1-2. Hi swihi swikarhatu leswi kutala ka vanhu va Yehovha va kumanaka na swona, naswona swiva yendla va titwisa kuyini?

YANAKANYISISA hi swikombiso leswi swa swinharhu: Makwerhu mun’wana wa mumpsha a byeliwe hi Dotori swaku ani mavabyi yamakulu lawa mangatamu heta ntamu hi kutsongokutsongo. Makwerhu lweyi anga ni ma 50 wa malembe a heleliwa hi ntirho, naswona a zama ku lava wun’wani kambe angawu kumi. Makwerhu waxisati wa kutshembeka lweyi se anga guga aya angahaswi koti kuyendla swotala ka ntirho wa Yehovha.

² Loko u kumana ni swikarhatu swa kufana ni leswi haha kuswi vulaka laha, ungaha titwa na ungaha pfuni nchumu. Swikarhatu leswi swingahaku hetela ntsaku, swiku yendla u tivona na unga li wa nchumu ni kutlhela swiku karhatela kuhanyisana ni van’wana.

3. Sathana ni vanhu lava va pimisaka kufana na yena va ni mavonelo wahi hi wutomi la vanhu?

³ Vanhu va misava leyi va ni mavonelo ya Sathana hi wutomi. Minkama hinkwayu, Sathana a khoma vanhu ingi hi loko vanga pfuni nchumu. A swimu danisanga kutshembisa Eva chunseko, na aswi tiva kahle swaku loko anga yingisi Xikwembu hi wugamu aata fa. Minkama hinkwayu hi yena a rhangelaka ka mabindzu, ka politika hambi ka wukhongheli la misava leyi. Se aswihi hlamalisi loko vaxavisi va kutala, vafumi, ni varhangeli va wukhongheli vanga na mhaka ni wutomi la munhu ni leswi vanhu va titwisaka xiswona.

4. Hita bula hi yini ka djondzo leyi?

⁴ Ku hambana na Sathana, Yehovha a lava hiswi tiva swaku hi va lisima naswona wahi pfuna loko hi kumana ni swikarhatu leswihi yendlaka hi titwa na hinga pfuni nchumu. (Pis. 136:23; Rhom. 12:3) Djondzo leyi yitahi kombisa leswi Yehovha ahi pfunisaka xiswona ka swiyimu leswi landzelaka: 1) Loko hi kumana ni mavabyi, 2) loko hi kumana ni swikarhatu swa  male, ni 3) loko ku guga kuhi yendla hi titwa hinga pfuni nchumu, hileswi hinga yendliki swa kutala antirhweni wa Yehovha. Xa kusungula, hita djondza swaku hinga tiyisekisa kuyini swaku mun’wana ni mun’wana wa hina i wa lisima ka Yehovha.

5. Hiswi tivisa kuyini swaku vanhu i va lisima ka Yehovha?

⁵ Hambileswi hinga yendliwa hi wuthulu la misava kambe hi va lisima hintamu kutlula lona. (Gen. 2:7) Ahi voneni leswihi yendlaka hi kholwa swaku hiva lisima ka Yehovha. Yehovha a tumbuluxe vanhu na vaswi kota kutekelela wumunhu la yena. (Gen. 1:27) Hi kuyendla leswo, Yehovha ahi yendle nahi yampsa kutlula swilo hinkwaswo leswi angaswi tumbuluxa misaveni, naswona aswi tshikele hina kuva hiswi fuma. — Pis. 8:4-8.

6. I yini swin’wana swihi kholwisaka swaku Yehovha ahi vona hi li va lisima?

⁶ Hambiloko Adamu a djohile, Yehovha a tame ava nyika lisima vanhu. A kombise swaku hi va lisima ngopfu, hi kunyikela n’wana wa yena lweyi amu rhandzaka ava nkutsulo wa swidjoho swa hina. (1 Yoh. 4:9, 10) Hi kutirhisa gandzelo la nkutsulo, Yehovha ata pfuxa hinkwavu lava feke hi mhaka ya xidjoho xa Adamu, “lavolulama ni lavangalulamangiki.” (Mint. 24:15) Marito lawa ma kombisa swaku hi va lisima ka yena hambiloko hi kumana ni swiyimu swa kutika, wusiwana ni kuguga. — Mint. 10:34, 35.

