LEMBE linga hela, vamakwerhu vanyingi amisaveni hinkwayo va vekiwe leswaku va va madoda kumbe vapfunisi va madoda. Loko u li mun’wana wa vona, ha tiyiseka leswaku swaku tsakisa kutirhela Yehovha ni vamakwerhu ka xiyavelo lexi xa kuhlawuleka.

Kambe, swinga yendleka u karhateka nyana hi xiyavelo xa wena. Jason, jaha lelinga doda, li vula leswi: “Loko ni vekiwe leswaku ni va doda, ni karhateke swinene.” Moxe na Yeremiya na vona ava tivona vanga faneleki loko va nyikiwe swiyavelo leswimpsha hi Yehovha. (Eksoda 4:10; Yeremiya 1:6) Xana na wena u titwa hi ndlela leyi fanaka? Loko swi li tano, xikombiso xa Timotiya xitaku pfuna leswaku u hetisisa kahle wutihlamuleli la wena ni kuhambeta u yendla nhluvuku. — Mintirho 16:1-3.

Swi tikomba ingaku Timotiya a ali ni 20 wa malembe loko a sungula kufamba na Pawulo ka ntirho wa wurhumiwa. Swinga yendleka Timotiya ati vone anga faneleki kudjondzisa ni kulaya van’wana hileswi aha li jaha. (1 Timotiya 4:11, 12; 2 Timotiya 1:1, 2, 7) Hambileswo, a hambete a yendla nhluvuku. Ndzhaku ka 10 wa malembe, loko a tsalela bandla la le Filipiya, Pawulo a vule leswi: “Ni ni kutshemba ka Hosi Yesu lesvaku kungali khale nitarhuma Timotewu ata le ka n’wina”. Hayini Pawulo a ani kutshemba loku? Wa hlamusela: “Ani na mun’wana lweyi afanaka na yena”. — Vafilipiya 2:19, 20.

Ahi kambisiseni 6 wa swilo leswi madoda mangaswi djondzaka ka Timotiya.

1. Timotiya a ani mhaka ni vanhu. Pawulo a byele vamakwerhu va le Filipiya leswaku Timotiya ‘aatavapfuna hi mbilu hinkwayo’. (Vafilipiya 2:20) Timotiya a alava leswaku vamakwerhu vava ni wuxaka leli tiyeke na Yehovha naswona a atiyimisele kutirhisa nkama ni ntamu wa yena leswaku ava pfuna.

William, lweyi se atlulaka 20 wa malembe na a li doda, a tolovela kubyela vamakwerhu lavaha kuvekiwaka tani hi madoda a ku: “Rhandza vamakwerhu. Matshan’wini ya kukhomelela ka ntirho wotala lowu unga na wona, khatalela swilaveko swa vamakwerhu.” Unga fani ni mufambisi wa xapa lweyi anga liki na mhaka ni vanhu kambe a karhatekaka ntsena hi kufika ka ndhawu leyi a yaka ka yona.

2. Timotiya a aveka ntirho wa Yehovha amahlweni. Pawulo a hlamusele leswaku Timotiya a ahambane swinene ni vamakwerhu van’wana va le nkameni wolowo, lava ‘avatikarhatela ntsena lesvinga sva vona, kungali sva Yesu Kriste’ naswona ava veka wutomi la vona amahlweni ka ntirho wa Yehovha. (Vafilipiya 2:21) Kuhambana na vona, loko kupfuleke mukhandlu wa kuyendla leswi yengetelekeke antirhweni wa Yehovha, Timotiya a hlamule kufana na Esaya aku: “Hi mina lweyi! Nirhume!” — Esaya 6:8.

Xana unga yendla yini leswaku u kota kuringanisela loko u khatalela swilaveko swa wena n’winyi ni swa bandla? Kusungula, “hlawula lesvinga svinene kutlula swin’wana.” (Vafilipiya 1:10) Veka ntirho wa Yehovha amahlweni. Xa wumbirhi, unga khomeki hi mintirho leyingataku hetela nkama ni ntamu wa wena. Pawulo a khutaze Timotiya leswaku a baleka ‘kunavela loku kutelaka vampsha, alandza kululama, kupfumela, ni rirhandzu, ni kurhula.’ — 2 Timotiya 2:22.

3. Timotiya a tinyiketele hintamu antirhweni wa Yehovha. Pawulo a tirhe na Timotiya akuhangalaseni ka mahungu yotsakisa, kufana ni n’wana lweyi a tirhaka ni tatana wa yena. (Vafilipiya 2:22) Timotiya anga li lolo. A tirhe hintamu na Pawulo naswona leswo swi tiyise wuxaka la vona.

