1. Hi yihi mintirho leyi vamakwerhu vavasati va yi yentxaka abandleni naswona hi swihi swikarhatu leswi va kumanaka na swona? (Vona foto ka pajina la ku sungula.)

HA TSAKA leswi hi nga ni vamakwerhu vavasati va vanyingi lava va tirhaka hi matimba abandleni. Hi xikombiso, va va kona amintlhanganwini va tlhela va ya nsin’wini, van’wana va va kona loko ku basisiwa ku tlhela ku lunghisiwa a Yindlo Ya Wugandzeli va tlhela va pfuna vamakwerhu van’wana! Kambe na vona va kumana ni swikarhatu, van’wana va hlayisa vapsali va vona lava se va nga guga, van’wana va kanetiwa hi maxaka ya vona, kasi van’wana a va ha na vavanuna funtshi va hlayisa vana va vona voxe.

2. Hi mhaka muni hi fanele hi pfuna vamakwerhu vavasati abandleni?

² Hi mhaka muni hi fanele hi pfuna vamakwerhu vavasati? Hi mhaka ka misava leyi ya Sathana vavasati a va khomiwi kahle, funtshi a va hloniphiwi. Bibele, li hi byela swaku hi va pfuna hi tlhela hi va seketela. Hi xikombiso, mupostolo Pawulo a kombele bandla la Roma leswaku li yamukela Febe, a te: ‘[Ni kombela] mimupfuna hi xin’wana ni xin’wana lexi angakombelaka leswaku mimupfuna ha xona’. (Rhom. 16:1, 2) A nkama Pawulo a a li mufarisi, a a tiva swaku vavasati a hi va nchumu naswona a a nga va hloniphi, kambe loko se a li Mukreste a a tekelela xikombiso xa Yesu hi ku va khoma kahle vavasati a tlhela a va hlonipha. — 1 Kor. 11:1.

3. Yesu a a titwisa ku yini hi vavasati, ngopfu ngopfu lava a va tirhela Yehovha?

³ Yesu a a hlonipha vavasati hinkwavu. (Yoh. 4:27) A a nga va tekeli hansi ku fana ni varhangeli va Vayuda va minkama ya yena. Buku lin’wana leli vulavulaka hi Bibele li li: “Yesu a nga zanga a vula nchumu lexi a xi kombisa swaku a a nga va hloniphi vavasati.” Kambe a a va nyika lisima ku fana ni leswi Yehovha a swi yentxaka. Leswo swi vula swaku a a va vona na va li vamakwavu  va yena vavasati funtshi a va li va lisima ku fana ni vavanuna. — Mat. 12:50.

4. Hi ta bula hi yini ka djondzo leyi?

⁴ Minkama hinkwayu Yesu a a lunghekile swaku a pfuna vavasati lava va tirhelaka Yehovha, funtshi a a va khensa ni ku va nyimelela. Swoswi a hi voneni swaku hi nga mu tekelelisa ku yini Yesu.

5. Hi mhaka muni vamakwerhu van’wana swi va karhatela ku va ni vanghanu abandleni?

⁵ Hinkwerhu ha swi lava ku va ni vanghanu, kambe minkama yin’wana vamakwerhu vavasati swa va tikela ku yentxa leswo. Hi mhaka muni? Vona leswi vamakwerhu van’wana va swi vulaka. Makwerhu mun’wana wawansati lweyi vito la yena ku nga Jordania * a li: “Leswi ni kalaka ni nga chadanga ni tivona ni nga pfuni nchumu abandleni, ni tivona i nga ku a ni lumbi bandla.” Cristina, lweyi a nga mupfuli wa ndlela, lweyi a nga rhurha a ya ka bandla lin’wana a li: “Loko u li ka bandla lin’wana u nga ha titwa na u li wexe.” Phela, hambi vamakwerhu vavanuna na vona va nga titwisa xileswo. Van’wana va tshama ka miminti ya ku kala va nga li Timboni Ta Yehovha, hi mhaka leyo swa va karhatela ku va ni wuxaka la kahle ni maxaka ya vona, naswona leswo swi yentxa swi va tikela hintamu loko va nga na vanghanu bandleni. Vamakwerhu van’wana lava va titwaka na va li voxe hi lava va vabyaka kumbe lava kalaka va nga swi koti ku suka kaya ni lava va vabyeliwaka hi maxaka ya vona. Anita a li: “A ni nga swi koti ku ya mintlhanganwini hikusa hi mina a ni hlayisa mamana wa mina lweyi a a vabya.”

