1. Impsini leswi Yehovha a nga swi yentxa nkama Adamu na Evha va nga djoha? (Genesa 3:15)

 NKAMA Adamu na Evha va nga djoha, Yehovha a vule wuprofeta leli nga ka Genesa 3:15 (Lerha), leli a li ta yentxa swaku vanhu hinkwavu va va ni ntshembo.

2. Hi mhaka muni wuprofeta leli nga ka Genesa 3:15 li li la lisima?

² Wuprofeta leli hi nga ta vulavula hi lona, li kumeka ka buku la Genesa. Kambe mabuku laman’wana ya Bibele ma fambisana ni wuprofeta leli. Ku fana ni leswi mapapela ya manyingi ma tlhanganisiwaka swaku ma va buku, wuprofeta leli nga ka Genesa 3:15 li tlhanganisa wuprofeta hinkwalu leli nga ka Bibele, leli vulaka swaku Xikwembu xi ta rhumela Muponisi lweyi a nga ta helisa Davulosi ni vanhu va yena. Phela leswo, swi ta va tsakisa hintamu vanhu lava va rhandzaka Yehovha.

3. Hi ta bula hi yini ka nhlokomhaka leyi?

³ Ka nhlokomhaka leyi, hi ta bula hi 3 wa swivutiso leswi vulavulaka hi wuprofeta leli nga ka Genesa 3:15. Ku vulavuliwa hi vamani ka wuprofeta la Genesa 3:15? Swi ta yentxekisa ku yini leswi ku vulavuliwaka hi swona ka buku leli? Naswona ku twisisa wuprofeta leli swi hi pfunisa ku yini?

4. I mani “nyoka” funtshi hi swi tivisa ku yini?

⁴ Ka buku la Genesa 3:14, 15 ku vulavuliwa hi “nyoka” ni “vana” va nyoka ni “wansati” ku patsa ni “n’wana” wa wansati. Bibele li hi pfuna ku twisisa leswi marito lawa ma vulaka swona. * A hi rhangeni hi ku vulavula hi “nyoka”. Phela a swi nga ta koteka swaku nyoka ya hikakunene yi twisisa leswi Yehovha a nga swi byela Adamu na Evha. Se, Yehovha a a  vulavula na mani? Nhlawutelo 12:9 yi li: “Nyoka ya khale” i Sathana Davulosi. Se a vana va nyoka ke? I vamani?

5. I vamani vana va nyoka?

⁵ Minkama yin’wana Bibele li tirhisa rito leli nge: “Vana” swaku li vulavula hi vanhu lava tekelelaka munhu ku fana ni n’wana lweyi a tekelelaka papayi wa yena. Se, vana va nyoka i tintsumi leti nyimaka na Sathana, ku patsa ni vanhu lava kalaka va nga mu yingisi Yehovha va tlhela va djikela vanhu va yena. Tintsumi toleto, hi leti ka minkama ya Nowa ti nga tshika ntirho wa tona matilweni ti ta teka vavasati lani misaveni. —  Gen. 6:1, 2; Yoh. 8:44; 1 Yoh. 5:19; Yuda 6.

6. Hi swi tivisa ku yini swaku “wansati” lweyi ku vulavuliwaka hi yena ka wuprofeta li nga ka Genesa a hi Evha?

⁶ Swoswi a hi buleni hi leswaku “wansati” i mani. Phela wansati lweyi a hi Evha. Hi swi tivisa ku yini? Hikusa wuprofeta li hlaya swaku n’wana wa wansati a a ta “pfotlosa” nhloko ya nyoka. Se hi swi vonile swaku a nyoka i Sathana naswona a nga kona munhu lweyi a nga ni xidjoho lweyi a a ta kota ku pfotlosa nhloko ya yena. Kasi i mani lweyi a a ta helisa Sathana?