 Namuntlha, ku ni ntirho wotala ka nhlengeletano ya Yehovha. Ntirho lowu wa tsakisa hi kakunene naswona wutaku pfuna kuyaka wuxaka ni vamakwerhu van’wana. Hikolaho, lava tindlela ta kuva ni ‘swotala swoswi yendla antirhweni wa Hosi’. — 1 Vakorinto 15:58, NM.

4. Timotiya a atirhisa leswi aaswi djondza. Pawulo a tsalele Timotiya a ku: “Ulandzelelile kujondzisa ka mina ni mahanyela ya mina, makungu ya vutomi bza mina, ni vupfumeli bza mina, kulehisa ka mina mbilu, ni rirhandzu ra mina ni kutiyisela ka mina.” (2 Timotiya 3:10) Hikolaho ka leswi a atirhisa leswi aaswi djondza, Timotiya a nyikiwe wutihlamuleli leli yengetelekeke. — 1 Vakorinto 4:17.

Hayini unga yendli xinghana ni doda lelinga ni ntokoto leli u lavaka kuli tekelela? Tom, lweyi se anga ni malembe manyingi na a li doda, a hlamusela leswaku loko a vekiwe kuva doda, doda lin’wana leli ali ni ntokoto li yendle xinghana na yena leswaku li kota kumu pfuna. A vula leswi: “Minkama hinkwayo ani kombela leswaku ani pfuna naswona ani landza swileleto leswi aani nyika swona. Hi kuhantlisa, leswi swini pfune leswaku ni hetisisa kahle xiyavelo lexi nixi kumeke.”

5. Timotiya a atidjondzisa. Pawulo a khutaze Timotiya a ku: “Tiletele hi xikongomelo xa ku tinyiketela loku nga ni vukwembu.” (1 Timotiya 4:7, NM) Hambiloko xitsutsumi xi ni mudjondzisi, xi fanele xiti trenara. Hi mhaka leyo, Pawulo a byele Timotiya a ku: “Yana emahlweni u tinyiketela eku hlayeni ka le rivaleni, eku khongoteleni, eku dyondziseni . . . Anakanyisisa hi swilo leswi; u dzika eka swona, leswaku ku ya emahlweni ka wena ku vonaka eka vanhu hinkwavo.” — 1 Timotiya 4:13-15, NM.

Na wena u fanele u hambeta u yampsisa wutshila la wena. Vana mudjondzi lweyi a hisekaka wa Bibele naswona tiva nkongomiso wun’wana ni wun’wana wa wumpsha lowu nhlegeletano yiwu nyikelaka. Unga titshembi. Swinga va swi hoxile kupimisa leswaku ntokoto lowu unga na wona wungaku pfuna kululamisa mhaka yin’wana ni yin’wana unga rhanganga hi kuyi kambela. Kufana na Timotiya, “tikambisise hi wexe, ni jondzo leyi uyijondzisaka”. — 1 Timotiya 4:16.

6. Timotiya a atshemba moya lowo kwetsima wa Yehovha. Pawulo a tsundzuxe Timotiya hi ntirho wa yena, loko a ku: “Hlayisa lesvinene lesvivekiweke mavokweni ya wena, hi kupfuniwa hi Moya Lowokwetsima lowuyakeke xikarhi ka n’wina.” (2 Timotiya 1:14) Timotiya a afanele a tshemba moya lowo kwetsima wa Yehovha.

Donaldo, lweyi anga ni malembe manyingi a li doda, a vula leswi: “Lava nyikiweke wutihlamuleli va fanele va hlayisa wuxaka la vona na Yehovha. ‘Ntamu’ wa lava yendlaka leswo ‘wutayengeteleka’. Loko va khongela va kombela moya lowo kwetsima naswona va kombisa handzu wa moya, vata va nkateko lowukulu ka bandla.” — Tipisalema 84:7; 1 Petro 4:11.

Swa khutaza kuvona madoda ni vapfunisi va madoda lava yaka mahlweni va yendla nhluvuku, tanihi hilaha na wena u yendlaka hakona. Jason, lweyi kuvulavuliweke hi yena akusunguleni, a vula leswi: “Malembe hinkwawo lawa ni tirhaka tani hi doda, ni djondze swotala naswona niya niwu hetisisa kahle ntirho wa mina. Swoswi naxi rhandza xiyavelo xa mina naswona nixi teka kuli lunghelo la likulu!”

Xana na wena uta hambeta u yendla nhluvuku? Loko u tekelela xikombiso xa Timotiya, na wena uta va nkateko ka bandla.