6. Hi ku ya hi Luka 10:38-42, Yesu a mu pfunise ku yini Marta na Maria?

⁶ Yesu a a heta nkama ni vamakwerhu vavasati funtshi a a li munghanu wa vona. Pimisa hi wunghanu leli a a li na lona na Maria na Marta, lava a va nga chadanga. (Lerha Luka 10:38-42.) Leswi a a swi vula ni mintirho ya yena a swi va yentxa va titwa na va chunsekile. Hi xikombiso, Maria a a nga chavi ku tshama kusuhi ni minenge ya Yesu loko a mu djondzisa. * Naswona leswi Marta a a nga mu chavi Yesu a nga chavanga ku mu byela loko a karhateka hileswi Maria a a nga mu pfuni ku tirha. Ka nkama wolowo Yesu a va pfunile ha vambirhi, naswona a kombisile swaku a a ni mhaka na vona ni makwavu wa vona Lazaru hi ku tlhela a va yendzela. (Yoh. 12:1-3) Hi mhaka leyo, a swi hlamalisi leswi va nga kombela Yesu swaku a va pfuna hi mhaka ya leswi Lazaru a a vabya hintamu. — Yoh. 11:3, 5.

7. Hi nga va tiyisisa ku yini vamakwerhu vavasati?

⁷ Vamakwerhu van’wana vavasati vo kumana ni vamakwerhu ntsena loko va li mintlhanganwini. Hi mhaka leyo, hi fanele hi va yamukela, hi bula na vona hi tlhela hi va komba swaku ha va rhandza. Jordania lweyi se hi nga vulavula hi yena ku sunguleni a te: “Ni tsaka hintamu loko vamakwerhu va ni khensa hi tinhlamulu ta mina, va ni kombela swaku hi famba xikan’we nsin’wini kumbe ku ni pfuna hi swilo swin’wana.” Hi fanele hi va byela vamakwerhu vavasati swaku i va lisima ka hina. Kiyara a te: “Loko ni lovha mintlhanganwini, vamakwerhu va gama va ni mandarela a mensajem va lava ku tiva swaku ni kahle ke. Leswo swi ni yentxa ni swi vona swaku vamakwerhu va ni rhandza.”

8. Hi nga yentxa yini swin’wana swaku hi tekelela Yesu?

⁸ Ku fana na Yesu hi fanele hi tinyika nkama  wa ku bula ni vamakwerhu vavasati. Hi nga ha va rhamba hi ta dla na vona kumbe hi hungata na vona. Loko hi bula na vona hi fanele hi tiyiseka swaku marito ya hina ma va tiyisa. (Rhom. 1:11, 12) Madoda ma fanele ma tekelela Yesu. Yesu a a swi tiva swaku van’wana swa va karhatela ku tshama na va nga chadanga, kambe ku chada ni ku va ni vana a hi swona ntsena swi yentxaka vanhu va tsaka. (Luk. 11:27, 28) Kambe lexi yentxaka munhu a tsaka hi kakunene i ku tirhela Yehovha. — Mat. 19:12.

9. Madoda ma nga va pfunisa ku yini vamakwerhu vavasati?

⁹ Madoda ma fanele ma teka vamakwerhu vavasati bandleni na va li vamakwavu kumbe vamamana va vona. (1 Tim. 5:1, 2) Madoda ma nga yentxa leswo hi ku tinyika nkama wa ku bula ni vamakwerhu vavasati loko mintlhanganu yi nge se sungula kumbe loko se yi helile. Cristina a te: “Doda lin’wana li vone swaku a ni tshama na ni khomekile nkama ni nkama. Hi mhaka leyo, li ni vutisile swaku i yini leswi a ni swi yentxa, ni li khense ngopfu hikusa leswi li nga swi yentxa a swi kombisa swaku a li ni mhaka na mina.” Loko madoda ma tinyika nkama wa ku bula ni vamakwerhu vavasati swi kombisa swaku va va rhandza. * Anita lweyi se hi nga bula hi yena a tlhamusela swaku hi mhaka muni swi li swa lisima ku bula ni madoda nkama  ni nkama. A li: “Ni va tiva ku yampsa na vona va ni tiva ku yampsa naswona loko ni kumana ni swikarhatu a ni chavi ku va kombela swaku va ni pfuna.”

