1-2. I mpsini leswi ntsumi yinga byela vavasati lavanga ya ka sirha la Yesu naswona Yesu ava lelete yini?

AKAHA LI mixo ngopfu hi siku la 16 ka Nisani wa lembe la 33 E.C. Se aku hundza siku ni hanfu na Yesu a lahliwile. Vavasati lava chavaka Xikwembu vaya sirheni laha Yesu anga lahliwa kona na va karhatekile. Loko va fika sirheni ava lava kutota ntsumbu wa Yesu hi mafurha ya kununwhela. Kambe loko va hlomela ka sirha va vone swaku akungana nchumu! Hi loko ntsumi yiva byela swaku Yesu a pfuxiwile kufeni, ivi yi tlhela yi ku: “Wamirhangela aya Galileya, mitayamuvona kona.” — Mat. 28:1-7; Luk. 23:56; 24:10.

² Loko vavasati va suka sirheni, Yesu ava tshinelela ivi ava leleta a ku: ‘Fambani miyabyela vamakwerhu leswaku vaya Galileya; vatanivona kona.’ (Mat. 28:10) Xa kusungula lexi Yesu angaxi yendla nkama anga pfuxiwa i kutlhangana ni vadjondzisiwa va yena. Ka ntlhanganu wa kona ava nyike swileleto swa lisima.

3-4. Hi mhaka muni hinga vulaka swaku xilerhiso lexinga ka Matewu 28:19, 20 axinga byeliwe vapostola ntsena? (Vona xifaniso ka pajina lorhanga.)

³ Lerha Matewu 28:16-20. Ka ntlhanganu lowunga yendliwa hi Yesu, a vulavule hi ntirho lowu Vakreste va nkama wa vapostola ava fanele vawu yendla, lowu na hina hi faneleke hiwu yendla. A te: ‘fambani ka tinxaka hinkwatu, mivayendla vadjondzisiwa . . . mivadjondzisa kuhlayisa hinkwaswu leswi nimibyeleke swona’.

⁴ Yesu a lava swaku valandzeli va yena hinkwavu va chumayela. Anga rhumanga 11 wa vadjondzisiwa ntsena. Hiswi tivisa  kuyini? Hiswi tiva hi mhaka a nkama lowu Yesu anga nyikela xilerhiso lexi, akunga na 11 wa vapostola ntsena antshaveni ya Galileya. Hi mhaka muni hi vula leswo? Khumbuka leswaku a ntsumi yi byele vavasati lavaya yi ku: “Mitayamuvona [a Galileya]”. Leswo swi vula swaku vavasati lava votshembeka na vona ava li kona ka ntlhanganu lowu. Kambe ahi leswo ntsena. Mupostola Pawulo a vule swaku Yesu ‘ahumelele hi nkama wun’we ka vamakwavu lavatlulaka ntlhanu wa madzana (500)’. (1 Kor. 15:6) Ava li kwini vanhu lava?

5. Hi djondza yini ka 1 Vakorinto 15:6?

⁵ Hini swivangelo leswi twalaka swa kuvula swaku ka 1 Vakorinto 15:6, Pawulo a avulavula hi ntlhangano lowu kuvulavuliwaka hi wona ka Matewu ndzima 28. Hiswi tivisa kuyini? Xa kusungula, kutala ka vadjondzisiwa va Yesu ava tshama Galileya. Kutani aswi vevuka kuhamba ntlhangano wawukulu ka ntshava ya Galileya, kutlula kuwu hamba muntini wokarhi a Yerusalema. Xawumbirhi, Yesu se a akumanile ni vapostola va yena va 11 ka munti wokarhi a Yerusalema. Loko Yesu a alave kubyela lava va 11 ntsena, i na a tekele kuvabyela kohala a Yerusalema. Aswingata lava a kombela ni vavasati lavayani ni van’wani leswaku vaya Galileya. — Luk. 24:33, 36.

