1. Swi vula yini kuchava Xikwembu, naswona hi mhaka muni lavaxi rhandzaka va fanele vaxi chava?

VAKRESTE va rhandza Xikwembu va tlhela vaxi chava. Van’wana va pimisa swaku kurhandza munhu ni kumu chava aswi fambisani. Kambe kuchava loku kuvulavuliwaka hi kona lani ahi kona lakakuza u rhurhumela. Kuvulavuliwa hi kuhlonipha Xikwembu ni vito la xona. Vanhu lava chavaka Yehovha ava lavi kumu kwatisa naswona ava lavi kulahlekeliwa hi wunghanu leli vanga na lona na yena. — Pis. 111:10; Swi. 8:13.

2. Hi swihi swilo swimbirhi hingata bula hi swona swinga ka Tipisalema 86:11?

² Lerha Tipisalema 86:11. Marito ya Davhida lamanga ka ndzimana leyi, ma kombisa swaku aaswi tiva swaku kuhlonipha Yehovha i swa lisima. Ahi voneni swaku hingaswi tirhisisa kuyini leswi Davhida angaswi hlaya ka xikhongelo. Xa kusungula, hita vona swaku i mhaka muni hi fanele hi hlonipha vito la Xikwembu. Xa wumbirhi, hita vona swaku hingaswi kombisa kuyini swaku hali hlonipha vito la Xikwembu ka wutomi la hina.

3. I mpsini leswinga humelela Moxe swingamu pfuna kuhlonipha vito la Xikwembu?

³ Pimisa hi leswi Moxe anga titwisa xiswona nkama anga vona kuphatima ka Yehovha na a li ka nhava. Loko li tlhamusela mhaka leyi, buku la Estudo Perspicaz li li: “Swinga yendleka lexi kuli xivono xa kuhlamalisa kutlula hinkwaswu leswinga  tshama swiva kona na Yesu angase ta la misaveni.” Swinga yendleka kuli ntsumi yinga vulavula na Moxe a nkama anga twa rito li ku: “Yehovha, Yehovha, Xikwembu xa timpsalu ni ntwelawusiwana, lexi hlwelaka kukwata, ni lexinga ni lirhandzu ni ntiyiso, lexi kombisaka lirhandzu ka ma milhões ya vanhu, lexi rivalelaka swihoxo ni swidjoho, kambe lexi kalaka xinga tshiki kukhatisa lweyi anga ni nandzu.” (Ekso. 33:17-23; 34:5-7) Loko Moxe a tirhisa vito la Yehovha, swinga yendleka a akukhumbuka leswi Yehovha anga tshama amu komba. Hi mhaka leyo a basopise Vayisrayele a ku va fanele va “hlonipha vito leli hloniphekaka ngopfu”. — Det. 28:58.

4. I mpsini swingahi pfunaka kuva himu hlonipha hintamu Yehovha?

⁴ Loko hi vulavula hi vito la Yehovha, hi fanele hi yanakanyisisa hi wumunhu la yena, hi fanele hi pimisa hi matimba, wutlhari, kululama ni lirhandzu la yena. Loko hi pimisa hi swilo leswi hitaya himu hlonipha hintamu Yehovha. — Pis. 77:11-15.

5-6. a) Li tlhamusela yini vito la Xikwembu? b) Hikuya hi Eksoda 3:13, 14 na Esaya 64:8, Yehovha aswi yendlisa kuyini leswi aswi lavaka?

⁵ I mpsini hiswi tivaka hi ntlhamuselo wa vito la Xikwembu? Tintivi tatinyingi ta pfumela swaku ntlhamuselo wa vito la Yehovha hi lowunge “A Yendla Leswaku Swiva Kona.” Leswo swihi yendla swaku hi khumbuka swaku axi kona lexinga sivelaka Yehovha kuyendla leswi aswi lavaka. Swi kotekisa kuyini swoleswo?

⁶ Yehovha anga tiyendla leswi aswi lavaka kuva a yendla leswi aswi lavaka. (Lerha Eksoda 3:13, 14.) Mabuku ya hina mahi pfuna kuyanakanyisisa hi wumunhu la Yehovha la kuhlamalisa. Naswona Yehovha angaha tirhisa vanhu va kukala vanga hetisisekanga kuva a yendla leswi aswi lavaka. (Lerha Esaya 64:8.) Axi kona lexinga yendlaka Yehovha a tsandzeka kuyendla leswi aswi lavaka. — Esa. 46:10, 11.

