U TITWISA ku yini loko u yamukela karta la munghanu wa wena lweyi u mu rhandzaka? Timotiya a yamukele karta la ku fana ni lelo ka Pawulo, leli swoswi li vitaniwaka 2 Timotiya. Phela Timotiya a lave ndhawu ya kahle swaku a kota ku djondza karta la munghanu wa yena lweyi a mu rhandzaka. Swi nga yentxeka hi nkama lowo, Timotiya a a tivutisa swaku o yini Pawulo? Nakambe swi nga yentxeka a a tivutisa ni swaku i yini leswi Pawulo a a lava ku mu byela swona hi ntirho wa yena? Indje karta leli a li ta mu pfuna swaku a wu yentxa kahle ntirho wa yena ni ku tlhela a pfuna van’wana? Hi ta swi vona swaku Timotiya a ti kumile tinhlamulu ta swivutiso leswi ka karta leli la lisima. Kambe a hi sunguleni hi ku vona minchumu ya lisima leyi hi nga yi djondzaka ka karta leli.

Loko Timotiya a sungula ku lerha a karta leli a tekeli ku swi vona swaku Pawulo a a li ni mhaka na yena. Hi lirhandzu a te i “n’wananga lweyi arhandzekaka”. (2 Tim. 1:2) A nkama Timotiya a nga yamukela a karta leli hi lembe la 65 ka nkama wa vapostolo swi nga yentxeka se a a ni kolomu ka 30 wa malembe naswona se a a li doda. Yena na Pawulo va tirhe xikan’we ku tlula 10 wa malembe naswona hi nkama wolowo a djondze minchumu ya yinyingi ka Pawulo.

Swi mu pfune ngopfu Timotiya ku tiva swaku Pawulo a a tiyisela swikarhatu swa swinyingi hi ku tshembeka. Pawulo a a li djele aRoma naswona a a li kusuhi ni ku dlayiwa. (2 Tim. 1:15, 16; 4:6-8) Timotiya a swi vonile swaku Pawulo a a nga chavi hikusa a te: ‘Timhakeni hinkwatu, natiyisela’. (2 Tim. 2:8-13) Ku fana na Timotiya na hina hi nga djondza ka xikombiso xa ku tiyisela xa Pawulo.

Pawulo a pfune Timotiya ku vona swaku ntirho lowu a a wu yentxela Xikwembu a wu li wa lisima hintamu. Pawulo a a lava swaku Timotiya a ‘pfuxeta nyiko ya Xikwembu, leyi a yili ka yena’. (2 Tim. 1:6) Pawulo a tirhise rito la Xigriki leli nge khaʹri·sma swaku a vula “nyiko”. Rito leli la Xigriki a li vula nchumu xa ku nyikiwa hi mahala. Timotiya a kume nyiko leyi nkama a nga langiwa swaku a tirhela bandla hi ndlela ya ku hlawuleka. — 1 Tim. 4:14.

I mpsini leswi Timotiya a a fanele a swi yentxa hi nyiko leyi? Loko a lerha marito lama nge: ‘Pfuxeta  nyiko ya Xikwembu’, swi nga yentxeka a pimise hi ndzilu lowu vanhu va wu tirhisaka makaya. Leswaku makhala ya kona ma ya ma hisa ma lava ku tshama hi ku pfurheteliwa. Disiyonariyu lin’wana li vula swaku marito ya Xigriki lawa Pawulo a nga ma tirhisa ma vula ku pfuxetela kumbe ku fufutela ndzilu, leswi vulaka ku hisekela ntirho lowu u nyikiweke wona. Hi marito man’wana Pawulo a a byela Timotiya swaku a fanele a yentxa hinkwaswu leswi a nga swi kotaka ka ntirho wa yena. Na hina namuntlha hi fanele hi yentxa leswi fanaka, ku nga ku hiseka ka ntirho wa hina.

