DJONDZO 42
Bibele Li Vula Yini Hi Ku Chada Ni Ku Kala U Nga Chadi?
Ka tindhawu tin’wana vanhu va kholwa swaku munhu a nge tsaki loko a nga chadanga. Kambe a hi vanhu hinkwavu lava va nga chada va nga tsaka. Naswona a hi vanhu hinkwavu lava kalaka va nga chadanga va kalaka va nga tsakanga. Ntiyiso hi leswaku Bibele li vula swaku kuva munhu a chada kumbe a nga chadi i nyiko leyi taka hi ka Yehovha.
1. Munhu a pfuneka hi yini loko a nga chadanga?
Bibele li li: “Lweyi a chadaka a yentxa kahle, kambe lweyi a tshamaka na a nga chadanga, a yentxa kahle hintamu.” (Lerha 1 Vakorinto 7:32, 33, 38.) Loko munhu a nga chadanga “a yentxa kahle hintamu” hi ndlela yihi? Vakreste lava kalaka va nga chadanga a swi lavi va hlayisa nuna kumbe nsati. Hi mhaka leyo, minkama ya yinyingi va tiyentxela leswi va swi lavaka. Hi xikombiso, va nga tirhisa nkama wa vona swaku va yengetela ntirho wa ku chumayela, va yentxa leswo hi ku rhurha va ya ka ndhawu leyi ku lavekaka hintamu vachumayeli. Ku tlula leswo, va ni nkama wa wunyingi swaku va tiyisa wunghanu la vona na Yehovha.
2. Munhu a pfuneka hi yini loko a tsalise wukati la yena hi ku ya hi nawu?
Loko munhu a nge se chada wa pfuneka, kambe hambiloko a chadile ku ni leswi a pfunekaka hi swona. Bibele li vula swaku “vambirhi va yampsa ku tlula mun’we.” (Eklesiasta 4:9) Leswo i ntiyiso ngopfungopfu ka Vakreste lava hanyaka hi minawu ya Bibele ka muchadu wa vona. Nuna na nsati lava nga chada va tshembisana ku rhandzana, ku hloniphana ni ku tlhela va hlayisana. Loko wanuna ni wansati va chada swa va vhikela, kambe leswo a swi yentxeki ka lava va tshamaka xikan’we na va nga chadanga. Naswona loko wanuna ni wansati va chadile, vana va vona va titwa na va vhikelekile.
3. Yehovha a wu vonisa ku yini muchadu?
Nkama Yehovha a nga chadisa vanhu va ku sungula, a te: “Wanuna a ta siya papayi wa yena ni mamana wa yena a ya namarhela nsati wa yena”. (Genesa 2:24) Yehovha a lava swaku nuna na nsati va rhandzana va tlhela va tshama xikan’we wutomi la vona hinkwalu. Kambe a pfumelela swaku va divhorsiyara kumbe ku tima muchadu ntsena loko nuna kumbe nsati a mbuyeta. Loko leswo swi yentxeka, Yehovha a pfumelela swaku nuna kumbe nsati lweyi a nga djoheliwa a langa swaku a ta tama a tshama na yena kumbe a lava ku tima muchadu. a (Matewu 19:9) Yehovha a nga pfumeleli swaku Vakreste va va ni nuna kumbe nsati wa ku tlula mun’we. — 1 Timotiyu 3:2.
DJONDZA SWIN’WANA
Vona leswi u nga swi yentxaka swaku u tsaka u tlhela u tsakisa Yehovha hambiloko u chadile kumbe u nga chadanga.
4. Yi tirhisi kahle nyiko ya ku kala u nga chadanga
Yesu a a vona kuva munhu a nga chadanga na ku li nchumu wa wunene. (Matewu 19:11, 12) Lerhani Matewu 4:23, mi gama mi bula hi xivutiso lexi landzelaka:
-
Leswi Yesu a a nga chadanga a wu tirhisise ku yini nkama wa yena swaku a tirhela Papayi wa yena ni ku pfuna vanhu van’wana?
Vakreste lava kalaka va nga chadanga va nga swi kota ku tikhorisa hi wutomi ku fana na Yesu. Sixtirani VHIDIYO, mi gama mi bula hi xivutiso lexi landzelaka.
-
Vakreste lava kalaka va nga chadanga va nga wu tirhisisa ku yini nkama wa vona hi ndlela ya yinene?
Indje a wu swi tiva?
Bibele a li vuli swaku munhu a fanele a chada na a ni malembe mangaki kambe li hi pfuna ku vona swaku swi kahle kuva munhu a nyima ku fikela loko “ntanga se yi fanela”, ku nga nkama lowu munhu a kotaka ku yentxa xiboho hi wutlharhi na a nga susumetiwe hi ku navela ku yentxa timhaka ta masangu. — 1 Vakorinto 7:36.
5. Langa kahle munhu lweyi u lavaka ku chada na yena
Ku langa munhu lweyi u lavaka ku chada na yena i xiboho xa lisima swinene lexi u nga xi yendlaka. Lerhani Matewu 19:4-6, 9, mi gama mi bula hi xivutiso lexi landzelaka:
-
Hi mhaka muni Mukreste a nga fanelanga a tsutsumela ku chada na a nge se swi lunghekela?