7. I mpsini leswingatahi pfuna kuhlonipha vito la Yehovha?

⁷ Hi fanele hi yanakanyisisa hi leswi  Yehovha angaswi yendla ni leswi ahi pfunaka kuva hiswi yendla. Hikusa loko hi yendla leswi hitaya himu khensa. Hi xikombiso, ha hlamala loko hi pimisa hi leswi angaswi yendla. (Pis. 8:3, 4) Kuyanakanyisisa hi leswi Yehovha angahi pfunisa xiswona akuva hi yendla kurhandza ka yena switahi yendla himu hlonipha hintamu. Vito la Yehovha la hlamalisa! Li tlhamusela leswi Yehovha anga swona, leswi angaswi yendla ni leswi angataswi yendla. — Pis. 89:7, 8.

8. Hikuya hi Deteronoma 32: 2, 3 Yehovha a lava swaku hi yendla yini hi vito la yena?

⁸ Nkama Vayisrayele a va li kusuhi ni ku nghena ka tiko la xitshembiso kuni lisimu leli Yehovha anga djondzisa Moxe. (Det. 31:19) Moxe a game a djondzisa vanhu van’wana kuyimbelela lisimu lolelo. (Lerha Deteronoma 32:2, 3.) Ka tindzimana leti, swa tikomba swaku Yehovha aanga lavi swaku vito la yena li fihliwa kumbe vanhu va chava kuli tirhisa. A alava swaku vito la yena li tiviwa hi vanhu hinkwavu. Phela Vayisrayele ava tsaka hintamu loko va twa Moxe ava djondzisa hi Yehovha ni vito la yena la kukwetsima. Leswi Moxe angava djondzisa swiva tiyisile swi tlhela swi tiyisa lipfumelo la vona. Aswi fana ni swimpfulana leswi naka amasin’wini. Hinga yendla yini swaku hi djondzisa vanhu kufana na Moxe?

9. Hinga yendla yini akuva hi pfunisa kubasiseni ka vito la Yehovha?

⁹ Loko hili ka ntirho wa kuchumayela, hinga tirhisa Bibele swaku hi komba vanhu vito la Xikwembu kunga Yehovha. Hingava nyika mabuku, hiva komba mavhidiyo ni swin’wana leswi kumekaka ka site la hina leswi dzunisaka Yehovha. Loko hi li ntirhweni, axikolweni kumbe loko hi yendza hi kumana ni vanhu lava hingava byelaka hi Yehovha ni leswi aswi rhandzaka. Hingava byela hi swilo swa kuhlamalisa leswi Yehovha angatahi yendlela swona lani misaveni. Loko hi yendla leswo vata sungula kuvona swaku Yehovha hikakunene wahi rhandza. A nkama hi byelaka vanhu ntiyiso hi Yehovha Papayi wa hina wa lirhandzu, hiva hi pfunisa kubasiseni ka vito la yena. Hi pfuna vanhu kutwisisa swaku leswi avaswi tiva hi Yehovha i mavunhwa. Loko hi djondzisa vanhu Bibele hiva na hiva djondzisa swilo swa kutsakisa kutlula hinkwaswu leswinga kona. — Esa. 65:13, 14.

10. Loko hi djondza ni vanhu Bibele hi mhaka muni swinga yenelanga kuva djondzisa minawu ya Xikwembu?

¹⁰ Loko hi djondzisa vanhu Bibele, hi fanele hiva pfuna kutiva vito la Yehovha ni kuli tirhisa; nakambe hi fanele hiva pfuna kuva vamu tiva kahle Yehovha. Indje swinga koteka leswo hi kuva hiva djondzisa minawu ya Yehovha ntsena? Munhu angaha djondza minawu ya Yehovha a gama ayi rhandza kambe leswo swi vula swaku wamu rhandza Yehovha naswona atamu yingisa? Kambe khumbuka swaku Adamu na Evha avawu tiva nawu wa Yehovha kambe avangamu rhandzi. (Gen. 3:1-6) Hi mhaka leyo, aswi yenelanga kudjondzisa vanhu minawu ya kululama ya Xikwembu.