Loko a ya a lerha karta la munghanu wa yena, Timotiya a kume swin’wana leswi a swi ta mu pfuna ka ntirho wa yena. Pawulo a te: ‘Hlayisa leswinene leswivekiweke mavokweni ya wena, hi kupfuniwa hi moya lowokwetsima lowuyakeke xikarhi ka hina.’ (2 Tim. 1:14) Hi swini swilo swa lisima leswi a swi vekiwe a mavokweni ya Timotiya? Ka ndzimana 13 Pawulo a vulavule hi ‘marito lamatiyeke ya ntiyiso’ lawa ma nga ka Matsalwa. (2 Tim. 1:13) Leswi Timotiya a a li Mukreste a a djondzisa ntiyisu abandleni a tlhela a wu chumayela ni nsin’wini. (2 Tim. 4:1-5) Nakambe Timotiya a a vekiwile swaku a va doda ku va a risa tinyempfu ta Xikwembu. (1 Pet. 5:2) Timotiya a a fanele a hlayisa swilo swa lisima leswi a nga nyikiwa swona ku nga ntiyisu lowu a a fanele a wu djondzisa. Naswona a a fanele a tshemba moya wa Yehovha ni Rito la yena. — 2 Tim. 3:14-17.

Na hina namuntlha hi fanele hi djondzisa van’wana a ntiyisu lowu hi nga nyikiwa wona. (Mat. 28:19, 20) Leswaku hi hlayisa ntiyisu lowu wu nga wa lisima hintamu hi fanele hi titoloveta ku khongela ka Yehovha ni ku djondza Bibele siku ni siku. (Rhom. 12:11, 12; 1 Tim. 4:13, 15, 16) Hi nga ha va ni mintirho yin’wana ya ku fana ni ku va doda kumbe ku va ka ntirho wa nkama hinkwawu. Loko hi nyikiwa mintirho ya ku fana ni leyi hi fanele hi tiveka hansi hi tlhela hi kombela Yehovha swaku a hi pfuna. Leswaku hi kombisa swaku hi yi nyika lisima mintirho leyi, hi fanele hi kombela Yehovha swaku a hi pfuna ku va hi yi yentxa kahle.

Swin’wana leswi Timotiya a a fanele a swi yentxa i ku djondzisa van’wana ntirho lowu a a wu yentxa. Hi mhaka leyo Pawulo a byele Timotiya a ku: ‘Kutani leswi uswitweke ka mina . . . swihundzisele ka vanhu lavotshembeka, lava na vona vangatakota kudjondzisa van’wana.’ (2 Tim. 2:2) Pawulo a byele Timotiya swaku a djondzisa van’wana abandleni swilo leswi a a swi tiva. Ni namuntlha i swa lisima swaku madoda hinkwawu abandleni ma lwela ku yentxa leswi fanaka. Doda la linene a li chavi ku djondzisa van’wana mintirho leyi li yi yentxaka, a li na mhaka hambiloko li tiva swaku va nga yi yentxa ku li tlula. Hi mhaka leyo loko doda li djondzisa van’wana a li swi yentxeli ku hetisisa nawu ntsena kambe li va pfuna swaku va va ni wutlharhi va tlhela va va ni wunghanu la likulu na Yehovha. Loko doda li yentxisa xileswo, lava li va djondzisaka va ta va “vanhu lavotshembeka” lava nga ta pfunaka hintamu abandleni.

Phela Timotiya a li tsakeli hintamu a karta leli a nga tsaleliwa hi Pawulo. Pimisa hi Timotiya na a lerha karta leli nkama ni nkama a tlhela a pimisa hi leswi li nga mu pfunisaka xiswona ka ntirho wa yena. Hi nga swi tirhisisa ku yini leswi Pawulo a nga tsalela Timotiya? Hi nga swi tirhisa hi ku lwela ku pfuxeta nyiko ya hina ku fana ni ndzilu hi ku hlayisa leswi hi nga tamelisiwa swona ni hi ku djondzisa van’wana mintirho leyi hi yi yentxaka. Loko hi yentxa leswo, hi lani Pawulo a nga byela Timotiya hi kona hi ta va hi hetisisa ntirho wa hina hi ku helela. — 2 Tim. 4:5.