1. Yehovha a ku yentxele yini?

U DJONDZISE ku yini ntiyiso? Swi nga yentxeka u sungule ku twa “mahungu ya ku tsakisa” ka vapsali va wena, munghanu wa wena wa xikola, munghanu wa wena wa ntirhweni, kumbe va ku chumayelile akaya ka wena. (Marku 13:10) Ku ve ni munhu, lweyi a nga tirhisa nkama wa yena, ntamu wa yena leswaku a ku djondzisa. Hi ku famba ka nkama, u sungule ku mu rhandza Yehovha u tlhela u djondza swaku na yena wa ku rhandza. Yehovha a ku pfunile swaku u tiva ntiyiso, se swoswi, u mudjondzisiwa wa Yesu Kreste, naswona u ni ntshembo wa ku hanya wutomi la ku kala li nga heli. (Yoh. 6:44) A swi kanakanisi swaku wa mu khensa Yehovha hileswi a nga tirhisa munhu swaku a ku djondzisa ntiyiso a tlhela a ku yamukela swaku u mu tirhela.

2. Hi ta vona yini ka djondzo leyi?

² Leswi se hi nga djondza ntiyiso, na hina hi nga swi kota ku pfuna vanhu van’wana swaku va kuma wutomi. Swi nga yentxeka swi nga hi karhateli ku chumayela hi munti ni munti kambe ku sungula ku djondzisa munhu Bibele hi swona swi nga hi karhatelaka. U titwisa xileswo? Loko u titwisa xileswo, ka djondzo leyi u ta vona minchumu leyi yi nga ku pfunaka. Hi ta vona leswi swi hi yentxaka hi lava ku djondzisa vanhu. Hi ta tlhela hi vona swaku hi nga swi hlulisa ku yini swikarhatu leswi swi nga hi yentxaka hi nga sunguli ku djondzisa vanhu Bibele. Ku sungula, hi ta vona swaku hi mhaka muni hi nga fanelanga hi chumayela ntsena kambe hi tlhela hi djondzisa vanhu mahungu ya ku tsakisa.

3. Hi mhaka muni hi chumayela?

³ Nkama Yesu na a li lana misaveni, a nyike valandzeli va yena mintirho yimbirhi. Ku sungula, a va byele swaku a va fanele va  chumayela mahungu ya Mfumu, a tlhela a va komba swaku va nga swi yentxisa ku yini. (Mat. 10:7; Luk. 8:1) Yesu a lunghiselele vadjondzisiwa va yena swaku va tiva xa ku xi yentxa loko vanhu va swi tsakela kumbe va nga swi tsakeli nkama lowu va chumayelaka. (Luk. 9:2-5) A tlhele a va byela leswi ntirho wa ku chumayela a wu ta kulisa xiswona, loko a vule swaku a va ta nyikela “wumboni ka matiko hinkwawu.” (Mat. 24:14; Mint. 1:8) Hambiloko vanhu va swi tsakela kumbe va nga swi tsakeli, vadjondzisiwa a va fanele va chumayela hi Mfumu wa Xikwembu ni leswi wu nga ta swi yentxa.

4. Hi ku ya hi Matewu 28:18-20, i mpsini swin’wana hi faneleke hi swi yentxa handle ka ku chumayela hi Mfumu?

⁴ Hi wini ntirho wa wumbirhi lowu Yesu a nga wu nyika vadjondzisiwa va yena? Yesu a byele vadjondzisiwa va yena leswaku va djondzisa vanhu ku landzela minchumu hinkwayu leyi yena a nga yi vula. Indje i ntiyiso swaku ntirho wa ku chumayela ni ku djondzisa a wu to yentxiwa hi Vakreste va ku sungula ntsena hi lana vanhu van’wana va pimisaka hi kona? Ihim, Yesu a vule swaku ntirho lowu wa lisima a wu ta tama wu yentxiwa ni ka masiku ya hina, “anze ku helisiwa misava.” (Lerha Matewu 28:18-20.) Nkama lowu Yesu a nga humelela ka vadjondzisiwa va yena lava a va hundza 500 swi nga yentxeka a va nyikile ntirho lowu. (1 Kor. 15:6) Nakambe leswi Yesu a nga pfuna Yohani swaku a swi vona, swi kombisa swaku vadjondzisiwa hinkwavu va Yesu va fanele va djondzisa vanhu van’wana hi Yehovha. — Nhla. 22:17.

