landzela uta tsaka? (Tipisalema 19:7-10; Esaya 48:17, 18) Loko waha kanakana, khumbukela swilo hinkwaswu leswinene leswi Yehovha a kuyendleleke swona. Buku ya Tipisalema 34:8 yi li: “Ringani kutani mi vona leswaku Yehovha i munene”. Loko u ya u yendla leswo, uta ya umu rhandza swinene Yehovha. Rhandza leswi aswi rhandzaka ni kunyenya leswi aswi nyenyaka. Tata mimpimiso ya wena hi swilo leswinene — swilo leswinga swa ntiyiso, leswi lulameke, leswi baseke, leswi rhandzekaka ni leswinga ni wunene kumbe kudzuneka. (Vafilipiya 4:8, 9) Kufana na Yosefa lweyi anga pfumelela wutlharhi la Yehovha limu kongomisa ivi swimu fambela kahle, na hina hingaswi kota. — Esaya 64:8.

26. Hita bula hi yini ka ndzima leyi landzelaka?

²⁶ Hambi u li nghwendza kumbe u chadile, Yehovha a lava leswaku u tikhorisa hi wutomi ni kutlhela u tsaka. Tindzima timbirhi leti landzelaka titahi pfuna kuvona leswi hingaswi yendlaka leswaku hi va ni muchadu lowu tsakisaka.