1. Hi ku ya hi Matewu 24:9, hi mhaka muni hi nga hlamali loko vanhu va misava leyi va hi nyenya?

YEHOVHA a hi yentxe na hi kota ku rhandza vanhu van’wana va tlhela va hi rhandza. Hi mhaka leyo, loko vanhu van’wana va hi nyenya ha vaviseka hi tlhela hi chava. Hi xikombiso, makwerhu Georgina, lweyi a tshamaka aEuropa, a li: “Nkama na ni ni 14 wa malembe, mamana wa mina a a ni nyenya hi mhaka leswi ni nga Mboni. Ni titwe na ni nga rhandziwi naswona a ni pimisa swaku a ni munhu wa munene.” * Makwerhu Danilo a tsale leswi: “A nkama masonchwa ma nga ni ba, ma ni rhuketela, ma ni chavisela hi mhaka leswi ni nga Mboni, ni chave hintamu ni tlhela ni titwa na ni nga li wa nchumu.” Leswo swa vavisa, kambe a swi fanelanga swi hi hlamalisa hikusa Yesu a a vulile swaku vanhu va misava leyi va ta hi nyenya. — Lerha Matewu 24:9.

2-3. Hi mhaka muni valandzeli va Yesu va nyenyiwa?

² Vanhu va misava leyi va va nyenya valandzeli va Yesu. Hi mhaka muni? Hikusa ku fana na Yesu a hi “fani ni vanhu va misava”. (Yoh. 15:17-19) Hi mhaka leyo, hambileswi hi yi hloniphaka mimfumu, a hi pfumeli ku gandzela mabandera kumbe swilo swin’wana leswi fambisanaka ni mimfumu. Hikusa hi tirhela Yehovha ntsena, naswona hi pfumela swaku hi yena ntsena a nga ni mfanelo ya ku fuma, ku nga mfanelo leyi Sathana ni vanhu va yena va lwisanaka na yona. (Gen. 3:1-5, 15) Hi chumayela swaku a Mfumu wa Xikwembu hi wona wu nga ta lunghisa swikarhatu hinkwaswu swa vanhu, naswona wu ta helisa mimfumu hinkwayu leyi lwisanaka na wona. (Dan. 2:44; Nhla. 19:19-21) Leswi hi swi chumayelaka i mahungu ya ku tsakisa ka vanhu va vanene kambe lava yentxaka swilo swa ku biha a va tsaki hi wona. — Pis. 37:10, 11.

 ³ Hi tlhela hi nyenyiwa hi mhaka ya leswi hi hanyaka hi minawu ya Bibele. Minawu leyi yi hambane ngopfu ni mahanyelo ya ku biha ya misava. Hi xikombiso, vanhu va misava leyi va seketela mahanyelo ya ku biha hintamu ya ku fana ni ya lava Yehovha a nga va lovisa aSodoma ni Gomora. (Yuda 7) Vanhu va vanyingi va hi poyila va tlhela va hi nyenya hi mhaka ya leswi hi hanyaka hi minawu ya Bibele. — 1 Ped. 4:3, 4.

4. I yini lexi nga ta hi pfuna loko vanhu van’wana va hi nyenya?

⁴ I yini lexi nga ta hi pfuna ku tiyisela loko vanhu va hi nyenya va tlhela va hi rhuketela? Hi fanele hi tshemba hi ku helela swaku Yehovha a ta hi pfuna. Ku fana ni xivhikelo lipfumelo la hina li nga kota ku ‘timela maflexa hinkwawu lama pfurhaka ya Davulosi’. (Efe. 6:16) Kambe ku ni nchumu wun’wana lowu hi faneleke hi va na wona ku tlula lipfumelo. Nchumu wolowo i lirhandzu. Hi mhaka muni? Hikusa a lirhandzu “a li na ximbilwambilwana.” A li godoli funtshi li tiyisela minchumu hinkwayu. (1 Kor. 13:4-7, 13) Swoswi a hi voneni swaku ku rhandza Yehovha, ku rhandza vamakwerhu ni ku rhandza lava va hi nyenyaka swi nga hi pfunisa ku yini ku tiyisela loko hi hluphiwa.