Bibele li nga ku pfuna ku vona swaku i yini leswi u faneleke u swi kambela ka lweyi u lavaka ku chada na yena naswona xa lisima ka hinkwaswu hi leswaku a fanele a mu rhandza Yehovha. b Lerhani 1 Vakorinto 7:39 na 2 Vakorinto 6:14. Mi gama mi bula hi swivutiso leswi landzelaka:
-
Hi mhaka muni hi fanele hi chada ntsena ni munhu lweyi a tirhelaka Yehovha?
-
U vona swaku Yehovha a nga titwisa ku yini loko hi chada ni munhu lweyi a kalaka a nga mu rhandzi?
Loko ko patsiwa swifuyu swimbirhi swa ku hambana leswaku swi rima xikan’we hinkwaswu swi nga hlupheka. Hi ku fanana, loko Mukreste a chada ni munhu lweyi a kalaka a nga tirheli Yehovha, va ta va ni swikarhatu swa swinyingi ka muchadu wa vona
6. Vona wukati hi ndlela leyi Yehovha a li vonaka hi yona
A khale vavanuna van’wana va Israyele a va tshika vasati va vona hi minchumu ya ku kala yi nga twali. Lerhani Malakiya 2:13, 14, 16, mi gama mi bula hi xivutiso lexi landzelaka:
-
Hi mhaka muni Yehovha a swi nyenya kuva vanhu va tima muchadu hi swivangelo swa ku kala swi nga seketeliwi hi Bibele?
Ku mbuyeta ni ku tima muchadu swi nga tisa ku hlupheka ka munhu lweyi a kalaka a nga djohanga ni ka vana
Sixtirani VHIDIYO, mi gama mi bula hi xivutiso lexi landzelaka.
-
Loko u chade ni munhu lweyi a kalaka a nga mu tirheli Yehovha, u nga yentxa yini swaku mi tsaka ka wukati la n’wina?
7. Tirhisa minawu ya Yehovha leyi vulavulaka hi wukati
Swi nga yentxeka munhu a fanele a tikarhata hintamu swaku a tirhisa leswi Bibele li swi vulaka hi wukati. c Kambe Yehovha wa va katekisa lava yentxaka leswo. Sixtirani VHIDIYO.
Lerhani Vaheberu 13:4, mi gama mi bula hi swivutiso leswi landzelaka:
-
U pimisa swaku swa koteka ku tirhisa leswi Yehovha a swi vulaka hi muchadu? Hi mhaka muni?
Ka matiko ya manyingi mfumu wu lava swaku vanhu va titsalisa hi ku ya hi nawu loko va tekana kumbe loko va tima muchadu naswona Yehovha a nyimela swaku Vakreste va wu yingisa nawu wolowo. Lerhani Tito 3:1, mi gama mi bula hi xivutiso lexi landzelaka:
-
Loko u tekile kumbe u tekiwile, wa tiyiseka swaku wukati la wena u li tsalisile hi ku ya hi nawu?
VANHU VAN’WANA VA NGA HA KU VUTISA VA KU: “Hi mhaka muni swi lava hi chada? A swi nge koteki ku tshama xikan’we na hi nga chadanga?”
-
A wu ta hlamulisa ku yini?
LESWI HI NGA SWI DJONDZA
Ku chada ni ku kala hi nga chadi i nyiko leyi taka hi ka Yehovha. Lava nga chada ni lava kalaka va nga chadanga va nga va ni wutomi la ku tsakisa loko va yentxa ku rhandza ka Yehovha ka wutomi la vona.
Ku kambela leswi hi nga swi djondza
-
Lava kalaka va nga chadanga va nga wu tirhisisa ku yini nkama wa vona hi ndlela ya yinene?
-
Hi mhaka muni Bibele li vula swaku hi fanele hi chada ni munhu lweyi a tirhelaka Yehovha ntsena?
-
Hi xini xivangelo xin’we ntsena lexi nga ka Bibele xa ku tima muchadu?
LOKO U LAVA KU TIVA SWIN’WANA
Swi vula yini ku chada “aHosini ntsena”?
“Swivutiso Swa Vahlayi” (Murindzi wa 1 ka Julho wa 2004 hi Xitsonga)
Sixtira 3 wa mavhidiyo lawa ma nga ku pfunaka ku yentxa swiboho swa swinene mayelana ni ku namorara ni ku chada.
Vona swaku hi mhaka muni makwerhu mun’wana a titwe na Yehovha a mu nyike minchumu ya lisima hintamu ku tlula leyi a nga yi luza.
I mpsini leswi munhu a faneleke a pimisa hi swona na a nge se tima muchadu kumbe ku hambana ni lweyi a nga chada na yena?
“Hlonipha ‘Leswi Xikwembu Xiswihlanganiseke’” (Murindzi wa Dezembro wa 2018)
a Vona Ntlhamuselo 4 lowu vulavulaka hi kuva nuna na nsati va hambana loko va nga mbuyetanga.
b Ka tindhawu tin’wana i vapsali lava langaka swaku i mani lweyi a ta chadaka ni n’wana wa vona. Ka tindhawu toleto vapsali lava nga ni lirhandzu a va rhangi hi ku pimisa hi male kumbe swaku munhu wa kona a ni ndhuma kambe va lava ku tiyiseka swaku wa mu rhandza Yehovha.
c Loko u tshama ni wanuna kumbe wansati na mi nga chadanga, u nga tilangela swaku u ta mu tshika kumbe u ta chada na yena.