7. Hi swihi swivangelo swin’wana leswi vagandzeli va Yehovha vanga na swona, leswi kombaka swaku hi va lisima ka yena?

⁷ Kaha ni swivangelo swin’wana leswi hi yendlaka hi kholwa swaku hi va lisima ka Yehovha. Ahi pfumelela kuva hiva ni wuxaka na yena, naswona wa swi tiva swaku hama rhandza mahungu yotsakisa. (Yoh. 6:44) A nkama hinga sungula kuhamba wunghanu na Yehovha, na yena aye ava munghanu wa hina. (Yak. 4:8) Kukomba swaku hiva lisima ka yena, Yehovha a tirhisa nkama ni ntamu wa yena akuva ahi djondzisa. Waswi tiva swaku hi tshamise kuyini swoswi ni swaku hitava vanhu va kuyampsa nkama lowu taka. Naswona leswi ahi rhandzaka, wahi laya. (Swi. 3:11, 12) Hinkwaswu leswi swi kombisa swaku Yehovha wahi rhandza!

8. Marito lawa manga ka Tipisalema 18:27- 29, mahi pfunisa kuyini kuva ni mavonelo lamanene hi swikarhatu swa hina?

⁸ Hambileswi van’wana avamu vona na angali wa nchumu, Hosi Davhida aaswi tiva swaku Yehovha wamu rhandza a tlhela amu pfuna. Kutiva leswi, swi pfune Davhida kuva a tiyisela xiyimu lexi a akumana na xona na a tsakile. (2 Sam. 16:5-7) Loko hi kumana ni swikarhatu kumbe hi tivona hinga li vanchumu, Yehovha angahi pfuna kuva hi cinca mavonelo ya hina hi tlhela hi hlula swikarhatu swoleswo. (Lerha Tipisalema 18:27-29.) Leswi Yehovha ahi pfunaka, akuna nchumu lexingahi tshikisaka kumu tirhela na hi tsakile. (Rhom. 8:31) Ahi kambisiseni swiyimu swinharhu leswi ka swona hi faneleke hi khumbuka swaku Yehovha wahi rhandza nakambe hi va lisima ka yena.

9. Mavabyi mangahi yendla hi titwisa kuyini?

⁹ Mavabyi mangahi yendla hinga tsaki naswona hi titwa na hingaha pfuni nchumu ka vanhu. Swingahahi danisa loko vanhu van’wani va tsumbula swaku ahaha gwenti naswona ahaha koti kuyendla nchumu loko hinga pfuniwi hi van’wana. Hambiloko van’wana vangaseswi tiva swaku ha vabya, hingaha karhateka hi mhaka ya leswi hi tsandzekaka kuyendla leswi ahiswi kota khale. Loko  hi li ka swiyimu leswo, Yehovha anga hi tiyisa. A yendlisa kuyini?

10. Swivuriso 12:25, yingahi pfunisa kuyini loko hi kumana ni mavabyi?

¹⁰ Loko hi vabya, “rito lelinene” lingahi tiyisa. (Lerha Swivuriso 12:25.) Ka Bibele, ku ni tindzimana ta kahle letingahi khumbukisaka swaku hiva lisima ka Yehovha hambi loko hi vabya. (Pis. 31:19; 41:3) Loko hi djondza tindzimana leto hi ku phindaphinda, Yehovha atahi pfuna kuhlula mimpimiso ya leswaku ahi pfuni nchumu hi mhaka ya leswi hi vabyaka.

