Bibele li hi byela swaku Yehovha a nga vula ka ha li swoswi leswi nga ta yendleka ka nkama lowu taka. (Esa. 45:21) Kambe a li hi byeli swaku a swi yendlisa ku yini, nkama muni ni leswaku i mpsini leswi a langaka ku swi tiva. Se leswo swi lava ku vula leswaku hina a hi swi tivi swaku matimba lawa Yehovha a nga na wona ya ku vona swilo swa ku kala swi nga se yendleka ma tirhisa ku yini. Kambe swi kona leswi hi swi tivaka.

Yehovha a nga yendla xin’wani ni xin’wani lexi a xi lavaka, kambe minkama yin’wani a langa ku kala a nga yendli swilo swin’wani. Leswi Yehovha a nga ni wutlharhi la ku kala li nga heli wa swi kota ku vula ka ha li swoswi xin’wani ni xin’wani lexi nga ta yendleka ka nkama lowu taka. (Rom. 11:33) Kambe Yehovha a nga langa ku kala a nga swi tivi leswi nga ta yendleka hikusa leswi yena a nga hetiseka wa swi kota ku tikhoma. — Vona Esaya 42:14.

Yehovha wa hi tiyisekisa swaku ku rhandza ka yena ku ta yendleka. Se leswo swi yelanisa ku yini ni matimba lawa Yehovha a nga na wona ya ku vona leswi nga ta yendleka ka nkama lowu taka? Buku la Esaya 46:10 la hlamula; li li: “Ku sukela ku sunguleni ni vula leswi nga ta humelela na swi nge se humelela, ni leswi kalaka swi nge se yendleka ni swi hlaye khale. Ni li: ‘Leswi ni swi lavaka swi ta yendleka, ni ta yendla ku rhandza ka mina.’”

Xin’we xa swilo leswi kombisaka swaku Yehovha wa swi kota ku vula swilo leswi nga ta yendleka ka nkama lowu taka, hileswaku yena a ni matimba ya ku yendla swaku swilo swi yendleka. Hambileswo a swi lavi Yehovha a vona swilo leswi nga ta yendleka ka nkama lowu taka ku fana ni munhu lweyi a tsutsumisaka filmi leli a li sixtiraka a ta vona swaku li ta gamisa ku yini. Handle ka leswo Yehovha a nga vula swaku swilo swi ta yendleka ni swaku swi ta yendleka hi nkama lowu yena a wu lavaka, se leswi a nga ni matimba, a gama a yendla swaku swilo swoleswo swi yendleka hi nkama lowu a nga wu vula. — Eks. 9:5, 6; Mat. 24:36; Min. 17:31.

Hi mhaka leyo Bibele li tirhisa marito lawa ma nge: ‘Ku boha,’ ‘ku tumbuluxa’ ni marito man’wani swaku li tlhamusela leswi Yehovha a swi yendlaka loko a vula leswi nga ta yendleka ka nkama lowu taka. (2 Tih. 19:25; Esa. 46:11) Marito lawa ma ta hi ka rito leli li vulavulaka hi munhu lweyi a tirhaka hi “vumba.” (Yer. 18:4) Ku fana ni leswi munhu lweyi a tirhaka hi vumba a nga swi kotaka ku li tirhisa swaku a yendla xibya lexi a xi lavaka, na yena Yehovha a nga yendla xin’wani ni xin’wani swaku ku rhandza ka yena ku yendleka. — Efe. 1:11.

Yehovha a pfumelela swaku mun’wani ni mun’wani a tiyendlela swiboho a tlhela a swi hlonipha. A swi kona leswi Yehovha a nga swi veka swaku swi yendlekela munhu mun’wani ni mun’wani ka wutomi la yena, naswona a nga yendli swaku vanhu vavanene va yendla swilo leswi nga ta va vavisa kumbe swi nga ta yendla swaku va helisiwa. Yena a pfumelela swaku munhu mun’wani ni mun’wani a tilangela ndlela leyi a yi lavaka hambileswi yena a lavaka leswaku vanhu hinkwavu va landza ndlela yayinene.

A hi voneni swikombiso swimbirhi. A xa ku sungula i xa Vaninivha. Yehovha a vule leswaku Vaninivha a va ta helisiwa hileswi a va yendla swilo swa ku biha. Kambe nkama Yehovha a nga vona swaku Vaninivha a va tisolile a nga ha li tisanga khombo leli a a lava ku va tisela lona. (Yon. 3:1-10) Yehovha a txintxe leswi a a lava ku swi yendla ka doropa la Ninivha hileswi vona va nga yendla swiboho swaswinene, va txintxa wutomi la vona ivi va yamukela rungula la Yonasi. Leswi vona va nga tisola a va ha helisiwanga.

Xikombiso xa wumbirhi i xa wuprofeta leli vulavulaka hi Korexe ku nga lweyi a a ta chunsa Vayuda awukaraweni, a tlhela a humesa nawu wa leswaku ku tlhela ku yakiwa tempele ya Yehovha. (Esa. 44:26–45:4) Hosi leyi ya Persiya yi li hetisisile wuprofeta leli. (Ezr. 1:1-4) Yehovha a yi tirhisile swaku yi hetisisa wuprofeta na a nga yi sindzisi kuva yi mu gandzela. Leswi vulaka swaku Korexe a tilangele hi yexe swaku i mani lweyi a a ta mu gandzela. — Swiv. 21:1.

Ku ni swin’wani leswi fambisanaka ni leswi Yehovha a swi vulaka swaku swi ta yendleka ka nkama lowu taka. Kambe ku vula ntiyiso a ku na munhu lweyi a nga kotaka ku swi twisisa hi ku helela leswi Yehovha a swi pimisaka ni leswi a swi yendlaka. (Esa. 55:8, 9) Kambe hinkwaswu leswi Yehovha se a nga hi byela swona swi hi yendla hi tiyiseka hi tlhela hi pfumela swaku leswi Yehovha a swi yendlaka hi swona swaswinene ni swa ntiyiso. Funtshi swi hi yendla hi kholwa swaku leswi Yehovha a swi vulaka swaku swi ta yendleka ka nkama lowu taka i ntiyiso.