11. Loko hi djondzisa vanhu minawu ya Xikwembu hingava pfunisa kuyini kuva vaxi rhandza?

¹¹ Minawu ya Yehovha i yinene funtshi yahi pfuna minkama hinkwayu. (Pis. 119:97, 111, 112) Kambe swinga yendleka lava hi djondzaka na vona Bibele vangaswi vonisi xileswo, loko vangaswi twisisi swaku Yehovha a veke minawu leyo hileswi ahi rhandzaka. Hi mhaka leyo hi fanele hiva vutisa leswi: “U vona swaku hi mhaka muni Yehovha a vula swaku malandza ya yena ma fanele ma yendla leswi kumbe manga yendli leswiya? Leswi swiku djondzisa yini hi Yehovha? Loko  hi pfuna lava hi djondzaka na vona Bibele kupimisa hi Yehovha ni kurhandza vito la yena la kuvangama hita khumba timbilu ta vona. Nakambe vata rhandza Yehovha va tlhela va rhandza minawu ya yena. (Pis. 119:68) Leswi switava pfuna kutiyisa lipfumelo la vona ni kutiyisela swikarhato ka nkama lowu taka. — 1 Kor. 3:12-15.

12. I mpsini swinga yendla mbilu ya Davhida yi yavana naswona kuhumelele yini?

¹² Ka Tipisalema 86:11 kuni marito ya lisima lamange: “Yendla mbilu ya mina yiva ni wun’we.” Marito lawa ma tsaliwe hi Hosi Davhida. Yena aswi vonile swaku mbilu yinga navela kuyendla swilo swa kubiha hambiloko umu rhandza Yehovha. Siku lin’wana na a li kaya ka yena a vone nsati wa vanhu na a hlamba. I mpsini leswinga yendleka hi mbilu ya Davhida hi nkama lowo? Phela Davhida aawu tiva nawu wa Yehovha lowunge: “Unga naveli nsati wa munhu mun’wani”. (Ekso. 20:17) Kambe a tame amu cuvukisa. Hi nkama wolowo mbilu ya yena yi yavanile hikusa a anavela wansati lweyi vange i Batixeba a tlhela a navela kutsakisa Yehovha. Hambileswi Davhida aamu rhandza Yehovha a tlhela amu hlonipha, angaswi kotanga kutikhoma. Hi mhaka leyo a yendle swilo swa kubiha, a nchimise vito la Yehovha a tlhela a twisa kuvava vanhu lava kalaka vangali na nandzu kupatsa ni ndjangu wa yena. — 2 Sam. 11:1-5, 14-17; 12:7-12.

13. Hiswi tivisa kuyini swaku mbilu ya Davhida yi tlhele yiva ni wun’we?

¹³ Yehovha a laye Davhida naswona va tlhele va va vanghanu. (2 Sam. 12:13; Pis. 51:2-4, 17) Davhida angaswi rivalanga leswinga humelela hi mhaka leswi anga tshika mbilu ya yena yi yavana. Marito ya yena lawa manga ka Tipisalema 86:11 mangaha vulisiwa xileswi: “Yendla mbilu ya mina yinga yavani.” Kungava leswaku Yehovha amu pfunile Davhida kuva ni mbilu ya kukala yinga yavani? Ina amu pfunile. Loko a vulavula hi Davhida Yehovha a te: ‘Mbilu ya yena . . . ayi helelile ka Yehovha Xikwembu xa yena.’ — 1 Tiho. 11:4; 15:3.

14. Hi fanele hi tivutisa yini naswona hi mhaka muni?

¹⁴ Xikombiso xa Davhida xahi tiyisa xi tlhela xihi basopisa. Malandza ya Yehovha ma fanele ma tivonela kuva manga weli ka xidjoho kufana na Davhida. Hinkwerhu hinga ka nhlengeletanu ya Yehovha hambi hi li va khale kumbe va swoswi hi fanele hi tivutisa leswi: ‘Naswi kota kutshama ni tiyile loko Sathana a zama kuyendla swaku mbilu ya mina yi yavana?’

15. Kuhlonipha Yehovha swingahi vhikelisa kuyini loko hi tshuka hi tlhangana ni swilo leswihi yendlaka hi pimisa hi swa masangu?