6. Matewu 28:20, yiswi kombisisa kuyini swaku xilerhiso xa kuyendla vadjondzisiwa xi tirha ni namuntlha, naswona i yini xi kombaka swaku xa yingisiwa?

⁶ Vona xivangelo xa wunharhu. A xilerhiso xa kuyendla vadjondzisiwa axi gamelanga ka Vakreste lava ava hanya hi nkama wolowo ntsena. Hi mhaka muni hi vula leswo? Hi mhaka loko Yesu a gamesa xilerhiso xa yena a te: “Ni na n’wina masiku hinkwawu, kukondza kuhela misava [ya Sathana].” (Mat. 28:20) Hi laha Yesu anga vula hi kona, namuntlha vanhu votala va yendla vadjondzisiwa. Pimisa hi leswi: Lembe ni lembe kolomu ka 300.000 wa vadjondzisiwa va Kreste va tsakamisiwa ivi va va Timboni ta Yehovha!

7. Hita bula hi yini naswona hi mhaka muni?

⁷ Kutala ka lava djondzaka Bibele va kulisa wuxaka la vona na Yehovha va tlhela va tsakamisiwa. Kambe van’wana swava karhatela. Vaswi rhandza kudjondza kambe ava yendle nchumu leswaku va tsakamisiwa. Hinkwerhu loko hi djondza ni vanhu, hi lava swaku va tirhisa leswi vaswi djondzaka ni kuva va va vadjondzisiwa. Ka djondzo leyi hita vona swaku hingava pfunisa kuyini lava hi djondzaka na vona kurhandza Yehovha ni kukulisa wuxaka la vona na yena. Hi mhaka muni hi lava kubula hi mhaka leyi? Hi mhaka minkama yin’wana swingaha lava hi yendla xiboho xa leswaku hi nyima kumbe hi tama hi djondza ni munhu wokarhi.

8. Hi mhaka muni minkama yin’wana swi karhata kupfuna lweyi hi djondzaka na yena kurhandza Yehovha?

⁸ Yehovha a lava leswaku vanhu vamu tirhela hi leswi vamu rhandzaka. Hi mhaka leyo, loko hi djondza ni munhu, hi fanele himu yendla aswi twisisa swaku Yehovha ani mhaka na yena naswona wamu rhandza hintamu. Hi fanele hiva pfuna kutwisisa swaku Yehovha i “B’ava wa vana lava pfumalaka papayi, ni muhlayisi wa vafelakazi”. (Pis. 68:5) Loko lweyi hi djondzaka na yena a twisisa swaku Yehovha wamu rhandza, na yena ata sungula kumu rhandza. Van’wana ka lava hi djondzaka na vona swingahava karhatela kukholwa swaku Yehovha i B’ava wa lirhandzu hi mhaka leswi va kalaka vanga kombiwanga lirhandzu hi vapapayi va vona. (2 Tim. 3:1, 3) Loko u fambisa xidjondzo, vulavula hintamu hi wumunhu la Yehovha. Byela xidjondzo xa wena leswaku Yehovha a lava swaku xi kuma wutomi lelinga  heliki naswona ataxi pfuna kuva xili kuma. Unga yendla yini swin’wana?

9-10. Hi wahi mabuku lawa hi faneleke hima tirhisa loko hi fambisa swidjondzo, naswona hi mhaka muni?

⁹ Tirhisa mabuku lawa: “Hinga Djondza Yini ka Bibele?” ni “Tama U Rhandza Xikwembu”. Mabuku lawa ma hambeliwe kuva mahi pfuna kukhumba timbilu ta lava hi djondzaka na vona. Hi xikombiso, a ndzima 1 ya buku lelinge Hinga Djondza Yini ka Bibele?, yi hlamula swivutiso leswinge: Xikwembu xi ni mhaka na hina kumbi xi ni mona?, Xikwembu xi titwisa kuyini loko hi hlupheka?, ni U fanele u yendla yini leswaku uva munghanu wa Xikwembu? Se, lelinge Tama U Rhandza Xikwembu ke? Buku leli li pfuna lweyi hi djondzaka na yena Bibele kutwisisa swaku loko a tirhisa matshinya ya minawu ya Bibele, wutomi la yena lita yampsa naswona atava munghanu wa Yehovha. Hambiloko se u djondze buku leli ni vanhu van’wana, lunghiselela loko u ya fambisa xidjondzo xin’wana ni xin’wana na u pimisa hi leswi xidjondzo xi kumanaka na swona.

