NDZIMA 10
Muchadu — Xihiwa Lexi Taka hi ka Xikwembu
“Goda la tingoti tinharhu alinge tsemeki hi le xikarhi hi kuhantlisa.” — EKLESIASTA 4:12.
1, 2. a) Va rindzela yini vanhu loko vahaku chada? b) Hi swihi swivutiso leswi hingataswi hlamula ka ndzima leyi?
ANAKANYA hi ntsaku lowu nuna na nsati va vaka na wona hi siku la vona la muchadu. Va tsake swinene hi wutomi leli vangata va na lona. Nakambe va ni makungu yotala ni kunavela kokarhi ka muchadu wa vona. Va nyimela kuva ni ntsaku lowukulu ni kutlhela va hambanisiwa hi kufa.
2 Kambe minchadu yotala leyi sungulaka kahle, ayi tami yi va tanu hi nkama woleha. Phela leswaku muchadu wu teka nkama woleha wu tlhela wu tsakisa, nuna na nsati va fanele va kongomisiwa hi Xikwembu. Kutani ahi buleni hi tinhlamulu ta Bibele ka swivutiso leswi landzelaka: Hi wahi mavuyelo man’wana ya muchadu? Loko u lava kuchada, ungamu langisa kuyini lweyi ungata chada na yena? Ungaswi kotisa kuyini kuva nuna kumbe nsati wa kahle? Naswona i yini lexinga pfunaka leswaku muchadu wu tshama nkama wa kuleha? — Lerha Swivuriso 3:5, 6.
NI FANELE NI CHADA?
3. I ntiyiso leswaku munhu a fanele a chada leswaku a tsaka? Hlamusela.
3 Van’wana va pimisa leswaku munhu ango tsaka ntsena loko a chada. Kambe leswo i mavunhwa. Yesu a vule leswaku kuva nghwendza kungaha va xihiwa. (Matewu 19:11, 12) Na yena mupostola Pawulo a vule leswaku swi ni mavuyelo ya swona kuva nghwendza. (1 Vakorinto 7:32-38) Hi wena u faneleke u tiyendlela xiboho xa kuchada. Unga pfumeleli ndhavuku wa wena, vanghanu kumbe maxaka swiku sindzisa kuchada.
4. Hi wahi mavuyelo man’wana ya muchadu lowunene?
4 Bibele li tlhela li vula leswaku na wona muchadu i xihiwa lexi taka hi ka Xikwembu naswona wu ni mavuyelo ya wona. Yehovha a vule leswi ka wanuna wosungula Adamu: “Ahi swinene kuva wanuna aya mahlweni ava yexe. Nitamu yendlela mupfuni, tani hi muhetisisi wa yena.” (Genesa 2:18) Se Yehovha a vumbe Evha leswaku a va nsati wa Adamu. Kutani va vumba ndjangu wa kusungula. Nakambe muchadu wu yendla leswaku loko nuna na nsati vava ni vana, va kota kuwundliwa ka xiyimu lexinene. Kambe xikongomelo xa muchadu ahi kupsala vana ntsena. — Tipisalema 127:3; Vaefesa 6:1-4.
5, 6. Muchadu wunga fananisiwa ni “goda la tingoti tinharhu” hi ndlela yihi?
5 Hosi Solomoni a tsale leswi: “Vambirhi va yampsa kutlula mun’we, hikuva vani hakelo leyinene hikolaho ka ntirho wa vona wa kutika. Hikuva loko mun’we ka vona owa, lweyi mun’wana anga pfuxa munghanu. Kambe swita kuyini hi lweyi awaka na angalina womu pfuxa? . . . Naswona goda la tingoti tinharhu alinge tsemeki hi kuhantlisa.” — Eklesiasta 4:9-12.