 ¹⁵ Hi xikombiso u yendla yini loko ka televhizawu kumbe ka interneti u tshuka u tlhangana ni swilo leswiku yendlaka u pimisa hi swa masangu? Ungaha zama kutinyimelela u ku leswi ahi pornografiya. Kambe Sathana angaha zama kutirhisa swilo leswo kuva mbilu ya wena yi yavana. (2 Kor. 2:11) Sathana angaha tirhisa swilo swoleswo kufana ni bewula leli tirhiseliwaka kupandzela swigodo. Loko waha sungula, xigodo xi pandzekanyana kakutsongo, kambe loko uya u pandzela xigodo hinkwaxu xa pandzeka xiza xi yavana. Swilo leswi yendlaka munhu a pimisa hi swa masangu swa fana ni bewula. Loko hi sixtira swilo swoleswo swi tikombaka swinga bihanga, hi kufamba ka nkama hinga djohela Yehovha. Hi mhaka leyo, unga pfumeleli nchumu xa kukala xingali xinene xi nghena ka mbilu ya wena. Lwela swaku mbilu ya wena yi rhandza Yehova ntsena u tlhela u hlonipha vito la yena.

16. I mpsini leswihi faneleke hi tivutisa swona loko hi ringiwa kuyendla minchumu ya kubiha?

¹⁶ Sathana angaha tirhisa swilo leswihi yendlaka hi pimisa hi swa masangu ni swilo swin’wana leswaku ahi ringa. Hi yendla yini ka swiyimo swoleswo? Van’wana va zama kutiyimelela. Hi xikombiso, vangahaku: ‘Aningata susiwa bandleni hi mhaka leswo hikusa aswi bihanga hintamu.’ Mapimiselo lawo ma bihile. Hi fanele hi tivutisa leswi: ‘Injhe Sathana ango zama kuyendla mbilu ya mina yi yavana hi kutirhisa ndzingo lowu? Loko no wela ka ndzingo lowu, aningata nchimisa vito la Yehovha? Leswi switani yendla ni va munghanu wa Yehovha kumbe switani hambanisa na yena?’ Yanakanyisisa hi swivutiso swa kufana ni leswi. Khongela u kombela Yehovha aku pfuna kukambela tinhlamulo ta swona. (Yak.  1:5) Kuyendla leswi switaku vhikela. Switaku pfuna kukala unga weli ka ndzingo kufana na Yesu lweyi anga te: “Suka Sathana!” — Mat. 4:10.

17. Kombisa swaku hi mhaka muni mbilu leyinga yavana yinga pfuni nchumu?

¹⁷ Mbilu leyinga yavana ayi pfuni nchumu. Pimisa hi ntlawa wa vabeli va bola va kalaka vanga twanani. Van’wana ka vona va rhandza kukhuzeliwa, van’wana avayi landzeli minawu leyinga bekiwa kasi kutala ka vona avamu hloniphi treyinadori. Phela swinga karhata kuva ntlawa wolowo wu ganya. Kuhambana ni leswo, ntlawa wutalisa kuganya loko vanhu va kona va twanana. Mbilu ya wena yingaha fana ni ntlawa lowu twananaka loko mimpimiso ya wena, kunavela ka wena ni leswi uti twisaka xiswona swi fambisana ni kutirhela Yehovha. Khumbuka swaku Sathana a lava kuyendla mbilu ya wena yi yavana. A lava leswaku mimpimiso ya wena, kunavela ka wena ni leswi u titwisaka xiswona swi lwisana ni leswi Yehovha aswi lavaka. Kambe leswaku u tirhela Yehovha, kulaveka leswaku mbilu ya wena hinkwayu yiva ka yena. (Mat. 22:36-38) Unga tshuki u tshika Sathana a yendla leswaku mbilu ya wena yi yavana!

18. Hikuya hi Mikiya 4:5 u tiyimisele kuyendla yini?

¹⁸ Khongela ka Yehovha kufana na Davhida u ku: “Yendla mbilu ya mina yiva ni wun’we leswaku yi chava vito la wena.” Yendla hinkwaswu leswi ungaswi kotaka akuva u tirhisa marito ya xikhongelo lexi ka wutomi la wena. Ka swiboho leswi uswi yendlaka siku ni siku hambi swova swikulu kumbe swi li switsongo, kombisa swaku wali hlonipha vito la Yehovha la kukwetsima. Loko u yendla leswo switaku fanela kuvitaniwa Mboni ya Yehovha. (Swiv. 27:11) Loko hi yendla leswo hita fana na muprofeta Mikiya lweyi anga te: “Hina hita famba hi vito la Yehovha Xikwembu xa hina, hi masiku ni masiku.” — Miki. 4:5.