Xikwembu xi vumbe miri wa hina ni wuswikoti la kuhlamalisa la kutihanyisa. Dokodela Johns Hopkins a kombisa leswaku loko hiti tsema, hiti tlhava kumbe hiti kwharambuta hi nchumu xokarhi, “miri wa hina wu sungula kutirha hi ndlela leyi hlamalisaka leswaku wu holisa xilondza xa kona, kunga khataliseki leswaku i xikulu kumbe i xitsongo.” Hi kuhantlisa, miri wu yendla leswaku ngati yingaha humi, wu pfala xilondza ni kutiyisa ndhawu leyi vavisiweke.

ANAKANYISISA HI LESWI: Loko kuli leswaku Mutumbuluxi wa swilo hinkwaswo a vumbe miri wa hina ni wuswikoti leli la kuhlamalisa, xana ahinge tshembi leswaku atahi pfuna kuholisa swivavu swa hina swa le mbilwini? Mupisalema mun’wana a tsale leswi: ‘[Xikwembu] xiholisa vanhu lava timbilu ta vona titshovekeke. Xiboha swilondza swa vona.’ (Tipisalema 147:3) Loko kuli leswaku u tshama u vavisekile mbilwini hi mhaka ya swilo leswiku humeleleke khale kumbe leswiku humelelaka swoswi, i yini lexingaku kholwisaka leswaku Yehovha ata holisa “swilondza” swa wena — swoswi ni ka nkama lowu taka?

Xikwembu xaku tshembisa: “Ungachavi, hikusa ni na wena. Ungavileli hikusa mina ni Xikwembu xa wena. Nitakutiyisa, ina, nitakupfuna.” (Esaya 41:10) Munhu lweyi aswi tivaka leswaku Yehovha a ni mhaka na yena, a ni kurhula ka miyanakanyo naswona a kota kulangutana ni miringo yotala. Mupostola Pawulo a vitane kurhula loku tani hi “kurhula ka Xikwembu loku tlukaka kutwisisa hinkwaku.” Agame a yengetela a ku: “Ningayendla hinkwasvu hi matimba ya lweyi anitiyisaka.” — Vafilipiya 4:4-7, 9, 13.

Matsalwa mahi pfuna ku tiyisa lipfumelo la hina ka switshembiso swa Xikwembu leswingata hetiseka ka nkama lowu taka. Hi xikombiso, Nhlavutelo 21:4, 5 (leyi tshahiweke ka tluka leli landzelaka) yihi byela leswi Xikwembu xingataswi yendla ni swivangelo leswingahi kholwisaka leswaku xitaswi hetisisa.

• ‘Xitasula minhloti hinkwayo’ amatihlweni ya vanhu. Xikwembu xita helisa kuhlupheka ni kuvilela hinkwaku, hambi lokuya kuti kombaka kunga li ka nchumu amatihlweni ya van’wana.

• Hosi ya matimba hinkwawu, ‘leyi tshameke Xitshan’wini xa Vuhosi’ atilweni yita tirhisa matimba ni wulawuli la yona leswaku yi helisa kuhlupheka hilaha kungaheliki ni kuhi pfuna hikuya hi swilaveko swa hina.

• Yehovha wa hi tiyisekisa leswaku switshembiso swa yena i swa ‘ntiyiso [naswona] swatshembeka.’ Vito la yena ni wumunhu la yena i xitiyisekiso xa leswaku ata hetisisa leswi aswi tshembisaka.

“Xikwembu xitasula minhloti hinkwayo matihlweni ya vona, ni rifu aringahatava kona; hambi mali mahlomulu kumbe ku rila kumbe ku vaviseka asvingahatava kona, hikuva lesvosungula se svi hundzile.’ Kutani lweyi atshameke Xitsan’wene xa Vuhosi aku: ‘Vonani, niyendla svilo hinkwasvu svi va lesvimpsha.’ Atlhela aku: ‘tsala, hikuva marito lawa i ya ntiyiso, matshembeka.’” — Nhlavutelo 21:4, 5.

A Bibele swin’we ni swilo leswi Yehovha aswi tumbuluxeke swofana ni maplaneta, tinyeleti, n’weti, ni dlambu swihi komba wumunhu la Tatana wa hina wa le tilweni. A ntumbuluku ni Bibele swihi rhamba leswaku hiva ni wunghanu la kutiya na Yehovha. A ntumbuluku wuswi yendla hi ndlela leyinga kongomiki, kambe Bibile yi vula hi kukongoma: “Tshinelani kusuhi ni Xikwembu kutani xitatshinela kusuhi na n’wina.” (Yakobo 4:8) Mintirho 17:27 yi li: “Axile kule ni mun’wana ni mun’wana wa hina”.

Loko uya u tiva leswi yengetelekeke hi Xikwembu, uta tiyiseka swinene leswaku ‘xitikarhatela wena.’ (1 Petro 5:7) Se uta vuyeliwa hi yini hi kutiva leswo?

Anakanya hi leswinga yendlekela Toru wa le Japão. Hambileswi a wundliweke hi mamana wa Mukreste, a tipete ka ntlawa wa swigevenga lowu vitaniwaka yakuza. Yena a vula leswi: “Ani pimisa leswaku Xikwembu axini venga; nakambe ani ku a lifu la lava ava tshama kusuhi na mina, ngopfungopfu lava aniva rhandza swinene aku li xikhatiso xa Xikwembu.” Toru wa pfumela leswaku a wutomi leli a ahanya lona swin’we ni wumunhu la yena swimu yendle ava munhu wa mbilu ya kubiha ni kutiyela. Mayelana ni leswi aaswi navela, a khumbuka leswi: “Ani lava kufa na nahali mumpsha, kambe kusungula ani navela kudlaya munhu wa ndhuma leswaku nita tiviwa hi vanhu hinkwavo.”

Hambileswo, a ndzhaku ka loko a djondze Bibele swin’we ni nsati wa yena Ana, Toru a cincile a wutomi  ni mavonela yakwe hi ndlela ya kuhlamalisa. Ana a te: “Ni vonile hi matihlo ya mina Toru na a cinca”. Swoswi Toru a vula na a tiyisekile leswaku “xi kona Xikwembu lexinga ni mhaka ni mun’wana ni mun’wana wa hina. Axiswi lavi leswaku vanhu va fa naswona xiswi navela hintamu kurivalela vanhu lava tisolaka hi mbilu hinkwayo. Xikwembu xa yingisa swilo leswi hinga swikotiki kubyela van’wana ni swilo leswi van’wana avangataswi twisisa. Li kusuhi siku leli Yehovha angata susa swikarhato hinkwaswo, kuhlupheka ni swivavu hinkwaswo swa nyama ni swa mbilu. Hambi swoswi wahi pfuna hintamu hi tindlela taku ahinga tinyimelanga. Yehovha a ni mhaka na hina nakambe wahi pfuna loko hi pfumala ntamu.”

Hilaha ntokoto wa Toru wu hi kombeke ha kona, kutiva leswaku Xikwembu xingaswi kota — nakambe xitaswi yendla kungali khale — kuhelisa timhangu hinkwatu ni kusula minhloti hinkwayo swihi nyika ntshembo lowu tiyeke hi wumundzuku swi tlhela swi yendla leswaku wutomi la hina liva ni xikongomelo. Hakunene, unga vuyeliwa hi nkhatalelo wa Xikwembu hambi ka misava leyi yinga tala hi kuhlupheka.