6 Muchadu wa wunene wunga yendla leswaku nuna na nsati va va ni vun’we ni kuva vanghanu lavakulu, lava pfunanaka, va chavelelanaka ni kutlhela va sirhelelana. I ntiyiso leswaku lirhandzu lingawu tiyisa muchadu, kambe muchadu wuta va lowu tiyeke ngopfu loko nuna na nsati va gandzela Yehovha. Kutani muchadu wa vona wunga fana ni “goda la tingoti tinharhu”; kumbe goda leli lukiweke hi tingoti tinharhu. Goda lofana ni leli li tiye swinene kutlula goda la tingoti timbirhi ntsena. Muchadu wuta tiya ntsena loko Yehovha a katseka ka wona.
7, 8. Pawulo a vule yini hi muchadu?
7 Loko nuna na nsati se va chadile, vanga yenelisa kunavela ka vona hi swa masangu. (Swivuriso 5:18) Kambe loko munhu a chada hi mhaka ya kulava kufamba masangu ntsena, angaha hetelela a langa munhu lweyi anga faneliki. Kutani Bibele li vula leswaku munhu a fanele a chada loko se a hundzile ka “xiluva xa wumpsha” kunga nkama lowu kunavela ka swa masangu kunga kukulu swinene. (1 Vakorinto 7:36) Swi kahle kuva u tshika nkama lowu wu hundza anze u kota kulawula kunavela ka wena. Kutani hi kona munhu anga kotaka kupimisa kahle a tlhela a yendla xiboho lexinene. — 1 Vakorinto 7:9; Yakobo 1:15.
8 Loko se u pimisa kuchada, swi kahle kuvona swilo hi ndlela leyi swinga ha yona hi kakunene ni kutiva leswaku michadu hinkwayu yi ni swikarhato. Pawulo a vule leswaku lava lavaka kuchada “vataxaniseka” nyameni ya vona. (1 Vakorinto 7:28) Hambi kuli michadu leyi tsakeke yi tshuka yiva ni swikarhato. Kutani loko se u lava kuchada, mu langi kahle nuna kumbe nsati wa wena.
NINGA CHADA NI MUNHU WA KUTSHAMISA KUYINI?
9, 10. Kunga yendleka yini loko hi chada ni munhu lweyi anga gandzeliki Yehovha?
9 Loko unga se langa nuna kumbe nsati, i swa lisima kukhumbuka tshinya leli la nawu: “Mingarhwaleni mpingu wun’we ni lava vangaliki vapfumeli”. (2 Vakorinto 6:14) Mhaka leyi yi fambelana ni leswi aswi yendliwa amasin’wini. Loko swiharhi swimbirhi swi hambana hi kukula ni ntamu wa swona, murimi aangaswi patsi ka kangi [kunga pulangu leli ali vekiwa ka nkolo wa swiharhi swimbirhi] leswaku swi tirha xikan’we masin’wini. Leswo aswingata va kahle ka swiharhi hawumbirhi ka swona hikuva aswita hlupheka. Hilaha kufanaka, muchadu wa munhu lweyi a gandzelaka Yehovha ni lweyi angamu gandzeliki wuta hetelela hi kuva ni swikarhato swotala swinene. Hi mhaka leyo Bibele lihi tsundzuxaka kuva hi chada “ntsena . . . hilaha Hosi yiswi rhandzaka hakona.” Leswi vulaka kuchada ni munhu lweyi a gandzelaka Yehovha. — 1 Vakorinto 7:39.
10 Minkama yin’wana, Vakreste van’wana vaswi vona swi yampsa kuchada ni munhu lweyi anga gandzeliki Yehovha kutlula kutshama voxe. Kambe loko hiyi ba hi makatla ndzayu ya Bibele, mavuyelo ya kona hakanyingi i kuhlupheka ni kuheleliwa hi ntsaku. Hina hi gandzela Yehovha, naswona kumu tirhela i swa lisima swinene ka wutomi la hina. Kutani awuta titwisa kuyini loko swinga koteki kubulela nuna kumbe nsati wa wena hi xiyenge lexi xa lisima ka wutomi la wena? Votala vaswi vone swi yampsa kutshama va li tinghwendza kutlula kuchada ni munhu lweyi angamu rhandziki Yehovha ni kumu gandzela. — Lerha Tipisalema 32:8.
