1. Hinkwerhu hi fanele hi yendla yini?

AWUTASWI navela kunghena ka mpalisanu lowu uswi tivaka swaku wa karhata hambiloko u vabya kumbe u karhalile? Aswita karhata. Kambe mupostolo Pawulo a vule swaku Vakreste hinkwavu vale ka mpalisanu. (Hev. 12:1) Kambe hinkwerhu, lavatsongo ni lavakulu, lava karhaleke ni lavanga ni ntamu loko hi lava kukuma leswi Yehovha ahi tshembisaka swona swi lava hi tiyisela aze magamu. — Mat. 24:13.

2. Hi laha swinga kombisiwa ha kona ka 2 Timotiya 4:7, 8, i yini lexinga yendla Pawulo a vulavula na a chunsekile?

² Pawulo a achunsekile loko a vulavula hi mhaka leyi hikusa a ‘ahetile mpfhuka wa yena wa kutsutsuma’. (Lerha 2 Timotiya 4:7, 8.) Kambe i kutsutsuma ka kutshamisa kuyini loko Pawulo a avulavula hi kona?

3. Pawulo a avulavula hi mpalisanu muni?

³ Minkama yin’wana Pawulo a atirhisa swikombiso swa mintlango leyi ayi li kona a Grécia wa khale, akuva a djondzisa swilo swa lisima. (1 Kor. 9:25-27; 2 Tim. 2:5) Minkama yinyingi a fananise mahanyelo ya Vakreste ni mpalisanu wa kutsutsuma. (1 Kor. 9:24; Gal. 2:2; Filp. 2:16) Munhu a nghena ka mpalisanu lowu loko a tinyiketela ka Yehovha ni kutsakamisiwa. (1 Pet. 3:21) A gamesa mpalisanu wa yena wa kutsutsuma loko Yehovha amu tiyisekisa swaku atamu nyika wutomi lelinga heliki. — Mat. 25:31-34, 46; 2 Tim. 4:8.

4. Hita bula hi yini ka djondzo leyi?

⁴ Hi kwihi kuyelana kunga kona axikarhi ka mahanyelo ya Wukreste ni kutsutsuma ka mpalisanu? Swi yelana hintamu. Ahi kambiseni 3 wa minchumu leyi kombisaka kuyelana. Xa  kusungula, hi fanele hi ya tsutsuma lomu va palisanaka kona. Xa wumbirhi, hi fanele hi tsutsuma aze hi gama. Xawunharhu, hi fanele hi tinyimisela kuhlula swikarhato leswi hi kumanaka na swona nkama hi tsutsumaka.

5. Hi yihi ndlela leyi hi faneleke hi famba ka yona naswona hi mhaka muni?

⁵ Akuva mutsutsumi a kota kukuma prémio, a fanele a tsutsuma ka ndlela leyinga vekeliwa vatsutsumi. Hi kufanana, loko hi lava kukuma wutomi lelinga heliki, hi fanele hi landza minawu leyi Vakreste va faneleke va hanya hi yona, kumbe kufamba andleleni ya wutomi. (Mint. 20:24; 1 Pet. 2:21) Kambe Sathana ni vanhu va yena va lava swaku hi famba hi ndlela yin’wanyani. Va lava swaku ‘hi famba na vona’. (1 Pet. 4:4) Vahi poyila hi mhaka leswi hi fambaka hi ndlela leyi, va vula swaku ndlela ya vona ya yampsa hikusa yiva yendla va nchunseka. Kambe vo hemba. — 2 Pet. 2:19.

6. U djondza yini ka leswinga humelela Brian?

⁶ Hinkwavu lava va hanyaka hi kulandza mahanyelo ya misava ya Sathana, vataswi tsumbula swaku ndlela leyi vangayi langa ayiva nyiki kuchunseka, kambe yiva yendla swikarawa. (Rhom. 6:16) Vona leswinga humelela Brian. Vapsali va yena vamu djondzise ntiyiso na aha li mutsongo. A nkama anga kulanyana, a sungule kukala anga kholwi swaku kuhanya hi ntiyisu switamu yendla a tsaka. Brian a sungule kutekelela mahanyela ya misava ya Sathana. A li: “Aswi hlwelanga kuva niswi tsumbula swaku a chunseko lowu vawu hlayaka awuni yendla xikarawa.” Hi kufamba ka nkama ni sungule kudzaha mbangi, ni dakwa ni tlhela ni hanya hi wugelegele. Loko malembe ma ya ma famba ni sungule kutirhisa madroga man’wanyana ya kutlula ni mbangi lawa manga ni yendla xikarawa. . . . Ni sungule kuxavisa madroga leswaku nita hakela mavhisiyu ya mina.” Brian, a game a vona swaku swa yampsa kuhanya hi minawu ya Yehovha. Brian a cince mahanyelo a gama a tsakamisiwa hi 2001. Swoswi a tsakile hikakunene naswona a famba hi ndlela ya wutomi leyi Vakreste va faneleke va famba hi yona. *