10. Hi nga va pfunisa ku yini vamakwerhu vavasati swaku va tshama na va tsakile?

¹⁰ Hinkwerhu ha tsaka loko vanhu va vona leswi hi swi yentxaka kumbe va hi khensa. Kambe loko vanhu van’wana va nga wu nyiki lisima ntirho wa hina kumbe va wu tekela hansi swi nga ha hi heta ntamu. Abigael lweyi a nga mupfuli wa ndlela naswona a kalaka a nga chadanga a tlhamusela swaku minkama yin’wana a vona i nga ku vanhu a va mu tivi, a li: “Vanhu va vanyingi vo tiva vapsali va mina ni vamakwerhu kambe mina a va ni tivi.” Vona leswi nga vuliwa hi makwerhu Palmira lweyi a nga tirha malembe ya manyingi na a nga chadanga ka ntirho wa wumisiyonariyo, hi ku famba ka nkama a tlhelele kaya leswaku a ta hlayisa vapsali va yena naswona swoswi se a ni kolomo ka 70 wa malembe kambe a ha li mupfuli wa ndlela. A li: “Leswi swi nga ni pfuna hintamu i ku tiva swaku vamakwerhu a va ni vona ni li wa lisima.”

11. Yesu a swi kombisise ku yini swaku a a va khensa vavasati lava a va tshembekile funtshi va yentxa ntirho wa Yehovha?

¹¹ Yesu a a va khensa ngopfu vavasati lava ‘avatirhisa [swilo] swa vona’ leswaku va mu pfuna. (Luk. 8:1-3) Yesu a a va nyika mintirho leswaku va yi yentxa, a tlhela a va djondzisa ntiyiso hi Xikwembu. Hi xikombiso, a va byelile swaku a a ta dlayiwa a tlhela a pfuxiwa. (Luk. 24:5-8) Ku fana ni leswi a nga pfuna vapostolo leswaku va tshama na va lunghekile leswaku va ta hlula mindzingo a pfune vavasati leswaku va tshama va lunghile. (Marka 9:30-32; 10:32-34) Hambileswi vapostolo va nga baleka nkama Yesu a nga khomiwa kambe vavasati van’wana va tame va seketela Yesu hi ku va kusuhi na yena nkama a nga dlayiwa ka mhandzi. — Mat. 26:56; Marka 15:40, 41.

12. Hi wini ntirho lowu Yesu a nga nyika vavasati?

¹² Yesu a nyike vavasati ntirho wa lisima hintamu. Hi xikombiso, vavasati hi vona va nga sungula va swi tiva swaku Yesu a pfuxiwile, a rhume vavasati volavo leswaku va ya byela vapostolo swaku se a pfuxiwile. (Mat. 28:5, 9, 10) Ka pentekoxta ya 33 ka nkama wa vapostolo, swi nga yentxeka a ku ni vavasati nkama Yehovha a nga chulula moya wa yena wa ku kwetsima. Loko ku li leswaku a va li kona, vamakwerhu volavo vavasati va kume nyiko ya ku vulavula hi tirimi tin’wana ni ku byela vanhu “mintirho leyikulu ya Xikwembu”. — Mint. 1:14; 2:2-4, 11.

13. I yini leswi vamakwerhu vavasati va swi yentxaka naswona hi nga yentxa yini ku kombisa swaku ha va khensa?

¹³ Hi fanele hi va khensa vamakwerhu vavasati hi ntirho lowu va wu yentxelaka Yehovha. Van’wana va tirha ka ku yaka ni ku lunghisa tiyindlo ta nhlengeletanu van’wana va pfunisa ka magrupu lawa ku vulavuliwaka tirimi tin’wana, kasi van’wana va tirha aBetele. Vamakwerhu van’wana vavasati va pfunisa loko ku humelela timhangu, va pfunisa ka ku hundzuluxela, kasi van’wana i vapfuli va ndlela ni va misionariyo. Ku fana ni vamakwerhu vavanuna na vona va ya ka xikola xa vapfuli va ndlela, Xikola Xa Vachumayeli Va Mfumu ni xa Jiliyadi. Handle ka leswi, vamakwerhu vavasati va pfuna vanuna va vona leswaku va hetisisa a mintirho abandleni ni ka nhlengeletanu. Phela vamakwerhu volavo vavanuna a va nga ta swi kota ku va madoda ya bandla loko a va nga pfuniwi hi vasati va vona. (Efe. 4:8) U nga yentxa yini leswaku u seketela vamakwerhu lava vavasati ka ntirho lowu va wu yentxaka?