5. Lirhandzu leli Yesu a a li na lona hi Yehovha li mu pfunise ku yini?

⁵ Ka wusiku la wugamu na a nge se dlayiwa, Yesu a byele valandzeli va yena a ku: “Ni yentxisa xileswi Papayi a nga ni rhumisa xiswona leswaku misava yi swi tiva swaku na mu rhandza.” (Yoh. 14:31) Lirhandzu leli Yesu a a li na lona hi Yehovha li mu pfune ku tiyisela nkama a nga kumana ni swikarhatu. Na hina loko hi rhandza Yehovha hi ta swi kota ku tiyisela swikarhatu.

6. Hi ku ya hi Varoma 5:3-5, hi titwisa ku yini loko mimfumu ya misava yi hi nyenya?

⁶ Ku sukela khale, ku rhandza Yehovha swi pfune vanhu lava va mu tirhelaka swaku va tiyisela loko va hluphiwa. Hi xikombiso, a nkama lowu tribunali la Vayuda li nga rhuma vapostolo leswaku va nyima ku chumayela, ku rhandza Xikwembu swi va yentxe va ku: “Hi fanele hi yingisa Xikwembu lexi nga Hosi ku tlula vanhu.” (Mint. 5:29; 1 Yoh. 5:3) Lirhandzu la ku fana ni lolelo li tiyisa vamakwerhu va hina namuntlha lava va hluphiwaka hi mimfumu. Kambe loko va hi hlupha, handle ka ku godola hi ya hi tsaka hintamu. — Mint. 5:41; lerha Varoma 5:3-5.

7. Hi fanele hi yentxa yini loko maxaka ya hina ma hi nyenya?

⁷ Swi nga yentxeka swi hi karhatela hintamu ku tiyisela loko lava va hi hluphaka ku li maxaka ya hina. Nkama hi nga sungula ku djondza ntiyiso swi nga yentxeka van’wana ka maxaka ya hina va pimise swaku ho kanganyisiwa. Phela van’wana swi nga yentxeka va pimisa swaku se hi sungula ku hlanya. (Fananisa ni Marku 3:21.) Hi mhaka leswo va nga hi hlupha hambi hi ku hi ba. Kambe leswo a swi fanelanga swi hi hlamalisa, hikusa Yesu a te: “Phela munhu a ta nyenyiwa hi va le kaya ka yena.” (Mat. 10:36) Hambileswi maxaka ya hina ma hi nyenyaka, hina a hi nga ta ma nyenya. Loko lirhandzu la hina hi Yehovha li kula, li yentxa swaku hi rhandza vanhu van’wana. (Mat. 22:37-39) Hambileswo, a hi nga ta tshika ku yingisa minawu ya Yehovha hi ku lava ku tsakisa vanhu.

8-9. I yini lexi nga pfuna makwerhu Georgina ku tiyisela loko va mu hlupha?

⁸ Georgina, lweyi hi nga vulavula hi yena ku sunguleni, a swi kotile ku tshama na a tiyile hambileswi a a hluphiwa hi mamana wa yena. Yena a vule leswi: “Mina ni mamana wa mina hi sungule ku djondza Bibele ni Timboni ta Yehovha. Loko ku hundze 6 wa tiwheti ni lave ku ya mintlhanganwini kambe mamana wa mina a ni djikelile. Ni tsumbule swaku mamana a a vulavula ni vanhu lava a va tshike ntiyiso, naswona a  a tirhisa leswi a va mu byela loko a vulavula na mina. Phela mamana a a ni rhuketela, a ni kokakoka misisi, a tlhela a ni yentxa minchumu yin’wana ya ku biha ku patsa ni ku txukumeta mabuku ya mina. Ni tsakamisiwe na ni ni 15 wa malembe. Hi nkama wolowo mamana a zame ku ni tshikisa ku tirhela Yehovha hi ku ni yisa ka ndhawu leyi a ku yisiwa tintombhi ta ku a ti kahle hi nhloko, swaku ti ta pfuniwa. Phela ka ndhawu leyo, a ku ni tintombhi leti a ti dzaha mbangi ti tlhela ti yentxa minchumu yin’wana ya ku biha hintamu. Swi vava hintamu ku hluphiwa hi munhu lweyi u mu tivaka, lweyi a wu nyimela swaku a ku rhandza a tlhela a ku hlayisa.”