 ¹⁰ Kambe hinga yendla yini loko lweyi hi djondzaka na yena Bibele a yendla xivutiso lexi nhlamulu ya kona yi kalaka yinga li kona ka mabuku lawa hima tirhisaka loko hi fambisa swidjondzo? Hingamu nyika buku lelinga ni nhlamulu kuva a djondza hi yexe ivi hi tama hi fambisa xidjondzo hi kutirhisa buku leli hi taka nahi djondza hi lona.

11. Hi fanele hi sungula kukhongela ni xidjondzo loko swi te yini, naswona hingaxi pfunisa kuyini kuva xi twisisa lisima la xikhongelo?

¹¹ Sungula xidjondzo hi xikhongelo. Minkama yotala swa yampsa kutekela kuhamba xikhongelo xa kusungula ni xa kupfala xidjondzo na waha kusungula kufambisela xidjondzo ni munhu wokarhi. U fanele u byela xidjondzo xa wena swaku akuva hi twisisa Rito la Xikwembu kulaveka moya wokwetsima. Vachumayeli van’wana va tirhisa buku la Yakobo 1:5 kuva va tlhamusela xivangelo xa kusungula ni kugamisa hi xikhongelo. Ndzimana leyi yi li: “Loko mun’we wa n’wina apfumala vutlhari, aakombele ka Xikwembu”. Muchumayeli a gama a vutisa xidjondzo swaku “hingali kombelisa kuyini wutlharhi ka Xikwembu?” Kutala ka swidjondzo swi tolovela kuhlamula swi ku hi fanele hi khongela ka Xikwembu.

12. Ungayi tirhisisa kuyini buku ya Tipisalema 139:2-4 akuva u pfuna lweyi u djondzaka na yena kuvulavula na Yehovha na a chunsekile hi xikhongelo?

¹² Mu djondzise makhongelela. Mu tlhamusele swaku Yehovha waswi lava kutwa swikhongelo swa yena leswi sukelaka ambilwini. Mu tlhamuseli swaku ka swikhongelo leswi awi yendlaka na ali yexe anga byela Yehovha swilo leswi aangata byela munhu. Phela Yehovha a tiva ni swilo leswinga ka timbilu ta hina. (Lerha Tipisalema 139:2-4.) Hinga tlhela hi pfuna xidjondzo xa hina leswaku xi kombela ka Yehovha kuva axi pfuna xi hlula mimpimiso ni mahanyelo ya kubiha. Hi xikombiso, ahinge u djondza ni munhu lweyi a rhandzaka feriyadu leli sukelaka ka wukhongeli la mavunwha. Yena waswi tiva swaku swi bihile, kambe ku ni leswi aswi rhandzaka ka lona. Mu pfuni kuva a byela Yehovha leswi a titwisaka xiswona. Mu byeli swaku a akombele Yehovha akuva amu pfuna kurhandza ntsena leswi Yehovha aswi rhandzaka. — Pis. 97:10.

13. a) Hi mhaka muni hinga fanelanga hi hlwela kurhamba xidjondzo amintlanganwini? b) Hingaxi pfunisa kuyini xidjondzo leswaku xinga chavi loko xi li amintlhanganwini?