5. Marito ya Pawulo lawa ma nga ka 1 Vakorinto 3:6-9, ma swi kombisisa ku yini swaku i swa lisima kuva hi nga chumayeli ntsena kambe hi tlhela hi djondzisa?

⁵ Mupostolo Pawulo a fananise ntirho wa ku yentxa vadjondzisiwa ni ntirho wa murimi, a kombise swaku ku byala ntsena a swi yenelanga. Pawulo a khumbukise vamakwerhu va Korinto a ku: “Mina ni byalile, Apolosi a regara . . . N’wina mi nsimu ya Xikwembu leyi rimiwaka hi xona.” (Lerha 1 Vakorinto 3:6-9.) Leswi hi tirhaka ka “nsimu ya Xikwembu,” a hi byali ntsena kambe hi tlhela hi regara ni ku vona kumbe swa kula. (Yoh. 4: 35) Kambe, ha pfumela swaku i Xikwembu lexi xi swi kulisaka.

6. Loko hi djondzisa vanhu hi fanele hi va pfuna ku yentxa yini?

⁶ Hina hi lavetela vanhu lava lavaka “ku kuma wutomi la ku kala li nga heli.” (Mint. 13:48) Swaku vanhu va va vadjondzisiwa, hi fanele hi va pfuna 1) ku twisisa, 2) ku pfumela, ni 3) ku tirhisa leswi va swi djondzaka ka Bibele. (Yoh. 17:3; Kol. 2: 6, 7; 1 Tes. 2:13) Hinkwerhu abandleni hi nga swi kota ku pfuna lava va djondzaka Bibele. Hi nga yentxa leswo hi ku va komba swaku ha va rhandza ni swaku ha swi rhandza ku va na vona abandleni. (Yoh. 13:35) Vamakwerhu lava va djondzaka Bibele na vona va fanele va tirhisa nkama ni ntamu wa vona swaku va va pfuna ku tsuvula ni “leswi nga dzima timintsu” ku nga minchumu leyi a va yi kholwa. (2 Kor. 10:4, 5) Ku pfuna munhu swaku a sungula ku txintxa mahanyelo ya yena a tlhela a tsakamisiwa swi nga teka nkama wa wunyingi. Kambe ku tikarhatela ku yentxa leswo swa pfuna.

7. I yini lexi xi hi yentxaka hi lava ku chumayela ni ku djondzisa vanhu?

⁷ Hi mhaka muni hi chumayela hi tlhela hi yentxa vadjondzisiwa? Xa ku sungula, hi mhaka leswi hi rhandzaka Yehovha. Loko u tikarhata swaku u yingisa nawu wa ku chumayela ni ku yentxa vadjondzisiwa, u kombisa swaku wa xi rhandza Xikwembu. (1 Yoh. 5:3) Pimisa hi leswi: Ku rhandza Yehovha swi ku pfunile swaku  u sungula ku chumayela hi munti ni munti. A swi vevuka ku yentxa leswo? Swi nga yentxeka swi nga ku vevukelanga. U titwise ku yini ka munti wa ku sungula lowu u nga chumayela ka wona? A wu nga chavi? A swi kanakanisi swaku a wu chava. Kambe a wu swi tiva swaku Yesu a hi rhumile swaku hi yentxa ntirho lowu. Hi mhaka leyo u wu yingisile nawu wa yena. Hi ku famba ka nkama, swi ye swi ku vevukela ku chumayela. Se, a ku djondzisa Bibele ke? Swi ku yentxa u chava? Loko u chava, khongela ka Yehovha u mu kombela a ku pfuna ku hlula ku chava koloko, tiyiseka swaku yena a ta ku pfuna u navela ku yentxa vadjondzisiwa.