11. Makwerhu mun’wana waxinuna aswi vonise kuyini swaku Yehovha wamu pfuna?

¹¹ Ahi voneni xikombiso xa Jorge, lweyi a ngheniweke hi mavabyi ya makulu na ahali mumpsa. Mavabyi ya kona ma kahlule mamu heta ntamu naswona leswi swimu yendle a titwa na anga pfuni nchumu. Jorge a te: “Aningaswi nyimelanga swaku mavabyi ya mina matani yendla ni daniseka ka vanhu. Loko mavabyi ya mina maya ma kula, ani tivutisa swaku kuta yendleka yini hi wutomi la mina. Ani karhatekile ngopfu naswona ni kombele Yehovha kuva ani pfuna.” Yehovha amu pfunise kuyini? “Leswi aningaswi koti kuheta nkama wa kuleha na ni djondza vani khutaze kulerha tindzimana nyana to karhi ta Tipisalema leti kombisaka swaku Yehovha ani mhaka ni vagandzeli va yena. Ni lerhe tindzimana letiya hi ku phindaphinda, naswona niswi vonile swaku ta tiyisana. Hi kufamba ka nkama, ni vanhu van’wana vaswi vonile swaku se ani b’onyozela. Va tlhela va vula swaku kuva ni tshama na ni tsakile swava tiyisa. Ni ye niswi twisisa swaku Yehovha a ahlamule swikhongelo swa mina. A ani pfunile kuva ni cinca leswi ani tivonisa xiswona. Ni sungule kutshama hi kupimisa hi leswi Rito la Xikwembu liswi vulaka hi mavonelo ya Xikwembu hi vanhu lava va vabyaka.”

12. Loko u vabya, unga yendla yini kuva Yehovha aku pfuna?

 ¹² Loko u ni mavabyi, tiyiseka swaku Yehovha waswi tiva leswiku humelelaka. Kombela Yehovha kuva aku pfuna uva ni mavonelo ya manene hi leswi swiku humelelaka. U gama u lavetela tindzimana leti tiyisaka. Tshama hi kupimisa hi tindzimana leti kombisaka swaku malandza ya Yehovha i ya lisima ka yena. Loko u ya u yendla leswi, utaswi vona kahle swaku Yehovha i munene ka lava vamu tirhelaka hi kutshembeka. — Pis. 84:11.

13. Loko mulumuzana a heleliwa hi ntirho swingamu yendla a titwisa kuyini?

¹³ Valumuzana hinkwavu vaswi navela kuva va kota kuhlayisa mindyangu ya vona. Kambe ahinge, makwerhu a heleliwa hi ntirho na kunga li nandzu wa yena. A zama ni kuzama, kambe angaha kumi wun’wana. Loko a kumana ni swikarhatu leswi, angaha titwa na anga pfuni nchumu. Ka swiyimu leswi, swingamu pfunisa kuyini kutshama hi kupimisa hi switshembiso swa Yehovha?

14. Hi mhaka muni Yehovha a hetisisa leswi aswi tshembisaka?

¹⁴ Minkama hinkwayu, Yehovha waswi hetisisa switshembiso swa yena. (Yoxu. 21:45; 23:14) A yendla leswo hi swivangelo swa kutala. Xivangelo xa kusungula, hi leswaku switshembiso swa yena khumba vito la yena lelinene. Yehovha ahi tshembise swaku ata hlayisa malandza ya yena ya kutshembeka, naswona a titwa na a sindziseka kuhetisisa switshembiso swa yena. (Pis. 31:1-3) Handle ka leswo, Yehovha waswi tiva swaku ha karhateka loko hi tsandzeka kuhlayisa mindjangu ya hina. Ahi tshembisa swaku atahi nyika leswi hiswi lavaka kuva hi hanya ni kutama himu tirhela hi kutshembeka, naswona aku na  nchumu lexingamu sivelaka kuyendla leswi angaswi tshembisa! — Mat. 6:30-33; 24:45.

15. a) I swikarhatu swihi leswi Vakreste va nkameni wa vapostola vanga kumana na swona? b) I mpsini leswi Tipisalema 37:18, 19 yihi tiyisekisaka swona?

¹⁵ Loko hiswi khumbuka swaku hi mhaka muni Yehovha a hetisisa switshembiso swa yena, switahi pfuna kutiyisela loko hi pfumala male. Ahi voneni xikombiso xa Vakreste va minkameni ya vapostola. Loko Vakreste va sungula kuxanisiwa abandleni la le Yerusalema, “hinkwavu vahangalasiwile . . . kusala vapostola ntsena.” (Mint. 8:1) Pimisa hi leswi aswitava humelela. Phela avata pfumala mali. Swinga yendleka va luze makaya ya vona ni leswi avaswi xavisa. Hambileswo, Yehovha angava tshikanga naswona ava luzekeliwanga hi ntsako. (Mint. 8:4; Hev. 13:5, 6; Yak. 1:2, 3) Leswi Yehovha anga hlayisa Vakreste lava va kutshembeka, na hina atahi hlayisa. — Lerha Tipisalema 37:18, 19.