11. Ungamu langisa kuyini nuna kumbe nsati wa kahle?
11 Phela leswo aswi vuli leswaku hinkwavu lava tirhelaka Yehovha vanga va nuna kumbe nsati wa kahle ka wena. Loko u lava kuchada, lavetela munhu lweyi umu tsakelaka naswona mingata hanyisanaka kahle. Rindzela anze u kuma munhu lweyi a lavaka kuyendla swilo leswi fanaka ni swa wena awuton’wini naswona a tekaka kutirhela Yehovha kuli nchumu xosungula ka yena. Ti nyiki nkama wa kulerha ni kuyanakanyisisa hi switsundzuxu swa lisima hi muchadu leswi hi nyikiwaka swona hi nandza wotshembeka. — Lerha Tipisalema 119:105.
12. I xikombiso xihi lexi Abrahamu ahi nyikeke xona loko a langa nsati wa Isaka?
12 Swi tolovelekile ka mindhavuku yin’wana kuva vapsali va langela n’wana wa vona djaha kumbe ntombi leyi angata chada na yona. Va pimisa leswaku vapsali hi vona vaswi tivaka leswinga swinene ka vana va vona. Mukhuva lowo awu tolovelekile nkameni wa kutsaliwa ka Bibele. Kutani loko ndjangu wa wena wu langa kulandzela mukhuva lowu, Bibele lingava pfuna vapsali kutiva muxaka wa munhu lweyi va faneleke vamu lava. Hi xikombiso, Abrahamu hi yena a langeke nsati wa n’wana wa yena Isaka. Kutani xa lisima ka Abrahamu akunga li male kumbe ndhuma ya nsati lwiyani; kambe aku li hi leswi a arhandza Yehovha. — Genesa 24:3, 67; vona Nhlamuselo 25.
NINGA YENDLA YINI LESWAKU NI LUNGHEKELA KUCHADA?
13-15. a) Wanuna anga tilunghiselisa kuyini leswaku a va nuna wa kahle? b) Se wansati na yena anga tilunghiselisa kuyini leswaku a va nsati wa kahle?
13 Loko u lava kuchada, u fanele u tiyiseka leswaku se u lunghekile. Loko u pimisa leswaku se u lunghekile, ahi buleni hi leswi vulaka swona hakunene kulunghekela kuchada. Nhlamulu ya kona yingahaku hlamalisa swinene.
Ti nyike nkama wa kudjondza ni kuyanakanyisisa hi switsundzuxu swa le Bibeleni hi muchadu
14 Bibele li kombisa leswaku nuna na nsati va ni wutihlamuleli leli hambaneke ndjangwini. Kutani a kulunghekela kuchada swi titshege hi kuva wanuna ni wansati va lunghekile kuhetisisa wutihlamuleli la vona. Loko wanuna a pimisa kuchada, a fanele a tivutisa leswaku a lunghekile leswaku ata va mulumuzana ke? Yehovha a nyimela leswaku wanuna a hlayisa nsati ni vana va yena hi tlhelo la nyama ni la mintlhaveko. Xa lisima swinene, wanuna a fanele a hlayisa ndjangu wa yena hi tlhelo la moya leswaku wu gandzela Xikwembu. Bibele li vula leswaku wanuna lweyi anga hlayisiki ndjangu wa yena “abihile kutlula ni lweyi angapfumeliki.” (1 Timotiya 5:8) Kutani loko u li wanuna lweyi a pimisaka kuchada, pimisa hi tshinya leli la nawu: “Lunghiselela ntirho wa wena le handle naswona lunghisa hinkwaswo na wahali ansin’wini; ndzhaku ka leswo tiyakeli munti wa wena.” Hi marito man’wana, nawungese chada tiyiseka leswaku utaswi kota kuva muxaka wa wanuna lweyi Yehovha a lavaka leswaku u va yena. — Swivuriso 24:27.