8. Hi ku ya hi Marku 6:34, i mpsini swin’wana swi hi yentxaka hi djondzisa vanhu Bibele?

⁸ Xa wumbirhi, hi djondzisa ntiyiso hi mhaka leswi hi rhandzaka vanhu. Siku lin’wana, Yesu ni vadjondzisiwa va yena a va karhalile hikusa a va tirhe hintamu ka ku chumayela. Vona a va lava ndhawu ya ku humula, kambe vanhu va yile lani a va li kona. Yesu a va twele wusiwana, se a sungula ku va djondzisa “minchumu ya yinyingi.” (Lerha Marku 6:34.) Phela hi siku lolelo swi lave swaku Yesu a tikarhata leswaku a va pfuna. Hi mhaka muni? Yesu a zame ku tiveka ka ndhawu ya xitshungu. Yena a vone swaku vanhu lava a va hlupheka ni swaku a va swi lava ku va ni ntshembo. Leswo swi mu yentxe a lava ku va pfuna. Ni namuntlha vanhu va ha swi lava ku pfuniwa. Hambileswi minkama yin’wana swi nga tikombaka ingi va tsakile, va fana ni tinyempfu leti nga lahleka, leti pfumalaka murisi swaku a ti kongomisa. Mupostolo Pawulo a vule swaku vanhu va ku fana ni lava, a va xi tivi Xikwembu naswona a va na ntshembo. (Efe. 2:12) Vona va ka “ndlela” leyi yisaka ku lovisiweni. (Mat. 7:13) Loko hi vona leswi vanhu va swi lavisaka xiswona ku tiva Xikwembu, lirhandzu ni ntwelawusiwana swi hi yentxa hi lava ku va pfuna. Naswona ndlela ya yinene ya ku yentxa leswo i ku va djondzisa Bibele.

9. Hi ku ya hi Vafilipiya 2:13, Yehovha a nga ku pfunisa ku yini?

⁹ Swi nga yentxeka u chava ku sungula ku djondza Bibele ni munhu hi ku tiva swaku swi ta lava u tinyika nkama. Loko i li leswo, byela Yehovha leswi u titwisaka xiswona. Mu kombeli swaku a ku pfuna ku navela ku kuma vanhu u tlhela u va djondzisa Bibele. (Lerha Vafilipiya 2:13.) Mupostolo Yohani a hi tiyisekise swaku Xikwembu xi ta hlamula swikhongelo swa hina, leswi fambisanaka ni ku rhandza ka xona. (1 Yoh. 5:14, 15) Hi mhaka leyo tiyiseka swaku na wena Yehovha a ta ku pfuna swaku u navela ku yentxa vadjondzisiwa.

10-11. I mpsini swi nga hi yentxaka hi nga djondzisi vanhu Bibele?

¹⁰ Ka hina i swa lisima hintamu ku landzela leswi Yesu a nga hi byela, swaku hi yentxa vadjondzisiwa. Kambe minkama yin’wana hi nga ha kumana ni swikarhatu loko hi yentxa ntirho lowu. A hi voni swikarhatu swa kona ni leswi hi nga swi yentxaka swaku hi swi hlula.

¹¹ Loko swiyimu swi hi karhatela. Hi xikombiso, vachumayeli van’wana va gugile kumbe va vabya. U le ka xiyimu xa ku fana ni lexo? Loko u li ka xona, pimisanyana hi leswi hi nga swi djondza ka ntungu wa corona vírus. Hi vone swaku swa koteka ku djondzisa Bibele hi ku tirhisa matelefoni, na hi li kaya. Naswona a swo koteka ntsena kambe swa pfuna. Hikusa minkama yin’wana hi kota ku djondza ni vanhu lava a hi nga ta va kuma makaya ka vona loko hi chumayela. Vanhu van’wana, vo kumeka nimixo kumbe niwusiku. U tshame u pimisa hi ku tinyika nkama wa ku pfuna vanhu lavo? U nga tinyikela swaku u va pfuna ku djondza  Bibele hi nkama lowu va kumekaka hi wona. Yesu a yentxe leswi fanaka loko a pfumela ku djondzisa Nikodema niwusiku. — Yoh. 3:1, 2.