16. I yini leswingahi yendlaka hi pimisa swaku wugandzeli la hina ka Yehovha ahi la lisima?

¹⁶ Loko hiya hi guga, hi sungula kupimisa swaku leswi himu yendlelaka swona Yehovha ahi swa lisima. Swingaha yendleka Hosi Davhida na yena a sungule kutitwisa xileswi loko aya a guga. (Pis. 71:9) Yehovha angahi pfunisa kuyini?

17. Hi djondza yini ka xikombiso xa makwerhu Jheri?

¹⁷ Ahi voneni xikombiso xa makwerhu mun’wana waxisati lweyi a vitaniwaka Jheri. A arhambiwile kuya ka ntlhanganu lowu awu tava kona ka Yindlo ya Mfumu ya Wugandzeli leswaku aya djondzisiwa kulunghisa tiyindlo leti tirhisiwaka kugandzela Yehovha kambe yena aangaswi lavi kuya. A te: “Se ni gugile, ni mufelakazi naswona ani tivi nchumu lexi ningaxi  yendlaka akuva ni pfunisa ka ntirho wa kulunghisa tiyindlo ta Mfumu ta Wugandzeli. Ani pfuni nchumu.” Hi wusiku lolelo a byele Yehovha leswi a atitwisa xiswona hi xikhongelo. Loko mundzuku ka kona a fikile laha ntlhanganu awuta yendleliwa kona, a hlamale ngopfu loko a vona swaku a alaveka hikakunene. Loko ntlhanganu wu li karhi wu famba, muvulavuli mun’wana a kombise swaku i swa lisima hintamu kuva hi pfumela kudjondzisiwa hi Yehovha. Jheri a tlhela a ku: “Ni game ni pimisa leswi, ‘Na mina ningaswi kota!’ Ni sungule kurila hikusa aniswi vona swaku Yehovha a hlamule xikhongelo xa mina. Ani tiyisekisa swaku ni ni nchumu xa lisima lexi ningamu nyikaka xona naswona yena a atiyimisele kuni djondzisa!” Loko Jheri a khumbuka a li: “Ni nghene ka ntlhanganu lowo na ni chava, na ni hele ntamu ni tlhela ni titwa na ningali wa nchumu. Kambe ni hume na ningaha chavi, ni tiyisiwile ni tlhela ni titwa na ni li wa lisima.”

18. Bibele liswi kombisa kuyini swaku Yehovha a tama awu nyika lisima ntirho lowu himu yendlelaka wona hambi loko hiya hi guga?

¹⁸ Hambiloko hiya hi guga, hinga tiyiseka swaku swi kona leswi hingaswi yendlelaka Yehovha. (Pis. 92:12-15) Yesu a djondzise swaku leswi hiswi kotaka kuswi yendla kambe hiswi tekaka swinga li swa nchumu ka hina, Yehovha aswi teka swi li swa lisima. (Luk. 21:2-4) Xa lisima i kuyendla leswi hiswi kotaka. Hi xikombiso, unga chumayela, u khongelela vamakwerhu ni kutiyisa van’wana swaku va tshama va tshembekile. Yehovha aku nyika lisima, kunga li hileswi uswi kotaka kumu yendlela swona kambe hileswi umu yingisaka hi mbilu hinkwayu. — 1 Kor. 3:5-9.

19. I yini leswi Varhoma 8:38, 39 yihi tiyisekisa swona?

¹⁹ Swahi tsakisa kutirhela Yehovha, Xikwembu lexima nyikaka lisima malandza ya xona! Ahi vumbele kuyendla kurhandza ka yena naswona loko hi yendla leswo hita tsaka. (Nhla. 4:11) Misava yingahi vona na hinga li va nchumu kambe Yehovha angahi vonisi xileswo. (Hev. 11:16, 38) Loko hi hela ntamu hi mhaka ya mavabyi, kupfumala male kumbe kuguga, hi fanele hi khumbuka swaku axi kona lexingahi hambanisaka ni lirhandzu leli B’ava wa hina wa le matilweni anga na lona hi hina. — Lerha Varhoma 8:38, 39.