Ka nhlokomhaka yinga hundza, hi djondze hi xikombiso lexi Yesu anga vulavula hi xona. Xikombiso lexi, xi tiyisekisa swaku Mfumu wa Xikwembu wu vekiwile matilweni naswona Yesu Kreste i Hosi ya wona.

Bibele li vula leswaku loko Yesu a sungule kufuma a hlongole Sathana ni mademona amatilweni. Akuva Sathana a hlongoliwile amatilweni hi 1914, i xin’we xa swivangelo leswi yendlaka kutala hi wubihi lani misaveni. — Nhlavutelo 12:7, 9.

Hambileswi swilo swi yaka swi biha misaveni, kuni leswi Yesu Hosi ya Mfumu wa Xikwembu angaswi yendla kuva a pfuna vanhu misaveni hinkwayu. Hi mhaka ntirho wa kudjondzisa vanhu Bibele, vanhu vanyingi va djondza matsinya ya lona va tlhela vama tirhisa ka wutomi la vona. (Esaya 2:2-4) Hi kupfuniwa hi Bibele vanhu vanyingi se i vatirhi va kahle, va hlayisa mindjangu ya vona naswona ava lweli kuganya. Leswi vaswi djondzaka swava pfuna naswona va tilunghiselela kuhanya hi kurhula hansi ka Mfumu wa Xikwembu.

Hambileswi Yesu se a fumaka matilweni, laha misaveni kaha fuma vanhu. Kambe Xikwembu xi byele Yesu xi ku: “Fuma henhla ka valala va wena.” (Tipisalema 110:2) Kuyo sala nkamanyana kuva Yesu a helisa valala hinkwavu a gama a pfuna hinkwavu lava yingisaka Xikwembu akuva va humula kuhlupheka.

Hi nkama lowo, Mfumu wa Xikwembu wuta:

• Helisa wukhongeli la mavunhwa. Wukhongeli hinkwalu lelinga djondzisa mavunhwa hi Xikwembu li tlhela li tikisela wutomi la vanhu, alingahata va kona. Bibele li fananisa wukhongeli la mavunhwa ni nghwavana. Loko li helisiwa vanhu vanyingi vata tsemeka nhlana. — Nhlavutelo 17:15, 16.

• Helisa mimfumu ya vanhu. Mfumu wa Xikwembu wuta helisa mimfumu hinkwayu ya vanhu. — Nhlavutelo 19:15, 17, 18.

• Helisa vanhu lava yendlaka swilo swa kubiha. Kuta yendleka yini hi lava tiyimiseleke kuyendla swilo swa kubiha naswona va yalaka kufumiwa hi Mfumu wa Xikwembu? “Loko kuli lavobiha vatahelisiwa la misaveni”. — Swivuriso 2:22.

• Helisa Sathana ni mademona. Sathana ni mademona, avangahataswi kota “kukanganyisa vanhu”. — Nhlavutelo 20:3, 10.

Se, kuta yendleka yini hi vanhu hinkwavu lava seketelaka Mfumu wa Xikwembu?

Na a li matilweni, Yesu Hosi ya Mfumu wa Xikwembu ata yendla swilo swa swinene lani misaveni swaku akuna hosi yinga tshama yiswi yendla. Ata yendla leswo na a pfuniwa hi lava 144.000, lavanga langiwa kola misaveni leswaku vaya fuma na yena matilweni. (Nhlavutelo 5:9, 10; 14:1, 3) Ata yendla swaku kurhandza ka Xikwembu kuyendliwa lani misaveni. I yini leswi Mfumu wa Xikwembu wungatahi yendlela swona la misaveni?

• Wuta helisa mavabyi ni kufa. “Akungata va ni munhu lweyi a tshamaka kona angata ku: ‘Na vabya’” naswona ‘lifu alingahatava kona’. — Esaya 33:24; Nhlavutelo 21:4.

• Wuta tisa kurhula ka kakunene ni kuhlayiseka. “Kurhula ka vana va wena kuta va kukulu” naswona “mun’wana ni mun’wana, ata tshama hansi ka nsinya wa yena wa mawuvha ni ka nsinya wa yena wa nkuwa, naswona anga kona lweyi angatava chavisa”. — Esaya 54:13; Mikiya 4:4.

• Wuta nyika vanhu mintirho ya yinene. “Vahlawuliwa va mina vatawu tsakela ntirho wa mavoko ya vona hi kuhelela. Avangata tirha va badla nyuku wa mahala”. — Esaya 65:22, 23.

• Wuta pfuxeta misava leyinga wonhiwa hi vanhu. “A mananga ni ndhawu leyi womeke swita tsaka, a livala leli womeke lita tsaka ngopfu li tlhela li humesa swiluva ni ma açafrão.” — Esaya 35:1.

• Wuta pfuna vanhu kuva va hanya hi laha kunga heliki. ‘Kambe wutomi lelingaheliki, hi leswaku vakutiva, wena ntsena unga Xikwembu xa ntiyiso, na Yesu Kreste lweyi umurhumeke.’ — Yohane 17:3.

Xikwembu xi lava leswaku na wena u tikhorisa hi swilo leswi.(Esaya 48:18) Nhlokomhaka leyi landzelaka yita tlhamusela swaku unga yendla yini akuva na wena u kuma wutomi la kutsakisa ka nkama lowu taka.