14. Hi ku ya hi Tipisalema 68:11, i yini leswi madoda lama nga tlhariha ma swi yentxaka?

 ¹⁴ Madoda lama nga tlhariha ma swi twisisa swaku vamakwerhu vavasati i “ntlawa lowukulu wa masonchwa” lawa ma tirhelaka Yehovha, naswona na vona va swi kota ku djondzisa kahle mahungu ya ku tsakisa. (Lerha Tipisalema 68:11.) Phela madoda na wona ma nga djondza ka vamakwerhu vavasati. Abigael lweyi hi nga bula hi yena ku sunguleni a tsake hintamu nkama madoda ma nga mu vutisa swaku a swi kotisa ku yini ku chumayela ka teritoriyu la vona. A te: “Swi ni yentxe ni vona swaku ni wa lisima ka Yehovha ni nhlengeletanu ya yena.” Xin’wana lexi madoda ma nga xi vona hi leswaku vamakwerhu vavasati abandleni va nga swi kota ku pfuna majovhem ya vavasati loko ma kumana ni swikarhatu. (Tito 2:3-5) Ku vula ntiyiso ha va tlangela hintamu vamakwerhu vavasati!

15. I mpsini leswi vamakwerhu vavasati va nga ha lavaka ku pfuniwa ka swona?

¹⁵ Minkama yin’wana vamakwerhu vavasati va nga ha lava munhu wa ku va nyimelela loko va kumana ni swikarhatu. (Esa. 1:17) Hi xikombiso, loko a feliwa kumbe a tshikiwa hi nuna wa yena a nga ha lava munhu wa ku mu nyimelela kumbe a mu pfuna hi mintirho ya le kaya. Makwerhu wawansati lweyi a nga guga a nga ha lava munhu leswaku a mu vulavulela ni dotori wa yena. Mupfuli wa ndlela lweyi a yentxaka mintirho yin’wana ka nhlengeletanu a nga ha lava ku nyimeleliwa loko vanhu van’wana va mu sola sola loko a nga ha yi hintamu a nsin’wini ku fana ni vapfuli va ndlela van’wana. I mpsini swin’wana hi nga swi yentxaka leswaku hi pfuna vamakwerhu vavasati? A hi tlheleni hi vona xikombiso xa Yesu.

16. Hi ku ya hi Marka 14:3-9 Yesu a mu nyimelelise ku yini Maria?

¹⁶ Yesu a a va nyimelela vamakwerhu vavasati loko vanhu va va sola sola. Hi xikombiso, a nyimelele Maria nkama Marta a nga mu sola. (Luk. 10:38-42) Naswona a tlhele a nyimelela Maria nkama van’wana va nga mu sola hi ku vula swaku leswi a a swi yentxa a swi nga li kahle. (Lerha Marka 14:3-9.) Yesu a a swi twisisa leswi swi nga yentxiwa hi Maria. Hi mhaka leyo, a mu khensile a ku: ‘Aniyendlele ntirho lowunene. . . . Wansati lweyi ayendlile leswi aswikoteke’. Yesu a game a vula swaku leswi a nga swi yentxa Maria a swi ta tiviwa a “misaveni hinkwayu”, lani a ku ta chumayeliwa mahungu ya ku tsakisa. Hambi hi swoswi hi le ku vulavuleni hi Maria. Swa tsakisa ku tiva leswaku Yesu a vule swaku mahungu ya ku tsakisa a ma ta chumayeliwa amisaveni hinkwayu na a khensa leswi Maria a nga mu yentxela swona. Swoleswo swi tiyise Maria nkama a va mu sola sola!

