“Tshamani mi rindzile hikusa siku a mi li tivi nawona nkama a mi wu tivi.” — MATEWU 25:13.

“Tshamani mi rindzile, tshamani mi pfule matihlo, hikusa a mi wu tivi nkama wa kona.” — MARKU 13:33.

A ku na munhu la misaveni lweyi a li tivaka siku leli minchumu ya ku biha yi nga ta helisiwa hi lona. Kambe Xikwembu xi veke “nkama wa kona” ni siku la kona swaku xi helisa misava ya ku biha. (Matewu 24:36) Kambe a ku na nchumu lexi hi pfunaka ku tiva loko nkama lowo wu li kusuhi? Swi kona. Yesu a byele vadjondzisiwa va yena minchumu leyi a yi ta yentxeka, leyi a yi ta kombisa swaku nkama wolowo wu kusuhi.

Loko Yesu a vulavula hi “ku hela ka misava” a te: “Matiko ma ta lwa hi xiwona, ni mimfumu yi ta lwa hi xiyona, ku ta pfumaleka swakudla ni misava yi ta tsekatseka ka tindhawu ta ku hambanahambana.” (Matewu 24:3, 7) A tlhele a vula swaku a ku ta va ni “mintungu” ku nga mavabyi lawa ma hangalakaka hi ku hantlisa. (Luka 21:11) Wa swi vona swi yentxeka leswi Yesu a nga swi vula?

Vanhu namuntlha va hlupheka hi tinyimpi, ndlala, ku tsekatseka ka misava ni mavabyi. Hi xikombiso, hi 2004 ku ve ni ku tsekatseka ka misava loku ku nga yentxa swaku ku va ni tshunami ka lwandle la Oceano Índico leli nga dlaya 225.000 wa vanhu. Hi lembe lin’we a ntungu wa corona vírus wu dlaye vanhu va 2,6 milhões a misaveni hinkwayu. Yesu a vule swaku minchumu ya ku fana ni leyi a yi ta kombisa swaku misava yi kusuhi ni ku helisiwa.

Bibele li kombisa swaku loko misava yi li kusuhi ni ku helisiwa a hi ta hanya ka “masiku ya wugamu.” (2 Pedru 3:2, 4) Buku la 2 Timotiyu 3:1-5 li kombisa swaku ka masiku ya wugamu vanhu a va ta va ni mahanyelo ya ku biha. (Vona kwadru leli nge: “ Loko Misava Yi Li Kusuhi Ni Ku Helisiwa.”) Wa swi vona swaku namuntlha hi hanya ka misava leyi vanhu va kalaka va nga na lirhandzu, va lumbetaka van’wana va tlhela va va ni tihanyi? Leyi i minchumu yin’wani yi kombisaka swaku misava yi kusuhi ni ku hela.

Masiku ya wugamu ma ta hela siku muni? Bibele li kombisa swaku ku yo sala nkama wa wutsongo swaku Xikwembu xi helisa “lava wonhaka misava.” — Nhlawutelo 11:15-18; 12:12.

Xikwembu se xi li vekile siku ni nkama lowu xi nga ta helisa hi wona misava leyi ya ku biha. (Matewu 24:36) Kambe, ka ha ni mahungu man’wana ya ku tsakisa. Xikwembu a xi “lavi leswaku ku helisiwa munhu ni mun’we”. (2 Pedru 3:9) Hi mhaka leyo xi nyika nkama vanhu swaku va djondza hi xona va tlhela va xi yingisa. Xi yentxa leswo swaku vanhu va kota ku pona loko misava leyi yi helisiwa ivi va hanya ka misava ya nyuwani leyi nga ta va paradesi.

Xikwembu xi yentxa swaku vanhu va chumayeliwa misaveni hinkwayu swaku va ta djondza leswi va faneleke va swi yentxa swaku va fumiwa hi xona. Yesu a vule swaku mahungu ya ku tsakisa ya Mfumu wa Xikwembu a ma ta chumayeliwa “amisaveni hinkwayu”. (Matewu 24:14) Hi 2019, Timboni ta Yehovha ti hete mawora ya ku tlula 2 bilhões na ti chumayela ti tlhela ti djondzisa vanhu Bibele a misaveni hinkwayu. Yesu a hlaye swaku ntirho wa ku chumayela a wu ta yentxiwa misaveni hinkwayu na magamu ma nga se fika.

Nkama wa ku Xikwembu xi fuma vanhu wu kusuhi. Funtshi lexi tsakisaka hi swaku na wena u nga pona loko misava leyi yi helisiwa kutani u hanya ka Paradesi leyi Xikwembu xi yi tshembisaka. Ka nhlokomhaka leyi landzelaka u ta vona swaku u nga yentxa yini kuva u hanya ka misava ya nyuwani.