VANHU

Leswi Bibele li swi vulaka: ‘Xikwembu a xi yi ‘yentxanga mahala [misava] kambe xi yi yentxe leswaku ku hanyiwa ka yona.’ — ESAYA 45:18.

MISAVA

Leswi Bibele li swi vulaka: “Lixaka lin’wana la hundza lin’wana la ta kambe misava yi kona hi masiku ni masiku.” — EKLESIASTA 1:4.

SWI VULA YINI LESWO: Hi ku ya hi Bibele, misava a yi nga ta helisiwa naswona vanhu va ta hanya ka yona hi masiku ni masiku. Se swi lava ku vula yini ku helisiwa ka misava?

PIMISA HI LESWI: Bibele li fananisa ku helisiwa ka misava ni leswi swi nga yentxeka ka masiku ya Nowa, ka masiku wolawo misava a “yi tale hi wubihi.” (Genesa 6:13) Kambe Nowa a a li munhu wa munene, hi mhaka leyo Xikwembu xi mu ponisile ni ndjangu wa yena kambe xi helisa vanhu hinkwavu lava a va yentxa minchumu ya ku biha hi ndhambi. Loko Bibele li vulavula hi leswi nga yentxeka li li: “Vanhu va nkama wolowo va helisiwile nkama mati ma nga funengeta misava.” (2 Pedru 3:6) Leswo ku ve ku hela ka misava. Kambe i mpsini swi nga helisiwa? A hi misava kambe i vanhu hinkwavu lava a va yentxa swa ku biha, hi mhaka leyo loko Bibele li vulavula hi ku helisiwa ka misava a li vulavuli hi ku helisiwa ka planeta, li vulavula hi ku helisiwa ka vanhu lava yentxaka minchumu ya ku biha misaveni ni minchumu hinkwayu ya ku biha ya misava leyi.

SWIKARHATU NI WUBIHI

Leswi Bibele li swi vulaka: “Ku yo sala nkamanyana leswaku lava yentxaka swa ku biha va helisiwa; u ta txuvuka lani a va li kona, kambe a va nga ha ta va kona. Kambe lava ku rhula va ta dla tshomba la misava, va ta tsaka ngopfu a ku rhuleni kakukulu.” — TIPISALEMA 37:10, 11.

SWI VULA YINI LESWO: A ndhambi leyi nga va kona ka masiku ya Nowa a yi helisanga wubihi hinkwalu, loko se yi helile vanhu va tlhele va sungula ku yentxa minchumu ya ku biha ni ku yentxa swaku wutomi la vanhu li karhata. Ku nga li khale Xikwembu xi ta helisa wubihi hinkwalu, leswo swa twana ni leswi buku la Tipisalema li swi vulaka loko li ku: “Lava yentxaka swa ku biha va [ta] helisiwa.” Xikwembu xi ta tirhisa Mfumu wa xona swaku xi helisa wubihi hinkwalu, Mfumu lowu wu ta fuma vanhu hinkwavu va ku lulama na wu li tilweni.

PIMISA HI LESWI: Vanhu lava fumaka lana misaveni va ta wu tsakela Mfumu wa Xikwembu? Bibele li kombisa swaku a va nga ta wu tsakela funtshi va ta lwisana na wona. (Tipisalema 2:2) Se ku ta yentxeka yini? Mfumu wa Xikwembu wu ta helisa mimfumu hinkwayu ya vanhu naswona “wona woxe wu ta tshama na wu li kona minkama hinkwayu.” (Daniyele 2:44) Hi mhaka muni mimfumu ya vanhu yi fanele yi helisiwa?

Leswi Bibele li swi vulaka: “Munhu lweyi a fambaka a nge swi koti ku kongomisa minenge ya yena.” — YEREMIYA 10:23.

SWI VULA YINI LESWO: Vanhu a va yentxiwanga swaku va tifuma. Vanhu a va swi koti ku tifuma ni ku helisa swikarhatu swa vona.

PIMISA HI LESWI: Academia Britânica li vone swaku mimfumu ya vanhu a yi swi koti ku “helisa swikarhatu swa ku fana ni wusiwana, ndlala, mavabyi, tindhambi, swidzedze, tinyimpi ni swin’wana.” Li tlhele li vula swaku “van’wana va kholwa swaku loko ko va ni mfumu wun’we lowu fumaka misava hinkwayu wu nga swi kota ku helisa swikarhatu leswi.” Kambe hambiloko ko patsiwa mimfumu hinkwayu yi va mfumu wun’we ka ha ta tama ku fuma vanhu lava nga ni xidjoho naswona a va nge swi koti ku helisa swikarhatu hinkwaswu. Mfumu wa Xikwembu hi wona wu nga swi kotaka ku helisa swikarhatu misaveni.

Hi ku ya hi Bibele, ku helisiwa ka misava, ku nga ku helisiwa ka minchumu hinkwayu ya ku biha a ku fanelanga ku chavisa vanhu lava yentxaka minchumu ya yinene. Kambe i mahungu ya ku tsakisa hikusa misava leyi ya ku biha yi ta txintxiwa hi misava ya yinene.

Swi ta yentxeka nkama muni leswo? Ka nhlokomhaka leyi landzelaka hi ta kuma tinhlamulu ta Bibele ta xivutiso lexi.