7. Hi ku ya hi Nhlawutelo 12:1, 2, 5, 10, i mani wansati lweyi ku vulavuliwaka hi yena ka Genesa 3:15?

⁷ Buku la Nhlawutelo la hi byela swaku i mani wansati lweyi ku vulavuliwaka hi yena ka Genesa 3:15. (Lerha Nhlawutelo 12:1, 2, 5, 10.) Lani a ku vulavuliwi hi wansati lweyi hi nga mu tolovela, kambe ku vulavuliwa hi wansati lweyi a nga ni n’weti ka minenge ya yena, a tlhela a yambala harhi leyi nga ni 12 wa tinyeleti ka nhloko ya yena! Wansati lweyi a psale n’wana wa ku kala a nga tolovelekanga, ku nga Mfumu wa Xikwembu. Leswi Mfumu lowu wu nga matilweni na yena wansati lweyi a le matilweni. Wansati yelweyo  a fanekisela nhlengeletanu ya Yehovha leyi nga matilweni leyi patsaka tintsumi. —  Gal. 4:26.

8. I mani n’wana wa wansati naswona a ve n’wana wa wansati ku sukela nkama muni? (Genesa 22:15-18)

⁸ Bibele li tlhela li hi pfuna ku twisisa swaku i mani n’wana wa wansati. Li tlhele li vula swaku n’wana lweyi a a ta psaliwa ka ndjangu wa Abrahamu. (Lerha Genesa 22:15-18.) Leswi wuprofeta leli li nga swi hlaya swi yentxekile, Yesu a psaliwe ka ndjangu wa Abrahamu. (Luk. 3:23, 34) N’wana lweyi ku vulavuliwaka hi yena ka wuprofeta leli, a a fanele a va ni ntamu wa ku tlula wa vanhu swaku a ta kota ku dlaya Sathana. Nkama Yesu a a ni kolomuyani ka 30 wa malembe, a totiwile hi moya wa ku kwetsima wa Xikwembu. Ku sukela kolanu, Yesu a ve n’wana wa wansati lweyi ku vulavuliwaka hi yena ka buku la Genesa. (Gal. 3:16) Nkama Yesu a nga fa a gama a pfuxiwa Xikwembu xi “mu nyike ku dzuneka ni ku hlonipheka” xi tlhela xi mu nyika “matimba . . . atilweni ni lani misaveni”, ku patsa ni ntirho wa ku “helisa mintirho ya Davulosi.” —  Heb. 2:7; Mat. 28:18; 1 Yoh. 3:8.

9-10. a) I vamani van’wana lava va nga n’wana wa wansati lweyi ku vulavuliwaka hi yena ka Genesa naswona va sungula nkama muni? b) Impsini leswi hi nga ta swi vona swoswi?

⁹ A hi Yesu ntsena lweyi a nga n’wana wa wansati lweyi ku vulavuliwaka hi yena ka wuprofeta la Genesa. Kambe ku ni van’wana. Mupostolo Pawulo a vulavule hi vona vanhu lava, nkama a nga vulavula ni Vayuda ku patsa ni vanhu va matiko lava a va totiwile, a te: “Loko mi li vadjondzisiwa va Kreste, mi vana va Abrahamu hikakunene naswona mi va dli va tshomba hi mhaka ya xitshembiso.” (Gal. 3:28, 29) Loko Mukreste a totiwa hi moya wa ku kwetsima, a sungula ku va n’wana wa wansati lweyi ku vulavuliwaka hi yena ka wuprofeta la Genesa, a tlhela a lumba ntlawa wa 144.000 wa vanhu lava va nga ta fuma na Yesu Kreste. (Nhla. 14:1) Hinkwavu lava, va zama ku hanya hi minawu ya Papayi wa vona Yehovha.

¹⁰ Leswi se hi va tivaka lava ku vulavuliwaka hi vona ka Genesa 3:15, swoswi a hi voneni swaku Yehovha a yentxa yini swaku wuprofeta leli li hetiseka funtshi li hi pfunisa ku yini namuntlha.

