1. Yehovha a fanisa kuyini ni manana lweyi a wundlaka n’wana?

“A WANSATI angamu khohlwa n’wana wa yena lweyi aha nyan’waka?” A xivutiso lexi xi yendliwe hi Yehovha a minkameni ya muprofeta Esaya. Yehovha a byele vanhu va yena a ku: “Hambiloko vavasati lava va khohlwa vana va vona kambe mina aninge tshuki niku khohlwa.” (Esa. 49:15) Yehovha anga talisi kutifanisa ni vamanana kambe ka ndzimana leyi a tifanisa na vona. Leswaku Yehovha a yendla vanhu va yena va twisisa leswi ava rhandzisaka xiswona, a fanise lirhandzu la yena ni leswi manana amu rhandzisaka xiswona n’wana wa yena. Va mamana vanyingi va titwa kufana ni makwerhu lweyi a vitaniwa ka Jasmin lweyi anga te: “Loko u wundla n’wana kusukela awu tsongwanini swiku yendla umu rhandza hintamu.”

2. Yehovha a titwisa kuyini loko makwerhu a hola?

² Yehovha waswi vona loko munhu lweyi aamu tirhela a tshika kuya mintlhanganwini ni kuchumayela. Hi mhaka leyo lembe ni lembe wa vaviseka loko a vona vanhu ya yena va hola. *

3. I mpsini leswi Yehovha aswi lavaka?

³ Kutala ka vamakwerhu langa hola va ta mintlhanganwini naswona ha tsaka loko hi va vona. Yehovha a lava swaku va tlhelela ka yena hambi hi hina, hi lava swoleswo. (1 Pet. 2:25) Hingava pfunisa kuyini? Leswaku hi hlamula xivutiso lexi hi fanele hi tiva swaku hi mhaka muni va tshike kuta mintlhanganwini ni kuchumayela.

4. I mpsini leswi van’wana vaswi yendlaka hi mhaka ntirho?

⁴ Van’wana va kamiwa hi ntirho. Makwerhu mun’wana wa le Aziya lweyi a vitaniwaka Hugu * a te: “Ani heta nkama wa wunyingi na ni li ntirhweni, ani pimisa swaku loko ni ni male ya yinyingi anitamu tirhela kahle Yehovha. Hi mhaka leyo ni sungule kutirha hintamu. Ni sungule kulovha amintlhanganwini hi kutsongo kutsongo, se hi wugamu ni tshika kuya. Sathana a tirhisa misava leyi kuva a hambanisa vanhu ni Xikwembu hi kutsongo kutsongo.”

5. Kuhumelele yini hi makwerhu mun’wana loko a kumana ni swikarhatu?

⁵ Vamakwerhu van’wana va taleliwe hi swikarhatu leswiva hetaka ntamu. Ana wa Inglatera lweyi anga ni 5 wa vana a li: “Mun’we wa vana va mina a psaliwe na a limalile hi kufamba ka nkama n’wana wa mina wa nhwanyana a susiwe bandleni kasi lweyi wa jaha a sungule kuhlanya. Ni karhatekile la kakuva ningaha yi mintlhanganwini ni kuchumayeleni, hi mhaka leyo ni sungule kuhola.” Leswinga humelela Ana ni ndjangu wa yena swi telisa wusiwana naswona hava tsetsa lava kumanaka ni swikarhatu swa kufana ni leswi.

6. Hi mhaka muni van’wana va nyima kuya mintlhanganwini loko vanga tirhisi leswinga ka Vakolosa 3:13?

⁶ Lerha Vakolosa 3:13. Van’wana lava tirhelaka Yehovha va tshama va kwatisiwa hi makwerhu abandleni. Mupostolo Pawulo a vule leswaku minkama yin’wana hingaha va ni xivangelo xa kuvilelisiwa hi makwerhu bandleni. Swingaha yendleka kuli ni makwerhu lweyi a kalaka angahi khomanga kahle. Loko hinga tivoneli hingaha sungula kumu vekela xiviti. Phela kukwata swingaha yendla munhu a tshika kutirhela Yehovha. Ahi voneni xikombiso xa makwerhu Paulo wa Amerika. Atshama a lumbetiwa swaku a yendle minchumu ya kubiha, ma gama madoda mamu tshikisa kuyendla mintirho abandleni. A yendle yini? A li: “Ni kwatile hintamu, se hi kutsongo kutsongo ni nyime kuya amintlhanganwini.”