7. Hi kuya hi Matewu 7:13, 14, hi tihi tindlela timbirhi letinga kona?

⁷ Hikakunene, i swa lisima kulanga kahle ndlela leyi hingata tsutsuma ka yona! Sathana a lava swaku hi tshika kutsutuma ka ndlela ya kulala leyi yisaka wuton’wini kambe a lava swaku hi tsutsuma ka ndlela ya kupfuleka leyi vanhu vanyingi va misava leyi va tsutsumaka ka yona. Vanhu vanyingi vayi tiva ndlela  leyo naswona swa vevuka kufamba ka yona, kambe yiva ‘yisa kuloveni’. (Lerha Matewu 7:13, 14.) Akuva hi tshama ka ndlela ya yinene hi tlhela hinga djikisiwi hi vanhu lava kalaka vanga landzi minawu ya Yehovha, hi fanele hi tshemba Yehovha hi tlhela himu yingisa.

8. I yini lexi mutsutsumi axi yendlaka loko a wa?

⁸ Vanhu lava tsutsumaka ka mpalisanu va tsutsuma na va languta xitaratu leswaku vanga wi. Kambe vangaha titlirinya kumbe va chovhiwa hi lava va tsutsumaka na yena. Kambe loko va wa va tlhela va sekeleka va tsutsuma. Ava karhateki hintamu hi lexingava wisa, kambe va karhateka hi kufika magamu leswaku vata kuma prémio.

9. Hi fanele hi yendla yini loko hi wa?

⁹ Ka mpalisanu wa hina, hingaha wa makhambi ya manyingi nkama hi yendlaka swihoxo ni loko hi vula swilo swaku ahinga fanelanga. Ni lava hi tsutsumaka na vona vangahahi hoxela. Leswo aswi fanelanga swihi hlamalisa hikusa hinkwerhu ahi hetisekanga naswona hi tsutsuma ka ndlela ya kulala leyi yi yisaka wuton’wini. Hi mhaka leyo, minkama yin’wana hita “gunyana” na hingaswi lavi. Hi kutiva leswo, Pawulo a vule swaku hitava ni swivangelo swaku hi ‘solana’. (Kol. 3:13) Kambe, kuhamba ni kutshama hi kupimisa hi leswingahi wisa, hi fanele hi pimisa hi prémio leli hingatali kuma. Loko hiwa, ahi sekelekeni hi tlhela hi tsutsuma. Loko ho hambeka xiviti hi gama hinga sekeleki hi tsutsuma, ahingata heta mpalisanu naswona ahingatali kuma prémio. Loko hi wa hi gama hinga sekeleki, hita pfalela van’wana ndlela swi gama swiva karhatela kutama va tsutsuma ka ndlela ya wutomi.

10. Hinga yendla yini leswaku hinga wisi van’wana?

¹⁰ Swin’wanyana leswi hingaswi yendlaka leswaku hinga wisi vamakwerhu, i kuva hingava sindzisi kuva va yendla swilo hi kuya hi leswi hina hiswi lavisaka xiswona. (Rhom. 14:13, 19-21; 1 Kor. 8:9, 13) Ka mhaka leyi ya lisima, ahi fani ni lava va tsutsumaka ka mpalisanu. Hinkwavu vo phikizana naswona mun’wana ni mun’wana a kokela ka yena. A vatsutsumi lava ava na mhaka ni munhu. Aswiva tsandzi kuchovha  mun’wana leswaku vona va rhanga. Kambe hina ahi phikizani. (Gal. 5:26; 6:4) Lexi hixi lavaka i kupfuna va kutala leswaku va tsutsuma akuva va kuma hakelo ya wutomi. Hi zama kutirhisa marito lawa Pawulo angama vula hi kupfuniwa hi moya wa kukwetsima loko a ku: ‘Mun’wana ni mun’wana wa n’wina angatshuki atikarhatela leswi swinga swa yena ntsena, kambe aatikarhatele ni leswi swinga swa van’wana.’ — Filp. 2:4.

11. Vanhu lavanga ka mpalisanu va tsutsuma na va lavisa yini naswona hi mhaka muni?

¹¹ Kuhambana ni kutsutsuma na va lavisa laha va kandzihelaka kona, vatsutsumi va mpalisanu va tsutsuma na va lavisa laha va yaka kona. Hambi vangaku voni hi matihlo, va tivona na va fika va tlhela va kuma a hakelo. Lexiva nyikaka ntamu, i kutsutsuma na va pimisa hi prémio.