15 Wansati lweyi a pimisaka kuchada na yena a fanele ati vutisa leswaku ali lunghekelile wutihlamuleli la kuva nsati kumbe mamana. Bibele li kombisa swilo swin’wana leswi wansati wa kahle aswi yendlaka leswaku a hlayisa nuna ni vana va yena. (Swivuriso 31:10-31) Votala namuntlha va pimisa ntsena hi leswi nuna kumbe nsati wa vona a faneleke ava yendlela swona. Kambe Yehovha a lava hi pimisa hi leswi hina hingaswi yendlelaka lweyi hi chadeke na yena.
16, 17. Loko u pimisa hi kuchada, i yini leswi u faneleke uswi tekela nhlokweni?
16 Ungese chada, rhanga u yanakanyisisa hi leswi Yehovha aswi vulaka hi vavanuna ni vavasati. Phela kuva mulumuzana aswi vuli leswaku u fanele u dlisa nsati wa wena mbitsi, umu ba kumbe kumu tlhava hi marito. Mulumuzana wa kahle a tekelela Yesu, lweyi minkama hinkwayu a akombisa lirhandzu ni timpsalu ka lava aava hlayisa. (Vaefesa 5:23) Loko swita ka nsati, na yena a fanele a pimisa hi leswi vulaka swona kuseketela swiboho swa nuna ni kutirhisana na yena. (Varhoma 7:2) A fanele a tivutisa leswaku ataswi kota kutiveka hansi ka wanuna lweyi a kalaka anga hetisekanga ke? Loko a vona leswaku angeswi koti, swingaha yampsa a tama a va nghwendza.
17 Lava chadeke va fanele va karhateka swinene hi ntsaku wa nuna kumbe nsati kutlula wa vona vinyi. (Lerha Vafilipiya 2:4.) Pawulo a te: “Wanuna aarhandze nsati wa yena, kukota loko atirhandza; na yena wansati aave ni xichavu [“lexikulu,” NM] ka nuna wa yena.” (Vaefesa 5:21-33) Wanuna kumbe wansati a fanele a titwa a rhandziwa ni kuhloniphiwa hi lweyi a chadeke na yena. Kambe leswaku muchadu wu famba kahle, wanuna a fanele a titwa a hloniphiwa hi nsati wa yena, kasi wansati na yena a lava kutitwa a rhandziwa hi nuna wa yena.
18. Hi mhaka muni wanuna ni wansati va fanele va tivonela loko vaha namorara?
18 Nkama wa kunamorara wu fanele wu va lowu tsakisaka laha nuna na nsati va kotaka kutivana kahle. Naswona i nkama lowu va faneleke va bulisana swi huma mbilwini leswaku vata kota kuyendla xiboho xa leswaku hakunene va lava kutshama xikan’we wutomi la vona hinkwalu. Loko vaha namorara, wanuna ni wansati vanga djondza ndlela yobulisana ni kuzama kudjondza leswinga mbilwini ya mun’wana hakunene. Loko mhaka ya vona yiya yi wupfa, i swa ntumbuluku kutitwa va rhandzana swinene. Kambe va fanele va lawula mintlhaveko ya vona leswaku vanga yendli swilo swa wuntunga vangase chada. Lirhandzu la ntiyiso litava pfuna kutikhoma. Naswona vangata yendla nchumu ni xin’we lexingata wonha wuxaka la vona xikan’we ni la Yehovha. — 1 Vatesalonika 4:6.
Ka nkama wa kunamorara, wanuna ni wansati vanga djondza ndlela ya kubulisana
NINGA YENDLA YINI LESWAKU MUCHADU WA MINA WU TSHAMA NKAMA WOLEHA?
19, 20. Vakreste vawu vonisa kuyini muchadu?
19 Mabuku yotala ni mafilmi swi hetelela hi muchadu wa kutsakisa swinene. Kambe ka wutomi la hakakunene, a muchadu i masungulu ya swilo. Yehovha a lava leswaku muchadu wu tshama hilaha kunga heliki. — Genesa 2:24.