11. Wuprofeta la leswaku nyoka a yi ta luma “xirhendze” xa n’wana wa wansati li vula yini?

¹¹ Genesa 3:15, a vula swaku nyoka a yi ta luma “xirhendze” xa n’wana wa wansati. Phela leswo swi yentxekile nkama Sathana a nga yentxa swaku Vayuda ni Varoma va dlaya N’wana wa Xikwembu. (Luk. 23:13, 20-24) Ku fana ni leswi munhu lweyi a nga vavisiwa xirhendze a kalaka a nga swi koti ku famba, na yena Yesu a a nga ta yentxa nchumu nkama lowu na a file. —  Mat. 16:21.

12. Nhloko ya nyoka yi ta pfotlosiwa ku yini naswona leswo swi ta yentxeka siku muni?

¹² Swaku leswi nga tsaliwa ka wuprofeta leli nga ka Genesa 3:15 swi kota ku yentxeka, Yesu a a fanele a rhanga hi ku pfuxiwa ku feni. Leswo swa twala hikusa hi ku ya hi wuprofeta leli, a n’wana wa wansati a a fanele a pfotlosa nhloko ya nyoka. Leswo a swi to yentxeka ntsena loko xirhendze xa Yesu xi hola, ku nga kuva a pfuxiwa ku feni. Lexi tsakisaka hi leswaku leswo swi yentxekile. Hi siku la wunharhu na a file Yesu a pfuxiwile swaku a ya hanya matilweni, funtshi a nge he tshuki a fa. Hi nkama lowu Xikwembu xi  nga wu veka, Yesu a ta dlaya Sathana. (Heb. 2:14) Yesu ni lava va nga ta fuma na yena, va ta helisa valala va Xikwembu ku nga vana va nyoka. —  Nhla. 17:14; 20:4, 10. *

13. Wuprofeta leli li hi pfunisa ku yini?

¹³ Phela hina vatirheli va Xikwembu ha pfuneka ka wuprofeta leli. Yesu a tile lani misaveni na a li munhu wa ku fana na hina. Phela yena a tekelele wumunhu la Papayi wa yena. (Yoh. 14:9) Namuntlha hi kota ku rhandza Xikwembu ni ku xi tiva kahle hi mhaka Yesu Kreste, funtshi hi tlhela hi pfuneka ka leswi a hi djondzisaka swona ku patsa ni ndlela leyi a li kongomisaka hi yona bandla la Wukreste. A tlhele a hi pfuna swaku hi hanya hi ndlela leyi tsakisaka Xikwembu. Funtshi hinkwerhu hi nga pfuneka ka lifu la yena hikusa nkama a nga fa a tlhela a pfuxiwa a nyikele hi ngati ya yena swaku yi hi “basisa ka swidjoho hinkwaswu.” —  1 Yoh. 1:7.

14. Hi swi tivisa ku yini swaku leswi Yehovha a nga swi hlaya Edeni a swi tekelanga ku yentxeka? Tlhamusela.

¹⁴ A ku ta hundza nkamanyana swaku leswi Yehovha a nga swi hlaya aEdeni swi yentxeka. A ku laveka nkama swaku wansati lweyi ku nga vulavuliwa hi yena a va ni n’wana ni swaku Sathana a hlengeleta vanhu va yena hinkwavu. Funtshi a ku ta laveka nkama swaku n’wana wa wansati ni valandzeli va Sathana va nyenyana. Loko hi twisisa wuprofeta leli, hi ta pfuneka, hikusa lona li hi ba ndleve ka misava leyi ya Sathana leyi nyenyaka lava va tirhelaka Yehovha. Hi ku famba ka nkama, Yesu a khumbukise valandzeli va yena hi mhaka leyi. (Marku 13:13; Yoh. 17:14) Leswi nga yentxeka ka 100 wa malembe lawa ma nga hundza swi hetisisa lin’wana la wuprofeta leli nga ka Genesa. Hi swi tivisa ku yini leswo?