7. Kungaha humelela yini hi munhu lweyi a biwaka hi lipfalo?

⁷ Loko munhu a tshame a yendla xidjoho xaxikulu swinga yendleka ni swoswi waha biwa hi lipfalu. Angaha pimisa swaku Xikwembu aximu rhandzi hambiloko a tisolile a tlhela a rivaleliwa. Angaha pimisa swaku angaha faneliki kutlhela ava mun’we wa Timboni ta Yehovha. Makwerhu mun’wana lweyi a vitaniwaka Francisco a titwisa xileswo. A li: “Ni soliwile hileswi ninga famba masangu na swingali nawini, hambi leswi a naha ya mintlhanganwini ni sungule kukarhateka ni tlhela ni titwa ninga faneleki kuva mun’we wa Timboni ta Yehovha. Ani biwa hi lipfalo funtshi ani tibyela swaku Yehovha anga ni rivalelanga. Hi kufamba ka nkama ni tshike kuya mintlhanganwini.” U titwisa kuyini hi vamakwerhu lava kumanaka ni swikarhatu swa kufana ni leswi? Wava twela wusiwana? Xa lisima hintamu Yehovha a titwisa kuyini hi vona?

8. Tlhamusela swaku hi mhaka muni Yehovha angava khohlwi lava vanga tshama vamu tirhela.

⁸ Yehovha angava khohlwanga lavanga tshama vamu tirhela kambe swoswi vanga tshika kuya mintlhanganwini. Naswona angayi khohlwanga mintirho ya vona. (Hev. 6:10) Muprofeta Esaya a tsale xikombiso xa kusaseka lexi kombisaka swaku Yehovha wava rhandza vanhu va yena. A te: “Kufana ni murisi ata hlayisa tinyempfu ta yena hi voko la  yena ata hlengeleta swinyempfana aswi veka xifuveni.” (Esa. 40:11) Leswi Yehovha anga Murisi Lwenkulu a titwisa kuyini loko yin’wana ya tinyempfu ta yena yi lahleka? Yesu a hlamule xivutiso lexo loko byela vadjondzisiwa va yena a ku: ‘Xana miyanakanya yini hi mhaka leyi ke: Loko munhu ali ni 100 wa tinyempfu, kutani yin’we ya tona yilahleka, xana angakala angasiyi leti ta 99 nhoveni, ayalava leyilahlekeke ke? Nitiyisile nili ka n’wina: Loko atshuka ayikumile, atayitsakela ngopfu kutlula leti ta 99 leti atingalahlekanga.’ — Mat. 18:12, 13.

9. Varisi va nkameni wa Bibele avati hlayisisa kuyini tinyempfu ta vona? (Vona xifaniso xa pajina la kusungula.)

⁹ Hi mhaka muni swi faneleka kufananisa Yehovha ni murisi? Hi mhaka ankameni wa Bibele murisi wa munene a atihlayisa kahle tinyempfu ta yena. Hi xikombiso Davhida a lwe ni ngonyama ni wursu kuva a vhikekela ntlhambi wa yena. (1 Sam. 17:34, 35) Phela murisi wa munene waswi vona hambi kukiyela nyempfu ka ntlhambi wa yena. (Yoh. 10:3, 14) Anga siya 99 wa tinyempfu axib’ aleni kumbe ni murisi mun’wanyana akuva famba a lavetela leyinga lahleka. Yesu a tirhise xifaniso kuva ahi djondzisa mhaka ya lisima a te: ‘Ahikurhandza ka Tatana wa n’wina lweyi anga matilweni leswaku kulahleka ni mun’we wa lavatsongo’. — Mat. 18:14.