¹³ Tekela kumu rhamba leswaku aya mintlhanganwini. Leswi angataswi kuma amintlhanganwini ya hina swingamu yendla a navela kutirhela Yehovha. Mu kombi vhidiyo lelinge: Xana Kumaheka Yini Salão do Reino? u gama umu rhamba akuva a famba na wena amintlhanganwini. Loko swi koteka um nyike boleya. Rhamba vamakwerhu va ku hambanahambana kuva va famba na wena ka xidjondzo xa wena. Leswo switaxi yendla xi tolovelana ni vamakwerhu naswona axingahata chava loko xi li mintlhanganwini.

14. I mpsini leswinga pfunaka xidjondzo akuva xi kulisa wuxaka la xona na Yehovha?

¹⁴ Leswi hiswi lavaka i kupfuna lweyi hi djondzaka na kuva a kulisa wuxaka la yena na Yehovha. (Efe. 4:13) Loko munhu a pfumela kudjondza Bibele, a nyimela swaku limu pfuna ka wutomi la yena. Kambe loko a ya a rhandza Yehovha, ata sungula kupimisa hi leswi angava pfunisaka xiswona van’wana, kupatsa ni lava se kunga khale nava gandzelaka Yehovha. (Mat. 22:37-39) Loko uswi vona swaku se a wupfile nyana, unga chavi kumu byela swaku hi fanele hi humesa male kuva hi seketela ntirho wa Mfumu.

15. Hingamu pfunisa kuyini lweyi hi djondzaka na yena Bibele kuyendla leswinene loko kuva ni swikarhato?

 ¹⁵ Mu djondzisi leswi a faneleke aswi yendla loko a kumana ni swikarhato. Hi xikombiso, ahinge lweyi u djondzaka na yena, lweyi se anga muchumayeli wa kukala anga se tsakamisiwa aku byela swaku kuni munhu lweyi angamu kwatisa abandleni. Kuhambana ni kumu byela swaku hi mani anga ni nandzu, mu kombe swaku a fanele a yendla yini hi kuya hi Matsalwa. Angahamu rivalela, loko angaswi koti kumu rivalela, anga ya bulisana hi lirhandzu na a li ni xikongomelo xa ‘kuvuyisile makwavu’ kumbe akuva va hanya hi kurhula. (Fananisa Matewu 18:15.) Mu pfune kulunghiselela leswi angataswi vula. Mu djondzise kutirhisa JW Library^®, Nkongomiso Wo Endla Ndzavisiso ni jw.org^® akuva va djondza kululamisa timhaka. Loko a djondza kululamisa timhaka na anga se tsakamisiwa, switamu wolovela akuva a hanyisana ni vamakwerhu loko se a tsakamisiwile.

16. Hi mhaka muni swi li swa lisima kurhamba vachumayeli van’wana kufamba na hina ka swidjondzo swa hina?

¹⁶ Rhamba van’wana abandleni kuva va famba na wena naswona rhamba ni mudjikelezi loko a pfuxela bandla la n’wina. Hi mhaka muni swi li swa lisima? Handle ka leswi se hiswi voneke kusunguleni, vachumayeli van’wana vangaha byela xidjondzo xa wena swilo swaku awungataswi kota kuxi byela. Hi xikombiso, ahinge se i khale naxi zama kutshika kudzhaha kambe xa tsandzeka. Rhamba makwerhu lweyi na yena a adzhaha, lweyi swingamu karhatela kutsika kudzhaha akuva a famba na wena. Makwerhu wa kufana ni lweyo swingamu vevukela kupfuna xidjondzo xa wena. Loko swiku danisa kufambisa xidjondzo na uni makwerhu lweyi aswi kotaka kufambisaka kahle, mu kombele yena a fambisa loko u famba na yena. A nkama u fambaka ni van’wana ka swidjondzo swa wena, swita pfuneka hi ntokoto wa vona. Unga khohlwi leswaku leswi hiswi lavaka i kupfuna lweyi hi djondzaka na yena kuva a kulisa wuxaka la yena na Yehovha.

17-18. I yini leswi hi faneleke hiswi kambisisa na hinga se tshika kudjondza ni munhu?