12. I ntxini xi hi kholwisaka swaku hi nga va vadjondzisi va vanene va Bibele?

¹² Loko hi pimisa swaku a hi nge swi koti ku djondzisa kahle Bibele. Swi nga yentxeka hi pimisa swaku hi fanele hi tiva minchumu ya yinyingi swaku hi kota ku djondzisa munhu Bibele. Vona 3 wa minchumu leyi nga ta ku pfuna ku vona swaku u nga swi kota ku djondza ni munhu Bibele. Xa ku sungula, Yehovha a ku vona na wu faneleka ku djondzisa van’wana. (2 Kor. 3:5) Xa wumbirhi, Yesu, lweyi a nga ni “matimba ya ku fuma atilweni ni lani misaveni,” a ku nyike ntirho wa ku djondzisa. (Mat. 28:18) Xa wu 3, u ta pfuniwa hi vanhu van’wana. Yehovha a djondzise Yesu leswi a a fanele a swi yentxa naswona Yesu a a swi tshemba leswi a va mu djondzisa swona, se na wena u nga swi tshemba. (Yoh. 8:28; 12:49) U nga tlhela, u kombela mulanguteli wa grupu ya wena ya nsimu, mupfuli wa ndlela wa nkama hinkwawu, kumbe muchumayeli mun’wana swaku a ku komba leswi u nga yi sungulisaka xiswona djondzo ya Bibele. Xin’wana u nga xi yentxaka swaku u yampsisa madjondzisela ya wena i ku va kombela swaku u va kona loko va djondzisa u ta vona swaku va yentxisa ku yini.

13. Hi mhaka muni hi fanele hi titwananisa ni madjondzisela ya nyuwani?

¹³ Loko swi lava hi txintxa madjondziselo ni leswi hi swi tirhisaka. Madjondziselo ya hina ma txintxile. Swoswi hi tirhisa buku leli nge: Tikhorisi Hi Wutomi La Ku Kala Li Nga Heli. Leswaku hi tirhisa buku leli swi lava hi tilunghiselela hi tlhela hi djondzisa hi ndlela ya ku hambana ni leyi a hi yi tirhisa khale. A ka ha lerhiwi hintamu maparagrafu kambe hi bulisana hintamu ni lweyi hi djondzaka na yena. Loko hi djondzisa, hi tirhisa hintamu mavhidiyo ni minchumu yin’wana leyi kumekaka ka JW Library^®. Loko leswi hi swi tirhisaka swoswi swi ku karhatela, u nga kombela makwerhu mun’wana swaku a ku pfuna ku swi tirhisa. Hina vanhu ha swi kota ku djondza ni ku tolovela minchumu ya nyuwani kambe minkama yin’wana a swi wolovi ku yentxa leswo. Ku pfuniwa hi Yehovha ni vamakwerhu van’wana, swi ta hi pfuna ku titwananisa ni ku txintxa koloko hi tlhela hi swi tsakela ku djondza Bibele ni vanhu. Mupfuli wa ndlela mun’wana a vule swaku, madjondzisela lawa ya nyuwani “ma tsakisa ka lweyi a djondzisaka ni ka lweyi a djondzisiwaka.”

14. Loko hi tirha ka tindhawu ta ku karhata ku chumayela hi fanele hi khumbuka yini, naswona buku la 1 Vakorinto 3:6, 7 li nga hi pfunisa ku yini?