15. Hi mhaka muni misava yi ya yi nyenya vanhu va Xikwembu naswona hi mhaka muni hi nga fanelanga hi chava?

¹⁵ Nkama Yesu a nga sungula ku fuma hi 1914, a yo vhela a hlongola Sathana matilweni. Funtshi Sathana a ta helisiwa ku nga li khale. (Nhla. 12:9, 12) Kambe Sathana a nga tshamanga hi mavoko. Phela yena a kwate swa wugamu funtshi a dumela vanhu va Xikwembu. (Nhla. 12:13, 17) Hi mhaka leyo, misava yi ya yi va nyenya hintamu vanhu va Xikwembu. Hambileswo, a hi fanelanga hi mu chava Sathana ni vanhu va yena, kambe a hi zameni ku fana na Pawulo, lweyi a nga te: “Loko Xikwembu xi na hina, i mani lweyi a nga lwaka na hina?” (Rom. 8:31) Leswi ku tala ka wuprofeta la Genesa 3:15 se li nga hetiseka, swi hi yentxa hi mu tshemba Yehovha.

16-18. Curtis, Ursula, na Jessica va pfunekise ku yini hi ku twisisa wuprofeta li nga ka Genesa 3:15?

¹⁶ Leswi Yehovha a nga swi tshembisa ka Genesa 3:15, swi nga hi pfuna swaku hi kota ku tiyisela swikarhatu. Makwerhu Curtis lweyi a nga misiyonariyu ka tiko leli vitaniwaka swaku i Guam, a te: “Minkama yin’wana ni kumana ni swikarhatu ka wutomi la mina lakakuva swa ni karhatela ku tshembeka ka Yehovha, kambe ku pimisa hi wuprofeta leli nga ka Genesa 3:15 swi ni pfune swaku ni tama ni tshemba Yehovha.” Makwerhu Curtis a nga wu voni nkama lowu Yehovha a nga ta helisa swikarhatu hinkwaswu.

¹⁷ Makwerhu Ursula lweyi a tshamaka Alemanha a vule swaku ku twisisa leswi nga ka  Genesa 3:15 swi mu pfune ku kholwa swaku Bibele i Rito la Xikwembu. A hlamalisiwe hi ku vona ndlela leyi wuprofeta hinkwalu li nga ka Bibele li fambisanaka hi yona ni wuprofeta leli. A tlhele a ku: “Ku vona swaku nkama minchumu yi nga wonheka, Yehovha a tekele ku yentxa xan’wanchumu swaku a yi lunghisa, swi ni yentxa ni tama ni mu rhandza.”

¹⁸ Jessica lweyi a tshamaka Micronésia a li: “Na ha khumbuka leswi ni nga titwisa xiswona nkama ni nga djondza ntiyiso. Ku vona ku hetiseka ka wuprofeta leli nga ka Genesa 3:15, swi ni pfune ku twisisa swaku swikarhatu leswi hi kumanaka na swona namuntlha swi ta hela. Swi tlhele swi ni pfuna ku twisisa swaku ku tirhela Yehovha swi tisa minkateko namuntlha ni ka nkama lowu taka.”

19. Impsini swi hi yentxaka hi kholwa swaku wuprofeta la Genesa leli nga sala, na lona li ta hetiseka?

¹⁹ Phela Genesa 3:15 yi le ku hetisekeni. Se ha mu tiva n’wana wa wansati ku patsa ni vana va nyoka. Xilondza lexi a xi li ka xirhendze xa Yesu lweyi a nga n’wana wa wansati se xi holile. Funtshi swoswi yena i Hosi ya ku kala yi nga fi. Yehovha se a va langile vanhu lava va nga ta fuma ni N’wana wa yena matilweni. Leswi wuprofeta lin’wana la Genesa 3:15 se li nga hetiseka, ha kholwa swaku ni leli nga sala, ku nga ku pfotlosiwa ka nhloko ya nyoka na lona li ta hetiseka. Vanhu va Xikwembu va ta tsaka loko Sathana a ta helisiwa. Na swi nga se yentxeka leswo, u nga godoli, Xikwembu xa hina xa ku tshembeka xi ta tirhisa Yesu swaku xi katekisa ‘matiko hinkwawu ya lani misaveni’. —  Gen. 22:18.