20 Votala namuntlha va pimisa leswaku muchadu i nchumu xa nkama nyana. Swa vevuka kuchada naswona swa vevuka kudlaya wukati. Kasi van’wana va tibyela leswaku loko kusungula guwa awukatini, i nkama wa kudlaya wukati. Kambe waxi khumbuka xifaniso xa Bibele xa goda la kutiya lelinga lukiwa hi tingoti tinharhu? Phela goda la kufana ni lelo alinge tsemeki hambi ka swiyimu swa kutika swinene. Kutani muchadu wa hina wuta tshama nkama woleha loko hi lavetela Yehovha leswaku ahi pfuna. Yesu a te: ‘Leswi Xikwembu xiswihlanganiseke, swingatshuki swihambanisiwa hi munhu.’ — Matewu 19:6.
21. I yini lexinga pfunaka nuna na nsati leswaku va rhandzana?
21 Hinkwerhu hi ni lomu hi tiyeke kona ni lomu hi tsaneke kona. Swa vevuka kutshamela kuvona swihoxo swa van’wana, ngopfungopfu ka lweyi hinga chada na yena. Kambe leswo switohi hetela ntsaku. Loko hi lwela kuvona wumunhu la kahle ka nuna kumbe nsati wa hina, hinga va ni muchadu lowu tsakeke. Kambe kunga va leswaku swa koteka kudzikisa miyanakanyu ka leswinene kunga li ka swihoxo? Ina swakoteka! Hi xikombiso, Yehovha waswi tiva leswaku ahi hetisekanga, kambe a dzikisa mimpimiso ya yena ka wumunhu la hina lelinene. Pimisa hi loko awo kala angaswi yendli leswo! Mupisalema a te: “Loko awolanguta swihoxo, Oh Yah, kutani i mani lweyi aatakota kunyima amahlweni ka wena, Oh Yehovha?” (Tipisalema 130:3) Lava chadeke vanga tekelela Yehovha hi kuvona leswinga swinene ka nuna kumbe nsati wa vona ni kutlhela va rivalelana hi xihantla. — Lerha Vakolosa 3:13.
22, 23. Abrahamu na Sara va veke xikombiso lexinene hi ndlela yihi ka lava chadeke?
22 Muchadu wunga ya wu tiya hi kufamba ka nkama. Abrahama na Sara vave ni muchadu lowu tekeke nkama woleha naswona va tsakile. Loko Yehovha a byela Abrahama leswaku va suka ka doropa la Uri, swinga yendleka Sara se a ani kolomuya ka kutlula 60 wa malembe. Swinga va swimu karhatelile Sara kutshika munti wa yena wa kahle aya tshama ka matende. Kambe a ali munghanu wa kahle wa nuna wakwe naswona aamu hlonipha. Kutani aswi seketelile swiboho swa Abrahama ni kuyendla leswi angaswi kota leswaku swi humelela. — Genesa 18:12; 1 Petro 3:6.
23 I ntiyiso leswaku akuva ni muchadu lowunene aswi vuli leswaku nuna na nsati vata pfumelelana ka minchumu hinkwayu. Siku lin’wana loko Abrahamu anga pfumelelani na Sara, Yehovha amu byele leswi: “Mu yingisi”. Abrahamu a yingisile naswona va ve ni mavuyelo lamanene. (Genesa 21:9-13) Loko u tshuka unga twanani ni nuna kumbe nsati wa wena, swingaku heti ntamu. A xa lisima i kuva mi khomana hi ndlela ya lirhandzu ni kuhloniphana hambi minga kumani ka minchumu yokarhi.
Bibele li fanele li vumba xiyenge xa muchadu wa wena kusukela akusuguleni
24. Muchadu wa hina wunga yisa kudzuneka ka Yehovha hi ndlela yihi?
24 Ka nhlengeletanu ya Yehovha kutale hi vavanuna ni vavasati lava tsakeke ka michadu ya vona. Loko u lava kuchada, khumbuka leswaku kulanga nuna kumbe nsati i xin’we xa swiboho swa lisima swinene awuton’wini. Swita khumba wutomi la wena hinkwalu. Hi mhaka leyo, lavetela Yehovha leswaku aku pfuna. Loko u yendla leswo, utaswi kota kulanga munhu wa kahle, u tilunghiselela kuchada ni kuzama kuva ni muchadu lowu tiyeke ni lowungata yisa kudzuneka ka Yehovha.
