Ntwelawusiwana i “wuswikoti la kutwa leswi munhu mun’wana aswi twaka ni kutiveka ka xiyimo xa yena.” Mutivi wa ta lihanyo la miyanakanyo, Dr. Rick Hanson, a vule leswaku hi ntumbuluku “hinkwerhu hi psaliwa ni wuswikoti la kukombisa ntwelawusiwana ka vanhu van’wana.”

ANAKANYISISA HI LESWI: Hayini hina vanhu, kuhambana ni swivumbiwa leswin’wana hinkwaswo, hi ni ntwelawusiwana? Bibele li hlamusela leswaku Xikwembu xi vumbe munhu hi xifaniso xa xona. (Genesa 1:26) Hikolaho ka leswo, hi ni wumunhu la kufana ni la xona. Loko vanhu va susumetiwa hi ntwelawusiwana kupfuna van’wana, va tekelela ntwelawusiwana wa Yehovha, Muvumbi wa hina lweyi anga ni lirhandzu. — Swivuriso 14:31.

Yehovha a ni ntwelawusiwana. Hi mhaka leyo, a twa kuvava loko ahi vona hi hlupheka. Loko li vulavula hi ndlela leyi Yehovha a titweke ha yona hi Vayisrayele, lava tiyiseleke tinxanisa ta kukarhata swinene tani hi swikarawa aGibita ni kutlhela va heta 40 wa malembe amananga, Bibele li vula leswi: “Kuhluphekeni ka vona hinkwaku, na yena aahlupheka.” (Esaya 63:9) Xana uswi xiyile leswaku Yehovha ango vona ntsena kuhlupheka ka vona kambe a atwa kuvava hi leswi aswiva humelela? Yehovha hi yexe a vule leswaku ‘aakutiva kahle kuvava loku avakutwa.’ (Eksoda 3:7) A tlhela a vula leswi: “Mun’wana ni mun’wana lweyi amikhumbaka akhumba ndzololo ya tihlo la mina.” (Zakariya 2:8) Loko van’wana vahi twisa kuvava, na yena a twa kuvava.

Bibele lahi tiyisekisa leswaku hambiloko minkama yin’wana hi tshamela kutiyavanyisa kumbe kutivona hinga faneliwi hi ntwelawusiwana wa Xikwembu, “Xikwembu i xikulu kutlula timbilu ta hina nasvona xitiva svilo hinkwaswo.” (1 Yohane 3:19, 20) Leswi Yehovha anga ni ntwelawusiwana, ayi tiva kahle miyanakanyo ya hina, swiyimo swa hina ni ndlela leyi hi titwaka ha yona. Ahi tiva kuyampsa kutlula ndlela leyi hina hi titivisaka xiswona.

 Matsalwa mahi tiyisa

• “Utavitana, kutani Yehova atahlamula, utakombela kupfuniwa, yena ataku: ‘Hi mina lweyi’”. — Esaya 58:9.

• “‘Hikuva niyitiva kahle miyanakanyu leyi ninga na yona hi n’wina,’ kuvula Yehovha, ‘miyanakanyu ya kurhula, kungali ya makhombo, kuminyika wumundzuku ni ntshembo. Naswona mitanivitana, mita, mikhongela ka mina, kutani nitamiyingisa’”. — Yeremiya 29:11, 12.

• “Chela mihloti ya mina ka hotso ya wena. Xana ayitsaliwanga abukwini la wena?” — Tipisalema 56:8.

Kutiva leswaku Xikwembu xi ni ntwelawusiwana swingahi pfunisa kuyini loko hi kumana ni swikarhato? Vona xikombiso xa Maria.

“Jaha la mina la 18 wa malembe li hetelele li fa ndzhaku ka 2 wa malembe na li lwisana ni kankru. Ni twe kuvava swinene. Ni kwatele Yehovha hileswi anga yendlangiki nchumu leswaku a hanyisa n’wana wa mina. Ni sungule kupimisa leswaku aninga faneliwi hi leswingani yendlekela.

“Loko kuhundze 6 wa malembe, munghanu wa mina wa le bandleni wa kurhandzeka ni lweyi anga ni ntwelawusiwana a bule na mina. Ani yingiselile loko nimu hlamusela leswaku Yehovha angani rhandzi. Ndzhaku ka loko ani yingisile hi nkama wa kuleha na angani kavanyeti, a vule marito ya 1 Yohane 3:19, 20 lamani khumbeke swinene. Ama vula leswi: ‘Xikwembu i xikulu kutlula timbilu ta hina naswona xitiva swilo hinkwaswo.’ Agame ani hlamusela leswaku Yehovha wa kutwisisa kuxaniseka ka mina.

“Hambileswi ni tiyisiweke, swini karhatelile kususa kukwata loku ani li na kona ambilwini ya mina! Kambe nigame ni lerha buku ya Tipisalema 94:19, leyinge: ‘Loko kuvilela kunidla unichavelelile utlhela unirhulisa.’ Ni twe onge marito lawa a matsaleliwe mina! Ndzhaku ka nkama nyana, ni kote kutlhela ni vulavula na Yehovha hi swikarhato swa mina na ni tiyisekile leswaku yena wani twa a tlhela ani twisisa.

Xana aswi thovi mbilu kutiva leswaku Yehovha wahi twisisa ni kuhi twela? Kambe ungaha tivutisa: Hayini hi hlupheka hintamu? Xana Xikwembu xohi khatisa hi swidjoho swa hina? Xana xita yendla xokarhi leswaku xi helisa kuhlupheka? Swivutiso leswi swita hlamuliwa ka tinhlokomhaka leti landzelaka.