Loko hi lerha Bibele hi nga kuma swilo swa lisima leswi nga ta hi pfuna ka wutomi la hina loko hi yendla mapexkiza. Se hi nga pfunekisa ku yini hi mapexkiza lawa hi ma yendlaka?

Pexkizara hi wuyenti swilo leswi u djondzaka hi swona ka Bibele. Hi xikombiso u nga ha tivutisa leswi: I mani lweyi a nga tsala buku leli ni li lerhaka? A a li tsalela mani? A li tsale hi nkama muni? Nkama a nga li tsala a a li ka swiyimu swa ku tshamisa ku yini? I mpsini leswi swi nga yendleka na a nge se li tsala? Naswona i mpsini leswi swi nga yendleka loko se a li tsalile buku leli?

Pimisa hi leswi u swi djondzaka ka mhaka leyi u yi lerhaka. Hi xikombiso tivutisi leswi: ‘A va titwisa ku yini vanhu lava ku vulavuliwaka hi vona ka buku leli? Hi lini wumunhu leli va nga li kombisa? Hi mhaka muni ni fanele ni li tekelela? Naswona hi swini swilo swa ku biha leswi ni faneleke ni fambela kule na swona?’

Tirhisa leswi u nga swi djondza siku ni siku ni loko u chumayela. Loko u yendla leswo u ta va u kombisa wutlharhi hi ku ya hi leswi buku la Tipisalema 107:43 yi swi vulaka loko yi ku: “Lweyi a nga tlhariha a ta vona swilo leswi.”

• Vona Leswi U Nga Swi Yendlaka: Ka mintlhanganu ya xikarhi ka vhiki, ka xiyenge lexi nge Xuma Xi Nga Ka Rito La Xikwembu, ha pfuneka hi ku vona ndlela leyi hi nga swi tirhisaka ha yona leswi hi swi djondzaka ka Bibele. Ka xiyenge lexi hi ntolovelo ku vuya swivutiso leswi hi nga ha tiyendlaka swona, tipontu leti ti hi pfunaka ku vona ndlela leyi hi nga swi tirhisaka hi yona leswi hi swi djondzaka ni mafoto lawa ma hi djondzisaka.