⁹ I yini lexi nga pfuna Georgina ku tiyisela? Yena a li: “Siku leli mamana a nga ni djikela, a na ha ku gama ku lerha Bibele hinkwalu. A ni tiyiseka swaku ni wu kumile ntiyiso, naswona wunghanu la mina na Yehovha a li li likulu hintamu. A ni khongela minkama hinkwayu ka Yehovha, naswona a a ni twa. Nkama lowu a ni tshama ka ndhawu leyi mamana a nga ni yisa ka yona, makwerhu mun’wana wa wansati, a ni kombele swaku ni ya kaya ka yena naswona hi sungule ku djondza Bibele xikan’we. Nkama hinkwawu lowu, ni tiyisiwe hi vamakwerhu ka Yindlo ya Wugandzeli. Vamakwerhu va ni yentxe ni titwa ni li wa ndjangu wa vona. Ni swi vone hi noxe swaku Yehovha a ni matimba ku tlula vanhu hinkwavu lava va hi hluphaka, ku nga na mhaka swaku hi hluphiwa hi vamani.”

10. Yehovha a ta yentxa yini loko hi hluphiwa?

¹⁰ Mupostolo Pawulo a tsale swaku a xi kona lexi nga kotaka “ku hi hambanisa ni lirhandzu leli Xikwembu xi nga na lona hi hina, leli xi nga li kombisa hi ku tirhisa Hosi ya hina Kreste Yesu.” (Rom. 8:38, 39) Hambileswi minkama yin’wana hi hluphiwaka, minkama hinkwayu Yehovha a na hina. Wa hi tiyisa naswona wa hi pfuna. Leswi nga humelela Georgina swi hi komba swaku Yehovha a nga hi pfuna hi ku tirhisa vamakwerhu abandleni.

11. Lirhandzu leli Yesu a nga li tlhamusela ka Yohani 15:12, 13, li va pfunise ku yini vadjondzisiwa va yena? Nyikela xikombiso.

¹¹ Ka wusiku la wugamu na Yesu a nge se fa, a byele vadjondzisiwa va yena swaku va rhandzana. (Lerha Yohani 15:12, 13.) A a swi tiva swaku loko va rhandzana va tlhela va twanana a va ta swi kota ku tiyisela loko vanhu va misava leyi va va hlupha. Vona xikombiso xa bandla la Tesalonika. Ku sukela li va kona, vamakwerhu ka bandla leli a va hluphiwa. Kambe vamakwerhu va bandla leli va ve xikombiso lexinene  xa ku tshembeka ni xa lirhandzu. (1 Tes. 1:3, 6, 7) Pawulo a va byele swaku va tama va “kulisa lirhandzu lolelo.” (1 Tes. 4:9, 10) Lirhandzu leli a li ta va pfuna swaku va tiyisa lava nga tshoveka timbilu va tlhela va pfuna lava nga hela ntamu. (1 Tes. 5:14) Va yingise leswi Pawulo a nga va byela swona. Hi mhaka leyo, Pawulo a tlhele a va byela marito lawa ka karta la yena la wumbirhi: “Ndlela leyi mi rhandzanaka hi yona ya kula.” (2 Tes. 1:3-5) Phela lirhandzu leli Vatesalonika a va li na lona li va pfune swaku va tiyisela loko va kumana ni swikarhatu.