12. I yini leswi Yehovha ahi tiyisekisaka hi swona?

¹² Hi lirhandzu, Yehovha a tiyisekisa hinkwavu lava hetaka mpalisanu lowu hinga ka wona swaku atava nyika wutomi lelinga heliki, van’wana a paradesini laha misaveni, kasi van’wana amatilweni. Bibele lihi byela leswi wutomi lelinga heliki lingata tshamisa xiswona leswaku hi kota kupimisa hi leswi lingata tsakisisa xiswona. Loko hi tshama hi kupimisa hi leswi Yehovha ahi tshembisaka swona, hitaswi kota kutiyisela.

13. I yini lexi hiva tlulaka hi xona vatsutsumi va kakunene?

¹³ Lava ava tsutsuma ka mintlangu ya Vagrikiya ava fanele va lwisana ni swikarhato swa kufana ni kukarhala kumbe kutwa kuvavisa. Kambe ava fanele va tirhisa ntamu wa vona va tlhela va trenara. Na hina hi fanele hi trenariwa ka mpalisanu lowu hinga ka wona. Kambe hina hava tlula. Hina hinga kuma ntamu wa kukala wunga heli ka Yehovha akuva wuhi pfuna. Yehovha a tshembisa swaku loko himu tshemba atahi nyika ntamu a tlhela ahi tiyisa. — 1 Pet. 5:10.

14. 2 Vakorinto 12:9, 10, yihi pfunisa kuyini kulwisana ni swikarhato?

¹⁴ Pawulo a akumana ni swikarhato swa swinyingi. A anga hluphiwi ni kuhlongolisiwa ntsena, kambe minkama yin’wanyana a hela ntamu naswona a afanele a lwisana ni leswi angaswi vitana “muntwa nyameni”. (2 Kor. 12:7) Kambe kuhambana ni kutshika kugandzela Yehovha hi mhaka ya swikarhato leswi, aswi vone na ku li nkama wa kukomba Yehovha swaku wamu tshemba. (Lerha 2 Vakorinto 12:9, 10.) Leswi Pawulo a ani mavonelo lawa, Yehovha amu pfune kuhlula swikarhato hinkwaswu.

15. Kuta yendleka yini loko hi tekelela Pawulo?

¹⁵ Na hina hingaha rhuketeliwa hi mhaka ya lipfumelo la hina. Hingaha vabya kumbe hi karhala. Kambe loko hi tekelela Pawulo, hita vona swikarhato leswi na ku li nkama wa kuvona Yehovha ahi seketela hi lirhandzu.

16. Unga yendla yini hambiloko u vabya?

¹⁶ Wa vabya kumbe u limalile? Uni nyamakazi kumbe uni mavabyi ya matihlo? Loko u li ni swikarhato swa kufana ni leswi, ungaswi kota kutsutsuma ni lava vaha liki vampsha naswona va titwaka kahle? Ina, ungaswi kota! I vanyingi lava tsutsumaka ka mpalisanu wa wutomi na va ni swikarhato leswi. A va tsutsumi hi ntamu wa vona. Kambe va tiyisiwa hi Yehovha hi kuyingisela mintlhanganu kungaha va hi telefone kuyi sixtira na va li kaya. Naswona va chumayela vadotori, maxaka ni van’wana.

17. Yehovha a titwisa kuyini hi lava vabyaka?

¹⁷ Loko ungahaswi koti kutirhela Yehovha hilaha awuswi lavisa xiswona hi mhaka ya  mavabyi, unga heli ntamu u pimisa swaku awungeswi koti kutiyisela kuya fika magamu. Yehovha waku rhandza hi mhaka hinkwaswu leswi ungamu yendlela malembe manga hundza. Swoswi hi kona u lavaka kuva Yehovha aku pfuna kutlula khale, naswona angeku tshiki. (Pis. 9:10) Kambe atava kusuhi na wena. Vona leswi makwerhu mun’wana waxisati a karhatiwaka hi mavabyi angaswi vula. A te: “Leswi mavabyi ma yaka ma kula, ni vona swaku ni ya ni pumbekeliwa hi mukhandlu wa kuchumayela. Kambe na tsaka hi kutiva swaku hambi loko no chumayelanyana ka kutsongo, Yehovha wa tsaka.” Loko u hela ntamu, khumbuka swaku a wu wexe. Khumbuka xikombiso xa Pawulo ni marito ya yena lawa ma tiyisaka: “Niyamukela hi kutsaka kutsana, ni maxangu, ni kukarhateka, ni kuxanisiwa, ni mahlomulu, hikolaho ka Kriste; hikuva loko nitsanile, hi kona ninga ni matimba”. — 2 Kor. 12:10.