¹⁷ Loko xidjondzo xa wena xingaswi tirhisi leswi xiswi djondzaka, tivutisi leswi: ‘Ni fanele ni tshika kudjondza na xona?’ Na ungasena tshika kudjondza na xona sungula hi kumbisisa swaku xidjondzo xa wena i munhu wa kutshamisa kuyini. Van’wana va hlwela kutirhisa leswi vaswi djondza ka Bibele. Se tivuse leswi: ‘Kuni leswi xidjondzo xiswi yendlaka kuva xi kulisa wuxaka la xona na Yehovha?’ Se xi sungulile “kuhlayisa” kumbe kutirhisa leswi xiswi djondzaka? (Mat. 28:20) Swingaha teka nkama nyana kuva xidjondzo xi kulisa wuxaka la xona na Yehovha, kambe xi fanele xili kulisa hi katsongo katsongo.

¹⁸ Se, hita kuyini loko lweyi hi djondzaka na yena Bibele a tikomba ingaku anga mhaka ni leswi aswi djondzaka? Vona xikombiso lexi:  Lweyi u djondzaka na yena se a hete buku lelinge Hinga Djondza Yini ka Bibele? Naswona a hete ni buku lelinge Tama U Rhandza Xikwembu, kambe angase tshama a psanya mintlhanganwini, hambi hi ka xitsundzuxo! Naswona a tshamela ku djikadjika loko uyamu djondzela. Loko u li ni xidjondzo xa kutshamisa xileswi, tshama hansi na xona xiku byela swaku kuyendleka yini. *

19. Ungamu byela yini munhu lweyi a tikombaka ingaku angaswi tsakeli leswi aswi djondzaka ka Bibele, naswona u fanele u yanakanyisisa hi yini?

¹⁹ Ungaha sungula hi kumu vutisa leswi: ‘I yini lexiku pfalelaka kuva Mboni ya Yehovha?’ Angaha hlamula a ku: ‘Naswi rhandza kudjondza Bibele, kambe aniswi lavi kuva Mboni ya Yehovha.’ Loko aku hlamula swaku fana ni leswo, na u hete nkama u djondza na yena, switaku siza yini kutama u djondza na yena? Kambe swingaha yendleka aku byela leswimu karhataka. Hi xikombiso, angahaku byela swaku a chava kufamba a chumayela hi munti ni munti. Loko se uswi tiva leswimu karhataka utaswi kota kumu pfuna.

20. Kutwisisa Mintirho 13:48 swingahi pfunisa kuyini kuva hiswi tiva loko swi fanela kutshika kudjondza ni munhu?

²⁰ Lexi godolisaka hi leswaku vanyingi va fana ni Vayisrayele va le nkameni wa Ezekiyele. Yehovha a byele Ezekiyele a ku: “Ka vona uta fana ni lisimu la kuvulavula hi lirhandzu, leli yimbeleliwaka hi rito la kuxonga li tlhela li chayiwa hi xichayachayana xa tingoti. Vatama twa marito ya wena kambe avangatama landza.” (Ezek. 33:32) Minkama yin’wana swingahahi karhatela kubyela munhu swaku hita tshika kudjondza na yena. Kambe “nkama lowusaleke wukomile”. (1 Kor. 7:29) Swa yampsa kulavetela munhu lweyi a kombisaka swaku a ni “kutiyimisela lokunene ka wutomi lelinga heliki” kutlula kudla nkama ni munhu lweyi a kalaka angana mhaka ni nchumu.” — Lerha Mintirho 13:48.

21. Hi yihi ndzimana ya lembe la 2020 naswona hayini yi faneleka?

²¹ Tsalwa la lembe la 2020, litahi pfuna kuyampsisa leswi hi hetisisaka xiswona xileriso xa Yesu xa kuyendla vadjondzisiwa. Li ni man’wana ya marito ya Yesu lawa angama vula ka ntlhanganu lowu angava na wona ka ntshava ya Galileya loko a ku: “Fambani . . . miva yendla vadjondzisiwa . . . miva tsakamisa”. — Mat. 28:19.