12. Vamakwerhu va swi kombise ku yini swaku a va rhandzana nkama ku nga va ni nyimpi ka tiko leli a va tshama ka lona?

¹² Vona leswi nga humelela makwerhu Danilo ni nsati wa yena. Nkama ku nga fika nyimpi ka doropa leli a va tshama ka lona, va tame va ya mintlhanganwini, va yentxa leswi va nga swi kota swaku va chumayela, va tlhela va yavelana swakudla ni vamakwerhu van’wana. Kambe siku lin’wana makwerhu Danilo a teliwe hi masonchwa. Ma mu byele swaku a a fanele a tshika ku va Mboni ya Yehovha. Yena a li: “A nkama ni nga yala, va ni bile va tlhela va yentxa ingaku vo ni duvula ka nhloko. Na va nge se famba, va ni chaviselile va ku a va ta tlhela va vuya va ta pfinya nsati wa mina. Loko vamakwerhu va tive leswo, hi ku hantlisa va hi pfunile leswuku hi ya ka doropa lin’wana hi xitimela. Ni nge li khohlwi lirhandzu la vamakwerhu lavo. Loko se hi fikile ka ndhawu yoleyo, vamakwerhu va hi nyike swakudla va tlhela va hi pfuna swaku hi kuma ntirho ni ndhawu ya ku tshama. Leswo swi yentxe swaku na hina hi kota ku pfuna vamakwerhu van’wana lava a va baleka nyimpi.” Phela hinkwaswu leswi, swi hi komba swaku loko hi rhandzana hi nga swi kota ku tiyisela loko hi hluphiwa.

13. Moya wa ku kwetsima wu nga hi pfunisa ku yini swaku hi tiyisela loko vanhu van’wana va hi nyenya?

¹³ Yesu a byele valandzeli va yena swaku va rhandza lava va va hluphaka. (Mat. 5:44, 45) Ku yentxa leswo a swi vevuki. Kambe swi nga koteka ku yentxa leswo loko hi pfuniwa hi moya wa ku kwetsima wa Yehovha. Phela a lirhandzu, ku lehisa mbilu, wunene, ku vevuka ni ku tikhoma i yin’wana ya mihandzu ya moya wa ku kwetsima. (Gal. 5:22, 23) Minchumu leyi yi hi pfuna ku tiyisela loko hi hluphiwa. Phela vanhu van’wana lava a va hi nyenya va vhele va txintxa loko va vona vasati va vona, vanuna va vona, vana, ni vavhizinyu va vona va kombisa mihandzu leyi ya moya wa ku kwetsima. Van’wana lava a va hi hlupha, va txintxile va va Timboni ta Yehovha.  Se loko swi ku karhatela ku kombisa wumunhu leli loko va ku hlupha, khongela ka Yehovha u kombela moya wa ku kwetsima. (Luk. 11:13) Tiyiseka swaku ku hanya hi minawu ya Yehovha hi swona swa lisima minkama hinkwayu. — Swi. 3:5-7.

14-15. Varoma 12:17-21 yi mu pfunise ku yini Yasmeen ku rhandza nuna wa yena hambileswi a a mu hlupha?

¹⁴ Vona leswi nga humelela makwerhu Yasmeen. Nkama lowu a nga va Mboni ya Yehovha, nuna wa yena a pimise leswaku a a kanganyisiwile, naswona a zame ku mu tshikisa ku tirhela Xikwembu. Nuna wa yena a mu rhuketelile, a yentxa swaku maxaka, mufundhisi ni nyanga va mu chavisela va tlhela va mu lumbeta swaku a zama ku hohlota ndjangu. Nuna wa yena a patse ni ku rhuketela vamakwerhu na va li mintlhanganwini! Yasmeen a a tshamela ku rila hi mhaka ya leswi a va mu hlupha.

¹⁵ Vamakwerhu va le bandleni va mu tiyisile Yasmeen. Madoda hi ku hantlisa ma mu pfune swaku a tirhisa marito lawa ma nga ka Varoma 12:17-21. (Lerha.) Makwerhu Yasmeen a li: “A swi karhata, kambe ni kombele Yehovha swaku a ni pfuna ni tlhela ni tinyimisela ku tirhisa leswi Bibele li swi vulaka. Nkama lowu nuna wa mina a a chimisela kozinya hi maxivomu, a ni limpa ku basa. Loko a ni rhuketela, a ni mu hlamula hi ndlela ya yinene. Funtshi loko a vabya, a ni mu hlayisa.”

16-17. U djondze yini ka leswi nga humelela Yasmeen?