18. Hi swihi swikarhato leswi van’wana va kumanaka na swona?

¹⁸ Van’wana lava tsutsumaka ka mpalisanu wa vutomi, va kumana ni swikarhato swin’wana swaku aswi voniwi hi van’wana. Hi xikombiso van’wana va hluphiwa hi kukarhateka a miyanakanywini loku vangiwaka hi kuvilela. Hi mhaka muni malandza ya Yehovha ya kurhandzeka ma kumana ni xikarhato lexi xa kutika? Hi mhaka makhambi manyingi loko munhu a tshoveke voko kumbe a limalile, vanhu vaswi vona naswona va navela kumu pfuna. Kambe loko munhu a karhateka a miyanakanywini, aswi voniwi hi munhu. Leswi va kumanaka na swona swi vavisa kufana ni leswi swi vavisisaka xiswona ka lweyi anga tshoveka nenge.

19. Hi djondza yini ka xikombiso xa Mefiboxete?

¹⁹ Loko uni mavabyi kumbe u limalile kambe van’wana vangaswi twisisi, xikombiso xa Mefiboxete xitaku tiyisa. (2 Sam. 4:4) A afanele a tiyisela wulima la yena naswona Hosi Davhida a angamu twisisi. Phela a angayo tilavela swikarhato leswi anga kumana na swona. Mefiboxete aanga tshami hi kupimisa hi swilo swa kubiha leswingamu humelela, kambe a atsaka hi swilo leswinene swingamu humelela awuton’wini. Angaswi rivalanga swilo swa swinene leswi Davhida aamu yendlele swona. (2 Sam. 9:6-10) Se a nkama lowu Davhida angamu pimisela swa kubiha, Mefiboxete a zame kutwisisa leswi Davhida anga tshamisa xiswona. Angamu vekelaka xiviti Davhida. Naswona anga lumbetanga Yehovha hi nandzu wa Davhida. Lexi Mefiboxete a alwela xona, aku li kuseketela hosi leyinga vekiwa hi  Yehovha. (2 Sam. 16:1-4; 19:24-30) Yehovha a yendle leswaku xikombiso lexinene xa Mefiboxete xi tsaliwa ka Bibele akuva xihi pfuna. — Rhom. 15:4.

20. Kukarhateka ka miyanakanyu kungava khumbisa kuyini van’wana naswona vanga tiyiseka hi yini?

²⁰ Hi mhaka ya kukarhateka ka miyanakanyu, vamakwerhu vanyingi va vilela hi leswi va kumanaka ni swiyimu swa kukarhata swa siku ni siku. Swingahava karhatela kuya lomu kunga tala hi vanhu kambe va kumeka mintlhanganwini, masembleya ni makongresu. Vangaha va ni tinghana ta kuvulavula ni vanhu lava kalaka vangava tivi, kambe ava tshiki kuchumayela mahungu ya kutsakisa. Loko leswi swiku humelela, tiyiseka swaku awu wexe. I vanyingi va fanaka na wena. Yehovha wa tsaka hi leswi umu yendlelaka swona hi mbilu hinkwayu. Leswi waha tiyiselaka kufikela swoswi swi kombisa swaku Yehovha waku katekisa a tlhela aku tiyisa. * (Filp. 4:6, 7; 1 Pet. 5:7) Loko u tirhela Yehovha hambi loko u vabya kumbe u karhateka a miyanakanyweni, tiyiseka swaku u tsakisa Yehovha.

21. Hi kupfuniwa hi Yehovha, hita kota kuyendla yini?

²¹ Lexi tsakisaka, kuni kuhambana ka kutsutsuma ka hikakunene ni kutsutsuma loko Pawulo a avulavula hi kona. A minkameni ya Bibele lweyi a akuma prémio a ku li munhu mun’we. Kuhambana ni leswo, Vakreste hinkwavu lava tiyiselaka a ndlelya wutomi vata kuma a prémio kumbe hakelo ya wutomi lelinga heliki. (Yoh. 3:16) Ka mpalisanu wa hikakunene, kutsutsuma lavanga ni lihanyu la kahle ntsena, loko kunga li leswo, avangata ganya. Kambe kutala ka hina ha vabya, hambi leswo, ha tiyisela. (2 Kor. 4:16) Hi kupfuniwa hi Yehovha, hita tsutsuma aze hiya fika magamu!