10. Hikuya hi Ezekiyele 34:11-16, i mpsini leswi Yehovha angaswi tshembisa lavanga tshika kumu tirhela?

¹⁰ Yehovha wahi rhandza hinkwerhu kupatsa ni “lava tsongo” lava kalaka vangaha yi mintlhanganwini. Hi kutirhisa muprofata Ezekiyele Yehovha a tshembise leswaku ata lavetela tinyempfu ta yena letinga lahleka a tlhela ati pfuna kuva ti tlhelela ka yena. Leswi Yehovha aswi yendlaka swaku a pfuna tinyempfu ti tlhelela ka yena, swa fana ni leswi aswi yendliwa hi varisi a nkameni wa Bibele loko va lavetela tinyempfu letinga lahleka. (Lerha Ezekiyele 34:11-16.) Kusungula ava lavetela nyempfu vaza vayi kuma. Leswo aswi lava ntamu ni nkama. Loko se vayi kumile avayi tlhelisela ka ntlhambi. Loko nyempfu yi vavisiwile kumbe yi twa ndlala murisi a afanele ayi  pfuna hi kuyi bandicha swilondza, ayi tlakula a tlhela ayi nyika swakudla. Leswi madoda manga varisi va “ntlhambi wa Xikwembu” ma fanele ma yendla leswi fanaka loko ma pfuna munhu lweyi anga tshika kuya mintlhanganwini kumbe lweyi a kalaka angaha yi nsin’wini. (1 Pet. 5:2, 3) Madoda ma lavetela vanhu lavanga hola kuva vava pfuna swaku va tlhela va tirhela Yehovha. Vava pfuna hi lirhandzu swaku va tlhela va va vanghanu va Yehovha. *

11. I mpsini leswi murisi wa munene aaswi tiva?

¹¹ Murisi wa munene aaswi tiva swaku tinyempfu tingaha lahleka. Loko nyempfu yi lahleka kumbe yi tihambanisa ni ntlhambi a angayi khatisi. Ahi voneni leswi Yehovha angaswi yendla a nkama lowu anga pfuna vanhu lavanga tshika kumu tirhela a minkameni ya khale.

12. Yehovha amu pfunise kuyini Yonasi?

¹² Muprofeta Yonasi angamu yingisanga Yehovha a nkama lowu angamu rhuma kuya Ninivha kambe Yehovha angamu tsukulanga. Leswi Yehovha anga Murisi wa munene amu pfunile a tlhela amu nyika ntamu swaku a yendla leswi angamu rhuma swona. (Yon. 2:7; 3:1, 2) Hi famba ka nkama Yehovha a tirhise xinsinyana kuva a komba Yonasi swaku vanhu hi va lisima hintamu. (Yon. 4:10, 11) Hi djondza yini? Madoda ama fanelanga mava tsukula lavanga tshika kutirhela Yehovha. Kuhambana ni leswo ma fanele ma zama kutwisisa swaku hi mhaka muni munhu yelweyo angaha yi mintlhanganwini kumbe nsin’wini. Naswona loko vanhu volavo va tlhelela ka Yehovha, madoda ma fanele mava komba swaku mava rhandza naswona ma ni mhaka na vona.

13. Hi djondza yini ka leswi Yehovha angamu khomisa xiswona mutsali wa Tipisalema 73?

¹³ Mutsali wa Tipisalema 73 a agodolisiwa hi kuvona swaku lava ava yendla minchumu ya kubiha aswiva fambela kahle. A sungule kukanakana swaku kuyendla kurhandza ka Xikwembu swa pfuna kumbe aswi pfuni. (Pis. 73:12, 13, 16) Yehovha a titwise kuyini hi  leswo? Yehovha anga zanga amu sola mupisalema lweyi. Kuvula ntiyiso a yendle swaku marito ya yena ma tsaliwa aBibeleni. Hi kufamba ka nkama a game aswi vona swaku akuna nchumu xa kuyampsa kutlula kuva munghanu wa Yehovha. (Pis. 73:23, 24, 26, 28) Hi djondza yini? Madoda ama fanelenga ma hantlisela kusola lava va kanakanaka swaku kutirhela Yehovha swa pfuna kumbe aswi pfuni. Kuhambana ni leswo ma fanele ma zama kutwisisa swaku hi mhaka muni va titwisa xileswo, hi kona manga tirhisaka Bibele leswaku mava tiyisa.