¹⁶ Yehovha a mu hakelile Yasmeen hileswi a nga komba lirhandzu nuna wa yena. Yasmeen a li: “Nuna wa mina a sungule ku ni tshemba hikusa a a swi tiva swaku nkama hinkwawu a ni mu byela ntiyiso. A sungule ku ni yingisela hi xihlonipho loko ni vulavula na yena hi ta wukhongeli, naswona a pfumelile swaku hi va ni ku rhula a kaya. Swoswi hi yena a ni byelaka swaku ni tikhorisa hi ku ya mintlhanganwini. Phela a ndjangu wa hina wu txintxe hi ndlela ya ku hlamalisa, naswona hi ni ku rhula hintamu a kaya. Ni navela swaku siku lin’wana, nuna wa mina a lava ku djondza ntiyiso hi tlhela hi tirhela Yehovha xikan’we.”

¹⁷ Leswi swi nga humelela Yasmeen swi kombisa swaku lirhandzu “a li godoli hambi ko yentxeka yini na yini, . . . li tshemba minchumu hinkwayu, li tiyisela minchumu hinkwayu.” (1 Kor. 13:4, 7) Phela ku nyenyiwa i nchumu xa xikulu swi tlhela swi vavisa. Kambe a lirhandzu i likulu hintamu ku tlula ku nyenyiwa. Phela loko hi rhandza van’wana va nga ha txintxa mapimiselo ya vona, va lava ku tirhela Yehovha va tlhela va nyima ku hi hlupha. Naswona leswo swi ta tsakisa Yehovha. Hambiloko lava va hi nyenyaka va  tama va hi hlupha, hina hi ta tsaka. Swi kotekisa ku yini leswo?

18. Hi mhaka muni hi tsaka loko va hi nyenya?

¹⁸ Yesu a vule leswi: “Tsakani loko vanhu va mi nyenya”. (Luk. 6:22) A nga kona lweyi a rhandzaka ku nyenyiwa. A swi hi tsakisi ku hluphiwa hi mhaka leswi hi nga Timboni. Se hi mhaka muni hi fanele hi tsaka loko va hi hlupha? Vona 3 wa swivangelo. Xa ku sungula, loko hi tiyisela, Xikwembu xa hi yamukela. (1 Ped. 4:13, 14) Xa wumbirhi, lipfumelo la hina la tiyisiwa loko hi hluphiwa. (1 Ped. 1:7) Kasi xa wunharhu, hi ta kuma wutomi la ku kala li nga heli. — Rom. 2:6, 7.

19. Hi mhaka muni vapostolo va tsakile hambileswi va nga biwa?

¹⁹ Nkama lowu Yesu na a ha ku pfuxiwa, vapostolo va kume ku tsaka loku Yesu a nga vulavula hi kona. Nkama va nga biwa va tlhela va byeliwa swaku a va nyime ku chumayela, vona va tsakile. Hi mhaka muni? “Hileswi va nga vuliwa lava faneliwaka hi ku hluphiwa hi mhaka ya vito la Yesu.” (Mint. 5:40-42) Vona a va mu rhandza hintamu Yesu ku tlula leswi a va va chavisa xiswona lava a va va nyenya. Naswona va kombise lirhandzu lolelo hi ku kala “va nga tshiki” ku chumayela mahungu ya ku tsakisa. Vamakwerhu va vanyingi namuntlha va tama va tirhela Yehovha hambileswi va hluphiwaka. Va swi tiva swaku Yehovha a nge wu khohlwi ntirho wa vona lowu va nga wu yentxa hi mhaka ya vito la yena. — Heb. 6:10.

20. Hi ta djondza yini ka djondzo leyi landzelaka?

²⁰ Vanhu va misava leyi va ta tama va hi nyenya anze yi helisiwa. (Yoh. 15:19) Kambe leswo a swi fanelanga swi hi chavisa. Hi laha hi nga ta swi vona hi kona ka djondzo leyi landzelaka, Yehovha a ‘tiyisa ni ku vhikela’ lava va mu tshembaka. (2 Tes. 3:3) Se a hi tameni hi mu rhandza Yehovha, hi rhandza vamakwerhu hi tlhela hi rhandza vanhu lava va hi nyenyaka. Loko hi yentxa leswo, hi ta twanana hi tlhela hi va ni wunghanu la linene na Yehovha, hi tlhela hi mu tsakisa. Naswona hi ta kombisa swaku a lirhandzu li ni matimba hintamu ku tlula ku nyenyiwa.