¹⁴ Loko hi tshama ka ndhawu leyi swi karhataka ku sungula ku djondza ni munhu Bibele. Swi nga yentxeka vanhu va nga swi tsakeli leswi hi swi chumayelaka kumbe va nga nyimi na swona. I mpsini leswi nga hi pfunaka swaku hi tama hi tirha na hi tsakile? Khumbuka swaku swiyimu swa vanhu swi nga ha txintxa, se lava a va nga na mhaka ni leswi hi swi chumayelaka va nga navela ku tiva Xikwembu. (Mat. 5:3) Vanhu van’wana lava a va nga ma tsakeli mabuku ya hina hi ku famba ka nkama va sungule ku djondza Bibele. Naswona ha swi tiva swaku Yehovha hi yena N’winyi wa ntshovelo. (Mat. 9:38) A lava hi tama hi byala hi tlhela hi regara, kambe hi yena lweyi a yentxaka swi kula. (1 Kor. 3:6, 7) Hambiloko ku nga na munhu lweyi u djondzaka Bibele na yena, khumbuka swaku Yehovha a hi katekisa hi leswi hi zamaka ku swi yentxa, ku nga li hi leswi hi djondzaka ni vanhu va vanyingi. *

15. Yehovha a titwisa ku yini loko munhu a djondza Bibele ni ku hanya hi leswi a swi djondzaka?

¹⁵ Yehovha wa tsaka loko munhu a djondza ntiyiso a tlhela a byela van’wana hi leswi a swi djondzaka. (Swi. 23:15, 16) Yehovha a tsaka hintamu hi ku vona leswi yentxekaka swoswi. Hi xikombiso, hambileswi hi nga ka corona vírus, hi 2020, vanhu va 7.705.765 va djondzisiwe Bibele, leswo swi yentxe swaku 241.994 wa vanhu va tinyiketela ka Yehovha va tlhela va tsakamisiwa. Naswona vanhu volavo va ta djondzisa vanhu van’wana Bibele, va tlhela va va yentxa vadjondzisiwa. (Luk. 6:40) A swi kanakanisi swaku Yehovha wa tsaka loko hi pfunisa ka ntirho wa ku yentxa vadjondzisiwa.

16. I mpsini u nga zamaka ku swi yentxa?

¹⁶ Ku yentxa vadjondzisiwa swi lava minzamu ya yikulu kambe hi ku pfuniwa hi Yehovha hi nga swi kota ku djondzisa vanhu, swaku na vona va mu rhandza Papayi wa hina lweyi a nga matilweni. U swi vonisa ku yini kuva u tikarhatela ku sungula ku djondza Bibele ni munhu? Phela loko u yentxa leswo u ta hlamala hi vanhu lava va nga ta pfumela ku djondza Bibele. Tiyiseka swaku Yehovha a ta yi katekisa minzamu ya wena.

17. Hi ta titwisa ku yini loko hi kota ku djondzisa munhu Bibele?

¹⁷ I nkateko wa wukulu ku chumayela ni ku djondzisa vanhu ntiyiso! Ntirho lowu wu hi yentxa hi tsaka hintamu. Mupostolo Pawulo, lweyi a nga pfuna vanhu va vanyingi aTesalonika swaku va va vadjondzisiwa, a te: “I mani lweyi a nga ta va ku tshemba ka hina, ku tsaka ka hina, kumbe harhi ya ku tsaka ka hina phambheni ka yena ke? A hi n’wina ke? Hikakunene hi n’wina mi nga ku dzuneka ni ku tsaka ka hina.” (1 Tes. 2:19, 20; Mint. 17:1-4) Vanhu va vanyingi namuntlha na vona va titwisa xileswo. Makwerhu Stéphanie ni nuna wa yena, va pfune vanhu va vanyingi swaku va tsakamisiwa, makwerhu Stéphanie a te: “A ku na nchumu xa ku tsakisa hintamu ku fana ni ku pfuna munhu swaku a tinyiketela ka Yehovha.”