17. I ka swiyimu muni lani swi lavaka u nyimelela vamakwerhu vavasati?

¹⁷ U nga swi kota ku nyimelela vamakwerhu vavasati loko swi laveka? Pimisa hi leswi, a hi nge vamakwerhu van’wana abandleni va tshamela ku sola sola makwerhu wawansati lweyi ndjangu wa yena wu kalaka wu nga li Timboni, hileswi a tshamelaka ku xwela mintlhanganwini a tlhela a hantla a muka loko mintlhanganu yi hela. Va tlhela va mu sola, hileswi a kalaka a nga ti ni vana va yena hinkwavu nkama ni nkama a mintlhanganwini, va vula swaku a fanele a vulavula ni nuna wa yena a nyimelela lipfumelo la yena. Hambileswo a va swi tivi swaku makwerhu lweyi wawansati a yentxa hinkwaswu leswi a nga swi kotaka naswona a nga timandi kumbe ku yentxa swiboho hi vana va yena. Phela loko u mu khensa makwerhu lweyo hileswi a swi yentxaka u tlhela u vulavula kahle hi yena ka van’wana, a va ta nyima ku mu sola sola.

18. Hi nga yentxa yini swin’wana swaku hi pfuna vamakwerhu vavasati?

¹⁸ Hi nga kombisa swaku ha va rhandza vamakwerhu vavasati hi ku va pfuna. (1 Yoh. 3:18)  Anita lweyi se hi nga vulavula hi yena, lweyi a hlayisaka mamana wa yena wa ku vabya a li: “Vamakwerhu van’wana a va ta kaya va ta ni pfuna ku tendera mamana wa mina kumbe va hi tela ni swakudla. Leswo a swi ni yentxa ni titwa na ni rhandziwa ni tlhela ni vona swaku na mina ni lumba bandla.” Jordania na yena a pfuniwile hi makwerhu mun’wana hi ku mu byela leswi a nga swi yentxaka leswaku a lunghisa movha wa yena. A li: “Swa tsakisa ku tiva swaku vamakwerhu va ni mhaka na hina funtshi va lava hi hlayiseka.”

19. I yini swin’wana leswi madoda ma nga swi yentxaka swaku ma pfuna vamakwerhu vavasati?

¹⁹ Madoda na wona ma lava ku pfuna vamakwerhu vavasati naswona ma swi tiva swaku hi leswi Yehovha a lavaka swaku ma swi yentxa. (Yak. 1:27) Va zama ku fana na Yesu hi ku kala va nga tikarhatisi funtshi va nga veki swinawanawana swa ku kala swi nga twisiseki. (Mat. 15:22-28) Loko madoda ma pfuna vamakwerhu vavasati ma yentxa swaku va titwa na va rhandziwa hi Yehovha ni nhlengeletanu ya yena. Siku leli muvoneleli wa grupu la nsimu leli makwerhu Kiyara a a li ka lona a nga tiva swaku a a ta rhurha, a yentxe hinkwaswu leswi a nga swi kota leswaku a mu pfuna hi ku hantlisa. Kiyara a vule swaku leswo swi mu pfune hintamu, a tlhela a ku: “Leswi va nga ni pfuna va tlhela va ni tiyisa ni swi vonile swaku na mina ni wa lisima bandleni funtshi a ni noxe hambiloko ni kumana ni swikarhatu.”

20-21. Hi nga yentxa yini swaku hi komba vamakwerhu vavasati swaku ha va rhandza?

²⁰ A mabandleni ya hina ku ni vamakwerhu vavasati va vanyingi lava va tirhaka hi matimba naswona va lavaka ku seketeliwa. Ku fana na Yesu na hina hi fanele hi heta nkama na hi bula na vona, hi tlhela hi va tiva ku yampsa naswona hi nga kombisa swaku ha va khensa hileswi va swi yentxelaka Yehovha ni ku tlhela hi va nyimelela loko swi laveka.

²¹ Ka marito ya wugamu ka buku la Varhoma Pawulo a vulavule hi 9 wa mavito ya vamakwerhu vavasati. (Rhom. 16:1, 3, 6, 12, 13, 15) Vamakwerhu lava va tsake hintamu hi ku tiva swaku mavito ya vona ma kona ka karta la Pawulo. Na hina hi fanele hi tiyisa vamakwerhu vavasati abandleni. Hi ku yentxa leswo hi ta va hi kombisa swaku ha va rhandza ni swaku na vona va lumba bandla.