14. Hi mhaka muni Eliya a alava kupfuniwa naswona Yehovha amu pfunise kuyini?

¹⁴ Muprofeta Eliya a balekile hi kuchava Hosi ya xisati Yezabele. (1 Tiho. 19:1-3) A apimisa swaku a kaha na muprofeta lweyi a atirhela Yehovha naswona a vona ingaku ntirho lowu aawu yendlela Yehovha awunga pfuni nchumu. A akarhatekile hintamu lani kaku aza a lava ni kufa. (1 Tiho. 19:4, 10) Yehovha angamu solanga Eliya kambe amu tiyisekisile swaku aanga li yexe naswona aatamu nyika ntamu swaku a hetisisa ntirho wa wunyingi lowu a afanele awu yendla. Yehovha amu yingisele kahle Eliya, a twa swikarhatu swa yena a tlhela amu nyika mintirho ya nyiwani. (1 Tiho. 19:11-16, 18) Hi djondza yini? Hinkwerhu, ngopfungopfu madoda ma fanele mava khoma kahle vanhu va Yehovha. Hambi loko munhu a kwatile naswona a vona ingaku Yehovha angatamu rivalela swidjoho swa yena, madoda ma fanele mamu yigisela loko a tiphofula ma tlhela mamu tiyisekisa swaku Yehovha wamu rhandza.

15. Hikuya hi Yohane 6:39 Yesu a titwisa kuyini hi tinyempfu ta Papayi wa yena?

¹⁵ Yehovha a lava hi titwisa kuyini hi lavanga tshika kumu tirhela? Yesu ahi vekele xikombiso. Aaswi tiva swaku vanhu hinkwavu i va lisima ka Yehovha. Hi mhaka leyo a yendle hinkwaswu kuva a pfuna “Vaisrayele, lavalahlekeke kufana ni tinyempfu” swaku va tlhelela ka Yehovha. (Mat. 15:24; Luk. 19:9, 10) Leswi Yesu anga murisi wa munene a yendle hinkwaswu leswi angaswi kota kuva kunga lahleki ni yin’we ka tinyempfu ta Yehovha. — Lerha Yohane 6:39.

16-17. Madoda ma fanele ma titwisa kuyini hi kupfuna lavanga tshika kutirhela Yehovha? (Vona kwadru lelinge: “ Lavanga Tshika Kutirhela Yehovha va Titwisa Kuyini?”)

¹⁶ Mupostolo Pawulo a kombele madoda ya bandla la Efesa swaku ma tekelela xikombiso xa Yesu. A te: ‘Hifanele kupfuna lava tsaneke, naswona hi tsundzuka marito ya Hosi Yesu, lawa angamahlaya hi xiviri xa yena loko aku: “Kunyika i nkateko lowutlulaka kunyikiwa.”’ (Mint. 20:17, 35) Ndzimana leyi yi kombisa swaku madoda ma ni ntirho wa lisima wa kuhlayisa vanhu va Xikwembu. Doda lin’wana la Espanha leli vitaniwaka Salvador li te: “Loko ni pimisa hi leswi Yehovha ava rhandzisaka xiswona vanhu va yena lavanga tshika kumu tirhela, ni navela kuyendla hinkwaswu leswi niswi kotaka kuva niva pfuna. Na tiyiseka swaku Yehovha a lava niva pfuna.”

¹⁷ Hinkwavu lava hinga vulavula hi vona ka djondzo leyi, lava ava tshike kutirhela Yehovha va game va tlhelela ka yena. Ni swoswi van’wana lavanga tshika kumu tirhela vaswi navela kutlhelela ka Yehovha. Ka djondzo leyi landzelaka hita vona swaku hinga yendla yini swaku hiva pfuna kutlhelela ka Yehovha.